رفعتو من الارض و كان وشو اتضلط لكن ابدا م بكا شلتو و قعدت في السرير و انا حاضناهو بس كان مفتح عيونو بي صورة مضحكة و مخلوع م قدرت م اضحك ضحكت و هو زاتو بقا يعاين لي و يضحك كنت حاضناهو و قاعده زحا راسو و ختا يدو في راسو و قال هنا بيوجعني عاينت لي التوب برضو كان فيهو دم اتخلعت كان شعرو مغطي الجرحه زحيت شعرو لقيتو مجروح في راسو قلت ليهو حبيبي بيوجعك؟هزا راسو قال اي بقيت بفكر هسي ح اعقم الجرح كيف؟اكيد مف معقم هنا قلت خلاص اشيل منديل من عربيه عزيز مشيت فتحت العربيه شلت مناديل و في العربيه كان في ديتول شلتو و جيت،هزاع لما شاف الديتول قال م عايز م عايز قلت ليهو مش انت بطل؟يلا حبيبي ح اعمل ليك براحه حاضر؟قعد و بعد عملت الديتول بقا يبكي،وجع لي قلبي كنت ببكي معاهو و في نفس الوقت براضيهو،بعد بكا نام فوقي كنت بعاين ليهو و يحليلو من البكا وشو لما بقا احمر،خالتو عواطف جات لقتو مجروح قالت لي مالو وب علييي و رفعتو مني فتح عيونو و تاني رقد نام حكيت ليها وقع كيف بقت تقول لي يحليلو و تبوسو من راسو حبوبه و معاها كم مره من حريم البيت جو طالعين يقعدو في الجنينه لقونا قاعدين،بعد حبوبه شافتو مجروح بقت تقول عين والله ي بتي انا كل مره بقول ليك حصنيهم كل صباح لكن منو بيسمع الكلام،هزاع صحى و عاين لي و جا قعد فوقي حضنتو علي و قلت ليهو الجرح بيوجعك؟قال لي لا هزار و بابا وين؟قلت ليهو هسي ح يجو حبوبه قالت ليهو تعال كدي النشوف جرحك مشا ليها قالت ليهو حييي ي ولدي جرحك كبير تعال ي ود ابوك انت و رفعتو بقيت تلعب فيهو،خالتو عواطف قالت سبحان الله عزو برضو لما كان شافع مهما حصل نهائي م كان بيبكي،عبد العزيز جا داخل و اول شي قالو عزام قال جاي ي حجه،امو قالت بالجد؟و فرحت فرح شديد،كنت عارفه انو ده اخوهم و في الجيش القطري ليهو ٧ سنوات م جا السودان سالتو متين جاي؟قال ليها والله قال لي بعد يومين ح يوصل الخرطوم و بعدها قال ح يجي البلد قالت يوصل بي السلامه ان شاء الله عبد العزيز دخل جوه و انا دخلت وراهو و هزار و هزاع كانو مع بعض و جو داخلين ورانا عبد العزيز قال هزاع ده شنو الجرح ده؟تعال هزاع جاهو رفعو فوقو و قال لي وقع كيف؟قال ليهو كنت بلعب بي الطوطحنيه لكن دي م بطة الوقعتني ضحكت و قلت ليهو ي حبيبي انت بتحامي لي امك يعني؟عبد العزيز قال انتِ الوقعتيهو يعني؟قلت ليهو ايوه زحا شعرو و قال حتى في راسو مضروب،قال ليهو بطل انت عايز شنو اي شي عايزو يكون حاضر قالو ليهو عجله عزيز قال مع انك عندك في الخرطوم لكن م يغلى عليك ي بطل بكره ح امشي السوق و ح اشتري ليكم عاين لي و قال"و انتِ عايزه شنو؟و باس راسي قلت ليهو الاولاد ي غبي قال م بيفهمو و ضحك😂بتي كيف؟ و مسك بطني قلت ليهو زاتو يمكن م تكون بت يمكن ولد برضو قال لي هزاع و هزار انتو عايزين شنو؟عايزين اخت ولا عايزين اخو زياده عليكم؟هزار قال اخت و هزاع قال ح تجيب لينا اخت من وين؟عبد العزيز ضحك و قال بطه عندها الاتنين عاينو لي و قالو وينا ؟عبد العزيز هبش بطني و قال ليهم هنا هزار قال ليهو ليه في بطن بطه؟و هزاع قال لي طلعيها لينا قولي اععع زي م عملتي قبيل عبد العزيز ضحك بي صوت عالي و حتى انا بقيت بضحك
