فضاءات اليأس والأمل / للكاتبة : أنفاس قطر

31

الجزء الحادي والثلاثون
.
قراءة ممتعة
.
ولا حول ولا قوة إلا بالله
.

الجزء الحادي والثلاثون

"وش ظنك إبي يبي فينا؟؟"

كانت هذه عبارة مي لحمد الذي دخل معها إلى صالة البيت الرئيسية وجلس وهو يهز كتفيه: علمي علمش..
نكلمه الحين ونشوف..

خلعت مي نقابها ووضعت شيلتها على كتفيها وجلست مجاورة له وهتفت بحزم رقيق لا يخلو من القلق:
شوف ياحمد.. لو إبي يبيك تنزلني عنده في ألمانيا وأنت رايح أمريكا..
أقول لك من الحين مستحيل..
مستحيل أخلي جدي.. عدا إنه امتحاناتي على الأبواب موب باقي شيء عليها..

تنهد حمد: بصراحة أنا متوقع ذا السيناريو.. وبديت أجهز له..
بس أبغي أقنع جدي يروح معنا..

اتسعت عينا مي: وامتحاناتي؟؟ مستحيل.. حرام عليكم..

ربت حمد على كتفها بحنو: يا بنت الحلال.. هذا كله حديث سابق لأوانه.. لا تستعجلين على رزقش..
خليني أكلم إبي الحين.. وعقب اعترضي على كيفش..

اتصل حمد بوالده وبعد السلامات والمقدمات المعتادة هتف له فرات بحزم:
حط التلفون سبيكر أبي أكلمك أنت ومي في موضوع..

توترت مي بينما حمد كان يرفع حاجبيه دلالة التساؤل المستغرب..
وعلى الطرف الآخر كان فرات ينظر لحامد شزرا وهو يشير له (كله منك!!)
ثم يهتف بحزم.. حزم من يعرف تماما ما سيقول:
أتوقع إنكم عارفين إنه نمر بظروف استثنائية.. والظروف الاستثنائية تحتاج دائما قرارات استثنائية..
وعلى العموم.. قراري اللي أبي أعلمكم فيه ماهو ب قرار مفاجئ أبدا.. هو قرار قررته من زمان.. لكنه كان مؤجل ليس إلا..
والظروف الحالية هي اللي خلتني أتعجل فيه..

مي بقلق: يبه ترا بطني خضني.. وقلبي صار يرقع.. وش فيه؟؟..

كان في مقاطعتها له فرصة لكي يلقي قنبلته عليهم وهو يهتف بحزم بالغ:
أنا خطبت.. وأنتظر رد الناس بالموافقة.. عشان أتزوج في أقرب فرصة.. يمكن أتزوج خلال هذا الأسبوع..

تبادل حمد ومي النظرات المصعوقة.. وجفت الكلمات على شفتي مي، بينما حمد هتف باحترام:
حقك يبه تزوج.. بس أنت شايف إنه الظرف اللي نمر به كلنا مناسب للزواج؟؟

فرات بثقة بالغة: هذا أنسب ظرف..

بدأت عيني مي تحمر وتتراكم فيها الدموع وعبرات ضخمة تسد حنجرتها دون أن ينتبه حمد الذي تساءل بذات الاحترام المستغرب:
بتتزوج عندك يعني وماتقدر تنتظر؟؟

تنهد فرات بثقة: لا بأتزوج عندكم في قطر.. وأنت اللي بتوقع بدالي على عقد الزواج بالتوكيل اللي معك إذا وافقوا عليّ الناس اللي خطبت عندهم.
وبتجي زوجتي عندكم قبل تسافر أنت.. عشان يتطمن بالي على مي وجدك.. وتروح أنت وأنت مطمن بعد..