فضاءات اليأس والأمل / للكاتبة : أنفاس قطر

6

فضاءات اليأس والأمل / الجزء السادس

أبو فُرات حين سمع (بنات الناس) تكهرب جسده بعنف.. وهو يتخلى عن سمت هدوئه المعتاد وينتزع حامد من عضده ليوقفه بحدة ويهتف بغضب كاسح:

السالفة فيها بنات ناس يا حويمد الزفت!!!

حامد خلص عضده برفق وهو يقبل رأس شقيقه ويهتف باحترام ومودة: لا تعصب جعلني فداك.. العصبية مهيب زينة لك
ولا يروح بالك بعيد.. ولدك الشيخ فُرات لو ماولعها حريقة ما يستانس..
السالفة كلها إنه فيه بنية كانت مأذيتني اتصالات .. وأنا غسلت شراعها..
البنية راحت كلت لها كم حبة بندول تبي تتدلع على أهلها
وأهلها لقوها مغمى عليها ودوها للمستشفى.. وأختها قالت لهم أنها هددت تنتحر لأن حامد آل سطام يصدها..
أم البنت كلمتني معصبة عليّ وتسبني أني كنت بأذبح بنتها وإني كان مفروض تواصلت معهم أبلغهم..
وإبيها كلمني يشكرني إني ما استغليت تعلق البنت فيني..
بس طبعا لأن الدوحة صغيرة والسالفة طلعت من المستشفى وتنطورت الأخبار هنا وهنا.. فتو ولدك أبو الفضايح درا بها..
وإلا السالفة صار لها شهر ونص.. شهرين..

فُرات بغضب مكتوم: وعاد لك وجه تحكي وأنت ما حتى علمتني؟!!

هتف حامد بشهامة حقيقية : لا.. اشرايك أفضح بنت الناس عندك؟!.. والله يافُرات لو بأعلمك بكل سالفة بتألف كتاب..

فُرات تنهد بحزم حان: حامد ليه شاب كذا ؟! تراني مستوجع منك..
متى ماكنت أشيل حمولك؟!.. ومتى كنت أدور للفضايح؟
ومتى ما غلاك بغلا عيالي وأكثر؟!.. أنت ولدي الكبير..
والله أني أبي مصلحتك.. الزواج استقرار وستر وتحصين..

ابتسم حامد بمودة وهو يميل ليقبل كتف فُرات: قل ذا الكلام لنفسك أول..
وإلا باب النجار مخلع... تعطي نصايح قبل تنصح روحك..
وتكفى فُرات.. تدري زين إني ذراعي ما تلوى.. إذا بغيت العرس علمتك..
ولا تخاف.. ماحد بخاطب لي غيرك أنت وحمد.. وأنتو الي تخيرون النسب اللي يرضيكم..

صمت فَرات على مضض.. بداخله قلق كبير يتزايد على حامد..
شاب ووسيم ومشهور!!!!
صفات كلها كالضوء الجاذب للفراشات!!

***************************

مُــــجــــتــــمــــعـــ ـات..
مساء أنثوي بامتياز..
يتفرقن في الجلسة بين قابعات على المقاعد وجالسات على الأرائك التي سحبوها للأرض..
جمعتهن هموم يتكلمن في كل شيء عداها.. ويدعين انشغالهن بهموم أقلهن هما..
تلك الغائبة المدللة المعتكفة في غرفتها منذ سفر الجليلة.. اعتراضا على سفر الجليلة..

" بثون.. اطلعي لاختش الدلوعة خليها تنزل.. تعبنا نتناها.."

بثينة بتأفف: تعبتني يا الجازي والله.. حتى الأكل بالزور.. نعنبو لو تعرس جليلة وش تسوي؟؟.. كان ما تستخف علينا!!