طـغيان إِحمِرار السآعد

بارت 24

                      ‎ طِـــغيان إحمـــرار ألســـآعد
  لا تحــاول مـع من لا يحــاول

~ عشتار ~
التفتت على مشعل اللي كاعد مقابيلي ونظراته اربكتني ثواني وكال
مشعل _ عشتاري وطن روحه المشعل هدمتي حيلي بثواني وحك علي الكرار تعبتيني فوك تعبي
عيوني تحركني وخنكة بصدري حجيت بغصة
عشتار _ روح ارجع الحياتك وعوفني اني أحير بنفسي لا تخاف اللي صبرني هالسنين راح يصبرني على بُعدك
مشعل _ منو كالج أنا أعيش بلاج ؟ منو كالج مشعل يعيش بدون شوفتج ؟ لو تعرفين محبتج بروحي ما جان حجيتي هيج
عشتار _ انتَ الاشعل شاعل روحي من شفتك إلى اليوم انتَ غيرت هواي أشياء بداخلي أشياء هي مزروعة بيه مثل انعدام تجاوبي مع اي شعور عطافي اني ما كنيت الشخص مشاعر غير خواتي .... وغيرك
ابتسم من كلامي كام بتعب جاب الكرسي وتقدم يمي كعد على اتجاهي اليمين مبتسم على كلامي اشرلي بمعنى كملي ابتسمت بخيبه وحجيت
عشتار _ انتَ اول شخص من بعد خواتي افتحله كلبي واسولف وياه خاصة انتَ رجال واني بصراحة اكره كل جنس بني ادم كل الناس تشوفني بنية قوية صلفة ما متربايه متكبرة انتَ الوحيد شفتني بغير نظرة صح اني عمري ماهتميت للناس بس انتَ جنت بكل شي مختلف عني ما اقصد الحالة الاجتماعية او المادية لا هواي أشياء بيها اللي تعرفها وبيها اللي ما تعرفها بس إذا متندم تكدر ترجع الأهلك والحياتك و....
حط ايده على حلكه يحجي وعيونه مدمعة تلمع بدموعها
مشعل _ اشششش لا تكملين لو اكدر اعوفج جان هسه أنا هنا ؟ عشتاري انتِ اعظم عطاء رب العالمين اكرمني بي انتِ عوضتيني عن الحرمان عن التعب عن الشغل مثل الحمار اربعة وعشرين ساعة  عوضتيني عن الاذية تردين بعد كل هذا اعوفج ؟
عشتار _ انتَ تعبان وتعبت وياي هواي يكفي اللي سويته
مشعل _ أنا تعبان على تعبج بويه
عشتار بأستغراب _ شنو بويه ؟ قصدك اني طفل ؟
ابتسم وسكت بقيت ساكته ومرتبكة ما اباوعله وهو مركز بيه الدرجة مو طبيعية حتى توترت وصرت ابعد بنظراتي ثواني وسألني 
مشعل _ شني تشوفين ؟
عشتار _ شنو اشوف ؟
مشعل _ اول مرة شفتيني بالمستشفى شني شفتي ؟
صفنت اباوع بعيونه مادري شنو أجاوب شنو اكول شفتك شيطان ؟ لو شفت عمي جاسر بملامحك ؟ لو شنو احجي شلون أجاوبه ماعرف تنهدت بتعب وكلت بهمس
عشتار _ مشعل روح نام انتَ تعبان وما نايم
مشعل _ عشتاره احجي
انقبض كلبي وبلعومي احسه يضيق وركبتي احسها خدرت ما احس بيها باوعتله وشفت وجه فارغ مابي ملامح حرفياً غمضت عيوني ورجعت فتحتها رجعت ملامحه طبيعية صافن بوجهي بأستغراب ملامحه مخيم عليها الخوف والاستغراب والقلق باوعت على اليسار شفت بالزاوية شي اسود مثل الدخان بس كان مرة يصير سريع وبعدين يصير بطيء مثل الأفلام شي مستحيل العقل يستوعبه اتحرك الدخان بسرعة مو طبيعية والتف ببطئ على رقبة مشعل وصار يلتف ويلتف ويتكاثر الدخان وريحته تخنك بشكل ريحة ابد مو حلوة كانت ريحة شي معفن وريحة شامبو خفيفة وريحة زفر وشي مو طبيعي مهما أوصفه ما ينوصف اختنكت من الريحة وصرت أكح بكل قوتي وكلما اكح بلعومي احسه مثل الزجاج ويجرح بي
اباوع عالدخان فاتحة عيوني والدخان صار يتكاثر ومثل يأكل مشعل اكل فجأة كل شي انعدم من الرؤية لكن فقط احس باللي حوالي صرت ادور براسي اريد المح ضوء لكن ماكو هدوووء واحس جسمي خدران ما اكدر اتحرك وحتى إذا تحركت ما احس بي
فجأة اجه صوت البنت اللي تبجي مهما اوصف الحزن والغصة والقهر اللي بنبرتها ما ينوصف تبجي بشكل يقهر ويقطع القلب صوت بجيها يفرمني فرم صوت بكائها صدى بأذني كأنها تبكي بمكان بي صدى والصوت محزن كلش صارت دموعي تنزل ما اكدر احجي بجيت على بجيها جمعت كل قوتي وسديت عيني اتحمل الألم وحجيت بصوت خافت كلش
عشتار _ وينج تعالي ليش تبجين ؟
اختفى صوتها فجأة وصرت اسمع ضحكة ركزت بيها اكثر واكثر واكثر واتذكرت هاي ضحكة منو ركزت اكثر صار الصوت يضحك اكثر كأنه يأكدلي اللي بالي او يضحك على عقلي هيج حسيت غمضت عيوني اسمع صوته بداخل راسي يحجي بتهديد وتوعد يضحك
_ إذا حاولتي تحجين كلمة راح اغركج بنار واطلعج عظم بلا جلد واتذكري خواتج جميلات حرامات يتشوهن
فتحت عيوني ورجعت غمضتها صرت اقرأ بداخلي آية الكرسي وصرت احس الضوء بدأ يرجعلي صرت اقرأها مرتين وثلاثة وأربعة وخمسة وسته وسبعة إلى ان اختفى عني كل شي احس احد لازمني من ايدي ويقرأ سورة الناس بصوت مرييييييح إلى ابعد حد ابتسمت مسترخية رافعه راسي صار يقراها مرة ومرتين وثلاثة إلى ان وصل رقم خمسة سكت واني حجيت بدون وعي
عشتار _ اللهم انك سلطت علينا عدواً بصيراً بعيوبنا مطلعاً على عوراتنا يرانا هو وقبيله من حيث لا نراهم اللهم فأيسه منا كما ايسته من رحمتك وقنطه منا كما قنطته من عفوك وباعد بيننا وبينه كما باعدت بينه وبين جنتك
فتحت عيوني واجت عيني بعينه جان يباوعلي بحزن دموعه تنزل دموعي نزلت اني هم هز راسه بـ لا وكال بحزن عيونه مخيم عليها التعب
مشعل _ لا لا لا تبجين دموعج مسحيهم من اروح فدوة لعيونج والله اروحلهن فدوة مسحيهن بويه
بجيت اكثر وبكل قوتي اشهك تعبانه على حالته زعلانة على وضعه شلون وجهه متغير وحزين شلون مبين عليه مقهور مني وساكت احتار هو شيسوي وياي يريدني اسكت وامسح دموعي ضربت وجهي بيدي وحجيت بصوت باكي مفرفحة روحي من القهر
عشتار _ ليششش هيييج تسويييي ليش روح ناااام يا بني ادم شوووف عيونك راح تطلع من التعببب والنعسسس كوووم روووح اوووووف ياربي شسوي
ما احس غير تقرب مني مد ايده يريد يمسح وجهي بعدت ايده بضربه خازرته بزعل وخر ايده وكال
مشعل _ خلص خلص اسف
مديت ايدي بزعل وضربته على ايده مرة ثانية رجعت ايدي متكتفه وحجيت بعصبية مبعده عيني عنه
عشتار _ ابني كوم خلي البنات يدخلون وانتَ روح نام
مشعل _ ابنج أنا ابنج ؟ وبعدين مو عيب تطرديني
عشتار _ داده لا تركز بهالكلمة وبعدين ما اطردك عزيزي بس كمت تتمادى وياي
مشعل بأبتسامة _ خلص حطلع بس لا تبجين ومسحي دموعج
عشتار _ خلص ما راح ابجي شوف
مسحت عيوني وخدودي وشفايفي وكصتي وشعري وخشمي بعصبية باوعتله وكل واني اشر على عيوني
عشتار _ ها شوف شفت شكد عيوني حلوة ما راح ابجي ارتاح وروح نام
باوع بعيوني بتمعن عيونه تلمع كال بتنهيدة
مشعل _ عويناتج تخبل كون اكضي العمر صافن بيهن
ابتسمت ودرت وجهي وهو استأذن وطلع شويه ودخل الدكتور كعد ينصحني وينطي تعلميات شكرته وطلع ابتسمت واني اذكر نظرات واكو استغراب بداخلي اول مرة احس بهيج شعور حلو اول مرة احس اكو شخص يحبني صدك ونظراته تشرح شكد هاويني جنت صغيرة احلم ادخل طب واتمنى اشتغل بدار أيتام مو علمود الفلوس لان أصلا ما احتاج فلوس بس احب يكون عندي عيادة واساعد المريض احب افرح الاطفال او اكفل يتيم او أساعد محتاج احس روحي انسان ناجح بحياته ما اريد اضمن الفلوس مثل اهلي ولا اريد ادخل بحروب علمود الشغل او احارب رزق احد مثل عمامي اتمنى افتح شركات واسوي منتجعات مو علمود يدخلون الي مورد مادي بس احب اشوف الناس تفتخر بلدها بناء بلدها بجمال بلدها صغيرة وكانت هاي كل طموحاتي عمري ما فكرت  بالزواج او الشباب او الحب او العلاقات لان هالعلاقات جنت اعتبرها فاشلة مثل علاقة اهلي بالضبط
لكن هسه عرفت انو مو كل العلاقات مثل علاقة اهلي الخايسه ومشعل مو مثل اهلي ولا مثل امجد الخايس سبحان الله فرق بينهم شاسع
وبنص افكاري داهموني البنات غمضت عيوني اصبر نفسي احجي بداخلي 
عشتار _ سمعي بنت الكلب لا تباوعين الشمس ولا الآسيا اخخخ لو باوعتي على وحدة بيهم او تجاوبتي نذر عليه اركعج بالشبشب لا تباوعين عليهم حتى لو نزلوا دموعهم سوي نفسج ما تشوفين لا والله ابو ابوج احركه
قويت نفسي وفتحت عيوني باوعت على العنود وابتسمت وهي ابتسمت بحزن واجتي عليه تركض حضنتني بكل قوتها حطت راسها على كتفي ساكته ودموعها تنزل تنهدت وحضنتها خليت ايدي على شعرها اطبطب عليها ما منطيه أهمية الشمس والآسيا مع انو اعرف نظراتهم اكلتني بس سويت روحي ما أشوف ابتسمت مايله راسي على راس العنود اغني بصوت ناصي بس مسموع متقصده لان هاي الأغنية جنت ما أغنيها بس الخواتي 
عشتار _ ضمي يا اختي ضميني نامي يا اختي بأمان في صدري دفئ وحنان اوصتني امي ان تبقي جوا عيني لا تخشي يا اختي من شيء لا لا تخشي
ضحكت العنود وباستني بفكي بكل قوتها رجعت حضنتني وكالت بتنهيدة
العنود _ روحي راحت عليج يا بعد المايشوفون بدونج
عشتار _ اسم الله عليج وعلى روحج يا بعد روحي
بستها بخدها مبتسمة وهي بعدت عني تضحك وتمسح عيونها لزمتها من وجها ومسحت عيونها احجي بابتسامة
عشتار _ اريد اشوف احلى شدو وماريد اشوف هالدموع تمام ؟
هزت راسها مبتسمة رجعت باستني عالسريع وكالت
العنود _ يلا نامي ارتاحي
عشتار بتنهيدة _ روحي انتِ هم نامي
العنود بهمس _ بعدين عندي وياج موضوع تسمحين آنسة عشتار ؟
عشتار _ مش مشكلة
ضحكت هي واني ضحكت درت عيوني على شمس وآسيا شفت شمس تباوعلي وعيونها حمررر دم وآسيا نظراتها ندم ، عتب ، لوم ، خوف حسيت نظراتها هدت حيل حيلي بس قاومت بكل قواي وبعدت نظري عنهم بهدوء فرشت العنود فراش بالكاع انكسر خاطري وروحي عليها ما هان عليه اعوفها تنام بالكاع صحتلها بهدوء
عشتار _ عنوده تعالي هنا لا تنامين على الارض
العنود بضحك _ خايبه أنا متعودة انام بالكاع اتمرغل من الحر نامي معليج بيه
عشتار _ تعالي هنا داده
العنود _ امعطجججج معطططط والرضا
ضحكت على كلامها وهي اجتي يمي بعدت نفسي شويه وخليت ايدي السليمة جوه راسها سحبتها بحضني وهي حطت راسها على صدري تشم بيه وتكول
العنود _ افييييييششش ريحتج ترد الروح والحسن هاي لو أنا جان ريحتي هسه معقم ابو الثوم
عشتار _ اووع شنو هالمعقم اللي بس اسمه مقرف
العنود _ اوييييي فدوة لله
ضحكت عليها وهي ابتسمت وغمضت عيونها تعبانه ونعسانة بست راسها مبتسمة ما راح انسى وكفتج وياي يالعنود غمضت عيوني تعبانة شوية وغفيت وصرت ما احس بشي
كعدت على دخول الشمس بعيني ابتسمت بشر واجه الصبح واليوم آخر يوم راح ترتاحون بي اقسم بالله إلا أحركها عليكم فتحت عيوني مبتسمة باوعت على البنات جانت العنود والبنات يتريكون ما عدا آسيا مبتعدة عنهم صافنة بيه باوعتلي العنود وكالت وهي تصفك
العنود _ ها ها يلا صباح خير شنو هالابتسامة اعرف وراها شي كولي كولي
عشتار_ ماكو شي جيبي البيض
باوعتلي بألم وتباوع عالبيض حطت ايدها على كلبها وكالت بحزن مصطنع
العنود _ الوداع ايها البيض المسكين راح تاكلك ام البيض
ضحكوا كلهم إلا اني على نفس ابتسامتي ما نطيت ردة فعل جابت البيض وصمون قبل لا تروح قسمت الصمونة واخذت نص ورجعتلها نص اتريك بدون ردة فعل وهم صافنين عليه مستغربات اكلت وكملت رحت امشي للحمام فرشت اسناني ورجعت للسرير حاطه ايدي على صدري اكو ألم بس ربي يدري بي ألم نفسي ألم جسدي كل أنواع الألم جربتها هذا سهل كلش اجتي شمس يمي باوعت عليها وهي تباوع بعيوني وكالت بهمس
شمس _ شميسه روح عشتانه
ابتسمتلها بهدوء وهي تقربت مني فتحت ايدها تريد تحضني تنهدت ما اكدر مو بيدي جريتها حاضنتها ابوس بيها كلبي مفرفح عليها فرفحت روحي عليها بوستني بخدودي نزلت راسها تريد تبوس ايدي جريت ايدي مانعتها لزمت ايدها وبستها رفعت نظري عليها وكلت بصوت واهن
عشتار _ عشتار تحبكم صح تعزكم صح انتوا أغلى من روحها صح مستعدة تضحي بنفسها علمودكم صح انتوا بالنسبة الها اعز من النَفَس صح انتوا بالنسبة الها بناتها ، خواتها ، صديقاتها ، روحها وعمرها وحياتها ودنيتها صح
سكتت شويه وكملت كلامي اهمس بحدة 
عشتار _ كل هذا صح لكن لا تنسون اني عشتار عبدالله لو منو يكون وشنو معزته ما اقبل بالغلط او الكذب ويا شمس اني متأكدة عندج شي وما كاعد تحجي
شمس _ بالبيت احجيلج اللي صار بس لا تزعلين انتِ امي اني ما راح اتيتم إذا امي الحقيقة صارلها شي لأ إذا صار بيج شي انتِ اني راح اتيتم
ابتسمت بحنان وقربت منها ابوس بوجها وأيدها حضنتها وحجيت بهمس
عشتار _ انتِ روحي واعز من روحي من تكبرين وتصيرين ام راح تعرفين شكد الاطفال عزيزين على امهم راح تفهمين ليش اني ما أدخلكم بهالحرب راح تفهمين ليش اخاف عليكم ليش احبكم ليش ما اقبل تضمون عليه شي كل هذا راح تفهمي
ابتسمت هي على كلامي ورفعت راسها باست خدي مبتسمة بفرح ابتسمت على ابتسامتها بس كلبي معصور على نظرات آسيا الي والها لكن ابد والله لازم تحس بخطأها ثواني وانفتح الباب دخل مصطفى ومشعل وايمن سلموا وكعدوا كالعادة عيون مشعل مثبته عليه باوعلي ايمن وكال يسوي حركات بوجهه على اساس زعلان
ايمن _ اي ست عشتار شلونج ؟
عشتار بأبتسامة _ الحمدُلله
ايمن _ خايب شني هاي انتَ هاي وين لاكيها مال تقنعني لكيتها بالمنتزه امسح أذنك بكطن مستحيل اصدك هاي تلاكيها بين الورود لان هي وردة مو زوجة اخي العزيزة ؟
عشتار _ احمممم اي صح بس الله يهديك عفويتك بطلها
مشعل _ نفذ
ايمن _ شني ؟
مشعل _ نفذ اللي كالته
ايمن _ شكالت ؟
مصطفى _ عفويتك الخايسه عفواً الزايدة بطلها
ايمن _ شني ؟
ضربه مشعل على بطنه خازره بحدة تقرب من السرير شويه وكال بأستهزاء
ايمن _ اووو اعتذر آنستي سيداتي سادتي اعتذر حقاً وجداً وأباً وأماً
ضحكت بكل قوتي والكل ضحك حجيت اباوع على رميم
عشتار _ هذا مو صوت مستر بين ؟
رميم بضحك _ اي والله
ضحكنه كلنه وبقوا شويه يسولفون إلى ان التفتت على العنود وكلتلها
عشتار _ وين الدكتور ؟
العنود _ ليش اكو شي يوجعج ؟
ما احس غير الكل طفر ويسأل شبيه وشنو يوجعني ابتسمت وكلت واني أشر بيدي بمعنى رخي
عشتار _ على كيفكم لا مابيه شي بس اريد اطلع هسه لان فعلا I can't اتحمل عطر المستشفى اكثر
العنود _ عشتار ما يصير الدكتور كال لازم اسبوع
عشتار _ العنود رجاءاً صيحي الدكتور
العنود _ اوووف منج كله عناد عناد عناد عناد يبوووو
راحت تريد تطلع وكام مشعل من مكانه وهو منزل عيونه وكال بهدوء
مشعل _ خويه اوكفي أنا اروح
العنود _ براحتك
راح هو طلع وهي كعدت تدردم ما عاجبها بعد دقايق دخل مشعل وياه دكتور لكن غير هذاك الدكتور اللي نصحني هذاك كان حباب وبشوش ومبين عليه نظيف وعيونه نظيفة لكن هذا اعوذ بالله النظرات تكره الواحد بنفسه باوعله مشعل بعصبية وكال بغضب مكتوم
مشعل _ دكتور عدنه اشغال مو وكت هاي السوالف
دكتور _ عفواً اي سوالف
مشعل _ مالك علاقة اي سوالف كتلك شوف حالتها تسمح تطلع منا لو لا
اباوع مشعل صار اعصاب عيونه نطت تباوع على الدكتور بحقد باوعلي الدكتور ولعبت نفسي من نظراته قبل ما يحجي اي احد حجيت بصوت حاد
عشتار _ دكتور ممكن تسجلي خروج  ؟
الدكتور _ بس انتِ بعدج ما طايبه وحتى جرح ركبت...
لزمه مشعل من ركبته من وره ونزله يضغط عليه بكل قوتي ساكت عيونه صارت حمر وهو خازره بكل قوته غضب العالمين بوجهه كاموا الولد يفاككون وطلعوا الدكتور بعد مدة دخل هذاك الدكتور المحترم سلم عليه
الدكتور _ سلام بنتي شلون صحتج
عشتار _ الحمدلله دكتور انتَ شخبارك ؟
الدكتور بأبتسامة _ على الله
عشتار _ دكتور اريد اطلع من المستشفى واريدك تسجلي ورقة خروج
الدكتور _ تدللين حاظر
ابتسمت مستغربة والكل مستغرب كام مشعل بأبتسامة وسلم عليه صفنت عالدكتور ياربي هذا وين شايفته والله اني متأكدة اعرفه وشايفته بس وين ما كاعد اذكر اوووف هسه شعليه هو منو بس خلي اطلع اخذ مشعل وطلعوا بعد فترة مو طويلة اجه الدكتور ومعاه مشعل باوعلي الدكتور وكال
الدكتور _ شوفي بنتي انتِ بعد ما تحتاجين الباندج اللي براسج لكن إذا حسيتي بأي مشكلة هذا رقمي دكي شوكت ما تردين
انطاني رقمه اخذته بدون تفكير لأني كلش مرتاحة اله ماعرف السبب بس احس اعرفه من سنوات ابتسمتله وشكرته ابتسم ورجع كمل كلامه
الدكتور _ بنتي ورقة العلاج موجودة عند الأخ مشعل وأبو الصيدلية هو يفهمج شلون تستخدميهن بس اهم شي تلتزمين بالاكل الصحي والفواكه والخضروات اشربي حليب كل يوم اكلي بيض لكن أنا شفت تحاليلج كلها سليمة وممتازة ما شاء الله معناها جنتي ملتزمة بالاكل الصحي
عشتار _ لا بصراحة بس اني اكل بيض هواي وبرتقال وفواكه تكدر تكول عايشه عليهم اكثر الوقت
ضحك الدكتور وصار ينصحني وينطيني تعليمات ويا الله الراحة من وخروا الباندج حسيت دخل هواء الراسي اخيرا شويه وكمت بدلت ملابسي لبست فستان وكعب وطلعت باوعت على مشعل جان يباوعلي بأنبهار وايمن يباوعله ويضحك يهز ايده دار نظره عليه وكال يحرك بإيده
ايمن _ عمي والعباس تنكرطين شني حلقوم
اجته ضربتين على راسه من يمي توجعت لزمت راسي بألم من صوت الضربة باوعلي مشعل من كل عقله رفع ايده وحجه باستسلام
مشعل _ خلص والله بعد ما اضربه خلص
ضربه مشعل على بطنه وكال بانفعال
ايمن _ خايب هو شنييي بعد ما اضربههه حسبييي الله على كيييد النساء يفرن عقوووووول بسحورتهننن
ضحكت ومشيت احجي
عشتار _ لا عزيزي ماكو سحورة اكو عشتار
ايمن مصطفى مشعل _ والنعمممممم
ضحكت امشي بس تعبانه كلش والبنات وياي اما آسيا اللي بس ساكته تباوعلي بحزن ادري بيها ندمانه بس كاعد تكابر بس والله اليوم لو اني لو انتِ سجلنه خروج وطلعت امشي بطيء تعبانه رحت عالصيدلية اخذت العلاج طلعت فلوس اريد ادفع خزرني مشعل بكل قوته وايمن ضرب كصته وكال بهمس عباله ما اسمعه
ايمن _ هو هذا اللي يعشك فايخة يا اخوي اتحمل ميخالف
عشتار بهمس _ داده أسمعك تره
ضحك يباوعلي ودار وجهه دفع مشعل الفلوس وطلع شايل الغراض هو والولد حجيت بهدوء
عشتار _ ماله داعي تدفع عني عندي فلوس
مشعل _ ماكو احد ما يعرف عندكم فلوس بس شني ما حاسبتني رجال ؟
عشتار _ حشاك بس ....
مشعل _ لا بس ولا خس عشتاري انتِ تسوين العيون يا مايها
هزيت راسي كلبي يرعد افكر بكلامه وصلنه للسيارة اخيرا صعدت كعدت وغمضت عيوني بتعب بدأ يسوق ايمن ومشعل بصفه متلثمين واني مابيه حيل ارفع راسي اباوع على احد بس اريد ارجع ابتسمت بتوعد والله وهاي آخر ساعات راحتكم هسه اجه دوري إلا العب بيكم لعب اصبروا عليه وصلنه نزلت اول وحدة بيهم وكفت مقابيل البيت رفعت راسي اباوعله من رغم فخامتك إلا انك بشع جربت أنواع العذاب بيك الضرب والشتم والتعنيف والاعتداء وماكو شي مصار بيك وتحت سكفك صح انتَ مالك ذنب لكن الذنب بركبة صاحبك ابتسمت بجانبيك وكلت بهمس
_ عبدالله محمد سلمان عبد الرحمن
قبل لا ادخل سمعت صوته يكول
مشعل _ عشتار وطن روحه المشعل ديربالج على نفسج
التفتت عليه وكلت بهدوء
عشتار _ تدلل وانتَ دير بالك على نفسك
دخلت للبيت بدون ما اسمع رده دخلت رافعه راسي امشي بثقة اباوع على الحدايق والنافورة اتجهت عيوني على كراسي موجودة بأحد الحدايق شفت امجد ومحمد من شافوني فتحوا عينهم بصدمة ما مستوعبين خصوصاً محمد جان شكله عبارة عن صدمة ابتسمت بشر اباوعلهم بحدة نظراتي تشرح شنو راح يمرون بي من بعد هاليوم درت وجهي بغرور ومشيت بثقة مع انو التعب واضح بوجهي اول ما فتحت الباب صار بوجهي جواد كاعد بالصالة من شافني ما شفت اي ملامح للصدمة عادي بارد نفسه نفسه ما اتغير مشيت ما معبرته ولمحت مكان الحادثة انعصر كلبي بقهر بس سكتت وصلت للدرج اريد اصعد وسمعته يكول
جواد _ الحمدلله على السلامة
ما سمع مني رد صعدت بهدوء والبنات دخلوا كلهم وراي واسمع صوت امجد يصيح بأسمي حلفت إذا اجه يمي او أتقرب ارتكب جريمة اليوم رحت فتحت الغرفة وانصدمت واني اشوف جداحة وجكاير وساعة باوعت عليها وابتسمت بهدوء هاي ساعة محمد باوعت على فراشي شفت صورتي وصورة الأكبر كلبي راح كلبي مات رحت امشي بطيء لزمت صورته اباوعلها مبتسمة مديت أصابعي على الصورة أتلمسها كلبي مفرفح يا روحي انتَ
اسفة يا بعد روحها الاختك عفتك وحدك يا بعد وحدتي الله ياخذني حبيبي
قربت الصورة لـشفايفي وبستها بحركة مسحت عيوني متنهدة يوم يومين وازوره ان شاء الله رجعت الصور بمكانها وسمعت دك عالباب توقعتهم البنات حجيت بصوت مرتفع واني اراسل العاملة تصعد من اسبح تنظف الغرفة
عشتار _ تفضل
انفتح الباب ورجع انسد ثواني بس وشميت عطر مو غريب عليه عرفته محمد ما التفتت ولا اريد اشوف وجهه التفتت عليه وجهي معدوم من الملامح واي ردة فعل ما انطيته بس اباوعله تقرب مني يباوع بعيوني وكال بهدوء
محمد _ شلونج ؟
سكتت ما رديت عليه رجع كرر سؤاله
محمد _ شلونج ؟
عشتار _ اخذ أغراضك
احجي برود تام ما مهتمه الاي شي درت ضهري اله وفتحت الكنتور اباوع بملابسي طلعت ملابس حطيتهم بالحمام وطلعت هو بعده موجود وكفت مقابيل المراية اباوع على نفسي مبتسمة برود حسيت شي بداخلي بارد متبلد ما اهتم ولأول مرة ما افرح بشوفة اخواني ولا يهمني امرهم
شويه ودخلت العاملة طلعت من الغرفة وهو انجبر يطلع رحت الغرفة رميم شفتها كاعدة صافنة كعدت بصفها وحجيت بهدوء
عشتار _ رميم ؟ شبيج حبيبتي ؟
رميم _ عشتار اخواني ما يستاهلون تضحين علمودهم اكثر صدكيني
عشتار _ ادري
رميم _ يعني خلص بعد ماكو مشاعر ؟
عشتار بضحك _ تخيلي لا
ضحكت بكل قوتي وهي صفنت تباوعلي سكتت وبستها بخدها وكمت لزمت وجها وحجيت
عشتار _ عشتار راح اطمهم طم هالمرة راقبي واستمتعي حبيبي تمام ؟
رميم _ واثقة من هالشي بس عشتار عدنه أشياء لازم نكولها الج
عشتار _ ادري باجر كل شي احجوا اليوم عندي شغل تمام ؟
هزت راسها مبتسمة سألتها باستغراب
عشتار _ رميم وين العنود ؟
رميم _ راحت وكالت سلميلي على عشتار وكوليلها باجر الصبح امر عليها مادري شنو
هزيت راسي مبتسمة رحت للغرفة ودخلت للحمام سبحت بعمق بس ويا الضربات على كيفي طلعت المقشرات وقشرت جسمي وخرت الجلد الميت عن رجلي خلصت بعد فترة طويلة كلش بدلت ملابسي وطلعت من الحمام لافة شعري شفت محمد موجود تنهدت بهدوء وتجاهلته كعدت مقابيل المراية وطلعت المراهم رفعت رداني وطلعت كدمة واضحة لونها اخضر وبنفسجي وأزرق وشويه منفوخة وبس الزمها توجع وجع مو طبيعي بس سكتت طلعت المرهم حطيت منه بأصبعي دهنت الكدمة الوجع بكلبي يدك ظاهري بارد بداخلي نار وبراكين ملامحي جامدة ماكو ملامح وجع ولا تعب احسها ملامح فارغة من كل شي وكل هذا تحت أنظاره ساكت واني ساكته ما معبرته
خلصت من الكدمة ورفعت البجامة طلعت رجلي لحد ركُبتي فوك الركبة اكو جرح حطيت اله مرهم اباوع على رجلي بيضة وركباتي بيضات فجأة كدمة ابتسمت وكملت رجلي وهسه أجينه للمهمة الصعبة الراس والرقبة
اكثر منطقتين يموتون من الوجع يموتون تنهدت ورفعت راسي همست بصوت ناصي
عشتار _ اووففف يارب الصبر يا اللهي
محمد _ اني احطلج أنطيني
سكتت مارديت عليه طلعت مرهم ثاني رفعت راسي حطيت بأصبعي شويه وحطيته على رقبتي لو روحي انرفعت من جسمي تحرك تحرككك سكتت وكملت رقبتي هسه راسي كمت على حيلي فتحت شعري اباوع على المكان حطيت مرهم بيدي وحطيته على راسي روحي انشالت وانركعت شهكت مفرفح كلبي من الوجع كام من مكانه واجه بأتجاهي راد يلزمني بعدت ايدي وكلت بهدوء
عشتار _ لا تلوثني
سكت يباوع على راسي بالمراية وجهه بارد بس أشوف ايده مقبوضة بأقوى قواتها حاولت اكمل بس تعبت ايدي راحت وراسي يحركني بشكل مو طبيعي نزلت ايدي بتعب شويه وردت ارفعها بس لزم ايدي ونزلها يحجي بهدوء لأول مرة
محمد _ كافي لا تعاندين
سكتت مابيه حيل احجي حط المرهم وخلص مد ايده يريدني اخذه اخذته وشمرته على الطاولة وهو سكت بس اكثر شي حلو ريحة المرهم طيبة وكبل يروح ما يبقه مثل الدهن رجعتهم بالكيس وفتحت احد الادراج طلعت عناية الوجه اخذتهم ودخلت للحمام طلعت الغسول وبديت اغسل وجهي بعمق حطيت مرطب لشفايفي وسيروم الهالات طلعت شفته بعده موجود رجعتهم بمكانهم ورحت جبت معطر الجو عطرت الغرفة وهمزين نينا مغيرة الفراش بعد احسن رحت كعدت اريد انام وهو اجه كعد كبالي يباوع بوجهي باوعت بعيونه منتظرته يخلص اللي عنده ما احس غير انسحبت الحضنه بكل قوة حاضني سكتت وما رفعت ايدي ولا بادلته هو مال راسه على ركبتي يشم بيه بحسرة بدون كلام حجيت برود ما مهتمه
عشتار _ دير بالك جرح ركبتي
ذب حسرة ماكلة صدره باسني بركبتي مرتين وبكتفي يشم بيه كال بحزن اول مرة اسمع نبرته بهالشكل
محمد _ البيت موحش بدونج عشتار
عشتار _ لا رد
محمد _ اني اذيتج مو ؟
عشتار _ لا رد
محمد _ عشتار كرهتيني ؟ كرهتي اخوج ؟
عشتار _ الله ينتقم منك
محمد _ لا عشتار لا تصيرين مثلهم افهميني اني اخوج
عشتار _ ماعندي اخوان
محمد _ والله مادري شلون صار هيج ماعرف ما استوعبت والله مو اني اللي ضربتج آخر شي جواد اللي ضربج والله العظيم
عشتار _ لا رد
محمد _ عشتار اني اخوج لا تكرهيني
عشتار _ كرهتك محمد كرهتك
سكت وما رد حط راسه على كتفي وصرت احس دموع تمشي على كتفي سكتت ما طبطبت عليه مثل قبل ولا سويت شي غير كلتله
عشتار _ كتفي
وخر راسه عن كتفي وابتعد عني يمسح بعيونه باوع عليه وتحديداً بعيوني وصفن بيهم ابتسمت وحجيت برود
عشتار _ شايف هالعيون شكد بجت علمودك وبسببك هالعيون جنت تشوف بيها كل الحب والأمان والحنان والطمأنينة بس بعد ما راح تشوف بيها شي واذا شفت راح تشوف كره وبس
تنهدت وبأبتسامة شر كلت بهمس
عشتار _ إذا تتوقع اني راح اسكت غلطان وتعرف هاي بعيدة عني عليه وعلى اعدائي راح أحركها عليكم حرك
محمد _ اني تندمت والله ليش ما تصدكين اقسم بالله مادري شلون هيج سويت مادري شلون ضربتج وما اذكر ليش ضربتج صح غلطت بحقج بس لا تكرهيني سامحيني اني كاعد احاول اتغير
عشتار _ محمد روح بغرفتك استغل هالساعات وارتاح بيهم لان بعدها راح تنسى طعم الراحة
مسح عيونه وطلع حطيت راسي على المخدة دقايق ورحت بنومة عميقة ما صحيت منها إلا على صوت المنبه طفيته وكمت باوعت على شعري همزين ناشف رحت طلعت فستان جان لونه اسود سواد الليل لبسته ولبست ساعة وشكم أسوار حطيت شويه مرطب فليت شعري ما سويتله شي جان حلو لبست نظارات وكعب عالي فضي يلمع رشيت عطر وطلعت رحت الغرفة رميم ما شفتها رحت الغرفة شمس شفتهم ثلاثتهم موجودات ابتسمت وحجيت بهدوء
عشتار _ اني راح اطلع عندي شغلة مو كلش راح اتاخر بس تردون اجيبلكم شي وياي ؟
شمس _ اي حبابه اريد نميات
عشتار بضحكة _ من عيوني ماكو غير شي ؟
البنات _ لا
هزيت راسي وطلعت اخذت سويج سيارتي وطلعت امشي بالحديقة صادفني جواد وكفني وكال
جواد _ وين رايحه ؟
رفعت النظارات وباوعتله برود ومارديت اتنهد وكمل كلامه
جواد _ شلونج انتِ ؟
عشتار _ الفازة اللي ضربتني بيها جانت زجاج لو خشب ؟
نزل راسه بحسرة ضحكت بهدوء وكلت
عشتار _ للاسف اني مو عشتار القديمة اللي تقنع نفسها بأسخف الأعذار اني بكثر ما حبيتكم وعزيتكم كرهتكم جواد كرهتك
غمض عيونه بتعب رفع رأسه للسماء ردت امشي وقفني وكال كلامه بي شويه ارتباك
جواد _ ما حسيت على نفسي مادري شلون سويت هيج والله اني ما اقصد هيج يصير بيج ولا اني اتمنى اذيتج ابدا وحتى لو جنت اتمنى مستحيل اتمنى تكون اذيتج مني
عشتار بأبتسامة _ جواد اللي صار صار انتوا بالنسبة الي غربااااء ما صرتوا تهموني لأول مرة احسكم ولا شي بحياتي ولا الكم أهمية انتوا مو اخواني انتوا نسخة مستنسخة من ugliness عمامك بس عموماً تذكر بهذاك اليوم شنو سويت بيه ؟
صفن بوجهي يتذكر الحادثة جر حسرة وبعده على نفس صمته حجيت بهدوء اباوع بعيونه
عشتار _ اني مو ناسيه
ثواني ورحت امشي واطك بالكعب مالي فتحت السيارة وصعدت بيها اجه احد الحمايه وكال
_ آنسة وين تردين تروحين
عشتار _ لا تجون وراي
_ آنسة هذا حفاظاً على سلامتك وهاي أوامر أستاذ عبدالله السبب مجهول
هزيت راسي وحركت السيارة وهم وراي يا اخي شكد اكره احد يرافقني وين ما اولي بعد فترة من الوقت واخيرا
وصلت للشركة نزلت من السيارة وسديت الباب اباوع على الشركة بأبتسامة شر ناويتلهم على نية تحركهم وتحرك شوارب الخلفهم ووووو ...!!؟؟

                                         يَتبـَــع
                             طَهـِر لِسـَـانك بِذِكـرِ اللـه
                                    سُبحَــان اللـه
                                      الحَمـدُللـه
                                 لَا إِلـٰــه إِلا اللـه
                                   اللــه أَكبَــــر
                    اللـهُــمَ صَلِ عَلى مُحَمَــد وَآلِ مُحَمَــد

بارت طويل لعيونكم ..🤎🪐