م كنت فاهم حاجه راسي جاط طلعت و انا بقول ياارب انت القادر يارب انت الكريم الدنيا بقت لي ضيقه مكان اثبت فيهو م لقيت قبلت يمين و شمال و انا م فاهم اي شي قلت امشي اصلي انا و ماشي الدكتور نده علي وقفت و م كنت عايز اقيف م مستعد ابداً اسمع خبر كعب عنها لي اول مره انا كنت ضعيف لي الدرجه دي،،رجعت لي الدكتور و قلت ليهو بي تردد ان شاء الله خير ي دكتور؟قال لي خير ي ولدي خير مرتك كويسه بس دي حقنه اديناها ليها و اصلا الحقنه دي من اعراضها انها بتنوم لكن الجرعه زايده شويه و م بتاثر بعد كم ساعه كده ح تصحى ان شاء الله قلت ليهو باذن الله ي دكتور باذن الله ياداب وعيت كويس قلت ليهو ي دكتور لو عايز اسوقها معاي البيت ممكن؟قال لي انتظر لحد الصباح ونشوف حالتها بقت كيف و بعدها تتوكلوا قلت ليهو تمام ي دكتور تسلم ،،مشيت و انا بشكر ربنا بقيت بصلي و بقرا قرآن لحد الصبح اذن صليت و نمت قبل انوم دعيت "ي رب دي دنيا م تخليها اكبر همي ي رب فرج لي همومي كلها و اصرف عني برحمتك شر ما قضيت"الصباح صبح مشيت ليها في الغرفه و كنت ملهوف القاها بتعاين لي لاني بالجد فاقدها دخلت و فعلاً كانت صاحيه وشها كانو كان فيهو نور بيضوي قلت في نفسي كيف يكون صباح لو م بدا بيك؟صباحي انتِ قالت لي كنت وين؟م رديت عليها كنت سرحان في تفاصيل وشها قالت لي عزيز ممكن نرجع البيت ؟بعد مسافه رديت ليها قلت ليها دقيقه ح امشي و اجي
بعد صحيت م كان جنبي و كنت متضايقة و عايزه ارجع البيت سالتو ممكن نرجع قال لي دقيقه ح امشي و اجي و طلع لما جا راجع كان معاهو الدكتور سالني كيف حالك؟قلت ليهو تمام قال لي ي بتي مف حمل صح؟قلت ليهو لالا قال لي متاكده اتوترت و عاينت لي عبد العزيز و قلت ليهو متاكده ليه في حاجه؟عبد العزيز ضحك قال لي م تخافي مف حاجه الدكتور برضو ضحك و قال لي مف حاجه ي بتي م تخافي و بعدها طلعو هو و عزيز بعد عزيز جا قلت ليهو قال ليك شنو؟قال لي بس قال ممكن تطلعوا قلت ليهو بس كده؟قال لي اي طلعنا و طول الطريق انا بسالو ي عبد العزيز ليه سالني قول الحقيقه هو بيضحك و بيقول لي مف حاجه والله قلت ليهو اقيف في اقرب صيدليه قال لي ليه؟قلت ليهو بس اقيف في اقرب صيدليه،،،فعلاً اقرب صيدليه لقيناها في طريقنا وقف فيها نزلت و هو نزل معاي اشتريت كاشف حمل و هو بيضحك فيني بيقول لي جبانه دي،،ركبنا العربيه و اتحركنا و هو كل م يعاين لي بيضحك و بيقول لي خنساء ده كلو خوف من الحمل؟قلت ليهو والله ي عبد العزيز من كلامك ده حاسه انو قال ليك في حمل وااييي ي عبد العزيز م بقدر انا استحمل الوجع داك تاني اول م وصلنا البيت سلمت على خالتو عواطف و اخت عزيز المتزوجه كانت قاعده و كمان باقي اخواتو قاعدين سلمت عليهم عزيز قال لي امو الاولاد وين؟قالت ليهو بيلعبو مع اولاد عزة قال لي تعالي نسوقهم احنا و ماشين ليهم قلت ليهو عبد العزيز استعجل ولا اقول ليك انا ح اطلع مش باب الشقه فاتح؟قال لي اي فاتح،ركبت سريع سريع و عملت كشف الحمل حمدلله م كان في حمل،،بعد عبد العزيز جا الاولاد جرو علي و هم بيقولو بطة حضنتهم و قلت اشتقت ليكم عزيز قال لي اها بشري قلت ليهو لالا مف حمل حمدلله قال لي لالا ياخ،خنساء انا عايز بت قلت ليهو مف بت مف يعني مف بعد الشفتو في ولادة ديل توبة عديل و بعدين انا ديل م قادره عليهم اجيب بت تاني؟بري لو عايز شوف ليك مره تانيه قال لي قولي والله بس،ضحكت قال لي تفصلي،بعدها دخل الغرفه لما جيت دخلت بعدو لقيتو نايم قلت معناها الليله مف شغل طلعت من الغرفه مشيت في الهول هزاع و هزار قالو لي مش قلتي ح تلعبي معانا؟قلت ليهو ايوه قال لي طيب نجيب الالعاب؟قلت ليهو طيب سمعت صوتهم بيقولو ي بابا العلبة الكبيره ديل وين؟مشيت قلت ليهم ياتو علبه؟قالو لي ال لعبتي بيها معانا فهمت انهم قصدهم علبة المكياج بتاعت و عزيز كان نايم قلت ليهم اولادي حبايبي مف لعب بي الحاجات دي اصلا دي حقت ناس كبار لقو العلبة في واحد قال لي التاني لقيتها بي صوت عالي عزيز قال لي خنساء اطلعو بره و طفو النور ده واحد شال العلبه و التاني مسكني من يدي طفيت النور و طلعنا استلموني عروسة لعب و انا كنت قاعده ليهم و ماسكه التلفون في قلم روج شايلو قلت ليهو انت منو؟"ح تستغربو كلكم من ام م بتفرق بين اولادها لكن حصلت معاي انا والله😂😂"قال لي هزاع قلت ليهو بطل شلاقة قال لي غمضي عيونك قلت ليهو انت غبي ده روج تعملو لي في عيوني بدا يعمل في شفايفي التاني كان شايل ماسك ا قال لي ي بطة ده شنو؟قلت ليهو حاجات ناس كبار فجاة حسيت بيهو بيمشي الماسكرا في جضومي لبعتو و قلت ليهو الله يقطعك و هم بيضحكو عايزه اقوم قالو لي لا لخبطو وشي حتى الروج عملو لي في جضومي بعد شفت في المراية ملخبطين وشي فوق تحت قالو لي م ح تغسلي الا بابا يشوف قلت ليهم دي بهدله و ابوكم م ح يصحى هسي واحد منهم قال بابا م لعب معانا ح نعمل ليهو هو كمان ضحكت بي صوت عالي و قلت ليهم اي الا تعملو ليهو انا و بقنعهم انو لازم يعملو ليهو عزيز صحى قالو ليهو تعال العب معانا عاين لي و بقا يضحك بعد قعد شالو العلبه و مشو ليهو قال ليهم لا بدو ينقنقو برضو قال ليهم لا يعني لا و قال ليهم نلعب بليستيشن، هم و بيلعبو تلفونو اتصل وقف اللعب و قال هزار تعال العب ح امشي و اجي اوع يغلبك،مشا البلكونه مشيت وراهو لكن هو م شافني سمعتو بيقول اي ي ادم تمام حمدلله انت كيفك، يستاهل الحمد والله،هسي؟يعني اجي في القياده؟خلاص تمام قفل الخط بعد قبل لقاني وراهو قلت ليهو طالع؟قال لي اي و احتمال اتاخر الليله،بس ي بطه مسافة استحمة اكوي لي ملابس الشغل قلت ليهو تمام و فعلاً كويتها ليهو ،وقت عايز يطلع قال لي خلي بالكم و ودع الاولاد قلت ليهو هسي ماشي القياده قال لي اي لكن م ح اقعد هناك كتير قلت ليهو طيب ح تتاخر وين؟قال لي شغل ي خنساء قلت ليهو ح ترجع الساعه كم؟قال لي يمكن نص الليل الساعه ٢ كده ليه ده كلو قال لي خنساء مالك بتسالي كتير كده و ضحك،،ماشين مدني عندنا شغل و ح ترجع في نفس اليوم قلت ليهو شغل شنو ده قال لي شغل ي خنساء شغل و ودعني و طلع،،العصر كده نزلنا انا و الاولاد عند خالتو عواطف كنت مهمومه خالتو عواطف سالتني مالك؟قلت ليها عزيز الليله سافر مدني و قال ح يتاخر قالت لي ي بتي عادي شغلو اصلا كده مرات كان بيسافر سفريتين في اقل من اسبوع م تشيلي هم قعدت معاهم و الاولاد كانو بيلعبو مع اولاد عزه اخت عبد العزيز ،كنت مهمومه شديد اتصلت ليهو تلفونو بيدخل جرس لكن م بيرد بعد اساعه كده رجع لي قلت ليهو مالك م بترد؟قال لي م كنت جنب التلفون،،كيفكم انتو؟قلت ليهو كويسين هسي قاعدين عند خالتو عواطف قال لي امي جنبك؟قلت ليهو اي قال لي اديني ليها اديتها التلفون"الو،ي ولدي كيفك ان شاء الله كويس؟كويسين حمدلله،كويس والله هسي لكن م قاعد،اي والله مهمومه و قاعده ،عيب منك الكلام ده ي ولدي دي بتي كيف م اخلي بالي منها،ضحكت و قالت ليهو سمح و مشيت ودت التلفون لي هزار و هزاع،لما جات قالت لي ي بتي مالك؟قلت ليها م بعرف والله ي خالتو الدنيا ضايقه علي قلت لي صلي على النبي "علية افضل الصلاة و السلام"ي بتي يمكن عشان ح يتاخر شايله هم لكن م تفكري كتير و وكلي الامور لي ربنا قلت ليها حاضر،،قعدت معاهم لحد بعد المغرب و بعدها طلعنا بيتنا،،اتصلت لي عبد العزيز كان تلفونو مفقول م قدرت اقعد في البيت براي تاني نزلنا تحت قلت ليها ي خالتو البيت تقيل علي م قدرت اقعد قالت لي اقعدي عندنا ي بتي لحد يرجع ان شاء الله بكره الصباح بيكون قاعد في البيت و قلبك يرتاح،،م تتوتري و م تفكري في الشينه ي بتي قلت ليها ي خالتو تلفونو مقفول قالت لي ي بتي م تخافي يمكن طافي شاحن و هو في الشغل م قدر يشحنو
يتبع...
