طـغيان إِحمِرار السآعد

بارت 26

                                 طِـــغيان إحمـــرار ألســـآعد
                     باجـر يعـوفك جديـدك وتتمـنى ترجـع القديـمك

~ شمس ~
خلصت قرايه وكعدت اراجع اني ورميم لحد ما ضبطنه المادة باوعتلي رميم وكالت
رميم _ اكُلج اني تعبت راح اروح اسبح شويه
شمس _ ها صرتي مثل عشتار
رميم _ وين اكو احد مثلها عشتار تنام بالحمام ساعتين وتطلع اني نص ساعة يا ظالمة
ضحكت وهزيت راسي باستني بسرعة على خدي وطلعت من الغرفة تنهدت بتعب باوعت على آسيا كاعدة صافنة باوعتلي وكالت بهدوء
آسيا _ هي زعلانة مني مو ؟
شمس بتنهيدة _ اللي سويتي محد توقعه آسيا نسيتي عشتار شلون ضحت علمودنه بأي حق تزعلين منها على شي مو بيدها آسيا عشتار بيها شي وأعتقد انتِ سمعتي الدكتور شنو كال كال هاي شغلات روحانية يعني مو بيدها اللي صار
سكتت وعيونها مدمعة تعمدت اعاتبها احنه كلنه نعرف آسيا متعلقة بعشتار تعلق طفل شلون هيج سوت وكامت تلومها بتصرفاتها مادري كالت بغصة وقهر وجها احمر شفايفها ترجف
آسيا _ اني تعبانه هواي بس الله يدري بتعب كلبي كلكم تلوموني لان عاتبتها بتصرفاتي صح اللي سويته غلط بس اني هم تعبت على تعبها هي امي واختي وصديقتي وسندي وأماني اي شي حلو بهالدنيا يذكرني بيها ما اتحمل اشوفها تعبانه او مريضة ما اتحمل أشوفها تضرب بنفسها وتبجي ما اتحمل أشوفها تحب احد اكثر مني ممكن تشوفوني انانية لكن اني احبها اكثر من كل شي بهالدنيا اني ولدت وفتحت عيوني عليها هي امي الحقيقية ما الها وجود بحياتي ولا دور بس والله اني تعبت
حجت آخر كلمة برجفة دموعها نزلت انعصر كلبي عليها وين عشتار هي تعرفج اكثر مني كمت من مكاني ورحت يمها سحبتها الحضني وهي حطت راسها على صدري تشهك وحجت بتعب واضح ودموع
آسيا _ اني تعباااااانهه تعبااااانهه
مسحت على ضهرها وبستها رفعت وجها بيدي الاثنين وكلت أطمنها
شمس _ ميخالف كل شي راح يروح من تجي عشتار صالحيها وشوفي ردة فعلها انتِ تعرفيها مستحيل تزعل منج
هزت راسها ومسحت دموعها باستني بخدي وطلعت عرفتها راحت الغرفة عشتار تنهدت ورجعت المكاني احس اكو شي بداخلي مثل ضميري كاعد يأنبني علمود عشتار ليش هيج سويت اني ؟ شلون اطلع بنص الليل وبدون عشتار وحتى بدون ما انطيها خبر ؟ ماعندي عقل ؟ ليش سمحت السيف يحجي وياي ؟ ليش سمحت النفسي احجي مع شاب ؟ اني طول عمري بعيدة عن هاي السوالف واكرها كره العمى اني اكره كل الرجال بسبب اهلي واخواني وابوية وعمامي اكرهممم ما اريد أتعلق بشخص غير عشتار وخواتي ماعرف بشنو أفكر بأختي الكبيرة اللي هي بمثابة امي اللي تعبت وتعذبت بكل حياتها علمودي بالاخير هيج أجازيها ؟ لو بأخواني واللي صار زين إذا هم يحبوها الهالدرجة شلون عادي يضربوها ؟ شلون يفضلون امجد الخايس عليها ؟ شلون سووا اللي محد مسوي بشر بيها وهسه يحبوها ؟ شلون يوصلونها للموت وبعدين يتندمون ؟ لو افكر بهذا الشاب اللي اسمه المغوار ماعرف ليش على بالي احسه يشبه عمي إبراهيم بشكل مو طبيعي عمي إبراهيم جان اكثر شخص أذاها العشتار من بعد عمي جاسر صفنت اتذكر هذاك اليوم اللي عمري ما نسيته