فضاءات اليأس والأمل / للكاتبة : أنفاس قطر

39(2)

فضاءات اليأس والأمل/ تكملة الجزء التاسع والثلاثون الأخيرة

"أبو سعود اشفيك؟؟..
من رجعتك من المستشفى وأنت وجهك أسود
عسى مافيه شيء كايد؟؟"

زفر جابر وهو ينظر لفرات الذي كان يجلس مجاورا له... بينما حامد يجلس مقابلا لهم ممدا على سرير وضعه فرات له في زاوية المجلس..
حتى لا يشعر بالملل أن يبقى حبيسا في الداخل.. وفي نفس الوقت لا يضغط على نفسه بالجلوس..

جابر بضيق كبير: الدكتور يبي يبتر الجزء الباقي من كف أختي بالكامل..
وهذا الحل صار لي سنوات رافضه عشانها...
لأنها تستخدم هذا الجزء بشكل مساعدها شوي...
بس هي تتعذب من الوجع صار لها سنين..
ولا أعرف وش أسوي..

حينها هتف حامد باهتمام عفوي: ليش هلك وش الحالة اللي معهم بالضبط؟؟

رغم غرابة السؤال..ولو كانوا في مجلس من مجالس الدوحة.. قد يكون هذا السؤال محرجا نوعا ما..
ولكن تجمع الناس في الغربة يجعلهم أكثر قربا وانفتاحا..

هتف جابر بذات الضيق: انولدت ومعها ضمور في كفها اليسار.. بس أجزاء من الكف نفسها موجودة..
لما صار عمرها ١٩ صارت معها حالة نادرة من ضمور العضلات.. بدت كفها تضمر أكثر.. وهذا الضمور مؤلم جدا.. تحس فيه بقوة...
وقتها قالوا لنا الأطباء أنه قطع الكف كاملة هو الحل.. عشان يتخلصون من كل الخلايا المصابة..
بس رفضنا.. فصاروا يضربونها في يدها بأبر تأخر هذا الضمور وتسكن الوجع...
بس الوجع كان يرجع لها من وقت للثاني..
وصارت الفترة الأخيرة عايشة على المسكنات...

حينها هتف حامد ببساطة: توكل على الله.. وخلها تقصها..
وتركب يد صناعية..
لأنه اليد الصناعية بيكون مكانها من المعصم أفضل..
و وجود الذراع كاملة بتدعم وجود مسند اليد الصناعية..
فتصير دعامة اليد الصناعية بدايتها من تحت المرفق..
بيكون هذا الحل الأنسب بدل العذاب اللي هي عايشته..

صمت جابر كما لو كان يفكر. جلس قليلا ثم غادر إلى شقته..
فور خروجه، التفت فرات لحامد وهتف بغضب: وش ذا اللقافة عندك؟؟ أنت ما تستحي؟؟ وش دخلك في أخته تنشد منها؟
أحرجت جابر..

هز حامد كتفيه وهو يبتسم: ماشفته انحرج.. بالعكس حسيته قعد يفكر في اقتراحي..
ثم أردف بابتسامة واسعة: وبعدين هذا جزاي وأنا أحاول أساعد في حل مشكلة صديقة المدام أم شهاب الصغير؟!!

اتسعت عينا فرات وهز يهتف بحزم: وأنت وش دراك إنه أخت جابر صديقة المدام إذا أنا ما أدري؟!!

حامد المبتسم دائما: مي تقوله.. ماجبته من عندي..

زفر فرات بغضب: أنت ما تستحي من سوالف الحريم.. تنّشّد منهم..