احبَبْتُكْ بقدر ما كَرِهتُكْ.

الحلقه الثانيه

8:30 A.m

" يا يوسف ... يااا يوسف "
قمت من النوم
طلعت برا الاوضه لقيته بيلبس الباتيناج بتاعه وبيقول
" انا نازل حاضر "
بصيتلو بغضب وقلت
" هو مش انا قلت لك امبارح قلهم مش ينادو عليك بالطريقه دى ..الواحد مش عارف ينام "
ضحك وقال
" يا والدى العزيز دول اصحابى "
قلت
" هو انا كل ما اكلمك تقولى اصحابى اصحابى ..يارب الجيران يشتكو منهم "
ضحك وقال
" الجيران يشتكو منى انا وصحابى ..لا لا مظنش يا فؤاد ده بص اول ما تجيب سيرتى عند اي حد يقولك يوسف قمر .. يوسف ده الشمس الى بتنورلنا ..بس انتَ الى مبتحمدش ربنا على النعمه "
قعدت على الكرسى وحطيت ايدى على راسى وقلت
" يارب صبرنى "
جه وقف قدامى وقال
" لا بقولك ايه يا فؤاد انا مبحبش العياط وانتَ عارف كده ... انا اول مبلاقى حد بيعيط بضعف ..وانتَ عارف
قلبى الصغير لا يحتمل "
قمت وقفت وقلت
" اطلع برا .. يلا امشى هو انتَ مش وراك كُليه يلا برا "
مشى شويه بالباتيناج بتاعه لغاية الباب وفتحه
بعد كده بص عليا وقال
" تعرف يا والدى انا قلبى مقبوض من نحيتك اه والله
قلبى وربى غضبانين عليك يا فؤاد ..يلا سلام "
وقفل الباب
ياربى ايه الولد ده
دخلت انا بسرعه ومسكت التليفون وكلمت 'سهير'
واول ما رفعت قلت
" ايه عملتى ايه ..اقنعتى بنتك "
قالت
" هو ايه الى اقنعتى بنتك .. انتَ الى قلت لى ابنك "
قلت
" لأ مقلتش حاجه لسه .. بس هقولو وبعدين انا لو اتحيلت عليه شويه هو هيوافق "
ضحكت وقالت
" بقولك ايه يا فؤاد .. احكيلى شويه على ابنك "
ابتسمت وقلت
" هو شكلو حلو اكيد طالع لي يعنى ... بس هو شعره ناعم اكتر ..وعينه بنى فاتح فاتح اوى وبشرته خمريه
وطوله متوسط هو بس ممكن يبقى اطول منى شويتين ..ايه تانى ايه تانى يا فؤاد اه افتكرت
بصى هو ساعات بيبقى ليه عضلات "
ضحكت وقالت
" ساعات ..ده ازاى ده "
قلت
"انا نفسى مش عارف "
قالت
" طيب طب شخصيته "
ابتسمت وقلت
" شخصيته مش عاوز اكذب عليكى ..هو بنى ادم فرفوش جدا شوفى انتِ لو بصيتى فى وشو تبتسمى وتضحكى تلقائى من غير حاجه ..بيحب الباتيناج جدا
ومبيحبش النكد والعياط ...عمره ما عيط فى حياته كلها غير مره واحده بس .. واه مبيحبش يشوف حد بيعيط قدامه ..واخر حاجه فضولى ساعات ..وبيحب يقرأ .. هو بأختصار يعنى بسمة الناس الى حولينو ..بس كده يا ستى "
قلت انا بقى
" طيب وبنتك "
قالت
" لااا .. انا عاوزه اقولك ان انا بنتى غير ابنك خالص انا معرفش ازاى لو بنتى وابنك وافقو انهم يتجوزو ازاى هيقدرو يعيشو مع بعض "
ضحكت وقلت
" ليه بتاكل البشر ولا ايه "
ضحكت وقالت
" لأ ..بس هي ليها عالم خاص بيها وبعدين هي صعب حد يفهمها ..انا مامتها وصعب افهمها "
قلت
" متخافيش ..انا اول ما يوسف يرجع من الكُليه هكلمه متخافيش "

♥︎◆♥︎◆♥︎◆♥︎◆♥︎◆♥︎

" يوسف ..سلفلى الباتيناج "
ضحكت وقلت
" لا يا صديقى .. ده معايا من زمان بس انتو امشو سريع عن كده يا اما المترو هيفوتنا "
ضحك احمد وقال
" المترو يفوتنا ايه خلاص احنا اهو وصلنا "
وصلنا ولقينا المترو واقف ... ودخلنا وقعدنا وبعد كده طلعت الموبايل بتاعى
لقيت احمد بيقول
" يوسف "
قلت " امم "
قال " يويف ..يا يوسف"
قلت ليه
" ايه .. فى ايه "
شاور براسه على بنت واقفه قدامنا ولابسه بنطلون جينز لونه ثلجى وتيشرت بكُم واسع ولونه كُحلى وانسيال فى فصوص لونها ازرق ..و بتقرأ روايه اسمها
《 | الحب الصامت|》.
شكلها بنت شيك
بصيتلو وقلت
" مالها "
قال
" الروايه الى هي بتقرأ فيها ..تعرفها "
ابتسمت وقلت
" اه .. قرأتها "
ابتسم وقال
" حلو ..بتتكلم عن ايه الروايه "
ابتسمت وقلت
" انهى قصه علشان دى مجموعة قصص .. يعنى عندك مثلا الحب الصامت نفسها ..'علياء' كانت بتحب ابن عمها ..لكن ابن عمها بيخطب اختها الى اسمها نسرين
ونسرين اصلا ملهاش فى الحب وكل الكلام الرومانسى ده وبتستهتر بمشاعر ايمن الى هو ابن عمها ..وبتكون عاوزه تتجوزه علشان هو غنى "
قال
" طيب وعلياء ليه مش بتعترفله بحبها وتقوله ان هي بتحبه "
ابتسمت وقلت
" ما هي مش بتتكلم ..علياء بكمااء .. علشان كده سموه الحب الصامت .. فهمت "
قال
" طيب قول النهايه اخلص "
ضحكت وقلت
" هيتجوز علياء .. وهيعرف من الكاميرا الى هتبقى بتسجل كل حاجه وهتفضح خطة نسرين "
لقيته ضحك وقال
" تسلم يا جو "
قام وقف ولعب فى شعره وعدل الكوتشى بتاعه
وبعد كده قعد تانى
وقال بصوت عالى
" عارف رواية ' الحب الصامت ' دى حلوه اوى "
ابتسمت وبصيت عليها
لقيتها نزلت الروايه من على وشها ولقيت شكلها حلو اوى رموشها طويله وعيونها عسلى وشعرها اسود وطويل شويه هي متهيألى كده قصاه بالتدريج
بصت على احمد بعد كده رجعت تكمل قراأه
رجع احمد تانى وقال
" ده علياء بتحب ايمن ومش ختعرف تعترفله بحبه "
بصيتلو مره تانيه بس كان باين عليها الغضب شويه
ورجع احمد من تانى يكمل ويقول.
" بس متخافش ده ايمن هيعرف حب علياء ليه من الكاميرا "
قفلت الرواية وقربت قدام احمد .. واحمد قام قدامها
اديتلو الروايه وقالت
" كمل بقيت الروايه للأخر وبعد كده تبقى تحكهالى ..ده انتَ غريب اوى "
ضحكت ومقدرتش امسك نفسى
رد عليها احمد وقال
" انا احمد .. مش غريب "
بصيتلو البنت ببرود ووقف المترو ونزلت
مسك احمد الروايه واحنا كمان نزلنا من المترو
وقعد يمسك الروايه بأستهتار وبعد كده قفلها وقال
" انا مش فاهم انتو ازاى بتشترو الكلام الفارغ ده "
اخدتها منو وكملت مشى
لقيت عمر بينادى عليا وبيقول
" يوسف .. اهدى شويه .. انتَ لابس باتيناج ..اما احنا لأ "
هديت السرعه شويه ومشيت جمبهم ومسكت الروايه وفتحت لقيت ختم عليها من مكتبه عامه
وفتحت اخر صفحه لقيت مكتوب
استلام وانتهاء
وقفت وقلت
" ثوانى ..ده هي واخداها استعاره ..يعنى مستعراها من مكتبه عامه ..وكمان المفروض معاد التسليم بكرا "
بصولى بأستغراب وقال احمد
" ايوه وايه الى هيحصل لو اتأخرت عن التسليم "
قلت
" بتدفع غرامه "
ضحك عمر وقال
" تستاهل هي الى ادت الروايه لى احمد "
قال احمد
" طيب هنعمل ايه دلوقتى "
قال عمر
" هى ركبة معانا على المترو يبقى هترجع على نفس المترو "
قال احمد
" اه بس احنا مش بنروح بالمترو "
قلت وانا بضحك
" خلاص .. انا هاروح اديها الروايه ..هو الباتيناج مش لافت انتباهكم ولا ايه "