اليتم وظلم المجتمع

بارت السابع والعشرون

#اليتم_وظلم _المجتمع
بقلمي✒#امنيه

بطرانه الشمس!
تجويني كل يوم ..
وانا حرورتي تجوي
التنانير!
هو العاش عمره
بضيم وهموم
عنده الموت
تسيورة خطاطير!
....................................
عليا :- رجعنه من الخطوبة مهدود حيلي من القهر كلما اتذكر نضرات مهدي كلبي يتكطع عليه .. اكول اني شلون كدرت احجي هيج واقهرة واني ماشفت منه بس الزين بس موبيدي والله غصباً عليه لازم يجي يوم  وتعذرني
..صعبة عليه فكرة ماراح نصير لبعض وراح يروح لغيري بس مااكدر اذا خليته يبقى متمسك بيه خالي راح يعاند اكثر وراح يعرفون اكو شي واكيد راح يلزمونها نقطة ضعف وهو راح يتأذة وياي واني مااريد اذيتة خليه يكرهني ولا يتأذة بسببي
..... احس نفسي ذبلت حيل وجوة عيوني اسود صاير من التفكير والقلق والقهر وتفكيري بغصون وخوفي عليها كلما تمر الايام اصير اكثر ادمان على التفكر بحيث صرت جلد وعظم اباوعلهم هم بغير عالم يجهزون لعرس عادل جانت الفرحة والسعادة غامرتهم
حلفت باعزاز كلبي وباخيتي المادري شحالها هسة بسببهم الا اطلع هاي الفرحة من اخشومهم
.. مرت خالي جانت مستعجلة تريد بس تزوج عادل حتى خاف يبطل ويشرد
..اقل الشهر كملوا كلشي وحتى العروس جهزت نفسها
اليوم يوم العرس وكالعادة الشغل كلة عليه
واشتغل سكته والبنات يدكن ويركصن من الصبح لليل
راحوا الزفة جابو العروس بس مااخذوا نسوان وياهم بس امه وهي العروس اجن وياها اخواتها وامها تعشت  الناس وبدت العالم تروح جنت واكفة بالمطبخ اعزل بالمواعين دخل مهدي بطولة الحلو شايل مواعين جايبهن من الزلم من شفته ايدي توقفت عن الحركة وعيوني اكلته اكل وكلبي يدك سريع ماعبالك اني نفسي الكتلة ذاك الكلام بقى واكف شوية بدون مايحجي شي وبعدين كال عشكج يبت الناس مبين يلوعني هواي بس انه اهل اله ومااعوفه لو على كص ركبتي
.. كال كلامة وطلع ارتجيت على الكاونتر ساكته عبالك جنت بحرب كلبي بيه طبول يدك سريع
.. اجت سندس وياها اخت العروس شادة  خشمها وصابغة وجها صبغ مابيها ذرة انوثة تباوعلي صفح وتخزر بيه كلما اشوفها 
.. سئلتني سندس على اكل العرسان كتلها ماادري بيه
بقت تعد وتصف وشياكلون وشلون كلتلها اني مالي علاقة محد كلي راحت شوية ورجعت كالت راح يجيبونة من المطعم
.. بقت سندس واكفة يجيبون العشاء ويمها بت خالتها اخت العروس يباوعن من شباك المطبخ كالت بت خالتها  
_يمه شوفي هذا شكد حلو الله عليج سندس شيصرلكم
سندس:- وينه ياهو منهم

_هذا  الطويل ابو القميص المخطط

سندس:- هاا هذا مهدي ابو يصير ابن عم ابوي
_وجح شكد حلو مزوج لو لا

سندس:- ههههه لا  ولج مامزوج تردينة

عليا:- اسمعهن وقبق راسي طار من القهر والغيرة احس شعري وكع بقيت الوب يمهن وهي بس تباوع لمهدي وي الشباب يلمون بالكراسي والمواعين وكلساع تذبلها حجاية تتغزل بطولة وشكلة .. كعدت بالكاع الم بالمواعين اليمي واباوعلها بودي افترسها محتارة شسوي بقيت الوب بمكاني ماكدرت اسكت
...صاحو عليه على جاي خليت بصينية استكاين الجاي وفتت من يمها تعمدت اعثر نفسي ونكلبن نص الاستكاين عليها صارت تكمز وتعيط وتجر بملابسها عن جسمها بس حيلل بالغت لان ماوكعن كلهن عليها ومو كلش حار الجاي  بس هي تحب تتعاير الضاهر هاي العائلة عايشين عالتصنع
.. ضلت تعيط وتبجي وسندس تسكت بيها اجت امها ومرت خالي واخذنها وغسللها المكان الوكع عليه الجاي
كتلها ماادري بيج ماانتبهت وهي كعدت تعد وتصف وتلعلع .. امها خلت ايدها على حلكها واخذتها تريدها بس تسكت راحن واسمع باب المطبخ تندك دخل سعيد ووياه مهدي وخالي كالوا شنو هذا الصوت جاوبتهم سندس وكالتلهم الصار راحوا جوة يشوفونها ومهدي بقة واكف مدنك يفر بسبحته احترك كلبي منه كتلة
بس ترة عيب عليك كاشخ وتفتر بالحوش كدام البنات عود حتى ينعجبن بيك باوعلي مستغرب
مهدي:- كال يابنات ذني؟