اليتم وظلم المجتمع

بارت الثالث والعشرون

# اليتم وظلم المجتمع
بقلمي#امنيه✒
.

.
.مثل شمعة ! أشتعل كل ليلة يم
عميان لا ينفع ضواي ولا يطفوني .

.............
عليا:- دنيا صارت الضهر وسمعت صوت ام عويدل تصيح ابتسمت بفرح وشماتة بداخلي بس مابينت لاحد ... رحت يمها جانت واكفة بنص الحوش والعباية بيدها وتصيح بقهر

ام عادل:- هذا يامطي حارك عباتي الزينة ...ولكم اليوم احركم انتم واهلكم ياملطلطين ياماعدكم تربية!

عليا:- نسوان خوالي وكرايبهم ضلن يحجن ومارضن على كلامها والجهال واكفة تباوع واحد يذبها على الثاني وكلها تبري بنفسها .. نوب كعدت بالحوش وصاحت على سندس تجيبلها الموبايل وخابرت خالي منضرها يموت من الضحك بالنسبة الي كاعدة ومتربعة بنص الحوش بالشمس والعباية بحضنها وعيونها نار من العصبية وتخابر بخالي تكلة

ام عادل:- اليوم لو انه لوالحارك العباية بهذا البيت تعال شوفلي جارة مو ابن اخوك يغلط وانه عايفة بيتي ومهجولة وكاعدين عشيرة ابيت واحد حركوا عباتي الزينة ..انه مليت تعبت من هاي العيشة

عليا:- واكفة على صفحة ويمي غصون تباوع ..والنسوان يتلاسنن وي مرت خالي ولازمات جهالهن ويستجوبن بيهم وسندس تلعلع وي امها طب خالي من باب الشارع ووي جيته دخلوا سعيد ومهدي ... كلبي صرت اسمع دكاته من شفت طولة صار شكد ماشايفته انتبهتلة يدور بعيونة عبالك مضيع شي ومن صارت عينه بعيني استقرت عيونه عليه وابتسم دنكت وجهي اخفي ابتسامتي وبكلبي اووي شهل يوم الحلو هم ام عويدل مقهورة وهم شفت وليف الروح سبحان الله الصبح جنت مكتئبة كلش قطع صفنتي صوت خالي وهو يصيح على الجهال وبعدين تعارك وي مرته ورزلها واني اباوعلهم بابتسامه نصر ... رفعت عيني على مهدي لكيتة يباوعلي بشك اشرلي بحواجبه يستفسر ..رفعت اكتافي بمعنى ماادري ابتسم ودنك بعدين فضت السالفة ودخلنه سوة للبيت بعد الملاطم السوتة مرت خالي مر من يمي مهدي وهو داخل للبيت وكال الشامة البخدج تجلط ومنها عشكت الشامه البخدي وكل شامه اشوفها احبها نسيت نفسي ونسيت الدنيا كلها كلبي وعقلي كلها يمة صرت مااريد الوكت يمشي حتى مانرجع لبيوتنة
.......................................................................
عذراء:- كعدت من النوم لكيت نفسي على سجادة الصلاة وايدي منملة منكد مانايمة عليها للحظة استرجعت كل الامي وهمومي صرت اتمنى انام ومااكعد حتى انسى همومي واحزاني كمت لكيتها صايرة دنيا عصر وكعدوا شوية شوية وكعد رياض كلي حضري روحج بس حسيتها يكلي لبسي جفنج الحزن مغيم عليه تقرب يمي وكال

رياض:-بت الزمال مو كتلج حضري روحج شبيج جنج بومة ملابسج سود وشواربج اطول من شواربي شوكت تصيرين بشر وتبطلين هاي الحيونة مالتج