مشينا ليها غرفتها كلمناها و فرحت شديد و زغرتت كلم اخواتو و اخوانو و حصل موضوع في البيت،،كلمت خالتو عواطف اني ح امشي بيت اهلي عشان عزيز مسافر استغربت و قالت لي مسافر وين؟قلت ليها بورتسودان قالت لي كان تقعدي معانا هنا ح اشيلك فوق راسي والله اصلاً معتبراك بتي قلت ليها والله بعرف ي خالتو لكن اشتقت لي اهلي عايزه اقعد معاهم لحد يجو قالت لي سمح ي بتي ودعتهم من بي الليل و عزيز برضو ودعهم عشان ح يطلع الساعه ٣ صباحاً و انا ح امشي معاهو عشان يوصلني لي اهلي،،قعدنا كلنا بنتونس لحد الساعه ١١ بعدها قلت انا نعسانه و مشيت الغرفه لكن عزيز كان قاعد معاهم لسه،،حسيت بيهو لما دخل الغرفه رفعت راسي و قلت ليهو جهزت شنطتك و كويت الملابس العايزه مكوه و رجعت نمت،،صحينا الساعه ٣ و تلفونو اتصل قال تمام ح نطلع هسي طلعنا و احنا و ماشين على بيتنا سمعتو كان بيتكلم في التلفون بيقول عمر احنا عندنا مشوار و نجي عليك خليك جاهز اي هسي ح اتصل لي محمود خلاص تمام،،قلت ليهو ح تسافرو بي العربيه دي؟ قال لي اي،،بعد وصلنا نزل معاي و كان منتظر لحد يفتحو لي الباب،،احنا و منتظرين يفتحو الباب قال لي م ح تشتاقي لي؟قلت ليهو لا حضني و قال لي عارفك كذابه،خلي بالك من نفسك طيب؟انتِ حامل حامل ي خنساء م تهملي اكلك قلت ليهو طيب بعدها الباب فتح فكيتو سريع سريع ضحك و كانت امي الفتحت لينا الباب ماسك يدي م عايز يفكني قلت ليهو ي زول فكني الوقت اتاخر ضحك و قال لي اي لقيتي اهلك خلاص مستغنيه عني قلت ليهو لو عايز طوالي نرجع بيتنا قال لي والله مستهبله كيف و قال"يلا في امان الله و حفظه"قلت ليهو الله يحفظك ان شاء الله و قال لي امي م اوصيك ليها ي خالتو و ودعها و مشا،،م كان هين علي فراقو لكن قلت م مشكله قال م ح يتاخر دخلت صليت الصبح و نمت،،لما صحيت الصباح اتصلت ليهو اطمنت عليهو و قفلت منو،،كنت سرحانه بفكر ح تكون بت ؟ولا ولد؟ح اقدر لي المسؤليه دي؟لما يبقا عندنا فرد تالت ح اكون مجبوره نرحل في شقتنا كنت شايله هم امي جات قعدت معاي قالت لي سرحانه مالك؟قلت ليها يما دي مسؤليه ياخ قالت لي ي بت لازم تبقي ام لو طال الزمن ولا ان قصر بعد اول ولاده الوضع ح يبقا ليك عادي كلنا كنا زيك شايلين هم اصلا في اول ولاده كل الحريم بيشيلو هم قعدنا نتونس و بعدها طلعت،،اتصل لي عزيز رديت و احنا و نتونس اتزكرت اني كنت عايزه اسالو من حاجات كتيره في خصوص انو بيعرفني من قبل سالتو قال لي والله هسي ح نتحرك ي خنساء بس وقفنا نفطر قلت ليهو انت ليه بتتهرب كده قال لي انتِ بتسالي في وقت غريب قفلت الخط تاني م اتصل لي الا الساعه ١٠ بي الليل قلت ليهو بدري والله قال لي والله وبعد وصلت طوالي نمت،كيفك انتِ؟قلت ليهو تمام،،اها مرجع لي موضوعنا؟قال لي اها قلت ليهو طيب اذا اصحابك عارفين انك كنت عايزني ليه استغربو كده؟قال لي صحبي ال كان بيقرا معاكم قبل انتِ و صحبك ولا هو حبيبك الكان بيقرا معاكم تخلو بعض اجز يعني كان في اجازه و م عارف انكم خليتو بعض قلت ليهو طيب انت عرفت كيف اننا خلينا بعض قال لي لما كنت بجي بنتظر عشان اشوفك شفتو طالع مع بت سكتت مسافه قال لي خلينا من المواضيع دي قلتي لي انتِ حامل و ضحك،،ضحكت و قلت ليهو خلي بالك الاسم علي انا قالت لي كدي قولي اقتراحات الاسامي قلت ليهو لو ولد ح اسميهو هزاع و لو بت هيبان قال لي طيب لو بتين؟قلت ليهو تف من خشمك ان شاء الله م يكونو تؤام قال لي نفترض و بعدين ليه م يكونو تؤام والله متمني يكونو تؤام قلت ليهو لو اتنين بنات هيبه و هيبان و لو ولدين هزاع و هزار قال لي طيب ي بطه قلت ليهو انت عارف شكلو ده اول الحمل يدوب قال لي بعد ارجع نمشي المستشفى و نشوف،،صح انتِ كيف عرفتي؟قلت ليهو اصلا تتزكر لما مشيت عند اهلي كنت عيانه قال لي اي كان ظاهر عليك قلت ليهو بس امي قالت لي انت حامل و مشينا الصيدليه جبنا كاشف الحمل طلع فعلاً حمل ضحك و قال لي ح نمشي المستشفى نعمل الايكو مع بعض م تمشي براك انتظري لحد ارجع سامعه؟ضحكت و قلت ليهو حاضر قعدنا متونس بعدها قفلت منو و نمت عدت الايام و في يوم انا و امي كنت طالعين لي مرة جيرانا كنت واقفه جنب الباب منتظره امي تطلع معتز كان جايي بي شارعنا و كل م يقرب على بيتنا قلبي بيدق اكتر م اتوقعتو يقيف جنب بيتنا وقف و قال لي خنساء كيفك مد يدو ختيت يدي في صدري على اساس يفهم اني م بصافح نزل يدو و كان بيعاين لي جوه عيوني و قال بقيت غريب عنك لي الدرجه دي؟م رديت عليهو امي جات قال ليها خالتو كيفك؟قالت ليهو تمام ي ولدي انت كيفك قال ليها حمدلله صدقي قاعد؟قالت ليهو اي قاعد جوه نادتو من جوه و احنا اتحركنا و هو كان واقف جنب الباب،،ملامح وشو اتغيرت،بقا انسان ذابل شديد،،م نفس الانا كنت بعرفو،ي ربي انا السبب؟انا انانيه بفكر بس في مصلحتي لكن هو كمان م كان عايزني و بيكذب علي سمعت بعد سمعت الريكورد حتى لو كان في امل بسيط ح يكون ضاع،،ربنا يديهو بت حلال احسن مني حالياً حمدلله عندي احسن راجل و لو كان بيناتنا قسمه كنت ح اكون من نصيبو انا برضو عانيت و تعبت في الدنيا دي،،يدوب بديت ارتاح،،ده كان تفكيري بعد اتحركنا منو،،عدت الايام و تميت شهر و شويه مع امي و كل الوقت ده كانت بتديني نصابح و الحمل كان متعبني شديد بي الليل عبد العزيز كان اتصل لي و قبلها كان برضو اتصل لي م كنت برد
يتبع......
