اليتم وظلم المجتمع

بارت الثاني والثلاثون

#امنيه
#اليتم وظلم المجتمع
.
.يامحطة تلم وحشتي؟
وياقطار
يسافر
وياخذ دمعتي؟
..
عذراء :- جنت واكفة ورة باب الاستقبال من داخل الصالة والشيخ والزلم بداخل الاستقبال حاجاني الشيخ من ورة الباب وانطيتة الموافقة حتى ماانتبهت للمهر شكد بس انتبهت لاسم الولد اللي المفروض اليوم يكون خطيبي!
اضحك على نفسي بداخلي شلون وحدة اليوم خطوبتها وهي ماتعرف خطيبها هه يلا بقت على هاي هي الدنيا شوفتني اشكال
..انطيت الموافقة ورجعت لمكاني وعيني على امه واخته توترتهن قلقني حيل لدرجة مااكدر اشيل عيني منهن....
عليا كلساع تهمسلي موافقة لو اكلبها عليهم
بعدج على قرارج؟
واني اجاوبها بأي موافقة لا تسوين مشكلة .. تبقى واكفة يمي عبالك امي خوفها عليه ووكفتها وحنيتها
بقيت كاعدة بمكاني جنت كاعدة بالكاع افرك بادية لا كوشة ولا كرسي ولا اي شي هيج يردون بس يخلصون مني
.. اني هم ماحجيت ولاتهمني هاي الشغلات بس اللي
يهمني يطلع ابن حلال ويصير العوض
اباوع مرت خالي كاعدة يم ام العريس بكرسيها وتسولف وتجامل وتباوعلي وتبتسم عود حنينه اعرف هاي سوالفها كدام العالم
دنكت عيني واطكطك باصابعيي
.. الا ان كالو راح يدخل العريس يلبسها خفك كلبي بخوف لان راح اشوفة احتريت وتوترت وعيني صارت على اختة تشاور بامها ويباوعلي عوزهن شوية ويبجن
من شفتهن كلبي ضل يركع ياترى شنو ضامات
عيني تشكلت على الباب دخل خالي ووراه سعيد نافش ريشاتة ودخل وراه ولد من شفته عيوني جمدن وفتحت حلكي بصدمة بدون ماادري بنفسي من وصل قريب يمي وشفتة شلون منحرج مني ومن الكل انتبهت لنفسي ودنكت عيني بعد مارفعتها كعد بصفي
مدنك راسه وايدة بيها رجفة وكلساع يمسح وجها من
العرك ماباوعتلة ابد ولا درت عيني بس اكدر اشوف لمحة منه اجت اختة بسرعة متوترة اكثر منه طلعت حلقات ومن راد يلبسني
ماادري شكلها هي ابتسمت بقلق وكالت
زهراء:- يستحي بعدكم جدد

عذراء:- لبستني هي الحلقة  والذهب ولبسته حلقتة هوسوا شوية وسلمن عليه  وامه خلت بايدي فلوس وراحوا
.. اني ممستوعبة وممصدكة من شفتة لحد ماراحوا جان شاب متوسط بالعمر طويل وضعيف وجها واديه كلهن اثار حروق وشعره خفيف جان خايف ومتوتر وخجلان من نضرات الناس الة
.. جان شكلة مخيف وبنفس الوقت يقهر
رفعت راسي اشوف عليا واكفة يمي ووجها يريد ينفجر من القهر وغصون ماتقل عنها شي عيني صارت على سندس
جانت واكفة  مقابيلي مجتفة ومرتجية عالحايط
تباوعلي مبتسمة بشماتة هي وامها
اللي كالت
ام عادل:- الف مبروك منج المال ومنه العيال

سندس:- هههههههههههه

عذراء:- وكفت الغصة ابلعومي كمت بسرعة للغرفة وعفت عليا وغصون يداهرن وياهن
دخلت للغرفة واني ممصدكة اللي صار اباوع بايدي بيها حلقة !
زين شلون هيج فرطوا بيه وانطوني الة
بس ليش ميفرطون بيه قابل اهمهم
نزلن دموعي سكتة ليش  هيج حضي من دون البنات يارب ماقصدي اعيب عليه بس والله مااكدر اتقبلة
شفته لحضات ونرعبت شلون اعيش وياه
شاسوي تعبت من القهر والقلق يارب والله تعبت