فضاءات اليأس والأمل / للكاتبة : أنفاس قطر

12

فضاءات اليأس والأمل/ الجزء الثاني عشر..

و حينها لم يجد فُرات إلا أن يبتسم بإعجاب وهو يقول لصاحبة الإجابة:
عفية يا بنتي.. تستاهلين بونص 10 درجات مهوب بس 5..
بس أنا ما أقدر أعطيش أكثر من خمسة..
الاسم لو سمحتي عشان أرصد لش الدرجة..

الصـــــوت بــــثــــقـــــة:
أميرة طالب متعب آل حزام

.
.

الجليلة بتأفف حازم : تراكم كلتوا كبدي عشان ذا الإمبريالي المتخلف..

أميرة وضي يتقاذفان الكلام: تكذبين على الدكتور.. وتقولين أنش أميرة عشان يسجل البونص لها..
أصلا حتى شرعا ما يجوز.. وأنتي مصلية ومتدينة وعارفة ربش...

ابتسمت الجليلة: فهمي للموضوع من ناحية ثانية تماما.. لأنه هذا مجرد بونص.. يعني هدية..
شيء زيادة عن حقي في المقرر.. والهدية من حقي أعطيها اللي أبي..
يعني لو كان الإمبريالي عطاني فرضا قلم هدية لما جاوبت.. وأنا خذت القلم وعطيته أميرة.. كنتو بتسوون نفس الفلم؟!!

أميرة برجاء: تكفين جليلة أنا أصلا ما أبي ذا البونص.. أسألي شيخ أكيد أنه حرام..

توترت الجليلة بشدة.. هي فكرت في هذه الدرجات كهدية تهديها لأختها..
لأنها تعلم أن أختها ستحتاجها بالفعل.. وخصوصا أنها رسبت في كل الاختبارات التشخيصية في كل المقررات..
في دلالة واضحة على ماسيحدث في الامتحانات النصفية القريبة.. وفجّر قلقها على أختها..
ولم يخطر ببالها أبدا أبدا أنه قد يكون فيها مجرد شبهة حرام..

تنهدت بحزم وضيق كبيرين: خلاص انتهى الموضوع.. وش تبوني أسوي؟؟..
أروح أقول له أنه أنا الجليلة يعني.. وجاوبت باسم أختي..
عيب وغلط وفضيحة.. وأساسا ما أعرف كيف سويتها..
بس أميرة وترتني بدرجاتها في الاختبارات التشخيصية.. وكان موجعني إني ما أقدر أساعدها بشيء..
فجاني ذا البونص من السماء.. والله ما أعرف كيف سويتها!!

همست ضي بقلق: الخوف أنه البنات الملاقيف يروحون يقولون له.. خصوصا إنش صرتي معروفة في القسم.. بين البنات والدكاترة..

تنهدت الجليلة بثقتها المعتادة: ما أعتقد.. يعني وش ذا الملقوفة قليلة الحيا ..اللي بتسويها..

في وقت حوار الاثنتين.. كانت أميرة تفكر بشيء مختلف.. همست بتوتر كبير:
تدرون بنات وش اللي أنا خايفة منه فعلا.. وكاسر ظهري..
بنات إحنا باقي لنا تقريبا شهرين ونص ثلاثة لين نخلص الفصل..
وأنا الحين عند دكتور فُرات العبقرية اللي جاوبت السؤال اللي ماحد عرفه..
تخيلوا المحاضرة الجاية وإلا اللي عقبها.. يقول : يا أميرة آل حزام وش رايش في القضية الفلانية أو القضية الفلانية؟؟
شهقت: يمه يمه.. الفضيحة اللي بجلاجل جاية جايه..