ជំនួបស្នេហ៍៣៦៥ថ្ងៃ(ចប់)

ភាគ៥០

  “ សំណាងល្អនិងសំណាងអាក្រក់ ”

  ង៉ក់!
  រ៉េន ឈប់ឡានមុខផ្ទះលោកដុកទ័រ គ្រីស ដែលជាអ្នកនាំ ណាប៊ី ចេញពីមន្ទីរពេទ្យមក។ គេរហ័សចុះពីលើឡានដើរញាប់ជើងសំដៅចូលទៅក្នុងផ្ទះលោកដុកទ័រ តែក៏ត្រូវអ្នកបម្រើក្នុងផ្ទះលោកដុកទ័រចេញមកហាមឃាត់គេ។
  « សុំទោសផង លោកបងរកអ្នកណាដែរ? »
  « ខ្ញុំមករក ណាប៊ី ឆាប់បើកផ្លូវឲ្យខ្ញុំចូលភ្លាមទៅ »
  « លោកមិនអាចចូលទៅបានទេ »
  « ហេតុអ្វីខ្ញុំចូលមិនបាន? » រ៉េន ចាប់ផ្តើមមួរម៉ៅនឹងអ្នកបម្រើប្រុសកាន់តែខ្លាំង។
  « អ្នកនាង ណាប៊ី ប្រាប់ថាមិនជួបភ្ញៀវទេ »
  « ទៅប្រាប់នាងថាខ្ញុំ រ៉េន មករកនាង »
  « ចឹងសូមលោកចាំនៅទីនេះសិនហើយ »
  រ៉េន ព្រមឈរចាំនៅមាត់ទ្វាតាមពាក្យរបស់អ្នកបម្រើទាំងចិត្តអន្ទះសារចង់ទៅជួបនាងភ្លាមៗ ប៉ុន្តែគេមិនអាចអុកឡុកផ្តេសផ្តាសទេព្រោះទីនេះជាផ្ទះអ្នកដទៃ។

  ប៉ុន្មាននាទីក្រោយមកអ្នកបម្រើដែលចូលទៅប្រាប់ ណាប៊ី មុននេះក៏ចេញមកវិញដើម្បីនាំពាក្យរបស់ណាប៊ី មកប្រាប់ រ៉េន ដែលឈរចាំ។
  « យ៉ាងម៉េចខ្ញុំអាចចូលបានហើយឬនៅ? » រ៉េន សួរហើយក៏រហ័សចង់ចូលទៅខាងក្នុងព្រោះគេជឿជាក់ថានាងប្រាកដជាចង់ជួបមុខរបស់គេ ប៉ុន្តែអ្នកបម្រើបែរជាលើដៃហាមគេដដែល តើនេះមានន័យថាម៉េច?។
  « អ្នកនាង ណាប៊ី ប្រាប់ថាមិនចង់ជួបមុខលោកទេ »
  « មិនអាចទេ...ឆាប់ឲ្យខ្ញុំចូលទៅជួបមុខនាងសិនទៅ » រ៉េន ព្យាយាមសម្រុកចូលទៅក្នុងផ្ទះតែក៏ត្រូវអង្គរក្សពីរនាក់ទៀតចូលមកជួយអ្នកបម្រើប្រុសរេរាំងគេមិនឲ្យចូលទៅក្នុងផ្ទះបាន។
   « បើលោកនៅតែចង់ចូលទៅខាងក្នុងផ្ទះទៀត ខ្ញុំហៅប៉ូលីសឲ្យចាប់លោកហើយណា »
   រ៉េន រំងាប់អារម្មណ៍ឈានជើងថយក្រោយមកវិញពេលឃើញពួកគេគំរាមហៅប៉ូលីសឲ្យមកចាប់គេ តែទោះគេមិនប្រើកម្លាំងដើម្បីសម្រុកចូលទៅក្នុងផ្ទះដូចមុនក៏គេមិនបញ្ឈប់គំនិតដែលចង់ជួបមុខរបស់នាងនៅពេលនេះដែរ គេត្រូវតែជួបមុខនាងឲ្យបាន ដើម្បីសួរនាងឲ្យច្បាស់លាស់អំពីរឿងនៅក្នុងព័ត៌មានកាលពីព្រឹកមិញ។
    « ណាប៊ី...បងមានរឿងចង់សួរអូន ឆាប់ឲ្យបងចូលទៅជួបអូនផងទៅ » រ៉េន ព្យាយាមស្រែកខ្លាំងៗដើម្បីឲ្យអ្នកដែលសម្ងំក្នុងផ្ទះគេចមុខគេបានលឺ។