اليتم وظلم المجتمع

بارت السادس والثلاثون

#امنيه
#اليتم وظلم المجتمع

خذني يمك
كبل لايخلص صبرنا
ويطفى دم وجوهنا ونطلع صفر
خذني يمك
بعد ماضل كل عذر لاتعتذر
خذني يمك
كبل لايم الصفر ينحط صفر
_جبار رشيد

.........
عذراء:- بقيت افكر بسالفة ابن عمي الطلعتلي جديدة
وافكر اتاكد منه واذا اتاكدت شلون راح اخذ اخواتي من خالي وشلون ابقيهن وياه وهو عزابي وحدة ...
الف فكرة براسي اشتغل وبالي مو وياي

زهراء:- شنو عذراء شو اليوم مخلصتها صفنات شبيج

عذراء:- لاماكو شي بس افكر بسالفة ابن عمي
وعلى كولتهم تاخذني حسبات  وتجيبني حسبات

زهراء:- ايي صدك هم كلتلي امي بس مافهمت شنو السالفة كالت اجاج ابن عمج من جنت انه بالدوام

عذراء:- ايي اجاني شاب تقريباً بنهاية التلاثين
اسمه ابو مريم كال هو ابن عمي عبدالله
ماادري منو كايلة علينه وكال يجي يساعدنة
اني وخواتي

زهراء:- ايي زين يالله
بس هو وين جان هسة تذكركم

عذراء:- يكول مايدري هيج حالنه عبالة احنه اختارينة
خوالنه ومايندلنه  وهسة شخص حاجيلة وضعنه ومدليه مكانه منو هذا الشخص ماادري

زهراء:- شو احسج مامقتنعة بيه ابن عمج ولا ثاقة بكلامة

عذراء:- احساسج صح عندي شكوك تجاها وخفت وصرت اوهوس

زهراء:- عادي تأكدي منه زين يلا بعدين اتفقوا شنو تسون
ولو مااعتقد شكج بمحلة لان شيستفاد من يجي يورط نفسه ويكول هو ابن عمج
ويدخل نفسه بمشاكل وي خوالج

عذراء:- ان شاءالله نتصل بيه واتاكد من هويتة

زهراء:- ماكتيلي ابن عمج حلو لو مرعبل
حتى اذا حلو اعوف دوامي واوكف بالباب

عذراء:- ههه لا حلو والله وشكلة مرتب وكاريزما
وانيق كلش من هذا اللي يكولون عليه خالط الشيب لحيته

زهراء:- اويلي هاهية بطلت بعد مااريد كلية اكعدلة بالدرب كعود

عذراء:- وهي تضحك وجج شو صرتي خفيفة
هيج تحبين الحلوين

زهراء:- وعلي خية مو خفيفة بس الحلوين يهزوني

عذراء:-  وهي تضحك ومصدكة ...
صدك الله عليج تحبين الحلوين؟

زهراء:-  لازمة الضحكة وتتصنع العصبية
..ترة عيب عليج شني هاي السمعة
صدك انتن الجنانين ماتنطن عين

عذراء:-  وهي تضحك العفو عيني العفو
..........

عليا:- من بعد الهوسة السواها عادل واخذوا امهم للمستشفى حالتها سائت اكثر صارت ماتكدر تتحرك ابد
بس لسانها شطولة
.. وعادل خاف على امه وسكت وسعيد الخبيث
ايده خيطوها خمس خياطات
عادل مكابل امه وكاعد وخطار رايح وخطار جاي
وكلساع مي وجاي كلة علينه اني وغصون والاميرات سندس وسلوى كاعدات
.. جنت بالمطبخ سمعت مصطفى يدخل بنسوان
تفضلن وتفضلن رفعت راسي جان اشوف ام مهدي واختة خفك كلبي من شفتهن جن شايفة اهلي سلمت عليهن
واباوع وراهن بلكي اشوف مهدي ايست من كالت
اخته لا تلتفتين ماجاي مهدي
دنكت بحزن واني ارحب بيهن كعدن شوية يم مرت خالي ونوب طلعن من طلعن خلت بيدي اخت مهدي موبايل
من شفته استغربت ودفعت ايدها واني رافضة اخذة
خلتة بكف ايدي وسدت قبضة ايدي حيل كالت
اذا صدك تحبين مهدي خلي عندج بس يريد يحاجيج
اخذتة ولفيتة بردن دشداشتي وصلتهن للباب ورحت ضميته بين الملابس
وكلبي يدك سريع عبالك مسوية جريمة
والوم بروحي شجاني اخذتة صرت مثل سندس واني
ماقابلة عليها
عفتة ورحت على شغلي وبالي وياه خاف يدك ويلكونة
لليل كملت الشغل بقت بس المواعين جاي اغسل بيهن
التفتت لكيت غصون وراي متخوصرة وتباوعلي