طـغيان إِحمِرار السآعد

بارت 8

                 ‎ طِـــغيان إحمـــرار ألســـآعد        
                                 حاربـت حرب حـتى افـوز بيـگ
                                     وانتَ ما حاربـت غيـري

~ عشتار ~
اريد ارجع للبيت حسيت روحي انسحب ونظري صار يختفي
فتحت عيوني على البطيء راسي ثكيل يوجعني لساني عبالك خدران باوعت الرؤية مو واضحة غمضت عيوني شويه وفتحتها صارت اوضح غرفة حلوة بسيطة اجه بالي ثنين بس هم يكدرون يخطفوني امجد او مشعل ضحكت عباله راح اعيط او ابجي يخسي لازم بكل شي اختلف بقيت كاعدة باوعت اكو سبلت وعلى الميز الريمونت رحت شغلت السبلت ونمت على السرير وتغطيت تعبانه ونعسانه كلش غفيت مرتاحة مر وقت ماعرف شكد بين الكاعدة والنايمة احس احد يباوعلي نمت على ضهري وفتحت عيني اباوع على السكف حتى ما باوعتله سمعت نبرة صوت اللي عشكته روحي
مشعل _ جبرتيني
سكتت ودرت عيوني عليه اباوعله عيونه ذبلت يستغفر وينزل عيونه ويرجع يرفعها يباوعلي تنهد وكال
مشعل _ تعبان مريض بدونج أنا يا بعد حيلي ما اكدر على فراكج جذب والله غركت بالحرام بس علمود اباوع لعيونج اللي يسلبون عقلي احجي عشتاري اني تعبان مشتاق الصوتج
اباوعله ساكته ماعندي رد
مشعل _ شبيج ليش تغيرتي كل هذا علمود حجي حجيته بـ لحظة قهر انتِ تعرفين اني كذبت لا تعذبيني فوك عذابي
ساكته ما انطق بحرف بس اباوعله وهو دنك راسه يحجي
مشعل _ اني مشعل أتذكري مشعل اللي جان يدافعلج اللي جان يحميج من روحج اللي يحرك الأكو والماكو علمود نظرة منج
سمعت كلمة يحرك واجه على بالي شركات عمامي وبيوتهم حجيت برود
عشتار _ انتَ السبب مو ؟
قلص حاجبه يدعي هو ممفتهم
عشتار _ الشركات والبيوت انت وره حركهم ؟
هز راسه وكال
مشعل _ اني السبب اي
باوعتله بأستغراب ممفتهمه
عشتار _ ليش
حجه وعيونه بطن عيوني
مشعل _ اللي يرفع ايده على ممتلكاتي مصيرة يتفحم
حجيت بحدة
عشتار _ ممحتاجة احد يحميني اني اعرف احمي نفسي وبعدين شدخلك رفعوا ايدهم لو لا
مشعل _ اذوج
عشتار _ مالك دخل اذوني حركوني موتوني لا تدخل بيه
هز راسه ما قابل
مشعل _ مستحيل اللي يأذيج يأذيني وتعرفين حكي ما اعوفه عند احد كائن من يكون
هزيت راسي ما بيه حيل احجي اي شي
عشتار _ اطلع بره وكعدني المغرب ارجع للمهجوم عايفه خواتي من وراك
هز راسه مو مصدك
مشعل _ شنو
اشرت بيدي بمعنى شنو يحجي بعدم فهم ويكطع بالكلام متعجب
مشعل _ تردين اطلع واكعدج المغرب ؟
هزيت راسي واشرت على الباب بمعنى اطلع باوعت على الفراش تلعب نفسي انام انتفضت واني اكول بداخلي
_ لا لا لا تفكرين مابي شي شوفي نظيف وابيض مبين محد نايم بي اهوو لا تفكرين لعنة الله على الشيطان نامي يلا
باوعت لكيت روحي واكفه مبتعدة ما اكدر المس اي شي روحي لعبانة اتنهدت بتعب إلى متى ابقه هيج وعيت على روحي واني ايدي صارت عبارة عن كتلة من الاحمرار اريد أسيطر على روحي ما اكدر كمت اعيط بكل قوتي
عشتار _ تعااااااااال طلعنييييي
انفتح الباب بنفس اللحظة دخلت عليه مره كبيرة مصدومة من عياطي باوعتلي وكالت
المره _ انتِ منو وشدسوين هنا وليش تعيطين انتِ منوو
باوعتلها وحجيت
عشتار _ انتِ منو
المره _ اني ام داوود انتِ منو
حجيت على السريع واني فاقده السيطرة على روحي
عشتار _ خالههه طلعينييي الشريان راح ينقطعع
باوعتلي بصدمة ممفتهمه وخرت عن الباب ونزلت اركض اباوع بنات وزلم مبين أولاد هاي المره يباوعولي بصدمة حجه رجال كبير
ابو داوود _ بنتيي وين رايييحة
ما اسمع الاحد اركض راح اموت راح اموت فتحت باب الشارع وانطخ راسي بصدر من حديد باوعت هذا مشعل يباوعلي بصدمة ما مصدك وضعي عيوني حمر دم وايدي طاغي عليها الاحمرار هستوه يريد يحجي دفعته ورحت اركض
منطقة شعبية حلوة جهال يلعبون وشباب كاعدين باب بيوتهم
مشيت من يم الجهال وسمعت ولد يكول
الولد _ هاي مو منا شوف شكلها شجابها على هذني الزرك اللي بمنطقتنه
ضحكت بعز تعبي بس اريد اوصل للشارع العام امشي سريع وطبكت سيارة باوعت نزل مشعل بعيونه خوف وعصبية
مشعل _ اصعدي عشتار اصعدي ان شاء الله بيه ولا بيج ابوية
باوعتله واحجي على السريع ايدي تملخت
عشتار _ عوفني عوفني
هز راسه وهو يكول
مشعل _ اصعدي عشتاري لا تعبيني
صعدت بقلة حيله مابيدي شي اريد اوصل للبيت
صعد وحرك سريع واني روحي فرفحت السآبع سماء مكاعد اتحمل وهو يباوعلي عيونه مدمعة ويتحسر بتعب على حالتي حجيت
عشتار _ امشي سريع كاعد تمشي على بييييض
ساكت ما ينطق بحرف مشه سريع كلش باوعت دخل للفرع مال بيتنه قبل ما يوكف السيارة نزلت وكعت بالكاع جانت عايزه والتمت باوعولي الحراس فاتحين عيونهم على وسعها فتحوا الباب دخلت اركض دخلت للبيت اباوع اخواني شافوني متعجبين منظري عيوني وجهي احمر ايدي متملخه حجه محمد بعصبية
محمد _ هاي وين جنتي دايحة وهيج سووا بيج
تفيت بوجهه وحجيت
عشتار _ كلمن يشوف الناس بعين طبعه يا سكط
عفتهم وصعدت اركض دخلت الغرفتي البنات تعجبن ملحكوا حتى يحجون ركضت للحمام اسبح اريد هذا الإحساس الخبيث يروح افرك بجسمي بكل قوتي علبة الشامبو خلصتها غسول الجسم خلصته روحي طلعت بيه احساس ما يعرف بي بس رب العالمين طلعت روحي رايحه مابيه حيل اسوي اي شي
عشتار _ صيحوا العاملة تجي
راحت رميم بدون كلام اجتي العاملة
عشتار _ شوفي هذا غرفة كلها سوي تنظيف اوكي
العاملة _ حاظر مدام
عشتار _ ورشي معطر
العاملة _ حاظر مدام
اخذت البنات ورحت الغرفة شمس كعدت على السرير تعبانه كلش تعبانه باوعتلي شمس ونزلت نظرها على ايدي
شمس _ إلى متى
سكتت ماعندي جواب
شمس _ كافي بعدج بعز شبابج وهيج تعذبتي كافي الله يخليج
باوعتلها وحجيت تعب الكون كله بيه
عشتار _ امي مابيه شي لا يظل بالج قريتوا
باوعولي وهزوا راسهم
عشتار _ عاشت أيدكم شرايين كلبي حتى من اكعد اسمعلكم
باوعتلي رميم
رميم _ امتحاناتج مبقالها شي
هزيت راسي وحجيت
عشتار _ ادري امي اليوم من اكعد اسمعجلن واكعد اقره
باوعتلي آسيا
آسيا _ وعمامي شلون بيهم
باوعتلها وابتسمت
عشتار _ اتفرغلهم بالعطلة
ضحكت شمس وهي تكوم واجت نامت بصفي
شمس _ راح اطميهم طم
باوعتلها وابتسمت
عشتار _ وبلا شك إنتوا وياي
ضحكن واجني رميم وآسيا نامن بصفي وكل وحدة باستني بخدي
عشتار _ يلا نامن امي
تغطينه ونمت بعد تعب كعدت على صوت دك الباب كعدت شمس باوعتلها وحجيت
عشتار _ رجعي نامي امي
هزت راسها رحت فتحت الباب لكيت الأكبر استغربت
عشتار _ خير بيك شي يوجعك شي
هز راسه بـ لا استغربت اكثر
عشتار _ لعد شتريد
باوعلي وكال
الأكبر _ تعالي للغرفة
باوعتله بشك مكاعد أثق قفلت الباب على خواتي اخاف متفق ويا اخواني وهو يباوعلي مصدوم من حركتي
رحت على غرفته سد الباب وكعدني على السرير وكعد كبالي ساكت حجيت بقلة صبر
عشتار _ شتريد فضني لا تظل صافن بوجهي
نزل راسه وحجه بصوت خافت
الاكبر _ تحبيهن
انصدمت من سؤاله
عشتار _ منو خواتي ؟
هز راسه
عشتار _ بناتي
حجه بحسرة
الاكبر _ يعني تحبيهن
عشتار _ ماكو وصف او تعبير يوصف حبي الهن
رفع راسه يباوعلي
الاكبر _ تقريبا
باوعتله وحجيت برود
عشتار _ اللي سويته يثبت حبي الهن
حجه بتساؤل
الاكبر _ وشنو اللي سويتي
عشتار _ اتحملت علمودهن اللي ميتحمله بشر صرتلهم كل شي ام أب اخت اخ صديقة عشيرة صرت سندهم اتحملت الضرب والتعنيف والإهمال والحرمان كل هذا تحملته علمودهن كل شي انحرمت منه وفرته الهن هذا غير الحروب اللي خضتها وحدي طفله وشايلة مسؤولية ثلاث بنات وكومة أشياء لا تُعد ولا تُحصى تحملتها علمودهن
باوعلي مصدوم من كلامي عيونه تغرغرن بيهن الدموع
الاكبر _ واحنه ؟
ابتسمت وحجيت بخيبة
عشتار _ اشتريتكم بماي عيني وبعتوني بالرخيص
نزلن دموعه كلبي وجعني عليه حجيت بهدوء
عشتار _ لا تبجي
يشهك بكل حيله يحجي يرجف عبالك ما واعي اول مرة اشوف اخوية هيج
الأكبر _ موتوني والله موتوني ضيعوني اني مو هيج اني ما أريدهم اي اي ما أريدهم اريد خواتي اريد اختي اللي جانت بمثابة امي وابوية علموني على المخدرات والشرب وكل ما اريد اعوفهن ميخلونيي والله ميخلونييي
روحي فرفحت على اخوية سكتت اريده يكمل
الاكبر _ عبالج ما ادري رادوا يحركوني وانتِ نقذتيني واني مسوي بيج مصايب خليتي روحي تنمرد من الندم والحسرة اكلت كلبي عمري ما حسيت بأمان مثل ما حسيت يمج عمري محسيت احد يحبني صدك مثلج وشلون نسيتي كل شي اني سويته
فتحتله ايدي باوعلي وكأن ممصدك اجه حضني بكل قوته جسمه يهتز من الشهكات من قوة شهكته كعدت بالكاع وهو بحضني امسح على رأسه وضهره ساكته وهو يحجي بأنهيار
الأكبر _ عرفت ليش البنات يحبوج والله عرفت اي اي عرفت لان حنية الارض بيج والأمان كله يمج ابقي يمي لا تعوفيني اني خايف اي اي خايف ما راح تعوفيني مو
باوعتله وهزيت راسي بـ لا
عشتار _ لا ما راح اعوفك وداعت شهكاتك الهدت حيلي ثارك مأخوذ
حجه يرجف
الاكبر _ اريد انام أريد أنام بدون خوف الله يخليج
بست شعره وحجيت
عشتار _ تجي تنام بالغرفة
باوعلي يهز راسه حيل بمعنى اي
هزيت راسي لزمت ايده ورحت للغرفة فتحت الباب البنات نايمات السرير كبير كلش نمت وهو اجه يرجف عيونه حمرة نام على ايدي ولازم ايدي الثانية بكل قوته غطيته كلش زين امسح دموعه وابوسه بعيونه مرت فترة قليلة باوعتله نفسه انتظم عرفته نام تنهدت روحي رايحه بس اكو شك بداخلي مكاعد اكدر أثق يجوز هاي خطة شلون أعرف إذا خطة او لا ياربي
حطيت راسي بصف راسه ونمت كعدت على حركة اباوع البنات واكفات عيونهم تريد تطلع اشرتلهن اششش باوعت على الآكبر غافي لازم ايدي بقوة
تنهدت واشرت للبنات على الكتب بمعنى روحن اقرن بقيت اباوعله واباوعلهن ياربي ارحمني مسؤوليات بحمل الجبال انطيني من عندك حيل وقوة يا قوي
فجأة كام الاكبر يصيح
الاكبر _ لااااا عوفونييييي
لزمته حضنته بكل قوتي امسح على شعره وهو سكت يرجف حاضني بكل قوته خايف امسح على متنه احجي
عشتار _ كافي امي انتَ
البنات يباوعون الحالته مصدومات وهو مغمض عينه يرجف رجعت راسه على المخدة امسح بوجهه
عشتار _ كوم اسبح
باوعلي عيونه متغوركة
الأكبر _ عادي ارجع يمج
ابتسمت بحنان وبست راسه
عشتار _ تنور
هز راسه وطلع من الغرفة وكل هذا البنات مستغربات فاتحات عيونهم باوعتلهن وحجيت
عشتار _ شنو ذنبي اباوع الكه ست عيون تباوعلي اقرننن
باوعتلي شمس وكالت بصدمة
شمس _ شنو هذا شديصير اني وين انتِ وين احنه شنو هذا منو
باوعتلهم وتنهدت بتعب وحجيتلهن كل شي باوعتلي آسيا زعلانة من حالة الأكبر حجيت اريد الطف الجو
عشتار _ لا تخافون كل شي مابي هسه يلا شنو خلصتوا خلي اسمعلجن
باوعتلي رميم وحجت
رميم _ قريت هاي القصيدة حفظتها اكثر من اسمي واني وشمس نفس الواجبات
شمس _ بعدني مو كلش ضابطتها
عشتار _ بين ما اسمع الرميم اضبطيها
هزت راسها ورحت سمعت الرميم حافظتها زين باوعتلي شمس وكالت
شمس _ خلصت سمعيلي
سمعتلها وهم جانت ضابطتها رحت على آسيا باوعتلي وكالت بضحك
آسيا _ عندي امتحان رياضيات وكل شي ما فاهمة منه
باوعتلها فاتحة عيوني آسيا شاطرة كلش مستحيل تفوت شي باوعتلي وضحكت
آسيا _ سديها يمعودة يمن اروحلها فدوة أشاقه
ضحكت وبستها بخدها طلعتلي الموضوع سألتها شكم سؤال جاوبتني يعني فاهمة الموضوع انطيتها تمارين تحلها انطتني الورقة باوعت كلها صح ضحكت وضميتها بحضني بهالاثناء دخل الاكبر باوعلي شلون حاضنه آسيا ابتسم بحزن وكعد ويانه ساكت باوعتله آسيا وخرت من حضني وطفرت كعدت بصفه تحجي
آسيا _ جنت اتوقعك بصراحة خايس بس طلعت ريحتك طيبة
باوعلها مصدوم من صراحتها ضحك وسكت ضربته على رجله خفيف
آسيا _ اوووف وكع الميانة يلا الاكبري
ضحك وكال بهدوء
الاكبر _ شنو الاكبري
ضحكت وهي تجاوبه
آسيا _ هو اي واحد ريحته طيبة احبه وأكول اسمه بالياء
ضحك من كل كلبه وهي تضحك
الاكبر _ والله عليج سوالف
ابتسمت وكمت باوعلي الاكبر بخوف
الاكبر _ وين رايحة وين
ابتسمت وحجيت
عشتار _ اجيب جنطتي
باوعلي وهز راسه رحت جبت جنطتي رجعت انصدمت واني أشوف آسيا حاضنه الاكبر بكل قوتها وهو مبتسم حاضنها مالت راسها وباسته بخده بكل قوتها وهي تكول
آسيا _ افيششششش يريحة هلي
باوعتله وحجت عالسريع
آسيا _ لا اييييع شنو ريحة هلي ريحتهم خايسه
باوعلها بصدمة يستوعب وطكها بضحكة والبنات يتمرغلون بالكاع من الضحك ابتسمت ورحت بعيد عنهم طلعت كتبي وبديت اقره كتبت ورتبت كل شي ضبطت كل شي ورجعت الكتب بالجنطة باوعت لكيت الاكبر يباوعلي مبتسم ابتسمتله ورحت كعدت يمهم ضحكت آسيا من شافتني وحضنتني بكل قوتها تبوسني بركبتي اشم بيه وخرت من حضني حطت راسها على صدري تلعب بأيدي والاكبر باوع البنات وسألهن
الاكبر _ شكد تحبون عشتار
حجت شمس عيونها تلمع
شمس _ اكثر من الدنيا كلها
حجت رميم مأيده كلامها
رميم _ ماكو شي يوصف حبنه الها
حجت آسيا وهي تبوس ايدي
آسيا _ حبنه الها مثل الأمان اللي نحسه يمها وبصفها لا يوصف بكلام ولا بأفعال
باوعلهم وحجه مأيد كلامهن
الاكبر _ حقكم
راحت آسيا ونامت على صدره تبوسه من خده وهو مصدوم من معاملتها
آسيا _ لا تزعل هم نحبك
باسته بخده مرة ثانية وحطت ايدها على صدره وهو عيونه مدمعة مرتبك حط ايدك على جتفها يمسح عليه يباوعلها بقهر وندم مرت فترة وهي نايمه على صدره وهو مبتسم طاير بيها كل ساع يبوسها بأيدها براسها باوعلها نامت باوعلي وكال بتردد
الاكبر _ عادي احطها على السرير
ابتسمت وحجيت
عشتار _ خواتك مو بس خواتي بس بناتي اني مو بناتك
ضحك وشالها يبوس براسها حطها على السرير بقه صافن بوجها مركز ابتسمت ورحت راجعت كل شي والبنات راجعن وراحن ينامون باوعلي وكال
الاكبر _ اريد احجي وياج بموضوع
هزيت راسي وحجيت
عشتار _ اني هم عندي موضوع مهم وياك كلش
أخذني وكعدنه على التخم باوعتله وحجيت
عشتار _ عمامي مو ناوين على خير خصوصاً بعد ما تفحمت شركاتهم وانتَ ما كدروا يحركوك لازم تختل بمكان
باوعلي وكال
الاكبر _ شنو اني مو زلمة حتى اختل منهم
باوعتله وهزيت راسي بـ لا
عشتار _ محجيت هيج بس اكو مكان ينفعك ما يضرك هم تتعالج وتستعيد وعيك علمود تكدر تصرف وهم ترجعلي انسان طبيعي
هز راسه وكال
الاكبر _ وشنو هذا المكان
عشتار _ تروح تتعالج من الادمان
باوعلي ساكت عيونه غوركت باوعتله حضنته ومسحت الدموع اللي نزلت
عشتار _ لازم امي لازم تروح
حضني جسمه يهتز دموع توكع على ركبتي بست خده احجي
عشتار _ ازورك صدكني مستحيل احد يأذيك واني اشم الهوا
باوعلي دموعه تنزل عشره عشره طلع تليفونه دخل على الواتساب باوعت وانصدمت واني إشوف عمي جاسر مهدده يسحره إذا مسوه نفسه ندمان واخلي ينام بغرفتي علمود يقتل خواتي باوعتله وحجيت كلمة وحدة بهدوء
عشتار _ ليش
باوعلي منهار لزم ايدي يبرر
الاكبر _ صدكيني ما كدرت اسوي اي شي اني فعلا ندمان والدليل شوفتج كل شي
باوعتله مادري شسوي
الاكبر _ والله مستحيل جنت هيج اسوي بس فرصة واجتني وعلمود توثقين بكلامي اني راح اروح اتعالج
باوعتله وهزيت راسي اعرفه مستحيل هيج يسوي
عشتار _ باجر تروح تتعالج
هز راسه وكال مستحي
الاكبر _ عادي اودعج واودع البنات
هزيت راسي اجه يمي حضني يبوس بخدي براسي بايدي سحبني الصدره يكول
الاكبر _ حضنيني عفيه
عبرت ايدي وحضنته اشم بي روحي تفرفح عليه بس ماعندي خيار ثاني بست راسه وابتعدت لزمني وراح يم البنات يبوس بيهم يشمهن بحسرة وصل الآسيا ابتسم وحط راسه بركبتها يشمها باسها براسها عيونه مدمعة ابتسمت واخذته
نومته على السرير وحطيت ايدي جوه راسه لزم ايدي بقوة ونام واني نمت كعدت باوعت الساعة أربعة الفجر سحبت ايدي وغطيتهم زين ورحت اتوضى خلصت فرشت سجادتي وصليت قريت شويه قرآن ورحت سبحت على السريع طلعت مشطت شعري وكعدت البنات وكعدت الاكبر
راح يسبح والبنات سبحن واجني سويت شعرهن وبدلت وهنَ بدلن رحت على غرفة الاكبر دكيت الباب ودخلت شفته يرش عطر
الاكبر _ نورتي الغرفة
باوعتله وابتسمت
عشتار _ شوكت تروح
تنهد وكال
الاكبر _ اليوم العصر
هزيت راسي ورحت يمه حضنته بكل قوتي اريد اشبع منه اخواني هذوله مهما يسوون ابقه احبهم بسته بخده وهو باسني براسي رحت على البنات أخذتهن تريكنه على السريع ورحنه للمدرسة دخلت للصف واجتي المدرسة ودرس يجر درس خلصنه دروس اخيرا وطلعنه من المدرسة باوعت وانصدمت واني أشوف عمي شاهين واكف وحراسه وياه اجه يمي يحجي باستهزاء
شاهين _ اليوم ابن محمد سلمان جاي بنفسه شتردين بعد
باوعتله وحجيت بقرف
عشتار _ ولا هلا
ضحك وتقدم لزمني من ايدي بكل قوته يهمس بأذني
شاهين _ قرب وقت الحساب بنت اخوية العزيزة
حجت شمس باستفزاز
شمس _ مابيكم خير ولا منفعه ولا مصلحة ولا بيكم رجوله ولا غيره شواربكم عليمن محطوطه
رفع ايده يريد يضربها لزمتها بكل قوتي نبتت أظافري بيها وحجيت
عشتار _ اخذ جراوتك وروح منا دام النفس عليك طيبه جرب مرة ثانية ترفع ايدك على وحدة من خواتي اله اكصها واحطها بحضنك
يباوع الأيدي اللي لازمة ايده بصدمة فلتت ايده بعنف باوع بوجهي وكال بتوعد
شاهين _ كاعد احسبها الج وحدة وحدة اصبريلي عشتار سهلة
حجت آسيا وهي تضحك
آسيا _ الله يقرفك شنو هاي الريحة الخايسه لعبت روحي ورب البيت
باوعلها وكال
شاهين _ تعرفين هذا العطر بيش بس حقج ممتعودة تشمين عطور
باوعتله رميم وحجت بجدية
رميم _ قصدك ممتعودين على ريحة الزبالة
ضحكنه كلنه وهو عيونه نطت قبل ما يحجي اخذت البنات ورحنه للسيارة سقتها ورحت على البيت دخلت ورحت اسبح طلعت مشطت شعري البيت فارغ كالعادة باوعت الاكبر ماكو تنهدت بتعب ورحت نمت اني والبنات كعدنه قريتهن وسمعتلهن ضبطتهن كل شي ورحت اقره كتبت واجباتي وضبطت المواد كلها دك تليفوني باوعت رقم غريب رديت
عشتار _" الو"
شخص _ "سلام عليكم اختي"
عشتار _ " وعليكم السلام تفضل "
شخص _ " انتِ اخت المريض الاكبر عبدالله محمد "
كلمته لجمتني مريض اخوية صار مريض تنهدت وحجيت
عشتار _ " اي نعم "
شخص _ " المريض طالب يشوفج ضروري "
عشتار _ " دزلي اللوكيشن هسه جايه "
شخص _ " تمام "
سديته واني الوب حسبي الله ونعم الوكيل بيكم الله لا ينطيكم هدمتوني وهدمتوا اخواني الله ينتقم منكم
اجاني اللوكيشن رحت للبنات
عشتار _ شرايين كلبي تعالن وياي
باوعتلي شمس وكالت
شمس _ وين
عشتار _ تعالن بملابسكم يلا
اجوي همزين جانوا لابسين رياضي رحت للسيارة شغلتها ومشيت وصلت للموقع اتنهدت والبنات صافنات ممفتهمات
عشتار _ ابقوا هنا هسه اجي واشرحلكم
هزن راسهن نزلت دخلت ودكيت على الشخص اللي دك عليه
الشخص _ " إلو"
عشتار _ " اني وصلت بس يا طابق "
الشخص _ " الطابق الثاني غرفة رقم ..."
عشتار _ " تمام "
دخلت بالمصعد وصعد وياي شخص ملثم عرفته كبل بس سكتت سويت روحي ما اعرفه ولا اشوفه صعدت ورحت للغرفة دكيت الباب ودخلت شفت اخوية كاعد على تخم واكو شخص كاعد على الكرسي يسولف وياه من شافني كام من مكانه مبتسم
شخص _ اهلا وسهلا وياج الدكتور سعد اخصائي الطب النفسي وعلاج الادمان
عشتار _ اهلا وسهلا بيك دكتور
سعد _ حجيت ويا اخ حضرتج جان متفاهم وماعنده مشكلة بالعلاج بالعادة اللي يجي بهيج حالة يكون عنده عصبية مفرطة لان راح ينمنع عن ادمانه بس اخ حضرتج جان غير الصراحة صدمني
ابتسمت وحجيت
عشتار _ تسلم دكتور ما تقصر
سعد _ لا تدللين هسه أخليكم براحتكم موعد الزيارة ربع ساعة وعندي معاج موضوع
هزيت راسي وهو طلع كعدت بصفه وحجيت بحنان
عشتار _ احسن شي سويته
باوعلي لزم ايدي باسها
الاكبر _ تليفوني محفظتي جوازي اوراقي كلهن بالغرفة اخذيهن يمج ضميهن اخاف كل شي يصير
ابتسمت وحجيت
عشتار _ لا تخاف الوضع تحت السيطرة
ابتسم بتعب
الاكبر _ ركزي بأمتحاناتج
اشرت على عيوني واني اكول
عشتار _ من عيوني وانتَ دير بالك على نفسك مهما تتأذى أتذكر عمامك الخايسين واصبر علمود تطلع تبتلي بيهم
حجه بحقد
الاكبر _ ابتلي بيهم بس متوعدلهم والله بس خلي اطلع
عشتار _ واثقه راح تأخذ حقك بنفس الوكت ثارك اني هم راح اخذه
ابتسم وكال
الاكبر _ ولا ينخاف عليج
ضحكت بكل قوتي
عشتار _ ينخاف مني مو عليه
باس راسي وهو يكول
الاكبر _ دير بالج منهم تره عدهم سوالف وخطط مو طبيعية يمكن ينتقمون منج بخواتج انتبهي وكوني حذرة
ابتسمت بأستهزاء وحجيت
عشتار _ من جنت طفلة بكد إيدهم مكدروا يلمسون شعرة من راسهم مو عاد هسه يصيرون زلم
ضحك بكل قوته واني ضحكت على ضحكته اختفت ضحكته فجأة وباوعلي
الاكبر _ اسف على كل شي
عشتار _ لا تتأسف مالك ذنب
عيونه دمعت وهو يكول
الاكبر _ كلتي ما اسامحكم
حطيت عيني بعيونه
عشتار _ ربي يعرف نيتي ويعرف احجي هيج من قهري ما اسامح ابوية واخوانه السربتيه وأولادهم الخايسين مو عليكم
الاكبر _ يعني مسامحتني
ابتسمت بحنان واني امسح على وجهه
عشتار _ ونسيت كل شي واتذكرت الآكبر اللي ربيته مع انو هو اكبر مني اتذكرت حنية الاكبر اتذكرت كل شي حلو بالأكبر ونسيت كل شي مو حلو
باسني بخدي وحضني يشم بملابسي دخل الدكتور وهو ما يقبل يعوفني والدكتور يضحك ويكول
سعد _ يلا الأكبر لهالدرجة تحب اختك
حجه الأكبر وهو يبوسني براسي
الأكبر _ اكثر من امي
ابتسم الدكتور وصاح زلم ثنين لابسين مثل الممرضين اخذوا الاكبر وطلعوا باوعلي الدكتور وكال
سعد _ تفضلي اخت عشتار تفضلي كعدي
كعدت على الكرسي وهو كعد مقابيلي
سعد _ احجيلي قصة اخوج حتى اعرف شلون أتعامل وياه
تنهدت وحجيتله قصته من البداية للنهاية باوعلي وكال
سعد _ طبيعي اخوج عندة قابلية للتغير وهذا الشي راح يساعدنه جدا
عشتار _ دكتور شوكت اكدر ازوره
سعد _ كل اسبوع تكدرين تجين تزورينه ولكن على بعد لان ممكن تكون حالته النفسية متأزمة بسبب العلاج وامتناعه التام عن الممنوعات
هزيت راسي وكمت وحجيت
عشتار _ شكرا دكتور
سعد _ لا شكر على واجب
عشتار _ من رخصتك
سعد _ اهلا بيج
اول ما طلعت صار بوجهي منتظرني تجاهلته كأن اشوف هواء صعدت بالمصعد وهو صعد وياي وصعدوا ثنين شباب ويانه انتبهت واحد منهم يباوعلي
ابتسمت واني اطلع مكص حاد من الجنطة باوعتله وحجيت
عشتار _ سلام
باوعلي وابتسم وهو يكول
الشاب _ اهلا
ابتسمت وحجيت واني اخشن صوتي
عشتار _ اني اسمي جاسميه انتَ شنو اسمك
باوعلي مصدوم وحجه بتلعثم
الشاب _ اسمي امير
عشتار _ اريد أنطيك معلومة عني تسمحلي
هز راسه
عشتار _ تعرف اي احد يباوعلي هذا المكص ادخله بعينه علمود بعد ميباوع على بنات الناس
حجه بخوف
الشاب _ اي اي زين تسوين
هزيت راسي اباوعله بحدة
طلعت من المصعد وهذا وراي انداريت وحجيت
عشتار _ بطل تلحكني لا افضحك هنا ورب الكعبة
اباوعله عيونه مسدودة وخرت اللثام يكح وجهه احمر
عشتار _ على فكرة ماكو شي يضحك
هز ايده وكال
مشعل _ يا ماكو شي ردت اشعل الولد شعل بس انتِ ما قصرتي
خشنت صوتي مثل ماسويت بالمصعد وحجيت بأستهزاء
عشتار _ وخر من يمي لا أحط المكص بخشمك اخلي يصغر
هذا مات فطس عفته ورحت لان انحصرت ضحكة رحت اركض للسيارة فتحتها ودخلت شغلت السيارة وحركت وحجيت للبنات كل شي وصلنه للبيت والبنات بدلن ونامن رحت سبحت ومشطت شعري ورحت راجعت ونمت كعدت الفجر صليت وقريت شويه قران وسبحت مشطت شعري وكعدت البنات راحن يسبحن بدلت وبدلن سويت شعرهن ورحنه للمدرسة وصار الروتين العادي درس وره درس لحد ما طلعنه رحت للسيارة دا اريد افتحها ولمحت ثنين ملثمين بالسيارة استغفرت ربي وصعدت السيارة وسقتها وصلت للبيت ميهمني لحكونه او لا رحت دخلنه للبيت سبحت ورحت قريت البنات باوعتلي آسيا وكالت
آسيا _ اليوم شفت احد يلحكنه بالسيارة
رميم _ حتى اني
شمس _ حتى اني بس ماردت اكلج حتى ما ترتبكين
ضحكت وحجيت برود
عشتار _ ادري
فتحوا عيونهم ضحكت وحجيت
عشتار _ سدوهن سدوهن عادي
شمس _ شلون عادي
ضحكت وحجيت
عشتار _ عادي
فزينه اني والبنات على عياط مو طبيعي بحيث سدينه أذنه من قوة الصراخ
انصدمت واني اشوف الباب اتكسر وووووو .......؟؟؟

                                          يتبع
                               طهر لسانك بذكر الله
                                     سبحان الله
                                      الحمدلله
                                   لا إله إلا الله
                                      الله اكبر

شنو صار؟ تتوقعون راح يحدث ما لم يكن في الحسبان ؟؟توقعاتكم

ضيفوني إنستا remass_hamza