في البيت و هم بجهزون للعشاء و العيال تاكين يتقهوون هم و الشيبان
جاء حاتم و جات معه و ضحى
وضحى : السلام عليكم ورحمه الله وبركاته
كلهم وقفوا احترام لها و طلعوا البنات لها و قالوا : و عليكم السلام و الرحمه
الجد : حي الله ام متعب
وضحى: الله يحييك شحالك و شخباركم جميع
الجد : الحمدلله كلنا بخير و صحه و عافيه شلونتس انتي ؟
وضحى : الحمدلله نحمد الله
صقر : اجلسي ياخاله
تقدمت وضحى و نزلت عصاتها و قعدت
ورد : وينتس ياخاله لتس كم ماشفناتس
وضحى : و الله فيه يمي بس رجلي مدري وش بلاها تعورني
حصه : ليكون طحتي عليها مره ثانيه ؟
وضحى: لا و الله مير انا خلاص عجوز وكاد انها يومنها تعورني طبيعي
ذياب : الله يطول باعمرك
ناظرت وضحى في العيال تدور الي كانت تحب تركي حييلل و تغليه واجد و قالت :
وليدي وينه ؟
الجد : يم الحلال راح
وضحى: و زوجته وينها مايعينتها اعرف صفاتها مير ماشفتها من اول اناظر في البنات ادورها
الجد ابتسم : و الله راحت مع تركي للنياق معاقبين
وضحى ضحكت : و ليش وش كبرهم تعاقبهم
الجد : ساريين الليل محد درا عنهم و يوم اصبحنا نفطر مادرينا غير طابين علينا من فوق الجدار كنهم حراميه
و ضحى : ياويلي وين مروحين ؟
الجد : مادري عنهم مير خوفوني و انا ادور عنهم ماعلموني
وضحى : شباب خلهم على هواهم
سكتوا شوي و ناظرت وضحى في رزان و قالت : اعرف بناتي زين لاكن انتي يالي ربي مكملتس مشاءلله علتيس من ؟
رزان ناظرت فيها وناظرت في جميلة و قالت جميلة : هاذي بنتي رزان
وضحى : هي الي كانت مع الهنوف ؟
جميلة : ايه رزان ذي
وضحى : مشاءالله عليتس متزوجه يمي ؟
ناظرت رزان في هايف و قالت : لا و الله ياخاله
وضحى : الله يوفقتس و يجيتس الرجال الي يستاهلتس
رزان : امين ياخاله
سكتوا عند هايف الي كان يبي يعرف رد رزان بأسرع وقت منها
انفتح الباب و دخل تركي وراه الهنوف
تركي : السلام عليكم
كلهم عليكم السلام
تركي : ميمتي هنيا ؟
ضحكت وضحى و قالت : هلا ياوليدي هلا و مرحبا
باس تركي راسها و ناظرت في الهنوف و قالت : تعالي يابنتي سلمي
تقدمت الهنوف و سلمت عليها و قالت و ضحى : بسم الله عليتس الرحمن الرحيم ياذكرت ربي و اخترته
ابتسمت الهنوف و ابتسم تركي لـ كلام و ضحى و قعدوا عند بعض
الجد : هاه عساكم سنعتوا الامور عند الحلال
ناظر تركي في الهنوف و ابتسم و قال : سنعتها النشميه
ضحك عبدالاله و قال: بنيتي جعل يدها ماتمسها النار
-
في الرياض تحديداً في السجن طلع مفلح يبي يكلم الشرطي و قال:
مفلح : ابي اتصل على اخوي
الشرطي بعد تفكير : انتظر اشوف اللواء
طلع الشرطي و تقدم لـ مكتب سهم و دق الباب
سهم : تفضل
دخل الشرطي و دق تحيه
سهم : استرح
الشرطي : السجين مفلح يبغا مكالمه مع اخيه نخليه ؟
سهم : لا خله ينثبر
الشرطي : بس ممنوع نحرمهم بدون حكم عليه مسبق
سهم: وش سبب انه يبي يتصل الخسيس ذا ؟
الشرطي: مااعرف بس قال يبي يكلم اخوه
سهم ضحك باستهزاء و قال: من متى عنده اخوان !
الشرطي : مااعرف ياحضره اللواء لاكن هاذا الي انقال لي
سهم اخذ القلم و هو منزل راسه يكتب و قال : دقيقه بس يكلم فيها و يذلف مكانه
الشرطي : طيب
طلع الشرطي متوجه لـ الزنزانه الي فيها مفلح فتح الباب و دخل و قال:
السجين مفلح سعيد
مفلح تقدم : انا
الشرطي : تعال معي
طلع الشرطي و معاه مفلح بعد ماحط الاصفاد على يدينه و دخلوا الغرفه الي يتصلون منها و قال الشرطي: كم الرقم ؟
بدا يقول مفلح له الرقم و اعطى الشرطي لـ مفلح الجوال و طلع
مفلح : الو
رابح : نعم شبغيت ياسجين
مفلح : عندي لك عرض و مقابله فلوس و شي يريح راسك
رابح : اهرج
مفلح : تذكر الهنوف
رابح ابتسم : الغزال ام العيون الزرق
مفلح : ايه
رابح: شفيها
مفلح : عندي محكمه معها و ابيك تشهد عليها
رابح : زور يعني ؟
مفلح : زي ماتفكر
رابح : كم باتعطي
مفلح : الي تبي
رابح : تم
قفل مفلح ورجع للزنزانه
-
في الديره في بيت اهل جميلة و هم قاعدين يلبسون عشان العشاء
الهنوف : عزوزز امش البس ثوبك و اطلع عند عمو تركي
عزوز الي كان يلعب مع الورعان : طيب
جاء عبدالعزيز و لبسته الهنوف ثوبه و قالت : انتظر البس و اطلعك لعموا
عبدالعزيز: زين
دخلت الهنوف عند البنات و تقدمت لين الي ماسكه فستان وردي و ماسك على الجسم و قالت : هنوفي تكفين البسي ذا يطلع عليتس يجنن
الهنوف : شعري احمر مايجي مع الوردي
لين : الا يالعيون الزرقاء يجي بعد يجننن تكفين البسيه
راحت الهنوف تلبسه عشان ماتزعل لين لبسته و خلصت و تقدمت للبنات
لينا : بسم الله الله يحفظك
لين : تف تف مشاءالله
سلمى : انا اقول وطيه عشان عيون حريم الديره
جمانه الي جات و هي لافه نص شعرها و الباقي لا : يبن..
وقفت باصدمه تطالع في الهنوف و قالت : يمه هنوف وش ذا الزين !
رزان : كل شي يهبل عليها بسم الله عليها
لينا : مالوم اخوي يومنه جايها على وجهه
ضحكوا كلهم و دق تركي على الهنوف الي ردت و قال:
عيون البحر
الهنوف : لبيه
تركي : تعالي و جيبي عزوز معتس انا عند الباب عشان نمشي للخيمه
الهنوف : يلا جيت
طلعت الهنوف ل تركي الي واقف قدام الباب فتح عيونه باصدمه يوم شاف الهنوف كاشخه و تهببل
تركي : بسم الله الا اله الا الله ياربي يازين خلقك
ابتسمت الهنوف و قالت : كيف حلو؟
تركي : وش حلو لا و الله يهبل
تقدم تركي و قالت الهنوف : تركي عزوز
ناظر تركي في عبدالعزيز و قال: عزوز عان عمو هايف عند الباب رح له
عبدالعزيز: طيب
مسك تركي يد الهنوف وراحوا ورا من الجدار الثاني رفع يد الهنوف و دورها و قال: الحين ليكون حريم الديره بيشاركوني في تأمل زينتس ؟
الهنوف : كاشخه لمن اجل
تركي : لا وطيه هاذا البسيه عندي بس انا اذكر ربي ماني مثلهم
ضحكت الهنوف و قالت : لاتخاف محصنه نفسي بعدين وش الزين الي انت لابسه !
تركي : شرايك حلو ؟
الهنوف و هي تقلد صوته الرجولي : وش حلو لا و الله يهبل
ضحك تركي و قال: (مابعد زينتس يابنت عبدالاله زين
لو كل الخلايق على زينتس تنافس
انتي فريده عنهم جميع يااجمل
قصيدي و محتوى ابياتي
حصنتس بااسم الخالق
عن عيون الخلايق يااحلا
شي في حياتي و اجمل ناسي)
ابتسمت الهنوف بحب ل تركي تقدم تركي الي رجع شعرها بيدينه ل ورا
تقدم باس جبينها و حضنها و قال: جعل ربي مايحرمني منتس
الهنوف : و لا منك
بعد دقيقه و هم حاضنين بعض الهنوف : تركي خلاص بروح الحين لين تكسر راسي
تركي : بس شوي
الهنوف بعدت ورفعت رجلها ل مستواه و هي تسوي شماغه و قالت :
جدي الحين بيهاوشك و انا ماابيه يزعل منك انتبه لـ اخوي و انتبه لـ نفسك زين
تركي الي كان هايم في تفاصيل و جهها و مو يمها تقدم بقوه يقبل مبسمها فتحت الهنوف عيونها باصدمه من حركته المفاجئه و هي حاطه يدينها على متونه غمضت تحس بايدينه على ظهرها العاري
بعد تركي و ناظر في و جهها الي صار فعلا احمر مره و قالت : ا ا انت
ليش فجأه
تركي و هو باقي يناظر فيها : ماقدرت اتحمل زينتس
الهنوف تقدمت تمسح روجها من شفايفه و قالت : الروج على شفايفك لو احد يشوفها وش بيقول
تركي رفع شعرها و قال: معلي
ضربته الهنوف على كتفه و قالت : وش معليك اصبر خلني اجيب لك مزيل مكياج خلك هنا
تركي : طيب
دخلت الهنوف و جهها احمر و قالت وله : وجهتس ليش احمر كذا
لين ناظرت باخبث : اها عساس تودي عزوز ل تركي بس وش صار
تقدمت الهنوف و ضربت لين بالمخده و قالت : ماتستحي
امل : و ماخذ مزيل الميكب عيا يروح روجك من على شفايفه
استحت الهنوف و ضربت امل و راحت و خلتهم و البنات يضحكون عليها
طلعت الهنوف لـ تركي و هي تحاول انها ماتبين انها مثله هايمه في زينه بس هي الي ماسكه نفسها مو هو تقدمت بدون اي كلام و حطت المزيل على المناديل رفعت راسها و ناظرت في عيونه الي تناظر في بحر عينها وقفت تناظر استوعبت و شتت نظرها تمسح روجها مسحته و قالت : قضيت روح
تركي : شلون تبيني اروح و انتي كذا
الهنوف : تركي قم بسرعه رح
تركي قطب حواجبه و قال: وشبك انتي كنك منتي متحمله وجودي !
الهنوف : لا الحين انا قلت كذا
تركي ميل فمه ورفع كتفه و قال: مدري عنك تصدين بعد مره ثانيه
الهنوف : ماصديت
تركي : الا
الهنوف : لا مو صد ذا
تركي : اجل وش تسمينه ؟
الهنوف: استحيت ماتشوف وجهي كيف صار احمر دخلت عند البنات و على طول حارشوني
تركي ابتسم : اها السالفه حياء
الهنوف سكتت و هي حاطه يدها على رقبتها قربت تركي و حط يده على الجدار و قال: دامه بيننا لا تستحين ماسوينا شي حرام لاتسوين كذا و تحسسيني انك صاده
الهنوف : مااعرف اظهر مشاعري شسوي
تركي : و الله شسوي فيك اجل
تقدمت الهنوف و هي الي بادرت باست خده و خشمه و قالت : عشان تعرف اني مااصد عنك
و ضربته و قالت : و لا تحسسني اني اكرهك تراني حتى انا احبك !
دخلت الهنوف بسرعه و هي ماتدري عن المشاعر الي هي عاصفه في صدر تركي منها
دخلت الهنوف و بدوا يرتبون الاغراض و يفرشون الفرشات في الحوش
جو الناس و استغبلتهم رغد و جمانه دخلت حرمه عجوز و سلمت و قالت: الطبيبه وين ؟
جمانه : الهنوف قصدتس ياخاله ؟
ام فالح : ايه ام الشعر الاحمر و العوينات الزرق
رغد: تجي ياخاله ادخلي سلمي عليها
ام فالح : ماابي ادخل انا ابي اكلمها الحين
استغربت البنات و قالت جمانه : طيب ياخاله ابشري
دخلت جمانه و لقت الهنوف قاعده عند حصه في المطبخ تحط القهوه و قالت: هنوفي في حرمه تبيك
الهنوف : من ؟
جمانه: ماادري قالت ماهي داخله وتبيها الحين
حصه : اسم الله من ذي ؟
جمانه : اول مره اشوف و جهها و عجوزز بالحيل
الهنوف : طيب يلا
طلعت الهنوف و راحوا البنات معاها
غرام : وينها قبل شوي هنا ؟
رغد : طلعت في الحوش تنتظرك
الهنوف : امشوا معي
رزان : البسوا عباياتكم اسمع خالتي تكلم تركي يبون يدخلون العشاء
لبسوا البنات و طلعوا وشافوا الحرمه واقفه و معها رجال
الهنوف : سمي ياخاله انا الهنوف
تقدمت الحرمه و قالت : انتي الهنوف يمي صدق ؟
الهنوف ناظرت في البنات : ايه ياخاله
تركي و هو داخل هو و فارس و سلطان و ذياب و هايف باصحون
تركي : بسرعه دخله هنا
ناظروا في البنات و الحرمه و شافوا الرجال واقف و قال فارس : من هنا قسم الرجال ياخوي
الرجال : ادري بس امي تبي الهنوف
تركي : وشفيه ؟
ناظرت الهنوف في الحرمه الي اقبلت عليها و حضنتها و هي تبكي و تقول : سامحيني ياوليدي مالحقتس
الهنوف باصدمه : من انتي و ليش اسامحك وش سويتي
ابتعدت الحرمه و قالت : تذكرين قبل ٨ سنوات العجوز الي عند باب بيتكم ؟
الهنوف : العم فايز
ام فالح : مانسيتيه
الهنوف : شلون تبيني انساه ؟
ام فالح : دريتي انه توفى ؟
الهنوف نزلت راسها : ايه الله يرحمه
ام فالح : انا زوجته ام فالح و ذا فالح
الهنوف : انتي ام فالح!
ام فالح : ايه انا
تقدمت الهنوف و باست راسها و سلمت عليه و قالت : شلون عرفتي مكاني ؟
ام فالح : و الله اني انا وولدي و ابوه الله يرحمه ندورك في كل مكان
ويوم جينا بناخذك من مفلح بدون مايدري مالقيناكم في البيت بس لقينا ابن اللذينا الله ياخذه و يحرق قلبه و شافنا الشرطي و سألنا عنك بعد وين كنتي ؟
الهنوف : هجيت ياخاله
ام فالح : و سعاد
الهنوف : ماتت
ام فالح : جعله يلحقها
فالح و هو منزل راسه : ووينه الحين ؟
الهنوف : مسجون
ام فالح : ليش ؟
الهنوف : خطفني ياخاله و انسجن
ام فالح باصدمه : متى !!!
الهنوف : قبل شهر كذا
ام فالح: حسبي الله ونعم الوكيل و عسى سوا لك شي !
الهنوف : بس انصبت بارصاصه باكتفي
ام فالح مسكت كتفها : وين يامي وين جعل يدينه في جهنم
الهنوف ابتسمت : خاله انا بخير الحين و مبسوطه الحمدلله مافيني شي لاتخافين
ام فالح ناظرت فيها و مسكت وجهها و ابتسمت : كبرت بنتي وش ذا الزين صرتي جميلة و جداً يابنتي بسم الله عليك
الهنوف استحت و حطت يدها على رقبتها : الله يسلمك
ام فالح ناظرت في فالح وقالت : هنوفي ماتغيرت اليا استحت حطت يدينها على رقبتها
ضحكوا كلهم و قالت سلمى : ايه ياخاله ووجها يصير احمر
ام فالح : خابرتها ، وش سويتي باحياتك الحين ؟
سلمى : ابشرك العشاء حق اليوم لها
ام فالح : ليش ؟
لين : صارت دكتوره
ام فالح ناظرت : صدق يمي ؟؟
الهنوف ضحكت : ايه
ضمتها و قالت : مبرووكك يابنتي مبروك يااحلى دكتوره
الهنوف : الله يبارك فيك ياخاله
لينا : خاله و ملكت بعد و بتزوج قريب بعد
استحت الهنوف و قالت ام فالح : سألتك بالله !
لينا اشرت على تركي : و ذا زوجها
ناظرت ام فالح و قال تركي : صيتي بالخير ياخاله
ام فالح : بانور ياوليدي مشاءالله تبارك الرحمن انتم مزوجين المزايين بعضهم؟
ضحكوا كلهم بأعلى صوت و قالت لينا : اخوي ذا المزيون راح عمره و هو يدور عيون البحر حب الطفوله
تركي : محد يقول عيون البحر غيري
لينا : ههههههههههه سم
ام فالح : الله يحفظكم ياوليدي و يسر امركم
تركي : امين ياخاله امين
جاء عبدالعزيز و هو شايل شماغه في يده و قال: ي ماما طاح هاذا
تركي نزل ل مستواه و قال: امش امش اسويه من اول اقولك لاتنزل راسك بقوه عشان لايطيح
عبدالعزيز : انا اسف مادريت
تركي بعثر شعرها و قال: معليه معليه
ام فالح : ليش يقولتس ماما
الهنوف قالت : ولدي
فالح : بعد جبتي ولد مشاءالله من مين؟؟
ضحكت الهنوف و قالت: سعاد قبل توفى اوصتني عليه و انا الي ربيته
ام فالح: انتي الي ربتيه و انتي طفله ؟
الهنوف نزلت راسها : ايه انا
ام فالح حضنتها و قالت : لاتخافين ربي ماينسى طيب فعلتيه و لا ينسى شقى شقيتيه و لا في شي حاطه لتس كذا الا و خير لتس و لا سبحانه مايعطي عبده شر كذا الا في شي زين و بيعوضك يمكن بالجنه
ابتعدت ام فالح و قالت : الاكسجين الي في خشمتس لمتى
الهنوف مسحت دموعها و هي كانت تحاول طول السنين هاذي كلها ماتبين ضعفها باذات لـ عبدالعزيز و لا عمرها بكت على حالها ابد
الهنوف : معليك يمي اسوي عمليتي ان شاء الله و اطيب
ام فالح مدت يدها تمسح دموعها و قالت : لاتضعفين و حنا معتس و لاتنزل دمعتس باعدم رضى باقدر ربي ادري تعبتي وشقيتي لاكن يمي مافي شر زي ماقلتس يجي كذا
حبت راسها الهنوف و قالت: انا بخير
و ناظرت في عبدالعزيز و قالت : و قويه لاجل العيون ذي جعلني فداها
و احب حياتي لااجل شخص شفته بعد فراق طويل معي مايترك يديني حتى و انا صديته في البدايه خوف من هالشعور
كانت تناظر في تركي و تقوله و قالت : و افرح لـ نفسي و لغيري لااجل خواتي الي اتقاسم معهم فرحي و احزاني
قالته و تناظر في البنات و قالت : و عندي سند و اخوان مايكسرون ظهري و اليا احتجتهم واحد يميني و الثاني ظهري و الباقي قدامي
قالته و هي تطالع في العيال
و قالت : و اليا مرضت القى عند راسي ميمتي و يمنى روحي فوق راسي تقراء علي
و عندي ابوي صح اني توني لقيته بس انه معي و احبه اكثر من اي شي و يبه عطالله بعد و عماني و عماتي بعد كلهم معي و ماخلوني جعل ربي يخليهم لي و يخليتس ياخاله
ذياب : انتي في عيوني قبل ماتصيرين اختي و الله مايصير لك شي و حنا اخوانتس و معتس
فارس: تونا عرفناك حنا يااهل الديره يالزرقاء لاكننا اخوانتس و معتس
الهنوف : الله يخليكم لي
راكان : ويخليتس لنا
الهنوف مسحت دمعها و قالت : ياربي اليوم مبسوطه وشوله البكاء
رزان : ههههه هاذا انتي ماتمسكين نفسك
ناظرت في هايف للحظه الي كان يطالع عيونها و شالتها باسرعه و قالت رزان : يلا ياخاله
جمانه تقدمت و حاوطت كتفها و قالت : تفضلي ياخاله ادخلي
ام فالح : لا و الله احسب ماعندكم شي جيت بدون عزيمه
فارس : لا و الله ياخاله انتم اهلنا دام ذي فعايلكم مع الزرقاء تفضل يافالح معي
ام فالح: الزرقاء وشهني ؟
امل : الهنوف فارس مايقول لها غير الزرقاء
ام فالح: ههه اي و الله انها زرقاء و حمراء و عيون بحر
لين : و ام العيون الزرق و هنوفي
ام فالح : مشاءالله وش كثر اسمائك
الهنوف : عاد شسوي كل واحد يناديني بإسم
ضحكوا كلهم و قالت وهج : يلا ياخاله عشان العشاء تفضلي
دخلت معهم و راح فالح مع العيال للخيمه
جميلة : هلا و مرحبا
تقدمت الهنوف و حاوطت كتف ام فالح و قالت : يمي هاذي ام فالح زوجت عمي فايز
جميلة باصدمه : بالله !
الهنوف ابتسمت و هزه راسها بـ ايه
تقدمت جميلة و سلمت عليها و قالت : ياربي حيها
ام فالح : السموحه جيت بدون العزيمه
حصه : لا و الله المحل محلتس يام فالح و حقتس علينا كثير
دخلت ام فالح و سلمت على الحريم و قعدت
سلمى دخلت و فتحت السماعه و قالت : يلا خلونا نشوش
الهنوف : انا برا انتم يلا
سلمى : امش معي بس يلا العشاء حقتس
الهنوف : مااعرف ارقص انتي ارقصي
لين : حتى انا بس اهبد اي شي
رزان: هاذا كله و تهبدين اجل لو ماتهبدين وش تسوين
لين ضحكت و قالت : يلا هنوفي بس على ذي الاغنيه و اقعدي
سحبتها مريم و قالت : يلا يلااا كلنا
غاده : خالتي زينب اكلتني باعيونها امشوا قبل تصفقني
قاموا البنات ورقصوا و كانت الهنوف في الوسط و هي سالفت كل الحريم عن شو زينها و زين جسمها و جمالها
سلمى: عاشتت بنت عبدالاله عااشت
ضحكت الهنوف و كملوا و انتهى العشاء على خير
