اليتم وظلم المجتمع

البارت الرابع

عذراء:- صار الصبح وباب الغرفة مفتوح يعني باقي بدون قفل بس مردود لان عليا طالعة واني كاعدة بالغرفة مااريد اطلع كلش خايفة جان يندفر الباب واشوف مرت خالي هي وعذراء ووياها سعيد وبيدها الصوندة من شفتهم شهكت شهكة حتى غصون طفرت من النوم دخلوا للغرفة وعيونهم كلها شر وكره كتلهم شبيكم شكو والكلمات ترجف بحلكي  حجت مرت خالي

ام عادل:- اريد اربيج لان انتي مامرباية واذا اعوفج بدون تربية تركبيلنة ثيابنة مكلوبي من العار ...سندس طلعي غصون وتعاي

عذراء:- اجت سندس تجر بغصون من حضني صارت روحي بيها من الخوف واني مجلبة بيها هي تجر واني اجر

سندس:- ولج الفالتة عوفيها خل اطلعها ترة اكتلها وياج عوفيييها

عذراء:- شتردون مني والله مامسوية شي عوفي اختي وروحي ماعليج بيها

سعيد:- وهو يجر بغصون وطلعها برة وقفل الباب  شنريد منج قابل هي شجم صوندة  على شجم راشدي وتتربين احسن تربية

عذراء:- الحمدلله اني مرباية مامسوية شي غلط روح ربي روحك ...بس كملت كلامي اجتني لسعة الصوندة على رجلي من الالم طفرت وكفت على حيلي صرت ابجي واكلهم روحوا عوفوني مامسوية شي وبدة الضرب بكل مكان بجسمي وسندس لازمتني حتى ماانهزم

ام عادل:- خايبة سنيدس عضيها حيل حيل

عذراء:- لزمتني من ايدي ونبتت سنونها بزندي الالم مو طبيعي والقهر و الهضيمه اصرخ بكل علو حسي وسعيد يخلي ايدة على حلكي حتى مايطلع صوتي الصوندات بكل مكان بجسمي خلت اثر ..واخواتي وسلوى من ورة الباب اسمع بجيهن وتوسلاتهن حتى يعوفوني مابقى مكان بحسمي صاحي من الضرب نمت بالكاع لااحرك ايد ولارجل

ام عادل :- سندس جيبي المكص

سندس:- شني يمه شتسوين بيه

ام عادل:- جيبي خل اكص شعرها اريد اشوف شلون تفتر على ابني تاج راسها بعد

سندس:- لا يمه كافي شبعت كتل مايحتاج تكصين شعرها

سعيد:- جيبي المكص واطلعي منها سندس

عذراء:- نايمه بالكاع من الضرب جسمي خدر بس اسمعهم ومااكدر ادافع عن نفسي جابت المكص مرت خالي وكصت شعري سوته شعر ولد اكثر شي قهرني وكسرني اتحمل الضرب بس قهر شعري مااتحملتة احس كلبي صار حار  ويوجعني من القهر  شعري الجانت ماما تموت عليه وماتقبل تكصة ابد جانت تخليلي اشكال الاعشاب والحنه والزيوت تكول اريدة يصير بطولج راح وصار شعر ولد ناس طوال وناس كصار ادموعي توكع بسكوت مابيه  حيل حتى اطلع صوت

ام عادل:- تف عليج ياناكرة المعروف جبناجن ابيتنه وتاكلن بزادنة وتالي هيج تسوين اسمعيني زين يعذيرة اذا ماتبتي من عادل شايفة هذا شعرج شلون كصيتة المرة الجاية اكص راسج بدالة