كنت قاعده في الغرفه اخوي جا مد لي التلفون قال لي ده عبد العزيز رديت قلت نعم؟قال لي كيفك؟مالك م بتردي؟قلت ليهو م عايزه ارد م بيخصك قال لي مالك انتِ ي زوله قلت ليهو انت هناك مرتاح و قاعد م شاء الله و انا هنا بتعذب بي سبب الحمل كمان بتسالني مالك؟قال لي جايي قريب ي خنساء قلت ليهو م تجي اصلا م تجي و قفلت الخط بعد المكالمه دي م اتكلمت معاهو بعد يومين بالعصر كده الباب دق مشيت فتحتو كان عبد العزيز و خالتو عواطف،،م غير مقدمات حضني قدام خالتو عواطف و قال لي مشتاقين و خالتو بتضحك😂اتفكيت منو و قلت ليهم اتفضلو دخلو جوه و امي و خالتو عواطف اخدو الونسه على حسابهم و انا و عزيز جنب بعض بيتكلم معاي بي صوت واطي بيقول لي بقيتي حلوه ي زوله ابتسمت قال لي اشتقت لي شامتك دي قلت ليهو عبد العزيز بطل بكش كتير ضحك و قال لي قومي طيب اجهزي عشان ماشين البيت قلت ليهو وين ؟قال لي بيتنا يعني وين؟قلت ليهو انا م جاهزه ي عبد العزيز على الاقل كان تكلمني جايي متين كنت اقل شي ح ارسم و بعدين انت قبل كده قلت لي حبوبتك جات من البلد و قاعده عندكم والله لو شافتني بي الحاله دي ح تشتمني قال لي ياخ انتِ عاجباني كده مالك و مال حبوبتي قلت ليهو انت بتقول كده لكن وقت حبوبتك تزلني ح تكون وين؟ح تقول شنو؟اقل شي شوف شعري منكش كيف قال لي عادي هسي سرحيهو قلت ليهو عبد العزيز عايزه اكويهو قال لي ي زوله احنا من عرسنا الاهتمام ده م شفتو فيك هسي عشان حبوبتي جات عايزه تهتمي بي نفسك لي الدرجه دي؟حبوبتي راجلك ولا انا راجلك؟ضحكت و قلت ليهو م تضايق بعدين ده الحمل مضايقني والله اخلاقي صفر قال لي م ليهو علاقه من عرسنا بعد تلاته يوم بترتبي شعرك و هسي الله اعلم قبل كم يوم ترتبتي شعرك ضحكت بي صوت عالي و قلت ليهو قبل اسبوع تقريباً ضربني في كتفي و قال لي مهمله انتِ قلت ليهو م مشكله حبيبي انت امشي الليله و بعد يومين ح اجيك نجفه لمن م ح تعرفني قال لي الاهتمام ده كلو لي حبوبه؟والله حبوبه دي تاني م ح اخليها تسافر البلد عشان تهتمي بي نفسك كده😂😂😂
فعلاً بعد يومين جا ساقني رجعت البيت و حبوبه م قصرت فيني بعد الاهتمام العملتو لي نفسي بقت تقول لي ي بتي الجنا ال في بطنك ده لو م لقا اكل ياكلو منك بياكل من جسمك و انتِ ضعيفه اكلي كويس عشان م تضعفي اكتر من انك صغيفه قلت ليها ي حبوبه والله والله كل م تشوفيني بتقلبي علي المواجع و بتزكريني اني ضعيفه قالت لي والله بنات البلد هناك بيبلعن حاجات تنفخهن لمن يقربن يتطرشقن و العجب الوش كان م كضبت والله زي البومه الجضوم ملانات و سمحات سماحه ضحكت و قلت ليها بيبلعو شنو؟قالت لي م خابراهم لكن بسالن ليك قبل كدي سمعت بت بتقول لي رفيقتا جيبي لي معاك من السوق حبوبتي اتخلعت و هي لما بتقول الكلام ده انا كنت بعاين لي عبد العزيز جا ماري بي جنبنا انسان عاتي شديد م شاء الله و طولو حلو و ملاحو بقت حلوه زياده و انا بقول ي ربي هو بقا حلو ولا عشان انا اشتقت ليهو😂،بعد مشا من جنبنا قلت ليها ليه؟قالت لي شنو ليه؟قلت ليها مش قلتي حبوبتي اتخلعت؟قالت لي ي بتي انتِ طيره ساي قومي قومي امشي قومي ضحكت و قلت ليها حبوبه قالت لي امشي سوي لي شاي ساده مشيت عملتو ليها و جيت قعدت معاها قالت لي انتِ م عندك شغله؟قاعده حارساني اليوم كلو ي بت راجلك بيكون منتظرك امشي ليهو ولا شوفي شغله غير تقعدي حارساني كده ضحكت و مشيت منها دخلت الغرفه عزيز كان قاعد قال لي تعالي مشيت قعدت مسك يدي و قال لي الرسم فيك حلو قلت ليهو بعرف فك لي شعري و قال مع انو شعرك حلو لكن انتِ مهمله قلت ليهو عطرك ده عفن عاين لي بي استغراب و قال شنو؟قمت منو و مشيت الحمام بعد طلعت لسه كان بيعاين لي بي استغراب قلت ليهو خير م تعاين لي كده عايزه اطلع قال لي تاني ماشه لي حبوبه صح تاني ماشه قلت ليهو احسن من اني اقعد معاك لانو عطرك مضايقني شديد قال لي طيب اقعدي ح اغير الملابس قلت ليهو خلاص ح امشي و اجي جا علي و قفل الباب قال لي م ح تطلعي قلت ليهو عطرك ده مضايقني زح من جنبي قال لي ده من قبل سنين م بعمل غير العطر ده جايه تقولي لي الليله عطرك عفن؟قلت ليهو انا بتوحم ي عبد العزيز م تكرهني ابتسم و قال ااا قلت ليهو ممكن تزح من جنب الباب؟قال لي لا شنو هو السنه كلها مع حبوبه ضحكت و قلت ليهو مع انو هي طردتني عديل لكن ونستها حلوه،،تاني مشيت الحمام بعد طلعت قال لي فيك شي؟قلت ليهو ده الوحم و انا امشي و اجي القاك لسه قاعد بي ملابسك دي تاني م ح اقعد معاك،،و طلعت مشيت لي حبوبه قلت ليها مشتاقين و قعدت في السرير الجنبها قالت لي عالك عايزه بتك تجي بتشبهني قاعده مقاصداني اليوم كلو ضحكت لمن دمعت😂😂😂😂عزيز جا و قعد جنبي و قال لي مالك قلت ليهو كلام حبوبه ضحكت و قال لي خلاص م تقعدي جنب حبوبه عشان م بتي م تجي بتشبها حبوبه كانت راقده قامت قعدت في السرير و قالت اجي اجي قعدنا نضحك قالت ليهو يا سعيد حظكم لو بتكم بتشبهني،،قعدنا نتونس و نضحك معاها و كنت كل م اتضايق بجي بقعد اتونس معاها،،عزيز كان بيقول لي نمشي نعمل ايكو و نشوف الجنين بس انا كنت برفض و بطني كانت ماشه على زياده و جمدت الجامعه،،و جا اليوم المنتظر "انا م كنت منتظره اليوم ده عزيز بس ال كان منتظر"حصل لي وجع و دي كانت فترة الولاده و انا كل م اتوجع بتزكر انو وحده بعرفها قبل كده حكت لي انو لما ولدت ولدوها بي عمليه و الدكاتره نسو شاش في بطنها،،الوجع زاد شديد ودوني المستشفى اول شي الدكتور سالني تؤام؟قلت ليهو لا عزيز قال ليهو م عارفين والله م عملنا ايكو قال ليهو اظنهم تؤام عزيز فرح ضربتو و قلت ليهو اي م بتتوجع انت م بتتوجع الدكتور قال لي عزيز خليها تمشي شويه و بعدها ح ندخلها لي الولاده،،كان مفروض تعملو الايكو و منها ح نعرف هل ممكن تولد طبيعي ولا الا بي عمليه قلت ليهو لا م ح اولد بي عمليه و الوجع ماشي لي الزياده،،طلعنا برا و بقينا نمشي و انا كل مره بضربو في وشو بيقول لي خنساء احسن ليك م تضربيني في وشي تاني ضربتو قال لي والله بنختلف ي خنساء م تضربيني عشان م اكفتك و انا كنت بمشي و بصرخ ظتمت نص ساعه رجعنا لي الدكتور دخلوني غرفة الولاده على اساس اني ح اولد طبيعي و كنت بتوجع لكن م كنت جاهزه لي الولاده مرت تلاته ايام و انا بتوجع و م ولدت بالنهايه قالو بعد اليوم ده لو م ولدت ح يولدوني بي العمليه،،لكن حمدلله ولدت طبيعي،،جبت تؤام ولدين و عزيز من كتر الفرح الدنيا م سايعاهو،،بعد ولدت م حسيت تاني الا لما جا داخل و شايلهم بي ايدينو الاتنين و فرحان شديد قال لي حمدلله على السلامه و انا سامعه كلامو بعيد و عيوني بتفتح و بتغمض شلت واحد من التؤام و قلت ليهو ديل اولادي؟و بكيت مسح دموعي و و باس راسي قلت ليهو دي مسؤلية صعبه قال لي م تبكي طيب انا معاك بس انتِ ادعي انهم يكونو ذريه صالحه قلت ليهو ان شاء الله ي رب❤️
يتبع....
