اليتم وظلم المجتمع

بارت السادس والعشرون

#اليتم وظلم المجتمع
بقلمي✒# امنيه

يلتم التعب بيه
واكول ايام وتعدي
اكابر والجرح يكبر
جبيرة جروحي
موكدي..💔

عليا:- ضاكت الدنيا بعيني من سمعت كلام خالي
..خالي! اخو امي وبالعادة الاخو يصير حنين ..
هيج يسوي بينه ياخذ بيتنه ويأجرة للغريب ويصرف فلوسنه واحنه ايتام وبنات حسرة علينه اللبسه وحسرة علينه ناكل مثل الناس سنه كاملة الوحدة بينه اذا عدها تلث لبسات للبيت نعتبر نفسنه زناكين!
واللبسات اصلاً مو مثل البشر ملابس تعبانة وهلكانة نلبس بيهن حتى يسترنة
... جان كليوم يعيرونه هو ومرتة ومحملينه منيه لان عايشين وياهم وناكل من اكلهم واحنه مكسورين وساكتين سنين احنه مذلولين ومحد حن علينه بابسط حقوقنة مافكر ينطينه من فلوسنه لو بس منطينة نصهن ونص الثاني اله ميخالف نعتبرهن ايجار لان عايشين وياهم !
بس ماكو لاحياة لمن تنادي اختاروا ياكلون مال اليتيم ويظلمونة في سبيل ياخذون كم فلس ..
بقيت صافنه ايام وساكتة حتى حسوا عليه..
سكتت كلش وتقوقعت وي نفسي نصدمت صدمة عمري ماجنت اعرف احنة النه رزق من الله بالحياة وبعدة خير اهلنة موجود جنت افكر احنة نشم الهواء هواي علينه ماجنت ادري النه حق ولازم ناخذة من حلك السبع
... حقدت عليهم بكد السماء والكاع لو اشوفهم ميتين ابشع موته كدامي مايرفلي جفن بقيت ايام واني اطحن بروحي ... ساكتة وافكر حتى غصون كوة اخلي بالي وعقلي وياها على كد بس ادرسها صارلنة شهرين تقريباً من رجعنه لمنطقتنة القديمة ومر على جيه مهدي واهلة فترة وبعد ماسمعت بيهم اجوا ..
مرت خالي بدت تلح على عادل تريد تزوجه كليوم تلح عليه وهو مامقتنع وضل تفتر وراه الا ان قنعتة تزوجه بت خالته اسمها نور تريدها لان بت اختها هو جان ميت على عذراء وكلما تكلة على بت اختها يكلب الدنيا
بس هسة اختلف الوضع بعدت عذراء عن طريقة وضلت تحوم عليه الا ان اقتنع وباجر الخطوبة جانوا فرحانين ويجهزون ويشترون اشكال والوان
.. عيني تروح على تجهيزات الخطوبة واذكر هن فلوس ايجار بيتنه ايجار ذيج الجنه الجانت لامتنه ويزيد حقدي عليهم بس تغلبني نفسي واختلي بيها وابجي بحركة كلب وهضيمة وبعدين احاول ارجع الحقودة اللي لازم تتنقم لاهلها من الظلموهم جنت انضف واجهز وياهم بسكتة مافتحت حلكي بشي
.. سندس وسلوى اشترن احلى ملابس وراحن حتى صالون واحنه بقينة على ملابسنة!
قبل الحفلة بيوم كالت مرت خالي شتلبسن باجر بالخطوبة ترة انه عازمة كومة عالم مو عبالجن تفشلني بخركجن
جاوبتها بنفس طايبة من كلشي كتلها هاي ملابسنه الميعجبة لا يباوع علينه
..مارضت على كلامي بس جانت فرحتها وحماسها مايسمحلها تنكد على نفسها وتداهر وياي راحت يم خالي مدري شكلتلة وراح مثل الطلي ورة ساعة اجة جايبلنه ملابس اني وغصون مو محبتاً بينه بس حتى مانفشلها كدام الناس بلبسنة المنهري اهم شي عدها الناس ماخافت من ربها ماخافت تتفشل بعدين كدام ربها باللي سوته بينه
اخذناهن مجبورين غصون فرحت بيهن بس اني داخلي يغلي من القهر يتصدقون علينه من فلوسنه!
.. صار الصبح وبدت العالم تجي من كل مكان وسوو غدة فخم وبعد الغدة جهزنة نفسنه ورحنه كلنه بسيارات جان الدك والركص بالشوراع والاغاني تركع بس اني بغير عالم اني مجلب بيه الهم والحزن من راسي لاصبع رجلي كاعدة وياهم بالسيارة ووياي غصون فرحانة بالاجواء بس ماتحب تخالط عيني عالطريق وبالي بغير مكان تغلغل بريتي عطر مو غريب رفعت راسي شفتة مهدي جان يسوق بسيارة بصفنة كلش بس هو بيها وفاتح الجامة وعينه عليه وكفت الغصة ابلعومي حسيت شفت واحد من اهلي بنص هذا الضياع ماسيطرت ونزلت دمعة من عيني
..جانت عيونه عليه ووجها حزين مثل كلبي عيونه بيها كومة حجي يسوق وعينه علينه من شافني بجيت تخربطت اوضاعة وفلتت السيارة من ايدة وضلت تفتر بالشارع كلبي نخمش مني وضاك النفس بيه كمت اعيط كل علو حسي الحمدلله محد انتبه عليه لان السيارة جانت كلش قريبة علينه وكلهن خافن وضلن يعيطن كلها خافت على نفسها الا اني خفت على كلبي
ايي مهدي قطعة من كلبي
..لا مو قطعة من كلبي هو كلبي كلة شفت بيه الحنية اللي جنت اتمناها شفت حرصة وخوفة عليه شفت اهتمامه بيه وغيرتة عليه شفت مخافة الله عدة
.. ضلت سيارتة تفتر وتشحط بالشارع سيارات الخطوبة كلها وكفت نزلوا حتى يساعدونة بس هو سيطر ووكفها راحو يركضون يتطمنون عليه واني نزلت وي الهوسة اباوعلة وايدي على كلبي نزل من السيارة مبتسم يطمنهم ماكو شي تقربت عليه ردت اتحمدلة بالسلامه بس بسرعة صاحو حتى نرجع ورحت للسيارة وكملنة طريقنة وصلنة وتمت الخطوبة جانت العروس واهلها طايرين بعادل عبالك نازل عليهم من السماء وامها كلساع وكالت منتظرين هذا اليوم صار سنين
... العروس جانت سمرة  طوخ وضعيفة مابيها شي حلو ابد وتتصنع الدلع حقة عادل من مارادها وراد عذراء جان بينهن فرق شاسع مو لان اختي وامدح بيها بس عذراء جميلة ملامحها حلوة وطولها يجنن رغم ابد مامعتنية بنفسها بس حلوة حيل عيونها مثل الغزال تمت الخطوبة وطلعنه حتى نرجع للبيت لكيت مهدي منتجي على الحايط وعينة على باب المطبخ يدورني طلعت بسرعة ماردت اتواجه وياه بس هو صار اسرع مني ولزم عليه الطريق
مهدي:- اوكفي عليا اريد احاجيج

عليا:- خليني اروح فدوة لا يشوفونة وتصير فضيحة

مهدي:- شالقصة يمعودة بس حجايتين ماائخرج
.. اسمعيني زين انه كد وعدي الج واخذج حلالي لا تخافين ولا تخلين ابالج اتراجع من خالج يرفضني راح اخذج واخلصج من ظلمهم

عليا:- جان يحجي بحركة كلب وعيونة تتفحص وجهي بقلق داخلي بركان بس اتصنعت البرود وجاوبتة
... بس اني مااريد ازوج ومااطلع عن شور خالي!
... بقة صافن بوجهي ممستوعب كلامي عصر وجها بيدة وكال
مهدي:- مو كتيلي احبك !

عليا:- جنت غلطانة ممتأكدة من مشاعري وهسة اتأكدت

مهدي:- شتأكدتي هسة!

عليا:- بلعت ريك احس بلعومي نشف وعيوني حركني ملابسي تعقجن كد مااعصر بيهن جاهدت نفسي وكتلة تأكدت اني مااحب اي شخص واصلاً مااعرف الحب بقى بمكانة ساكت وعيونة نترسن شرايين حمر يباوعلي على نظرة وحدة بدون مايرمش
.. عفتة ومشيت سريع متوجها للسيارة هنااا اطلقت العنان لدموعي وصارن يتسابقن على خدي شهكت بصوت مسموع واني اتذكر صدمته بيه اخخخ ياحبي الوحيد شلون اورطك وياي واني عايشة وي وحوش اني هسة عايشة بس حتى انتقم ومااكدر انتقم اذا انت تحارب علمودي انت نقطة ضعفي مااريد يلزموني منها
.................................
بيت ابو علي:-

زهراء:- مرت الايام وانه على حالي كرهت حتى الخياطة من بعد موقف مرت عزام .. سمعت صار عندة ولد وطاير بيه اما انه فهواي يجوني على زواج بس اكثرهم جانوا مزوجين وانه ماقبلتها على نفسي ومااقبلها على غيري ..
ماسه بت علاوي شايلة عنه الوحشة تخبل فرهة وتلعب وجها بشوش عبارة عن خدود تفتر بالبيت صارت تمشي بس كلساع توكع علاوي طاير بيها
.. امي تلح عليه يزوج ومايقبل يكول مااريد اجيب مرت ابو لماسه امي هواي دورت لحسوني مرة ولهسة مالاكية كلما تخطب يرفضونة لان محروك
.. جنت اخيط لابنية تطلع اكبر مني بكم سنه جانت ارملة وعدها جهال وحالتهم تعبانة فاني اساعدها لوجه الله جانت كلما تجي تجيبلي شي وياها هدية وانه اكعد الومها لان ماعدها وهاي فمرة اجتني جانت فرحانة حيل وجايبة وياها علبه حلويات ماسئلتها شنو المناسبة لان دائماً تجيبلي بدون سبب  بس هي كالت قدمت سادس اعدادي خارجي ونجحت بمعدل  حلو واراح تدخل كليه حتى بلكي تتعين وتعين روحها وجهالها فرحتلها من كل كلبي جانت فرحانة حيل ومتحمسة وتسولف شنو تسوي وتفكر بمصرف الجهال والدوام بعدين سكتت وباوعتلي باستغراب وكالت
.. انتي شمخلصة دراسة؟
كتلها اخذت شهادة ثالث متوسط وتركت
كالت ايي يعني تكدرين تقدمين سادس خارجي
كتلها لا ويني وين المدرسة
كالت واذا شنو ناس اكبر منيمنه ودرست وتخرجت شبيج لاتتشأمين مادام ماعندج شي ومامزوجة ادرسي وحصلي شهادة ووضيفة كتلهاالله كريم وراحت وبقيت افكر بكلامها هواي فعلاً انه كاعدة وماعندي شي ليش يضيع الوقت على الفاضي اذا درست وحاولت مراح اخسر شي
.. انتظرت ينزل علاوي من دوامه وكتلة رحب بالفكرة حيل وشجعني وفعلاً انتظرت التقديم وقدمت خارجي وانقبلت وبديت اقرة وملتهية وغركانة بكتب السادس ماالحك لماسه والبيت والخياط صرت اقصر بأاموري بس  بقيت مقاومة الا ان اجت وكت الامتحانات
.
.
يتبع

...........
خجلانة منكم والله ادري مقصرة هواي وياكم بس ظروفي مانعتني
عندي شخص عزيز عليه مريض كلش
اترجى منكم الدعاء بالشفاء العاجل