احمد بقا على ديك الحال كايتفرج او كايهضر مع خولاتو او مرة مرة كايلعب مع البراهش صغار, حتى فجأة دخلات عليهم نور كتجري او لابسة واحد قميجة طويلة عليها، جاتها بحال تكشيطة، بقات كدور بيها فالبيت او البراهش وراها كايضحكو، تلاحت على احمد مخبية على دراري صغار.
احمد شادها مبعدها عليهم او البراهش كايضحكو او كايتنترو باغين يشدوها ، حتى فجأة خديجة لاحضات نور اش لابسة، بدات كتغوت عليها او كتولو او وجهات كلامها لاحمد
خديجة: ويلي ويلي ويلي، تا حيد لديك البعلوكة القميجة، دابا توسخها ، راه ماشي ديالنا غير ديال ناس
تورية شافت فيها باستغراب
تورية: على شكون هاد ناس بسلامة؟!
نور هربات من احمد حيت شافت خديجة جاية ليها، بقات تابعاها خديجة فالبيت او كتهضر بتأسف.
خديجة: ديال ديك البنية لي عودت لك عليها ( تابعاها من قنت لقنت) تي أجي لمك لهناا.
تورية عرفاتها علامن كتدوي، ملامحها تبدلو لشفقة او أشارة بيديها لدار صابرين
تورية: ااه كدوي على هاد البنية لي ماتت ليها مهاا؟
احمد غير سمع هكا، كان متكي او هو يتوكض شاف فتورية بإستغراب او سولها
احمد: كيفااش؟؟!
تورية ضارت شافت فيه بتأسف
تورية: هاد دار لي مقابلة معاكم ، ولايلا ماليها بقاو فيا، عودات ليا مك اش وقع، قلبي تقطع من جهة ديك البنت
احمد غوبش او سولها باهتمام
احمد: ايواا، او حوايجهاا اش وصلهم لهنا؟!( رجع شاف فمو كايتسناها تجاوب)
خديجة عيات متبع فنور جلسات او شافت فيه، مغوبشة: حيد لديك البعلوكة، ديك القميجة دابا توسخهااا
نور يلاه غدوز من حدا احمد او هو يشقمها، حيد ليها القاميجة، او طلقها خلاها كتركل فالارض كتبكي، بقا شاد القاميجة بين يديه او رجع شاف فخديجة، كايسولها باهتمام
احمد: و بغيت غير نفهم، حوايج البنت اش جابهم لعندك ؟!
خديجة تنهدات بألم تفكرات مي فاطمة، جاتها الغمة فقلبها
خديجة عودات ليه كلشي ( شافت فتورية او أشارت بعينيها لبلاصة فين جالس احمد) هنا مسكينة فين نعسات واحد سويعة المكانة او مشات فحالهاا.
احمد كان كايسمع باهتمام، او قلبو غير مكايزيد يتزير عليه، شاد قميجتها او كايتحسس فيها بصباعو او ملامح القلق ضاهرة على وجهو، تقاد فالجلسة او بدا كايطوي فقاميجتها بهدوء، او من الداخل ديالو غير ربي لي عالم بيه،او ريحتها طالعة معااه كايستنشقها بكل حب،
اصبحت نقطة ضعفو هي صابرين، مبغاش مو تهضر عليها بديك طريقة حس بيها كأنها كتشفق عليها، او هادشي بضبط لي ماباغيهش، حبيبة قلبو معند تا واحد الحق انه يشفق عليها او ينقص منهاا، مورالو زاد تخربق ، كتر ما كان فلول، جمع الوقفة بتغوبيشة او هاز معاه قميجتها، غادي متوجه لبيتو تا نترات منو خديجة لقميجة
خديجة: تا طلق لهنا، دابا توسخهاا
احمد بقا واقف كايشوف فالقاميجة بغا ياخدها او يخبيها عندو فالبيت، معرف كيف ياخدها ، قرر انه حتى تحطها فشي بلاصة او يمشي يهزها، دخل لبيتو كاعي هز باكية لكارو او هبط لزنقة كايكمي او كايحاول يتهدن.
❤️
11:30 ديال ليل، واقف فراس درب او كايفكر فيها، او كايلعب مع احاسيسو غميضة، مرة كايفرح او قلبو كايضرب ف90 بكترة الفرحة ، حيتاش صابرين دخلات لدارهم او نعسات ففراشهم،او ما هي الا تواني كايتقبط عليه قلبو حيت خرجات من دارهم ، للحضة كايبغي يطفي لكارو او يطلع يخاصم على مو ،حيت مشداتهاش تجلس عندها وقت طويل، جبد تليفونو شعلو او كيف العادة تصويرتها هي لولا كتبان، زومة على وجهها او بقا كايتحسس باصابيعو فشاشة الهاتف على عينيها او على ابتسامتها، علا يديه لفوق لي شاد بيها التيليفون او غطا بيه شرجم لي كانت كطل فيه داك نهار، تصويرتها جات مقابلة مع وجهو، كايتخيلها كطل من داك شرجم ، رجع تيليفون لجيبو او بدا كايضحك على هاد الفعايل لي كايدير، ديما كايحصل راسو كايدير شي حوايج بدون شعور ، شاف فشرجم لي كانت كطل فيه او بدا كايضحك، زفر لكارو بيأس او هضر معاها
احمد: واخا على مك سطيتيني ، تانشدك هههه
❤️ عند صابرين❤️
11:30 ديال ليل، طالعة لسطح ديال لعمارة او هازة معاها شبكة ديال حوايج، مشات كتنشر فيهم بصمت او كتستمتع باصوات لماج لي جايين من بعيد، سلات نشير او مشات كطل على بحر لي كان بعيد عليها ، حطات يديها على الحيط او حطات وجهها عليهم او غمضات عينيها، كتحاول تستاراح من شقا ديال هاد النهار او فنفس الوقت كتستمتع بنسيم البارد لي كايضرب ليها فوجهها، بعد دقاءق حلات عينيها لي كانو عامرين بدموع ، بدات كتدمع بصمت، حسات بواحد الوحدانية فشيشكل، توحشات صحباتها، بغات تعيط عليهم او تهضر معاهم هوما لي كاينسيوها فالهموم، شوية تفكرات ماماها او خوها دغيا بدلات تفكيرها عليهم، حيت مبقاتش قادرة بالمرة انها تفكر فيهم، فكرة انهم ماتو مزال لحد الان كتألمها او مزال ما بغات تستوعبها، فديك لحضة كانت باغة غير تريح قلبها واحد شوية، عيات من البكا او القهرة، ما هي الا تواني بتاسمات او قلبها بدا كايفرفر، خرجات بطاقة أحمد من ذاكرتها او سمحات ليها باش تلعب ليها فاحاسيسها، نطقت بكل حب او اشتياق او غير بشوية
صابرين: احمد ( بدات كتضحك او رجعات نطقاتها مرة أخرى كأنها كتعبأ مخزونها من الفرحة) أحمد هههه
رجعات شافت فالقمرة او كتهضر معاه بكل حب او ابتسامة عريضة على وجهها، عاشت دور او نسات راسها
صابرين: ايوا اش كدير دابا؟
غوبشات كأنها تقلقات أو رجعات ضحكات
صابرين: هههه، علاش مابغيتيش تجاوبني، محشوماش عليك؟!
بدات كتضحك غير بوحدها بحال شي حمقة،
( بطاقة أحمد دارت خدمتها، غمراتها بالفرحة كيف العادة او مشات تخبات.)
صابرين فاقت من سهوتها، هزات شبكة ديال الحوايج او كضحك على راسها او هبطات عند البنات.
يتبع....
بقلم ساندي🌸
أنت تقرأ
🌹 هيام ما بين الغفران و الانتقام 🌹✨( بداريجة المغربية)✨
Romanceرواية خاااترة حب ❤️🔥 او رومانسية 🥹✨ القلب غايتحرك ليك فيها 💗 او خالية من سفالة الخامجة❌( فيها شوية مي ماشي ديك المعيقة) البطلة غطيح فولد دربهم 😍( بزنااز كلااص ياختي ) ، رواية مختااالفة عن اي قصة ديال تبزنيز لي كتعرفي، فكرة مكايناش فسووق نهائيا...
