اليتم وظلم المجتمع

بارت الثاني والعشرون

#اليتم_وظلم_المجتمع
بقلمي✒#امنيه

‏وعاوَنتك علَي من شفت عذرك خاب
قنعت النفس كتلها يتغير
لا گصرك طوَل لا فاض بيك الطيب!
لا شمسك علَت والراكد تبخر !
لا مدك وصَل والعين شافَت نور
لا كسرك جُبر.. لا لْغزك تفسّر !.
.
.
(بيت ابو علي)

ام علي :- وهي توللول وتندب حظها اوف ياربي هو هذا هم حظي محتارة بذولة العدي ونوب جملتهم زهيرة خايبة شلج بالطلاك ولج يمه مو لعبه

زهراء :- كاعدة بالغرفة كاتلني القهر وصوت امي يوصلني ساعة ترزلني وساعة تندب حظنة وحظها كمت قفلت الباب وكعدت ابجي واذكر كلام عزام ...
الماضي:
عزام:- زهرتي لاتضوجين من كلام امي هي مرة جبيرة وتشوف من منضورها

زهراء:- بس هي تكرهني لان انه ماخلفت لهسة وهي تدري هالشي بيد الله انه تعبت والله يومية تبسمرني وتكلي العاكر

عزام :- ميخالف يروحي اتحمليها انه مااكدر احاجيها امي ولازم احترمها، لخاطري اصبري وان شاءالله يجينة طفل وتسكت والله هي تحبج بس تنقهر لان تريد تشوف احفادها

زهراء:- هي تكلي راح ازوج رجلج عليج صدك تزوج عليه عزام؟

عزام:- انه ازوج عليج !امداني وين الكة مثلج زهرة بيتي

زهراء:- ببتسامه توعدني عزام ماتزوج عليه؟

عزام:- وعد يروح عزام واذا خلفت الوعد ازين شواربي

الحاضر:
زهراء:- ههههههه ضحكت بنص بجيتي ضحكت ضحكة هستيرية اضحك وابجي ضحكة اللي بداخلها يكون قهر وحزن مغيم كلبي يتكطع ودموعي تجري واضحك !
...... شكد غبية انه جنت غبييييية ...شلون صدكتة شلون هو هذا طبع الزلم غدارين جذابين ...صوتي راح من العياط جان كبالي ميز طشرت كل الغراض البيه اتهسترت ضليت اضرب على الباب باثنين ادية جذاااب كلكم جذابين امي اجت تدك عليه الباب وتصيح عليه حتى افتحة بس انه خويت من البجي وكعت بالكاع ودموعي توكع من عيني للكاع سكته صوت امي يروح ويجي احس دخت كلش وبعد ماحسيت بشي ....
كعدت لكيت نفسي نايمه بفراشي وبيدي مغذي ويمي امي واخواني

علي:- ليش هيج تسوين بروحج يبعد اخوج ليش تأذين رويحتج الترفه وتأذينة عليج

زهراء:- بجيت من كلامه لزم ايدي وباس راسي ويمسح على راسي بحنية ويحجي بهدؤ عبالك ابوي مو اخوي

علي:- انه ادري بيج مقهورة وخاطرج مكسور وحقج ماتلامين الغدر من القريب مو سهل بس البجي موحل انه اريدج ترجعين زهورتنة القوية وتملين علينه البيت وحقج اجيبة الج مربع واسحلة سحل والله انه بس اريدج تهدين وترتاحين وتقررين شنو تردين ويجرالج

زهراء:- كتلة انه اريد اطلك مااريد ارجعلة بعد ولا اشوفة ،كال هاهية يجرالج ، باوعت لامي لكيتها ساكته تباوع علينه كتلها يمه شو ساكتة خلت شيلتها على وجها وبجت تفطر كلبي وانه اشوفها مقهورة كتلها لاتبجين يمه اذا طلاكي يقهرج اتحمل الضيم ولااقهرج