طـغيان إِحمِرار السآعد

بارت 12

               ‎ طِـــغيان إحمـــرار ألســـآعد
                              نعيب زماننا والعيب فينا
                              وما لزماننا عيبٌ سوانا

~ مشعل ~
باوعت عالشارع وابتسمت بأنتصار طبكت السيارة كدامها ونزل سيف باوعتلنه بخوف رادت تركض وعاط سيف
سيف _ اذا تحركتي اعتبري كل فضايحج رايحه بيد ام محمد
وكفت التفتت تباوع بصدمة اشرلها تجي راحت تمشي بخوف باوعتلها وحجيت
مشعل _ شوفي فضايحج والبوك كلهن يمنه إذا ما سويتي اللي نريده بالضبط وبدون تغير او كذب ما راح نفضحج
_ تمام بابا بليز بابا بليز لا تكول ماما كبير هي سوي عقاب مال أنا اطفال
فهمت شنو تقصد هزيت راسي
مشعل _ ما اكول لكن عندي شروط اول واحد تبطلين هاي السوالف مال بوك تمام
هزت  راسها بخوف وسألت
العاملة _ منو انتَ بابا
ايمن _ مالج دخل منو احنه نفذي اللي نريده وبس لا تسألين
باوعتله بحده ودرت راسي الها احجي
مشعل _ مو مهم منو اني المهم اريدج تبتعدين عن الخداع والبوك موافقة
هزت راسها بمعنى اي رجعت كملت براحة واني متأكد راح توافق
مشعل _ هاج هذا تليفون بي رقمي ش
العاملة _ ليش بابا
مشعل _ علمود عشتار
فتحت عيونها بصدمة وخلت ايدها على حلكها وكالت
العاملة _ عشتاار ؟
مشعل _ اي شني اللي يعجب
العاملة _ بابا عشتار مو نفر سهل والله هي تدري سوي انا موت
ضحكت مستغرب خوفها
مشعل _ ماراح تدري
سكتت تباوعلي تنهدت وحجيت
مشعل _ منو يضربها
فتحت عينها وهزت راسها بقوة بمعنى لا تحجي عالسريع استغربت وضعها وزاد شكي او بالأحرى تأكدت
العاملة _ الله يخليك بابا لا ماعرف أنا ماعرف ماعرفففف
مشعل _ جاوبي
نزلت راسها أيدها ترجف خلت ايدها على وجها تبجي تنهدت وحجيت
مشعل _ كولي منو اخوانها
هزت راسها مترددة بمعنى اي
مشعل _ شلون
بدت تشرح واني كلمة افهمها كلمة لا هزيت راسي
مشعل _ اريد منج كل ما يضربوها تصوريلي وتجين دزيلي الفيديو
العاملة _ صعب بابا إذا شاف انا صور يسوي ذبح
مشعل _ حاولي على الاقل خمس فيديوهات وكل ما يضربها تكوليلي واي شي يصير وياها تتعارك ويا امها ويا ابوها اريد روتينها كله يمي يصير تمام
العاملة _ حاضر بابا
مشعل _ اني اسف خوفناج وهددناج بس مضطرين
هزت راسها اشرتلها تروح صعدت بالسيارة أعصابي تفور صعدوا الولد واني ساكت أتخيل منظرها وهم يضربوها بهالشكل مجرد فكرة سمعت صوت كلبي يتكسر بداخلي عتب بس متجاهله رحت عالنهر والولد ساكتين ركنت السيارة ونزلت امشي بس بدون روح والولد يمشون ويايه كعدت كبال النهر صافن حسيت ايد طبطب على كتفي
ايمن _ هونها وتهون خويه
ابتسمت بأستهزاء وحجيت واني بداخلي نار
مشعل _ تهون ؟ شنو اللي يهون هونت كل شي بس هي وداعت وجعها وألمها ما راح أهونها
سيف _ يجوز هاي مشاعر مراهقه يجوز انعجبت بشكلها بعدك صغير وهي صغيره مستحيل تحبها
باوعتله وابتسمت بضعف
مشعل _ غلطان
ايمن _ شنو تحبها
مشعل _ استسلمت استسلم مشعل لحبها
حسين _ يبووو الله يعينها شلون واحد يحبها عنده حب التملك هواية
ايمن _ وضميرك
مشعل _ ما بيدي شي طز بيه وبضميري المهم عندي اليوم هي تكون بخير بس شلون راح اكدر احميها واني ما اقربلها لا من بعيد ولا من قريب
حسين _ وشنو حسيت من عرفت يضربوها
تنهدت بتعب صافن
مشعل _ انهدم حيلي هالبنية دخلت بعقلي واني ماعرفها كل شي ماعرف عنها دائماً اني الاشوفها وهي متشوفني اخاف اغلط وياها اخاف اسوي شي مايرضي الله ماعرف وين اروح وشلون احميها من هالوحوش
ايمن _ احنه وياك وبعدين باجر راح تجي
ابتسمت لا اراديا وكمت امشي للسيارة صار الصبح رجعنه للبيت دخلنه الولد يتختلون يخافون يشوفهم ابويه يباوعون عليه هزيت ايدي وصعدت دخلت للغرفة وطلعت صورها ابتسمت احجي بلا ادراك
_ اوووف شسويتي بيه من يوم اللي ركضتي بي بالمنتزه واني ما مرتاح يجي يوم وتحبيني ويرتاح كلبي بعدج طفلة وسحلتيني خليتي عقلي اللي جان مغلف بوسط قوقعة مليانة بالشغل والدراسة والمسؤولية واهلي تبدل وصار يفكر بضحكتج تميزتي بكل شي ما شفتيني واني شفتج ما ركزتي بيه واني حفظتج ما اهتميتي الي واني مثل المدمن اللي يدور ادمانه ليش هيج انتِ جا شخليتي للنسوان اخذتي المواصفات كلها
طلعت صورة ثانية جانت تضحك ضحكت وحجيت
_ ما رفعت عيني على بنية بس انتِ اختلفتي يا ترى راح يجي يوم واشوفج وياي راح يجي يوم عيونج تباوعلي مثل ما اباوعلج راح تحبيني استحرم اباوعلج بس عيوني تنعمي بدون شوفتج جنت عايش مثل الرجل الآلي ومن شفت ضحكتج اللي ما شفت مثلها رجعلي الأمل من شفتج اتمنى من الباري ما تكسريني وتروحين وتعوفيني ضايع بدونج
تنهدت وكمت طلعت بالبلكونه كعدت بالكاع باوعت للسماء وحجيت بداخلي
_ ياربي دخيلك لا تغضب عليه حاولت بس ماكدرت انتَ تعرف نيتي صافية وياها بعزتك وجلالك لا تبعدها عني يارب ما اكدر اخليها تتعذب وتنضرب من اخوانها واسكت انتَ اعلم لو بنية غيرها اسوي اللي اسوي واكثر يارب نورلي طريقي واجعلها من نصيبي يارب اني اضوج إذا ما اشوفها بيوم احس يومي ناقص لا تحرمني منها يا الله اني أضعف خلقك بدونها
مسحت على وجهي وكمت سبحت ونزلت الصبح امي كاعدة عالسجادة تسبح رحت نمت على رجلها وغمضت عيوني كملت تسبيح ومسحت على شعري تحجي بخوف
ام داوود _ شبيك يمه ليش وجهك ذبلان
بست ايدها وحجيت
مشعل _ تعبااااان يمه اني تعبااان
ام داوود _ اسم الله عليك يمه بعدوك ولا بيك
حطت ايدها على كصتي وشهكت بصدمة
ام داوود _ لك يمه غادي نار شبيك احجيلي لا تضم عليه
مشعل _ خايف يمه
ام داوود _ من شني يمه اول تالي مشعل ابني يخاف لا يمه ارجعلي مثل قبل يا بعد نظر عيني لا تخوفني عليك
مشعل _ خايف انحرم منها ومن شوفتها
ام داوود _ منو هي
مشعل _ العاشكها كلبي ما اكدر بدونها خايف ربي يحرمني منها خايف تصير الواحد ما يستاهلها واحد ما تعذب بشوفتها ويتعذب اكثر بغيابها
ام داوود _ يمه لا تسوي شي يخليني اغضب عليك
مشعل _ لا تخافين ما اغضب ربي ولا أذي وطن روحي ودوه جروحي
ام داوود _ زين هي منو نعرفها لو لا
مشعل _ لا من رخصتج يمه
ام داوود _ مشعل اوكف
باوعتلها عيوني تحركني باوعتلي وكالت
ام داوود _ بالتسعة اريد اروح بيت ابو محمد وتعال وياي اني واختك هند اريد اروح اعزم بناته وماعندي ارقامهن
مشعل _ صار
طلعت واني الفرحة مسايعتني صعدت اركض دخلت على ايمن نمت فوكاه واصرخ بدون صوت كمز من مكانه يفرك بعيونه يصيح
ايمن _ دخيلك يا داحي الباب دخيلك
باوعلي واشرلي شبيك مصدوم فاتح عيونه من منظري اول مرة افرح هيج
مشعل _ ولك الخايس كوم اروح فدوة الك والله يطيح حظك أبوس عقلك
هز ايده واشر على راسة بمعنى انت مخبل كام وعاط بيه
ايمن _ ولك كطعت النسل الله يكطعك يا بووومة همزين بنية وحدة حولتك مطي خلتك تصفن صفنة ابو صابر شتريد
مشعل _ ولك امي تريد اوديها هي وهند لبيتها علمود العزيمة
ايمن _ اي مبروك الف مبروك ويلا ولي اريد انطمر من وره ست الحسن الليل مانمته
باوعتله بحدة وضربته كفخة على راسه وحجيت
مشعل _ لا تحجي بهالطريقة بيها
هز ايده بأستهزاء وشمر نفسه عالجرباية وانخمد نزلت بالصالة كعدت ابويه وامي واخواني داوود ومالك ومنير كاعدين
مشعل _ سلام عليكم
الكل _ عليكم السلام
كعدت بهدوء باوعلي ابوية وكال
ابو مشعل _ بويه مشعل اليوم انتَ لا تروح للشغل ابقه عدنه عزيمة اليوم
مشعل _ حاظر بويه
مالك _ مشعل انتَ صارلك هالايام متغير مو مثل قبل صاير شي محتاج شي
باوعتلي امي ساكته تعرف السبب بس غلست شربت جاي ورديت برود
مشعل _ سلامتك خويه ما محتاج شي بس تعبان شويه
مالك _ لا تضغط على نفسك الشغل ما طاير اهم شي صحتك يمعود
هزيت راسي وسكتت نزل ايمن وسيف وحسين كعد ايمن بصفي حجه داوود وهو يباوع الابوية
داوود _ يابه تعزم ابو علاء
ابو داوود _ طبعا أعزمه جا شلون غير العزيز هذا وعزمت كل اصدقائكم وأهاليهم كل الزلم عزمتهم
داوود _ حتى ابو محمد
ابو داوود _ ياهو منهم
ايمن _ قصده على الطكطكطوكين بويه
ابو داوود _ لا مسافر هو وزوجته بس أمكم اصرت تعزم بناته شلون مادري
ام داوود _ شنو اللي شلون
ابو داوود _ هي غير اكبر وحدة بيهن طفلة شلون تعزميهن
ام داوود _ اكبر وحدة بيهن هي المتحمله مسؤوليتهن من تشوفها عود كول هاي طفلة
كلبي فز من جابوا طاريها باوعتلي امي وكالت
ام داوود _ يمه ها تودينه بين ما البس عباتي واجيب اختك
مشعل _ براحتج يمه تردين هسه امشي يلا
هزت راسها وراحت تصيح رهف نزلت تركض وتصرخ
رهف _ جاهزه يمه
ام داوود _ لج صبري خلي البس عباتي
لبست امي عبايتها وطلعنه رحنه على بيتهم باوعلي الحارس وكال
الحارس _ خير خويه
مشعل _ الوالدة تريد تشوف بنات ابو محمد تعزمهن عالعزيمة
الحارس _ دقيقة
طلع موبايله مادري شنو كتب وطلعت العاملة كالها
الحارس _ الحجيه جايه على بنات أستاذ عبدالله
هزت راسها العاملة وطبت للبيت باوعت عالحارس بعصبية وكلت
مشعل _ الضيوف يوكفون بالشارع ؟
الحارس _ اعذرني خويه بس الأمر بيد ابو محمد هاي أوامره لازم نتأكد
هزيت راسي استغفر سجن خو ما سجن انفتحت البوابة وطلعت عشتار عيوني تعلكن بيها حارت عيوني وين تباوع حسيت بفراغ واشتياق كبير عيوني اكلت وجها اباوعلها لهفة مو طبيعية بداخلي حسيت عيوني اخترقتها اباوع لعيونها السلبت كل شي بيه حسيت بضعفي كدامها للحظة خفت عليها مني ومن لهفتي واشتياقي خفت من عيوني اللي تتنقل بين ملامحها بعشك خفت عليها من عقلي اللي نسخ ملامحها
لابسة فستان نيلي غمضت عيوني استغفر ورفعت وجهي اباوعلها باوعت الامي وابتسمت راحت يمها بوستها وكالت بهدوء
عشتار _ شلونج خالة
ام داوود _ الحمدلله انتِ شلونج يمه
عشتار _ الحمدلله
راحتلها رهف تبوسها وتحجي عبالك تعرفها او صديقتها
رهف _ شلونج حبيبتي
ابتسمت ابتسامتها اللي فززت كلبي من اول مشفتها الابتسامة اللي وراها اسرار وألم وخذلان ودموع من دم ردت عليها بهدوء وهي مبتسمه
عشتار _ الحمدلله عُمري تفضلوا
باوعت عالحارس وحجت
عشتار _ ليش مخليهم بالشمس
الحارس _ أوامر أستاذ عبدالله
عشتار _ أستاذ عبدالله كلك تبقي الجيران بالشارع
الحارس _ لا بس اااا
عشتار _ عموماً هذا الشي ما أريده يتكرر رجاءاً اني احجي ويا الوالد
هز راسه انتبهت اسلوبها حدي مغلف بـ لباقه توقعتها تغلس على هذا الموضوع ولا مرة باوعتلي ولا حتى انتبهتلي ولا حتى بلمحة وحدة كأنوا حالفة تعذبتي تمنيت عيونها تخطأ وتباوعلي بس ماكو تنهدت ودخلت للبيت استحيت اردها او بالأحرى ماعندي جرأة احجي وياها اباوع حدايق محاوطة البيت نافورة بالنص واشجار وورد ومسابح ثنين تعجبت توقعت بيتهم فخم بس مو هالدرجة استغربت انو هي بيتهم هيج وتطلع تروح متنزه
مشينه وهي ورانه صعدنه مثل الدرج وهي صعدت فتحت الباب دخلت امي وأختي واني بقيت بالباب ماعرف شسوي ادخل لو ابقه صاحتني امي
ام داوود _ ادخل يمه لا تستحي
دخلت مدنك راسي كعدت بصف امي بيتهم عبالك متحف كله تحفيات ولوحات اللي يدخل يتعجب ويصفن على جمال البيت والأثاث بس اني جنت كاره هذا البيت وكاره فخامته هالفخامة كاعد تأذي اعز ناسي دخلت عشتار وبيدها صينية بيها كهوة وفناجين ومي وبقلاوة راحت كعدت يم رهف وحطت الصينية على الطاولة واني كل ما احاول ما اركز بيها الكه روحي صافن بيها اكثر واكثر ابتسمت امي وكالت
ام داوود _ والنعم من اصلج ومن كرمج يمه عاشت ايدج
عشتار _ والنعم منج خاله واعتذر والدتي والدي مموجودين مسافرين واعتذر على وكفتكم وانتظاركم
ام داوود _ لا شسالفة حبيبة ماكو داعي تعتذرين
رهف _ لج عيني بطلي هذا الأسلوب دا احس روحي حشره والله
ضحكت واني ابتسمت على ضحكتها شكد حلوة ومريحة للعين
عشتار _ حشاج دااده
رهف_ وين البنات
عشتار _ بالغرفة تردين اصيحلهم
رهف _ اي حبابه
هزت راسها وطلعت من الصالة باوعت امي على رهف وكالت بأعجاب واضح
ام داوود _ اسلوبها ما شاء الله احد يصدك هاي طفلة
رهف _ يمه تره مبين شكلها صغيرة
ام داوود _ اني مكاعد احجي على الشكل كاعد احجي على الاسلوب شوفيها شلون راقيه ولبقه مو مثلج جنج مطيرجي
ضحكت رهف وحطت ايدها على راسها ثواني ونزلن خواتها الاثنين فتحت امي ايدها وهي تكول
ام داوود _ هلا برميمه وشميسه هلا شلونجن يمه
رميم وشمس _ الحمدلله خاله
نزلت عشتار وشايله هاي الطفلة باوعتلها بعدها تخبل اول مشفتها ابتسمت اتذكرها باوعتلها شلون مربربة بيضة مال أحطها بصمونة وأكلها ضحكت رهف وهي تكول
رهف _ حبابه خلي اشيلها
ابتسمت وراحت حطتها بحضنها لزمتها رهف تبوس بوجها تضحك والطفلة لابسه نفس فستان عشتار اخذتها امي من ايدها تبوسها وتصفكلها والطفلة تضحك وتصفك
ام داوود _ اللهم صلي على محمد وال محمد قل اعوذ برب الفلق شني جكليته انتِ يمه فدوه للبنيات
ابتسمت للطفلة باوعتلي شويه وصفكت تضحك اتوقع تذكرتني ضحكت ورفعت راسي بعدها متباوعلي تباوعلها وتبتسم درت عيني للطفلة اللي تباوعلي وتضحك وتصفك كالت بصوت طفولي ضاحك
آسيا _ آموووو
ضحكت واشرتلها بمعنى تعاي اجتي يمي بوستها بوجها وبركبتها اشم بيها بيها ريحة أطفال تجنن
مشعل _ يا بعد حيل عمو
ضحكت وحطت ايدها على خدي وهمست
آسيا _ الله هيلوو ( الله حلو )
ضحكت ونزلتها راحت كعدت بحضن اختها وامي اصرت على عشتار اله تجي للعزيمة بالاخير قبلت ابتسمت فرحان ورحت للبيت لكيتهم يطبخون راحت رهف بنصهم تسولف عليها
رهف _ بابا لو تشوفها شلون هيج تحسها مثقفه تحسها دكتوره تحسها مادري شنو
ابو داوود _ لج بابا راح تموتين البنية كولي ما شاء الله
رهف _ ما شاء الله
رجعت تسولف وياهم بالاخير عافتهم وطلعت واني رحت اطبخ بكل ذمه وضمير ويا اخواني فرحان شفتها بس سوال براسي ما يطلع ليش متباوعلي ملكيت إجابه مقنعة خلصنه طبخ ودخلوا الزلم للمجلس والنسوان دخلن للصالة طول العزيمة واني على نار اريد المحها الكل طلعوا حتى النسوان
دخل ابوية اول واحد وسمعته يهلي ويرحب فتحت الباب وحسيت الدنيا ما شايلتني واني اشوفها كاعدة
ابو داوود _ هلا بنيتي شلونج شلون الأهل
ابتسمت وكامت حبيت حركتها واحترامها للكل تجبر الواحد يحترمها
عشتار _ هلا عمو الحمدلله انتَ شلونك ان شاء الله زين
ابو داوود _ الحمدلله بنيتي زين بعدج موجودة والله ياريت دائماً تزورينه تنورين البيت
عشتار _ البيت منور بأهله عمو تسلم
جانت تحجي بأحترام واضح الكل عيونه ثابته عليها مستغربين شلون طفلة اسلوبها بهالرقي والاحترام
ابو داوود _ اعرفج هذول ولدي
كعد يعرفهم علينه وهي تباوع الأبوية متباوعلنه وبعدها واكفه من خلص حجت بهدوء
عشتار _ تشرفنه
داوود _ النه الشرف
راكان _ الشرف النه خيتي
باوعلها ابوية بأستغراب وكال
ابو داوود _ كعدي بويه بعد وكت لا تروحين خلي نتعرف عليج
ابتسمت وكالت
عشتار _ تسلم عمو
كعدت واني اباوع على تحركاتها شلون تحجي برزانه وتتحرك برزانه وهدوء باوع داوود على رميم وشمس وكال بابتسامه وهو يأشر على عشتار
ابو داوود _ هاي منو شتصير منكم
رفعن راسهن يباوعن على عشتار بفخر شفت الفخر ينكط من عيونهن
شمس ورميم _ اختنه الكبيرة
ام داوود _ يمه فدوة شفتي يفتخرن بيج
ابتسمت عشتار ساكته اجتي آسيا كعدت بحضنها تباوع الرهف بزعل باوعتلها عشتار وكالت بخوف
عشتار _ شبيج آسياوتي
سكتت آسيا مبرطمة تباوع على رهف باوعلها ابوية وكال
ابو داوود _ اللهم صلي على محمد وال محمد هاي اختج بويه
عشتار _ اي عمو
ابو داوود _ ما شاء الله تشبهج
باوعتله آسيا وكمزت من حضن عشتار وكفت كدام ابوية وكالت بطفولة وهي تأشر بمعنى لا
آسيا _ لا آمووو ناني ماهذه ملامهي مين اثدادي ( لا عمو اني ماخذه ملامحي من اجدادي )
ضحكنه كلنه وهي كتفت ايدها بزعل ورجعت بحضن عشتار تباوع الرهف بزعل ضحكت عشتار باوعت الرهف وكالت
عشتار _ شسويتي وياها
رهف _ ماسويت شي
عشتار _ آسياوتي تكول ماسويت شي صدك
هزت راسها لا وباوعت الداوود وكالت وهي عصبية
آسيا _ امووو
ضحك داوود وكالها
داوود _ عيون عمو
آسيا _ لهف اهتك غثت ( رهف اختك غشت )
ضحكنه كلنه باوعتلها رهف بصدمة وكالت
رهف _ عزه شلون عرفت والله مخليتها تشوف
ابتسمت عشتار وهي تعدل شعرها وكالت بهدوء
عشتار _ آسيا ذكية كلش يعني ما يعبر عليها شي إذا تغشين تعرف إذا تحاولين تقشمريها تعرف إذا تكذبين تعرف
طول الوكت ايمن صافن باوعلي وهمس بأذني
ايمن _ ولك هاي إذا باوعتلك اطلع مصلخ شوف نبرتها مال طكطكطوكين صوتها مال طبقة مطكطكة عابرة مرحلة المخملية
مشعل _ انجب لا اكوم أسكتك كدامهم
باوعت العشتار كلبي يفز بكل مرة تحجي بيها 
باوعتلها وصال وكالت
وصال _ عشتار
عشتار _ نعم
وصال _ سمعت انتِ اللي مهتمه بخواتج
عبالي راح تتوتر او راح تنزعج لكن صار عكس توقعي تماماً ابتسمت بفخر وكالت
عشتار _ اي الحمدلله
وصال _ وعادي عندج يعني تربين ثلاث بنات وانتِ بعدج طفلة تحتاجين تربية
ضغطت على ايدي بكل قوتي من اسألتها الوقحة اعرفها حاقده عليها ابتسمت عشتار وكالت جواب صدمنه كلنه واولنه صدم وصال
عشتار _ عادي طفلة واعية احسن من مُسنه حشرية
باوعت الأيمن اللي يباوعلي وجهه احمر واني هم اريد اضحك رهف حاطه ايدها على حلكها وتهتز وصال وجها كام يذب ألوان ما تعرف شنو ترد ضحكن شمس ورميم وكالن
_ صدقتي
وصال _ زين امج شلون عايفه بنات بيدج ما تخاف عليهن
عشتار _ لا
وصال _ خطيه خواتج مستحيل انتِ تعوضين غياب الام
شمس _ غلطانه يا خااله
وصال _ شني غلطانة
عشتار _ قصدها وجودي يعوض غياب الجميع
سكتت تباوعلها بحقد باوعلي ايمن وهمس بأذني
ايمن _ شو هاي كلاشنكوف اشتغلتها شغل خلتها تبلعم
ابتسمت عجبتني قوة شخصيتها وأجوبتها شلون تجاوبها بهدوء تستفزها اكثر 
وصال _ بصراحة احسج متكبرة
باوعتلها عيونها حادة الدرجة محد يتصورها لأول مرة أشوفها تباوع الاحد بهالطريقة
عشتار _ لا تحسين
سكتت ثانيه ورجعت كملت
عشتار _ تأكدي
وصال _ بس التكبر صفة مذمومة مو حلوه ابد
عشتار _ التكبر على المتكبر عبادة
داوود _ كافي وصال احترمي الضيف خويه أنا اعتذر عن كلامها وحقج على راسي
عشتار _ ماكو داعي الاعتذار اخي كاعد تتناقش وياي عادي
مركز بكل حرف بكل حركة تمنيتها تبقه تمنيتها تباوعلي بس بنظرة كامت باوعت الأبوية بابتسامة وكالت بهدوء
عشتار _ شكرا عمو ما قصرت كفيت ووفيت
كام ابوية وكف وكالها
ابو داوود _ افا بويه لا تشكريني اني الأشكرج لان قبلتي تجين
عشتار _ الله يحفظك اني استأذن منكم هسه
ام داوود _ وين يمه تعشي وروحي
عشتار _ مشكوره وما قصرتي خاله بس البنات موعد نومهم بالعشرة وهسه بالسبعة
ام داوود _ بعد وكت يا يمه تحملتيني واجيتي للعزيمة تحملي هسه شويه تعشي ورجعي خايب البيت ما طار
عشتار _ عُمري خاله عزيمتج على عيني وعلى راسي والله بس البنات تعبن وآسيا عندها دوه اسمحيلي
ام داوود _ براحتج يمه والبيت بيتج شوكت ما يعجبج تعاي الج العين أوسع من المكان حبيبة الله شاهد فرحت بوجودج
باست راسها وكالت
عشتار _ تسلمين خاله ما قصرتي لا انتِ ولا عمو الكم كل الامتنان
كامت آسيا تركض حضنتها من رجلها ورفعت إيديها بمعنى شيليني ضحكت وشالتها اجني البنات يسلمن عليها ويبوسنها ويودعون البنات يبوسنهن
سلموا الولد من بعيد وصاح ايمن وهو يغير نبرته
ايمن _ بنت جيراني المثقفة اتمنى ان تعودي وتكرري هذه الزيارة واكون ممتن لكي
ضحكت وكالت وهي تقلده بالصوت
عشتار _ حسناً سأحاول ان شاء الله
ضحكوا كلهم إلا اني ضجت تمنيت تحجي وياي مثل ما حجت ويا ايمن تمنيتها تباوعلي على الاقل طلعت وطلعت روحي وياها ساعتين بقت يمنه بس حسيت راح افارك روحي رحت للصالة اباوع على مكانها واتحسر باوعت على اليمين شفتها تباوعلي وتبتسم ابتسامتها اللي اخذت ثلثين حيل مشعل لابسه قفطان ابيض دنكت خجلانة ورفعت راسها باوعتلي تضحك واني ابتسم باوعتلي وسألت صوتها بي صدى
_ تحبني ؟
هزيت راسي بمعنى اي سألتني وهي تلعب بشعرها
_ شكد مثلا
مشعل _ لدرجة كمت اتخيلج
_ بس
مشعل _ مستعد احرك العالم علمود عشتاري
ضحكت بصوت عالي تقربت مني وحطت ايدها على خدي حسيت حرارة على خدي مو طبيعية كالت كلام انطبع براسي
_ انتَ بطلي بس اني الصعب تحصله راح تحارب علمودي يا ترى ؟ تذكر اما اني او لا احد تمام بطلي
هزيت راسي واني اميله على ايدها وحجيت
مشعل _ لا تعوفيني
ابتسمت وهي دنك عليه وحجت بس صوتها جان بي صدى كأن كاعد احلم او اتخيل
_ امممممم انتَ تقرر إذا عشتار راح تعوفك او لا هسه انتَ تحب عشتار
ابتسمت وحجيت بهمس
مشعل _ وشلون ما احب بنت حلوة مثلج
ابتسمت وهي تكول
_ وشلون اني اعوف شخص وسيم بكدك
مشعل _ راح اندم كلمن اذاج يا وطن روحه المشعل
ابتسمت ولزمت وجهي بايديها ثنينهم تمسح بخدودي همست بصوت
_ بطلي مشعل القوي
عافت وجهي وراحت للباب حجيت بصوت مخنوك
مشعل _ كلتي ما راح تعوفيني
صرت اسمع صوت ايمن يكعدني
ايمن _ مشعل مشعل كوم شبيك هذا حلم ماكو احد لك شكاعد تسوي بروووحك خرب مشعل خويه أصحى
فزيت اباوع ماهي باوعت الأيمن وحجيت واني ما واعي
مشعل _ وينها هستوها هستوها جانت هنا كالتلي ما راح أعوفك وطلعت وعافتني ايمن وينها
ايمن _ هدي هدي هذا حلم صدكني
مسحت وجهي من العرك وكمت بدون حيل صعدت للغرفة نمت بفراشي طلعت صورتها بقيت اباوعلها إلى ان غفيت
احس ايد دافيه تلمس وجهي فتحت عيوني شفتها لابسة ابيض باوعتلي وابتسمت
_ بطلي .

                                            يتبع
                                 طهر لسانك بذكر الله
                                       سبحان الله
                                        الحمدلله
                                     لا إله إلا الله
                                        الله اكبر

تعبتتتتت وعدتكم اليوم ينزل بارت وفيت بوعدي صح شويه تأخرت بس تعبانه كلش اليوم عذروني سيموراماتييي حبيباتي وعد البارت الجاي يكون احداث اكثر واطول بس اني مريضة شويه هذا اللي كدرت عليه عيناااي