اليتم وظلم المجتمع

البارت الثامن

علي:- لاخوية مارايد شي بس انه شفتهن بنات وحدهن واختهن تخربطت كلت اجي اساعد

عادل:- مشكور مانريد مساعدة

علي:- ترخصت منهم ومشيت رجعت لقبر ابوي وانه كلساع عيني تروح عليها يمكن لان شفتها صغيرة وشايلة هموم اكبر منها .. اخذهن الولد وراحن شارع المقبرة طويل كلش مشوا مسافة وانه وراهم كاعد يم القبر اباوعلهم ردت ادير وجهي وشفتها التفت تباوعلي شفت بعينها نضرة ماعرفت افسرها استغفرت ربي ورجعت للبيت طول الطريق ماراحت من بالي صورتها ولاصوت بجيها وصلت للبيت تعبان كلش وبنفس الوكت ضايج ماادري ليش بقيت افكر بالابنية ياترى شنو صاير الها مخليها هيج مقهورة وتشكي اخذني التفكير الاان نمت
.........................................................................

عذراء:- جنت ابجي ومنهارة يم قبور اهلي واشكيلهم ماادري اكو احد موجود غيرنة فجاءة سمعت صوت شخص غريب رفعت راسي شفت ولد شاب اسمر لاف غترة سودة على راسة و لابس دشداشة سودة ومترب من تراب المقبرة بنضرتة خوف وقلق وهو يسئلني اذا محتاجة شي اوبيه شي بالبداية خفت منه بس من شفت ملامح وجها فجاءة راح الخوف مني مااعرف ليش ضل واكف يسئل ردتة بس يروح لان اخاف يجي عادل وعبالة عندة شي وياي وصدك اجه عادل وكلبي وكف من الخوف بس الحمدلله ماتعارك وياااه  عاادل جان حيل عصبي ومقبل نبقى اكثر يحجي وهو معصب وطابك حاجبة

عادل:- يلا كافي امشن نرجع

عذراء:- فدوة خل نبقى بعد ماشبعت منهم

عادل:- هو انه عفتج وياهم عبالي ادمية طلعتي عايفة اهلج وتقصقصين وي الرجال الغريب

عذراء:- شنو اقصقص وي الرجال الغريب ترة عيب هذا الحجي الولد اجه عبالة محتاجين مساعدة قابل شعندي وياه

عادل:- ديلا يلا فضيها امشي انتي وخواتج هو صوجي جبتجن

عذراء:- حيل نقهرت من كلامة سلمت على اهلي وبست قبورهم ورحنه مشيت واني بدون مالتفت  اشوف الولد كاعد يم واحد  من القبور صار شكد مسامعة احد يكلي محتاجة شي تردين شي مشيت وعبرنة مسافة ماادري ليش حسيت لازم اشوفة اخر مرة التفت وشفتة يباوع النه من بعيد من بعدها مشينة وصرنة بعيدين وعادل بس ينفخ ويتأفاف وصلنة يم خالي ومرتة يمة والكل جانوا منتضرينة

ابو عادل:- وين صرتوا هن ذني القبور شني دقيقتين اسلم واقرة الفاتحة وارجع المن باقييات هناك

عذراء:- سكتت ما حجيت شي مقهورة وتعبانة وضايجة وكلهن بيه بس اباوع بعيوني حجت مرت خالي

ام عادل:- هاا هسة خرسيتن قبل شوي خبصتنة خبص باهلجن عبالك توهم ميتين ماجنهم صارلهم سنين حتى عظام ماضلت الهم

عذراء:- مااعرف شصار بيه من كالت هيج ماصيطرت على دموعي مااحس الا انجرت مرت خالي من عباتها اباوع عليا هجمت عليها تريد تفرسها