فضاءات اليأس والأمل / للكاتبة : أنفاس قطر

3

قبل ما ندخل في بارت اليوم أيضا فيه طلب تكرر عن علاقات الأسر
مع أني ما تعودت على طريقة التعريف
أحب ترك القارئ يتعرف على الشخصية بنفسه
بس طلباتكم أوامر
عندنا حاليا 6 عوائل / من ظهر منهم تحديدا.. اللي ماظهر مارح اذكره.. أخليه للأحداث.. الترتيب حسب العمر..
عائلة سعود: أم سعود صافية..سعود زوج دانة، محمد زوج بثينة، مها زوجة متعب، الجازي متملكة خالد
عائلة عمهم هادي: العم هادي، زوجته أم خالد وضحى..دانة زوجة سعود.. مزنة.. خالد متملك الجازي.. غالية زوجة جابر..
عائلة جابر: جابر زوج غالية...
عائلة عبدالمحسن: عبدالمحسن أبو متعب، أم متعب نورة أخت أم سعود.. متعب زوج مها.. تركي متملك الهنوف .. البندري.. حزام.. وبنت عمهم الهنوف أبوها علي متوفي
عائلة طالب: متوفي.. الجليلة.. بثينة زوجة محمد.. مساعد.. أميرة.. وفيه شهاب اللي ماعرفنا علاقته فيهم..
عائلة فرات: حمد أبو فرات.. فرات.. حامد عم فرات.. حمد ومي عيال فرات..
.
بارت اليوم حماسي مليان أحداث وأحداثه كلها تدور في ليلة وحدة تحديدا في كم ساعة من الليل..
استمتعوا فيه..
وأنتظر آرائكم وتعليقاتكم وتحليلاتكم
.
استلموا الجزء الثالث
.
لا حول ولا قوة إلا بالله
.
.

فضاءات اليأس والأمل/ الجزء الثالث

انفجر والده بغضب أكبروهو يشد يده منه وهو يصرخ به ويشير لسعود ومتعب الواقفان بتحفز منذ سمعا الصراخ أن يتقدما : دامني غصبتها على قولتك.. تطلقها ذا الساعة .. طلقها وذولا سعود ومتعب شهود..
خلصنا من ذا السالفة.. ثمان سنين وأنا أحايل فيك تعرس وأنت تمنن.. على ويش تمنن.. بنت علي هي المنة عليك..
طــلـــقـــها.. يا الله طلقها ذا الساعة.. والله ماتكمل عدتها إلا هي عند اللي يسواك ويسوى طوايفك يا الرخمة..
متعب وسعود اقتربا بسرعة قبل أن يتهور أحد منهما وهما متفاجئان من هذا الانفجار غير الطبيعي لأبي متعب..
يشد سعود أبا متعب لزاوية بعيدة من المجلس وهو يحاول تهدئته..

بينما متعب شدَّ شقيقه خارجا ليركبا سيارة متعب.. متعب حرك سيارته بعيدا عن البيت و لم يتكلم مطلقا.. وكل ماكان حاضرا هو صوت أنفاس تركي المتطايرة..
حين هدأت أنفاسه وهو مازال صامتا كان متعب من تكلم بسكون مقصود: ممكن أعرف ليه ذا كله؟؟

تركي شدَّ غترته ليضعها في حضنه وهو يمرر أنامله في شعره بحركة لا شعورية ويهمس بإرهاق:
اسأل إبيك لا تسألني.. نقاش عادي حوله لحرب..
أنا توني واصل الفجر وهو متجهز لي..

متعب ببساطة: ماتبيها.. طلقها ..ليش تطول السالفة أكثر من كذا؟؟

التفت تركي عليه بحدة: ومن قال لك ما أبيها؟؟

متعب بذات البساطة: مهوب على متعب يا دكتور تركي.. أدري أنك ما تبيها.. ولا أنت مقتنع بالسالفة كلها..