لما جا داخل الغرفه قال لي مرتي الكذابه كنت بسرح شعري ضحكت و قبلت عليهو قلت ليهو انت ح تزلني ولا شنو؟قال لي ابداً دي حقيقه قلت ليهو عشان ساكته لكن اصلا انا غلطانه لاني سكتت و م اتشاكلت لما حكيت لي قصتك الحلوه دي ي محضر الخير انت،،،،انت قادر تصلح علاقتك مع مرتك عشان تمشي تبقا محضر خير لي الناس؟ضحك و قال لي مرتي قادره ضحكت قال لي تفصلي😂😂😂قلت ليهو طلقني هسي طلقني اي طلقني هو و بيضحك قال لي بعد شنو فصاحتك دي كان تتفاصحيها قبيل قلت ليهو والله م تقفل افلقك بي المشط ده قال لي روقي ي بطه روقي كمان على العليك كذابه قايلاني م ح اعرف ؟انا عارف بتكذبي كيف ي خنساء😂المهم ي بطه قلت ليهو لا مهم ولا شي اختاني قال لي انا عايز بت قلت ليهو عبد العزيز كرهتني عايز بت عايز بت نفترض حملت و طلع ولد تاني نرميهو يعني نرميهو؟قال لي يمكن كمان تكون بت قلت ليهو اختاني،،انا اشتقت لي هزار و هزاع قال لي اشتقتي تتشاكلي معاهم،قلت ليهو صح والله،،اليوم التاني بعد الفطور طلعنا ليهم و كان عزيز م شغال ،،مشينا البيت الصدمه كانت لقو كديسه صغيره في البيت متحمسين شديد قعدنا عند اهلي شويه و طلعنا احنا و طالعين قالو الا يشيلو الكديسه معاهم قلت ليهم لا قالو لي ح نشيلها قلت لي عبد العزيز قول ليهم لا ي عزو انا بخاف قال لي خليهم يشيلوها م تخافي كانت صدمه كبيره ،هم اصلا متفقين علي و لو مشينا معانا الكديسه ح يخوفوني بيها،احنا و في الطريق كنت ساكته عزيز قال لي شنو الرواق ده؟ولا خايفه؟ابتسمت و عاينت ليهو عشان م يخلي الاولاد يعرفو انا خايفه من الكديسه واحد من التؤام قال ليهو ي بابا بطة بتخاف من الكديسه؟قال ليهو اي امك دي جبانه ساي فجاة لقيت الكديسه قاعده فوقي صرخت و عزيز كان بيضحك قلت ليهو شيلها مني ي عبد العزيز ياخ طيب قول ليهم يشيلوها هو و بيضحك قال ليهم شيلوها ي حبايب بابا عيب شالوها مني بعد شالوها مني قبلت عليهم لبعت واحد التاني قال لي برميها تاني قلت ليهم انا امكم م تعاملوني كده قليلين ادب تحترمو ابوكم و انا لا ليه؟ضربت عبد العزيز و قلت ليهو انت كمان بس الله يقدرك للضحك بس،وصلنا البيت قلت ليهو والله ي عبد العزيز الكديسه دي تخوفوني بيها انزل اقعد تحت مع امك،،عزيز كان شايل الكديسه و قاعد جيت ماشه على المطبخ واحد من التؤام قال لي بطة الجبانه لبعتو في ظهرو التاني حمر لي قلت ليهو م تعاين لي كده بي عيونك الكبار ديل عبد العزيز قال لي اخير ليك ي خنساء م تضربيهم احنا و قاعدين في واحد جا مفتح عيونو و بيقول ي بابا الكديسه دخلت غرفتكم قال ليهو البيت بيتها خليها عاينت ليهو و سكتت بعد مشا قلت ليهو عيونهم بتخوف ولا انا براي بخاف قال لي طالعين لي حبوبه كيف م يطلعو بيشبهوها و انت صباح مساء مقاصداها،،قلت ليهو والله اشتقت لي حبوبه خالتو عواطف قالت ح تجي بعد كم يوم حماسس ياخ،،كنت ماسكه التلفون و هو بيحضر سمعتو بيقول تعال ي هزار رفعت راسي قال ليهو خلي الكديسه دي لي بطة و ارح نده على هزاع قلت ليهو ماشين وين؟قال لي الحلاق قلت ليهو اسمع م تحلق ليهم نفس الحلاقه عشان اقدر افرق بينهم سمح؟قال لي ام م بتعرف تفرق بين اولادها م شفت قلت ليهو اولادك غريبين بيشبهو بعض شديد هسي انت بتفرق بينهم كيف ي عبد العزيز؟قال لي لي متين ح اوصف ليك الفرق؟قلت ليهو المهم اعمل زي م قلت ليك و سوقو معاكم كديستكم دي ح تخلوها لي منو هنا؟ضحك و قال لي جبانه دي ،بعد طلعو نزلت تحت لي خالتو عواطف كنا بتونس قلت ليها حبوبه جايه متين؟قالت لي بعد يومين،،كنت شايله عشق و بلعبها عبد العزيز جا داخل و معاهو الاولاد لما شافوني شايله عشق جو قعدو جنبي و بيلعبوها معاي و عزيز كان شايل الكديسه،اولاد عزه قالو ليهو يخليها عندهم قلت ليهم طوالي خلوها و قعدو يلعبو بي الكديسه و معاهم هزاع و هزار قعدنا معاهم و بعدها قلنا نمشي،طلعنا بيتنا كان تلفون عزيز فوق سرير الغرفه و هو في الحمام شلت تلفونو اول م شلتو طلع من الحمام اتخلعت و ختيت التلفون رفع حواجبو و عمل لي حركه بي وشو بتوحي لي معنى ده شنو البتعملبهو ده؟قلت ليهو بس كنت عايزه اشوف الساعه كم قال لي ايوااا بقيت بفكر ده شنو البعمل فيهو ده؟معقول انعدمت الثقه للدرجه دي؟اليوم التاني خنساء شنو الحركات الجديده دي م رديت عليهو ،،كنت مغسله شعري رجعتو لي ورا قال لي حركة رومنسيه عجيبه قلت ليهو اتلهي ي عبد العزيز😂الليله ماشه الكوافير يمكن اتاخر قال لي الساعه كم؟قلت ليهو انت طالع الليله قال لي بعد ساعتين من هسي طالع عندي شغل طيب تمام انا ح اطلع معاك الاولاد ح اخليهم عند خالتو عواطف،قال لي ماشه الكوافير؟قلت ليهو اي،احنا و في الطريق قال لي لما تكوني راجعه اتصلي لي طيب؟ح تتاخري انتِ؟اي ح اتاخر قال لي فجاة كده قررتي تمشي الكوافير يعني؟غريب امرك قلت ليهو اي والله فجاة تصدق؟بعد وصلت قال لي خلي بالك من نفسك طيب؟ انا بعرفك طايشه م تفك ي ترجعي براك ح اجيك انا طيب؟قلت ليهو طيب حبيبي و نزلت ،عملت بروتين في شعري و كويتو ده اكتر شي حلو كنت عملتو😂و رسمت،،من كتر م شعري عاجبني كنت فاكاهو و قاعده في البيت عبد العزيز كان بيقول لي الله يديم الاهتمام ان شاء الله،بي الليله كنت نعسانه و عايزه انوم نور غرفتنا كان مطفي بس عبد العزيز كان صاحي و شايل اللابتوب و بيحضر في فيلم،فجاة حسيت زول بيقرب علي قمت و انا بصرخ عبد العزيز قال لي في شنو؟مالك؟؟؟قلت ليهو في زول قرب علي ي عبد العزيز ولع الانور قال لي ده خيال ي خنساء قلت ليهو لا ي عبد العزيز في زول لمسني من كتفي والله قال لي حبيبتي بسم الله مف شي هنا خلاص دقيقه اجيب المصحف اقرا ليك قران،كان بيقرا لي و انا كنت في حضنو لحد نمت تاني،،تاني حسيت بي زول بيهبشني من خصري و الوقت داك عزيز كان نايم صحيتو و انا متوتره بقول ليهو عبد العزيز والله في زول بيلمسني ي عبد العزيز تاني رقدني في حضنو و بيقول لي حبيبتي مف زول غيرنا والله ي عبد العزيز في زول انت م قادر تفهمني خنساء خلاص هسس و كان بيحرك اصابعو في شعري حضنتو شديد و نمت،،الصباح لما صحيت هو كان لسه نايم كنت بفكر في الحصل قلت ده حلم ساي ،،كنت في حضنو و م زحيت نهائي،هو بعد صحى عايز يقوم مسكتو من قميصو قلت ليهو انا خايفه ي عبد العزيز م تخليني براي كان الوقت داك الساعه ٧ صباحاً قال لي خايفه من شنو؟قلت ليهو بس خايفه قال لي طيب بي الراحة فهميني حاصل شنو عشان افهمك قلت ليهو حسيت في زول بيلمسني قال لي والله ي حبيبتي م كان في زول غيرنا قلت ليهو يمكن حلم قال لي اي يمكن حلم،هزار و هزاع صحو طلعت عملت الشاي و قعدنا كلنا بنشرب عزيز قال لي يمكن الكديسه امبارح كانت في غرفتنا قلت ليهو عبد العزيز كديسه تهبشني من خصري كيف يعني؟قال لي شنو؟من خصرك؟خنساء انتِ متاكده ده حلم؟بعد تردد في الاجابه قلت ليهو اي حلم
يتبع....
