طـغيان إِحمِرار السآعد

بارت 13

‎ طِـــغيان إحمـــرار ألســـآعد
فراغ بكلبـي عايف جنه صحراء

~ مشعل ~
واكف كبال دخان عذابها مبتسم ملثم بالشماغ وأبوية يحجي عليه ما قابل حسيت بأرتياح نوعاً ما واني اشوف شركة طول بعرض متفحمه وجان يصير اللي تمنيت ما اشوفه ولا اعيش بأيامه عافتني بنت كلبي بس استاهل اني سويت بيها وبنفسي هيج استاهل تسوي بيه اكثر تمنيتها تذبحني ولا تعوفني سكتت وجع روحي قوي طول هالسنوات اني اراقبها انخطبت وفسخت وشالت من بيتهم عبالها اعوفها انطتني أمل الكل شي بساطة وسحبت الامل وسحبت روحي بساطة باوعلي ابوية وهز ايدة وكال
ابو داوود _ من امداك على هاي السوايه الغبره اي شفتني رجال كبير كلت يلا خلي اضربه واضرب تعبه وتربيته بعرض الحايط
مشعل _ حشاك بويه عمرك وانتَ وتعبك وتربيتك وسهرك ونصايحك وكل شي سويته فوك راسي وبين عيوني ولأن أنا تربيتك سويت هيج بويه افهمني اروحلك فدوة أنا ما اقبل يصير هيج ويا اي بنية لان كلهن بحسبة خواتي مو عاد البنية اللي يحبها كلبي صارلي سنين متلوع عليها ما اكدر اعوفها يأذون بيها واني حاط ايدي على خدي واباوع شني اني طلي لو مكرن
باوعلي وحط ايده على كتفي وكال
ابو داوود _ ابني مهما يكون الأمور مو بهاي الطريقة هذا رزق وقطع الاعناق ولا قطع الارزاق
مشعل _ بويه شغلهم حرام كله حرام وهاي الشركة من فلوس حرام
نصيت صوتي حتى محد يسمع وكملت
مشعل _ يتاجرون اسلحة ومخدرات
سكت شويه ورد حجه
ابو داوود _ زين انتَ شمدريك هي راح تجي هنا
ابتسمت ورديت برود واني اباوع على الشركة وحقدي وغلي يزيد ما ينقص
مشعل _ كل شي اعرف عنها
هز ايده وسكت مرت نص ساعة وشفتها جايه وأبوها لازمها بقوة يمشي سريع وهي ساكته تباوع عالشركة بأستغراب وتعجب نزلت عيني على ايدها وتمنيت اروح اكسر ايده ورأسه كزيت على أسناني حيل وكلت الأبوية بهمس
مشعل _ بويه روحله
باوعلي مستغرب اتجهت انظاره بأتجاهم وهز رأسه بأسف وكال بصوت ناصي
ابو داوود _ لا حول ولا قوة إلا بالله لا حول ولا قوة إلا بالله
راح يمهم سلم عليه شويه ورجع انصدمت انو معرفته توقعتها تعرفه وتسلم عليه بس ماعرفته بقيت مركز ما أشوف غيرهم باوعتلها شلون عصبت انكلبت حمرة ونترت ايدها وصرخت بوجهه تحجي فارت روحي من شفته ضربها على حلكها لزم أيدها يسحبها بكل قوته وهي تمشي سريع مشيت وراهم روحي تنركع كل شويه توكع على حجار مشيت اريد اشرب من دمه حسيت احد لزمني بكل قوته وسحبني باوعت بعصبية احجي
مشعل _ وخر اريد اكسرررروايده مثل ما وجعهااا وخررررر ايمنننننننننن
جرني يحجي بهمس
ايمن _ مشعل اروحلك فدوة كافي امشي وياي بعدين اخذ حقها بس امشي راح ننفضح والله
نترت ايده ورحت اركض سمعته صرخ بكل صوته مفرفح يركض وراي
ايمن _ اووووووكففف مشعللللل اووووكف بداعتهااااا بداعت معزتها اوكف الخاطر الله اوكففففف بداعت وجعها وألمها
وكفت روحي تنتفض أعصابي تلفانه عيوني تحركني ايدي ترجف دارني اله حط ايده على وجهي يحجي بوجع مفرفحة روحه من وضعي
ايمن _ بداعت الخوة لا تسوي بنفسك هيج كاعد تتعب امشي وياي خويه امشي
لزمته من ايده اريد حيل اسند روحي عليه امشي بدون روح بداخلي مطمأن ادري بيها قوية مستحيل تسكت عن حقها بنفس الوكت احس سجين بكلبي سكتت ورحت عالسياره شفت ابوية كاعد ايده على راسه صعدت ساكت ايمن يمسح بوجهه وأبوية كل شويه يتنهد وصلنه للبيت دخل ابوية دخل وراه سلمت وصعدت على غرفتي سبحت وطلعت شفت ايمن كاعد بالكاع ساند روحه عالسرير باوعتله ورحت كعدت يمه حجيت بتعب
مشعل _ بعد ما ادزك بشي
ايمن _ هذا اللي فهمته من كلامي ؟ عبالك لان تعبت حجيت اللي حجيته
مشعل _ لا بس انتَ تعبت وانتَ مو مدخل بالسالفة بعد ما ادخلك
حضني وحجه بعتب
ايمن _ اقسم برب العباد أتونس على هالشغلات وانتَ تعرف حتى لو غريبة حتى لو منعرفها حتى لو منو تكون ما اقبل يصير هيج بس أنا تعبان علمودك
وخر من حضني وكمل
ايمن _ مشعل انتَ ما شايف روحك انتَ متخبل على الأخير تركيزك بالشغل مو مثل قبل مالك واهس بكل شي
لزمني من ملابسي يحجي بحركة
ايمن _ مو اخويه اللي اعرفه هذا غير واحد بس صافن وساكت مشعل صرت تباوع عالشارع وتبتسم بدون سبب صرت تباوعلي عبالك اني هييييي صرت تحجي ويا نفسككك صرت مخبللللل صرت تباوع على صورها ودموعك تنزل وانتَ مو واعييييييي صرت تتخيلهاااا بكل مكااان صرت تناممم على صورهاااا لك ارجعلييي نفس قبل خويه روحي فرفحت عليك وداعت سبع الكنطرة روحي فرفحت عليك
اباوعله يحجي بحركة كلب ويهز بيه كمل كلامه وحضني بكل قوته حضنته بحيل واهن وحجيت بهمس
مشعل _ تدري أنا ميت بدونها
سمعت صوت الباب انفتح دخل ابوية وكعد مقابيلي على الكرسي ساكت يباوعلي مسح ايمن على ضهري
ايمن _ مقدمتلك شي انتَ بس اللي قدمتلها يا خويه ما اكلك عوفها بس ارجعلي نفس قبل فدوة اغديلك
وخرت من حضنه وصفنت حسيت بماي على وجهي باوعلي ايمن عيونه مدمعة واشرلي اوكف كباله كمت بدون روح وكفت كباله نزل راسه عالسبحه وكال وهو يرفع راسه
ابو داوود _ شوف بويه اللي يخلي دموع الرجال تنزل هنَ شغلتين يا ابني يا اما إذا كان عشك كبير او الفراك شلون إذا ثنيناتهم بنفس الوكت اكيد عذابك كبير غير ندمك وتعلقك بيها
قبضت على ايدي من صار غواش على عيوني بسبب دموعي حط ايده على كتفي وكال
ابو داوود _ لا تحبس دموعك يا مشعل ابجي وارتاح لا تخلي ألمك يزيد بسبب كتمانك تتوقع البجي ضعف خطأ انتَ تبجي لان حبك حقيقي وصادق وهذا افضل ما يكون لا تكابر بويه طلع دموعك
نزلت دموعي بغزارة روحي تعبانه كعدت بصف ايمن غمضت عيني وحجيت بهمس
مشعل _ بويه
ابو داوود _ ها بويه
مشعل _ هي تدري انا ميت بلاها
سكت مجاوبني ابتسمت وحجيت
مشعل _ شفتها وطن شفتها أمل بحياتي شفتها الكون كله شفتها العوض رجعتلي كل شي جنت اتمنى اسوي بس واكف بنقطة سودة ما اتحرك دفعتني وخلتني اشوف الدنيا بعيونها كل صفات البشر الحلوة بيها جنت أتعجب شلون هي هيج شلون هي مميزة هالدرجة لكيت روحي اضحك لان ادري ماكو جواب
فتحت عيوني باوعتله وكلت بتعب
مشعل _ بويه اريد ابقه وحدي شويه عوفوني
هز راسه وأخذ ايمن وطلع غمضت عيني احجي بداخلي
_ راح ارجع مشعل اللي حبيتي وارجعج الي عشتاري مشعل بدونج ضايع زعلتي مني لان عاملتج مثلهم اسف يا وطن روحي انا اسف زعلتج والله الج الافضليه بكلبي وروحي وحياتي راح تسامحيني مو عشتاري راح تسامحين مشعل ابن جيرانكم والله وداعت وجعج وداعت ألمج
_ وداعت عيونج البيها قوة نسر
راح ابجيهم دم عايش على صورتج وشوفتج يا وطن روح مشعل
سمعت الصوت اللي اعتاديت اسمعه صوتها بي صدى فتحت عيوني أدور عليها اتعودت اشوفها بوقت تعبي وانهياري ومرضي تجي لابسة فستان ابيض وشعرها الطويل عايفته مفلول باوعتلها جانت واكفه بالزاوية لازمة وردة بيضة ابتسمت بوجهي كالعادة وسألت سؤالها المعتاد
_ تحبني ؟
ابتسمت فرحان طاير بشوفتها هزيت راسي وكلت
مشعل _ ميت بدونج شتكولين احبج لو لا
ردت عليه وهي تباوع عالوردة
_ شلون تحبني وتحبها
مشعل _ انتِ هي وهي انتِ
هزت راسها بمعنى لا ضحكت وباوعتلي
_ غلطان اني غير وهي غير
هزيت راسي بمعنى شلون مو فاهم تقربت يمي وكنبصت كبالي مبتسمه ابتسمت على ابتسامتها نفس ابتسامتها اللي سلبتني روحي
مشعل _ شلون انتِ غير وهي غير
ضحكت صافنه بعيوني ردت عليه بصوت ناصي
_ اني هنا حتى أصبرك على فراكها
مشعل _ يعني شني
_ يعني اني هنا حتى ارجعلك أملك اللي اخذته هي
مشعل _ بس انتِ نفسها
_ ممكن
بقت صافنة عليه مبتسمه حجيت بدون وعي
مشعل _ تحبيني ؟
ضحكت وما جاوبتني بقت تباوعلي بصمت
مشعل _ ليش تجين يمي
باوعتلي على نفس ابتسامتها وما ردت
مشعل _ حرام إذا المسج لو لا
ضحكت بكل قوتها هزت راسها وكالت
_ اني خيال وحلم يعني عادي
رفعت ايدي متردد حطيت ايدي على ايدها صرت احس ماكو ملمس بس اكو ماعرف شنو احس باوعتلها ضحكت وكالت وهي تضحك
_ ها شنو حسيت
مشعل _ ماكو ملمس واكو بنفس الوقت ليش بس من تلمسين ايدي احس بدفو يحضن روحي
ابتسمت ساكته حجيت بهمس
مشعل _ انتِ تحبيني جاوبيني ؟
_ اكيد احبك
ابتسمت اباوعلها تشم بالوردة مبتسمه
مشعل _ انتِ تتوجعين
_ اكيد
مشعل _ انتِ مو تكولين اني خيال شلون تتوجعين
ابتسمت بس غير ابتسامة جانت بيها خيبة ووجع ردت عليه
_ اني روحها اكيد أتوجع اني هنا علمود اواسيك على فراك عشتار اني خيالك المساعد
هزيت راسي ما فاهم تنهدت وكالت
_ ما راح تفهم بس الشي الوحيد اللي لازم تفهمه اني خيالك
هزيت راسي وكلت
مشعل _ هي تحبني
ابتسمت وردت عليه وهي تمد بالكلمة
_ هوااااااي كلش هواي
مشعل _ شلون عرفتي وانتِ تكولين اني مو هي
_ اني روحها اللي بداخلها اكيد راح اعرف
مشعل _ يعني انتِ هي
_ ممكن
مشعل _ لا تعوفيني خلي انام وروحي
ابتسمت وكالت
_ تمام بطلي
مشعل _ اريد دفو ايدج يحضن كلبي ويداوي جروحي ليش ما احس بأيدج بس من انتِ تلمسين ايدي احس بحرارة تغلف كلبي
ابتسمت دنكت راسها تباوع عالوردة
_ لان انتَ حقيقي واني خيال تريد ايدي ؟
هزيت راسي قابل حطت ايدها على ايدي حسيت بأمان العالم كله دفو حاوطني باوعتلها بعدها تباوع عالوردة باوعت على شعرها لونه حلو مديت ايدي على وجها ايدي ترجف خايف حسيت اكو شي بس ماكو شي وخرت ايدي رفعت راسها تباوعلي باوعت لعيونها صفره حجيت بأرتباك
مشعل _ عيونج احممم عيونج حلوة
ابتسمت وبعدت ايدها عن ايدي حطت ايدها على عيني غمضت مسحتها وهي تكول بحنان صوتها بي دفو
_ لا تنزل دموعها هاي عزيزة عشتار
ابتسمت وهي ابتسمت وحطت ايدها على كلبي وكالت
_ لا تخلي يحزن لان بي عشتار
اشرت بأصبعها عليه وكالت
_ لا تسمحلها تحب غير وطنها
هزيت راسي بمعنى اي وهي ابتسمت تشم بالوردة سألتها بفضول
مشعل _ منو اكثر شخص تحبه عشتار
_ ما تعرف
مشعل _ خواتها صح ؟
_ صح
مشعل _ اكثر من امها وأبوها
_ حبها ما ينوصف
مشعل _ اكثر مني حتى
_ اي
كامت بهدوء حجيت بسرعة
مشعل _ اوكفي لا تروحين
_ نام
مشعل _ ما اكدر
ابتسمت واجتي حطت ايدها على ايدي وأيدها الثانيه قربت الوردة يم خشمي مبتسمه بعمق شميتها ارتاحت اعضائي وأعصابي من عطرها بعدتها عني مبتسمه لزمتني من زندي ومددتني بالكاع وحطت الوردة على خشمي ضليت اشم بعطر الوردة سمعتها تهمس
_ ارجعلي بطلي ارجع نفس قبل ارجع بطلي القوي تمام
هزيت راسي واني مغمض مسحت على ايدي بهدوء وكالت كلمتها المعتادة قبل ما تروح
_ بطلي مشعل القوي
ماحسيت بشي بعدها بس ارتاحيت كلش كعدت على ايمن يكعدني
ايمن _ كوم خويه كوم شسويت بروحك يا بعد اخوك
كمت مرتاح احس براحة عجيبة باوعت على ايدي شميتها ماكو عطر الوردة ابتسمت ووكفت حضنته بكل قوتي اشم بي حسيت رجعت قوتي رجعت مشعل القديم بست راسه اطبطب على ظهره
مشعل _ تروح للشغل ؟
باوعلي مصدوم وفرحان الفرحة واضحة بعيونه ضحك ويهز براسه بمعنى اي
ايمن _ اي اروح يا حيل اخوك امشي انزل امي مشتاقتلك
هزيت راسي ونزلت وياه اول ما شافتني امي بجت رحت يمها بسرعة بست راسها وأيدها وحجيت
مشعل _ يموت مشعل وهو مزعلج يمه
حضنتني حسيت بالحنان اللي أحسه من تجيني عشتاري وخرتني من حضنها واشرتلي اكعد مقابيلها
ام داوود _ تحبها اكثر من امك ؟
مشعل _ لا يمه طبعا لا لو ما انتِ جان ما شفتها
هزت راسها وحجت
ام داوود _ ما راح تنساها يعني
مشعل _ انسى روحي ودنيتي وعقلي وأنسى كل شي وما أنساها يمه مثل ما جبتينه بتعب اني حصلت عليها بتعب الله يرضا عليج لا تكولين ابتعد عنها لان مستحيل اكدر
عفتهم وصعدت الغرفتي مبتسم سمعت صوتها التفتت أدور عليها مالكيتها بس صوتها موجود
_ حافظ على الوردة بداخل كلبك بطلي
ابتسمت وحجيت بداخلي
_ حاظر بس شوكت تجين
ما سمعت صوت بعدها تنهدت ودخلت سبحت وطلعت للشغل افييييش حسيت روحي رجعتلي باوعلي ايمن وكال
ايمن _ خويه البارحة شفتك
مشعل _ شنو شفتني
ايمن _ أجتك البارحة
فهمت قصده بس تغابيت ماريد اجاوب
مشعل _ منو هي شبيك مشعول الصفحة
ضحك وسكت يعرفني حافظني حفظ اشتغل بكل ذمه وضمير فرحان بشوفتها حجه ايمن متنرفز
ايمن _ البارحة شعوطت كلبي وما ركدت البارحة بس تخيلتها باقي شويه وتحلق بالفضاء فوك ما خلتك مطي صافن وقرد يكمز يحبها سليمه طمك يا عااار
باوعتله بعصبية وسكتت جبت الفرجة مال صبغ وحطيتها بنص ركبته وحجيت
مشعل _ هاي علمود تحترم اخوك الكبير يا زمال
ايمن _ أشكرك على راسي
ضحكنه وكملنه شغل رحت للبيت بدلت وطلعنه للمطعم باوعتلهم وكلت
مشعل _ انا راح اطلع ساعتين ثلاث ساعات واجي يلا مع السلامة
عفتهم وطلعت بدون ما اسمع اي رد ركبت السيارة ورحت على منطقتنه القديمة باوعت على بيتنه القديم ورجعت كل ذكرياتي باوعت على بيتهم وابتسمت صفنت استرجع كل شي سويته وياها امشي وكل مكان اله ذكره بروحي رحت عالمنتزه وتمنيت ترجع هذيج اللحظة اللي شفتها بيها رحت عالمكان اللي جانت تركض بي
تنهدت بوجع وطلعت شفت المكان اللي جانت تمشي بي هي وخواتها
_ هالمكان بي ذكريات حياتي
ركبت السيارة وتحركت رحت البيتهم اباوع على شباكها اتمنى تفتحه اتمنى تنزل أشوفها بس ماكو بنت كلبي ما شفتها حركت السيارة ورجعت للبيت باوعلي ايمن وعاط
ايمن _ اليوم غصباً على راسك تجي نسهر صار دهر مساهرين عيب على شواربك
ابتسمت وهزيت راسي موافق سهرنه وكام طلع قصيدة علي حكه بالحرب يتباهى يهوس ابتسمت بعد ما سمعت صوتها
_ بطلي سمعت كلام عشتار