اليتم وظلم المجتمع

بارت الثامن والعشرون

#اليتم وظلم المجتمع
بقلمي✒#امنيه

‏لم أقصد أن أحبك،
لكن ما حدث هو أنك طرت
مثل طائرة ورقية في مخيلتي،
فصرتُ شاعرًا
انتظركِ مع نهاية كل فيلم
تخرج من الشاشة
ثم نخترق الشوارع معًا
............................................

عليا:- مامصدكة عذراء اختي صارت كدام عيني ورجعت الي سالمه مابيها شي نايمين اني وغصون يمها ونباوع عليها وتسولف النه شصار وشلون راحت وي رياض بعدين غصون نامت وبقت تسولفلي كلشي جانت دموعها مثل الشلال انتبهتلها اديها يرجفن باستمرار وجوة عيونها مثل سواد الليل وبشرتها باهتة
جانت تعبانة اختي حيل تعبانة .. بس اكثر شي فرحني هي بقت محافظة على نفسها ومالوثتها وي رياض الحقير ...جانت مخليه راسها بحضني وتسولفلي الا ان نامت واني هم نمت كعدنة ب٩ على دكة الباب كمت اشوف منو والكة مرت خالي وجها مكلوب ومطنكرة ووراها مرت عادل متخوصرة وواكفة .. كالت مرت خالي يلا كعدتن صيحي اختج خالج يريد يحاجيها
.. عفتها وسديت الباب كعدت عذراء رتبت نفسها وطلعت جان خالي كاعد بالصالة وبصفة مرته وعادل تقدمت عذراء وسلمت عليهم وبوستهم... عادل جان يباوعلها بلهفة ومرتة تخزر بيه وبعذراء وتباوع لمرت خالي ومرت خالي تاشرلها بعيونها عود اصبري
...بقت عذراء واكفة كالها خالي تعاي كعدي اشرلها على مكان بصفة كعدت كال
ابو عادل:- ايي بت اختي سولفينه شلون اجيتي وليش اجيتي

عذراء:- بديت اسولفلهم كلشي وخالي يهز براسه وعادل كلساع ينتفض ويغلط ويهدونة اباوعلة متغير هواي بتصرفاتة قبل ماجان هيج يهمه امري استغربت بس سكتت حجة خالي وجان ماراضي بجيتي الهم

ابو عادل :- المفروض تبقين وي رجلج لو شما سوة المرة مالها الة بيت رجلها

عادل:- بوية رحمة لوالديك يارجل هذا ماتسمعها تكلك لكو وي بت العالم الضافينه هذا شتترجى منه بعد

ابو عادل:- بصياح  جاا لو كل وحدة رجلها يصاحب تشرد جا ماتضل نسوان بالبيوت

عذراء:- بس اني ماشردت هو خاله طردني وكال مالكم مكان ابيتي بجيت بقهر وكملت كلامي ... اني مااتحمل رياض بعد يومية يشرب ويجي نص الليل وبالنهار نايم لا شغل ولا عمل كل سالفة خايسة يسويها وكليوم يضربني ويسب اهلي ومابقة مرة ما صاحبها اني مااريدة اريد ارجع يم اخواتي

ابو عادل:- مو بكيفج ترجعين لرجلج غصباً عليج ماعدنة بنات  تطلك

ام عادل:- الابنية الزينة والمرباية تتحمل الرجال لو جان كاولي

عادل:- شني السالفة حيوان وتتحمل!
عوفوها بحالها حرامات بيه عذراء هذا الخايس
ماترجعين ابقى هناا يطلكج غصباً عليه

ابو عادل:- عادل انت تدري شتحجي  طلاك هذا مو لعب شني تهجم بيت ابن عمك

عادل:- هو منيلة بيت هذا العار الشارع هواي عليه
بس اخخ لو ماغدرت اقرب الناس الي