اليتم وظلم المجتمع

بارت السادس عشر

(بيت ابو علي)

علي:- طلعت الدكتورة وجها ميبشر بخير جانت ضايجة وتباوعلنة وانه كلبي مامرتاح بسرعة سئلتها.. بشري دكتورة جابت ؟

-ايي جابت بنوتة الحمدلله

علي:- وندى شلونها

- البقية بحياتكم الام توفت جان عدها نزيف كلش قوي ماسيطرنة عليه

علي:- عبالك صاعقة وكعت على راسي شلون ماتت شلون تموت وتعوف بتها شلون وهي جانت فرحانة وتريد تربيها وتدللها هستوني اهتميت بيها هستوني بديت اميل الها شلون تموت وتتيتم بنتي بقيت واكف بمكاني من الصدمة ماحجيت شي بس الف فكرة اجت براسي صحيت على نفسي من سمعت عياط وصريخ امها وامي نزلن دموعي سكتة احس انه سبب موتها لو ماخطبتها وتزوجتها جان ماماتت ..حاولت اهديهن ماسكتن عفتهن ورحت سويت الاجرائات وانه كوة اجر بروحي كلساع تنزل دموعي وامسحها اتذكر من جانت تحير شتسويلي بس علمود احبها واهتم بيها اذكر فرحتها من كتلها احبج كل ذكرياتها تمر عليه مثل الشريط كملت كلشي ورجعت عليهن اخذتهن كوة هدت امي خليت الابنية يمها حتى ماشفتها بالي مو يمي .. اخذت ندى ورحنة لبيت اهلها وجان صريخ اهلهايكطع الكلب اخذتها  دفنتها بيدي ورجعت للبيت مهدود حيلي خلصت الفاتحة يومين كلمن رجع لاهلة ولحياتة بس انه احس فراغ كلش جبير عندي وتأنيب الضمير اكلني .. حتى بنتي مااريدها احس بسببها ماتت امها بقيت فترة منطوي على نفسي امي تحاول تطلعني من الانه بيه جانت تحاول تجيب بنتي  يمي بس  انه فاصل حتى مااعرف اسمها امي مسميتها  ماسة   ... جانت زهراء تجي تحاول تحجي وياي ميفيد وتروح صارت الجكارة احسن رفيق الي مر شهر وانه نفس حالتي  فجأة جنت كاعد واسمع امي تعيط وتصيح باسمي من الهبطة كمت ووكعت صارت وكعتي على الميز ونشكت كصتي بس مااهتميت رحت ركض لامي لكيت الطفلة بيدها لا حس ولانفس وعيونها مكلوبات ايديها يابسات

ام علي:- يمااااي ولك عليوي البت مدري شمالها جاي ترضع وكلبت عيونها

علي:- يمه مو وكت بجي وصريخ لبسي عباتج ناخذها للمستشفى .. الطريق للمستشفى صار عليه سنه كوة وصلنة واجوا الدكاترة اخذوها يركضون كعدت بالكاع ايدي ترجف وحيلي بايد اجت ممرضة

_ اخوية تفضل وياي انضمدلك جرحك راسك ينزف

علي:- انتبهت لنفسي تشيرتي كلة دم من كصتي ووجهي كلة مدمر كتلها مايحتاج بس شوفولي الابنية شبيها فدوة

_لتخاف الدكاترة يهتمون بيها بس لازم نضمدلك جرحك

علي:- رحت وياها ضمدت جرحي وخلولي مغذي لان جان ضغطي هابط وامي كاعدة يمي وتدعي وتبجي
شوية ورحنة يم الطفلة سئلت الدكتور كال عدها ضعف بكلبها يحتاجلها راحة وعناية بقيت ..اباوعلها من الجام مال الباب نايمة مثل الملاك اول مرة احس بهيج شعور هاي بنتي طفلة صغيرة وجها ملائكي كسرت كلبي نولدت بلا ام وانه ابوها عايفها ومااسئل عليها شكد قاسي انه واناني عايفها ومحتار بروحي وعدت نفسي اهتم بيها واصيرلها ام واب بس خل تصير زينة .. دك تلفوني جان عزام سئلني احنه بيا مستشفى شوية واجه هو وامه