طـغيان إِحمِرار السآعد

بارت 29

طِـــغيان إِحمـــرار ألســـآعد
باجر كل حطب محــروگ من دموعنـا يورد

~ عشتار ~
باوعلي مستغرب وكال جملة صادمتني اني ومشعل صدمة مو طبيعية
هشام _ لكن الأستاذ عبدالله والد حضرتج اليوم خابرني وعزمني على خطوبتج من ابن عمج امجد
باوعت على مشعل اللي ضغط على ايده بكل قوته وعيونه صارت حمرة دم مسحت على ايده بهدوء أردف مشعل بابتسامة جانبية 
مشعل _ شلون اليوم خطوبة امجد وهو راح ينسجن ؟
باوعله هشام باستغراب وضحك نفس ضحكة ابوية الضحكة الحقيرة شكد اكرهه وكال
هشام _ اها تمام فهمت قصدك
مشعل بابتسامة _ احب اللي يفهموني بدون شرح
ابتسمت اباوع على مشعل ولأول مرة احس عندي سند حقيقي لأول مرة احس بهيج شعور شعور غريب وحلو لكن بنفس الوقت تنهدت ورجعت ضهري حطيت رجل على رجل وحجيت برسمية
عشتار _ استاذ اعتقد انتَ شبه فهمت اني على شنو جايه
هشام بصوت خشن _ يعني
عشتار _ استاذ هشام انتَ اكثر انسان تعرف اهلي وابوية وعمامي واخواني خاصة انك تعاملت وياهم قبل
هز رأسه بمعنى كملي ورخه ضهره على الكرسي يباوعلي باهتمام باوعت على مشعل طلع سيجارة من هاي الكوهيبا الثخينة ورثها وهو يباوعلي اني وهشام بغموض رجعت حجيت بابتسامة وصراحة
عشتار _ موضوع يفيدك ويفيدني واكيد مو بلاش
هشام _ طيب شنو الموضوع ؟
عشتار _ بمعرفتك أريدك بأي وقت اكُلك تطلعلي دورية تقبض على شباب
باوعلي وابتسم يضحك بخشونة شغل سيجارة كوهيبا ورثها وكال بهدوء وابتسامة
هشام _ هالشباب اخوانج ؟
عشتار _ وياك امجد وطبعاً اخواني بسبب تاثير امجد عليهم اتجهوا للاسف بغير طريق يعني المخدرات والشرب والنسوان وهاي السوالف وبسبب تاثير المخدرات عليهم اني دخلت مستشفى قبل يومين او ثلاثة وعندي تقارير طبية تثبت ومن الممكن الدكتور اللي اشرف على حالتي يكدر يشهد وعندي شغلة صغيرة بيها أشياء ضد امجد واشياء خطرة كلش من تسلمها بيدك للدولة راح تستفاد انك بلغت على هيج فساد وأنك نكدر نكول راح تقضي على عصابة فاسدة واني راح استفاد انو اخذ انتقامي وهواي شغلات
اباوعله واضح عجبه الموضوع شبك اصابعه وكال
هشام _ طيب ممتاز ولكن كيف نثبت أنهم يتعاطون ؟
عشتار بابتسامة _ اكو طريقتين الاولى يوجد تحليل من خلاله يكدرون يعرفون انه يتعاطون او لا او نكدر نثبت عليهم بالجرم المشهود
هشام _ شلون فهميني ؟
عشتار _ اخواني كل جمعة وسبت يطلعون مع امجد يرحون المكان ماعرفه بصراحة لكن اعرف يروحون علمود هاي الشغلات
هشام _ وشلون نعرف المكان ؟
عشتار _ هاي عوفها عليه بس هسه المطلوب منك من معرفتك اريد تودي هذا الفلاش للدولة ومن يصير الموضوع محط اهتمام تكدر تبلغني واني اجي
مشعل _ استاذ اني هم عندي شغلة صغيرة ممكن تفيدك
طلع من سترته فلاش حطه على الطاولة ببرود يباوع على هشام بابتسامة جانبية اخذه هشام يباوعله مبتسم وكال
هشام _ تعجبني الناس اللي مثلك يا مشعل
مشعل _ وانا يعجبني ذكائك يا هشام
كام هشام يضحك تحاضنوا واني مصدومة الصدمة محتله وجهي اباوعلهم باوعلي مشعل وضحك هو وهشام وكالي
مشعل _ اعرفج صديقي هشام
عشتار _ شنو ؟ منو ؟ منو صديقك ؟
مشعل _ هشام
عشتار ممستوعبة _ صدك
هشام _ اي مشعل صديقي
عشتار _ بس انتَ اكبر منه
هشام بضحك _ ليش تعرفين مواليدي ؟
عشتار _ مو ضروري اعرف بس مبين عمرك بالثلاثين
هشام _ عمري يا آنسة ثلاثين ضبط
عشتار _ بس انتَ اكبر من مشعل شلون صديقة ؟
هشام _ اني اصير ولد صديق ابو داوود وصديق مشعل
باوعت على مشعل بزعل وكلت
عشتار _ ليش مكتلي ؟
مشعل _ ما جنت اعرف هشام هو نفسه ابن صديق ابوي
سكتت وكمت بهدوء باوعت على هشام وحجيت برسمية
عشتار _ تمام استاذ هذا الفلاش هنا من يصير الموضوع اني موجودة استأذن اني
هشام _ هلا بيج آنسة
مشيت واحس بيه زعل الدنيا كلها ماعرف ليش بس احس اكو حزن بداخلي حزن مخفي بكلبي ما أشاركه لاحد ياربي اني بشنو احير بأخواتي بخواني بالأكبر بسالفة الأمانة لو شنو ياربي راسي راح ينفجر اجه وراي مشعل ولزم ايدي بقوة ساكت واني ساكته نزلنه واني بس صوت كعبي طالع مني وصلنه للسيارة باوعتله وحجيت بهدوء
عشتار _ اريد أسوق 
هز راسه وأنطاني السويج ركبت مكان السايق وهو ركب يعرفني شنو راح اسوي وساكت ما اعرف اعبر عن شعوري إلا بهاي الطريقة رجعت السيارة ومشيت بسرعة وهو ساكت شفت الشارع فارغ ودست بانزين بقوة احس اكو دموع بعيني ما اكدر انزلها بس غصباً عليه وعلى اعصابي نزلت حسيت بفراغ فضيع بداخلي كافي عشتار كافي مشيت بالحد المعقول واحس الدموع تنهمر على خدي حسيت بأصبعه يمر على خدي يمسح دموعي شهكت وحطيت ايدي على حلكي مانعة نفسي وكفت السيارة ونزلت وهو نزل كعدت بمكانه وهو كعد بمكاني يسوق حطيت راسي عالجامة مانعة صوت شهكاتي يطلع تعبت تعب مو مثل اي تعب تعب موت روحي فكرة بعد ما أشوف اخواني تموتني عشتار سجنت اخوانها لا لا ما اريد ما اريد ياربي ارحمني وعزتك وجلالك وعرشك وحبيبك اني تعبت ياربي انتَ مو تشوفني بس برد كلبي كلبي نار على اخواني ياربي شلون انطيني القوة ما أشوفهم أنساهم ؟ مستحيل ضميري من هسه بلش يأنبني بعدين شنو راح يصير بيه ؟ ياربي اخواني هذولي اخواني قطعة من روحي لا والله هم روحي كلها
السيارة تمشي واني اباوع على الشوارع لفت نظري ولد لازم بنية صغيرة يركض هو وياها ابتسمت على منظرهم ودعيت الله يبقيهم هيج وما يغيرهم على بعض مثل ما صار بيه حسيت بأيده تمسح دموعي ابتسمت بجانبية وحجيت بغصة
عشتار _ الدموع تنزل وتنمسح بس التعب من ينصب بالروح شيمسحه ؟
مشعل _ ايمانج بالله سبحانه
عشتار بصوت ناصي _ طول عمري مؤمنة وصابرة صبرت على هواي اشياء مستحيل احد يتحملها شعوري واني اشوف اخواني ضايعين ما ينوصف شعوري واني اشوف خواتي مشتتات روحي تموت ابوية عادي عنده لو اموت يزفني بجنازتي الابن اخوه بس علمود المصالح يا وجع روحي المستحيل ينمحي
مشعل _ من جنت اشوفج استغرب عيونج شلون شايلات هالقوة اكثر شي جذبني بعشتارة روحي حنيتها المغلفة بقوة لا تضعفين وتضعفيني وياج انا من عيونج استمد قوتي عشتارتي
عشتار _ ما اعرف أضعف أصلا اطمئن
مشعل _ سولفيلي فضفضي اللي بكلبج كولي
عشتار _ ما اعرف
مشعل _ تعودي وكولي شني البكلبج يا بعد كلبي
عشتار بتنهيدة _ كل الناس تشوفني شي بس اني غير شي تماماً الكل يشوفني البنية القاسية اللي بدون رحمة بدون مشاعر تريد تسجن اخوانها بس ما يدرون اني فنيت عمري وحياتي وفرت الهم كل شي يردونه وقصرت على روحي ما اعايرهم باللي سويته لا والله لأني ما أشوف سويت شي لكن اللي سووا بيه صدمني شايفتهم اخواني واعز من روحي وهم سهل عدهم اذيتي هالدرجة ؟ مادري شلون راح افاركهم ماعرف شلون حياتي بدونهم بدون شوفتهم بدون صوتهم بدون وجودهم شلون راح اعيش بدون اخواني ؟ ماعرف تعبانه والتعب ماكل كلبي اشيل هم منو ماعرف شنو ذنبي يصير بيه كل هذا ؟ سويت شي غلط بحياتي واني مادري ؟ اذيت بشر هو ما مأذيني ؟ لا ظلمت احد ؟ لا شنو سويت ؟ اني الشخص اللي كال الحمدلله في كل حال
مشعل _ كل هذا بكلبج بويه ؟
عشتار بابتسامة _ ما حجيت شي هذا ذرة من بحر تعبي
مشعل _ تدرين حتى انا ما حبيت اخواني وخواتي بكثرج انتِ شي مميز صعب أوصفه كل الصفات بيج من شفتج حبيت روحج قبل وجهج اللي هو اجمل شكل شافته عيني عينج من باوعتلي سطرت روحي نستني اسم ابوية وامي انتِ غيرتيني أنا مشعل عمري كله اخجل احط عيني بعين بنية وهسه انا عاشك انا مشعل اللي يكول الاصدقائه انا مستحيل ازوج وهسه هو اول واحد
ابتسمت وحجيت بهدوء
عشتار _ بعدك على نفس اسلوبك
باوعلي عيونه مادري شلون تكدر هيج تباوعلي بيها حدة بيها هيام بيها عشك بيها هوس بيها اشتياق بيها حب بيها براءة بيها كل شي حلو ويعجبني ضحكت من شفت وجهه حمر حجيت بضحك
عشتار _ تدري اكثر شي يعجبني بيك من تخجل من جنت صغير إلى الآن من تخجل تكوم تمسح ركبتك وترمش هواي  وجهك يصير احمر شنو هاي طقوس؟
ضحك وجهه انكلب ماروني ضحكت وطلعت تليفوني طلعت اغنية وكمت اغني وياها واصفك بهدوء
عشتار _ عالبساطة البساطة يا عيني عالبساطة اديش مستحلية عيش جنبك يا ابو الدراويش تغديني خبزه وزيتون وتعشيني بطاطا
يضحك ويباوع عليه بهيام جبرته يصفك وصار يضرب على الستيرن
عشتار _ عم يحلم قلبي برجال طفران ودرويش الحال يعشني بأوده صغيري ما فيها غير حصيري مابدي فراطة ولا المال خلي الغيري الفراطة عالبساطة البساطة
وصلنه للبيت اخيرًا وهو وجهه احمر نزلنه ودخلت البيت العنود وهو راح للمجلس الموجودين بي الشباب دخلت شفت البنات كاعدات يلعبون باوعوا عليه وصفنوا واني اغني عالبساطة البساطة عاطت العنود تضحك
العنود _ عالبساطة ها ؟ عاد انتِ تموتين عالبساطة
عشتار بضحك _ طبعاً
رحت كعدت والبنات كعدوا يمي يحضنون بيه حضنتهم ابوس بيهم باوعتلي العنود وكالت
العنود _ بس لا تروحين اليوم ؟
عشتار _ اي والله أصلا اليوم يوم مغامرة خطوبتي من مشعل تعاي وياي انتِ
العنود _ لا استحي
عشتار بغمزه _ من منو ؟
العنود _ من اهلج شعليه جايه
عشتار _ استحي على الفاظج شنو شعليج غير انتِ اختي
العنود بابتسامة _ صدوووك  اووووختج انا
عشتار _ اييي صدوووك وبعدين حبي لا تتأملين اكثر مستحيل تزوجين جواد
العنود بقرف _ عييييع على شنو أزوجه من حلاته من طوله من كرشه من نظافته هو غير خايس
عشتار بغرور _ انجبي داده تروحيله فدوة وهو يروحلج فدوة
العنود باستغراب _ هاي شلون صارت
عشتار _ شمدريني ؟ يعني ما اكدر انطي بأخوية ولا اكدر انطي بيج فـترحون فدوة البعض
العنود _ انجبي عشتاره
باوعت براءة على البنات وحجيت
عشتار _ هاي تكول انجبي الاختكم تقبلوها ؟
شمس _ لا والله ما نقبلها ولج تعاي
رميم وهي تكف ردانها _ اليوم يوم تصفية الحسابات تعديتي حدودج عنوده
باوعنه على آسيا اللي نزعت جواريبها ولبستها بأيدها وراحت اخذت شال موجود على الكرسي حطته على راسها لفته على وجهه وهي تحجي
آسيا _ ما عاش ولا نخلق اللي يجيب طاري اختي بسوء واني عايشه اليوم يا عنوده يا بنت حواء اليوم مستحيل تنسي شو تعاي
ركضن عليها وهي تصيح بضحك يدغدغون بيها وهي راح تموت من الضحك حجيت اضحك
عشتار _ كافي عوفوها تعلمت الدرس
العنود وهي تضحك _ اي والله تعلمت الدرس بس وخرن يا يمه بطني هههههه
وخرت اسيا الجواريب والشال واجتي يمي تضحك لزمتها ابوس بوجها ما ينشبع منها بنيتي باوعت على البنات وحجيت
عشتار _ يلا كوموا نروح
العنود _ كعدي خيه
عشتار _ لا اريد اروح تعبت
العنود _ ولج ابقيييي
عشتار _ انتِ تعاي وياي
العنود _ لا ما اجي
عشتار بعناد _ اني هم بعد ما ادخل بيتكم
العنود بضوجة _ عشتار لا تسوين هيج عفيه
عشتار _ لا العنود كل مرة اني اجي هالمرات مو هالمرة انتِ تجين يلا روحي جيبي هدوم ودفاتر وكتب
العنود _ شكو رايحه مدرسة ؟
عشتار _ اي حبي نقره
العنود _ عجييييب من تصادق المثقفين يصير عندك جالي دراسة كتب اقلام دفاتر الفايخة
عشتار بصياح _ لا والله انتِ الجالي بكبره وماكو فايخة بكدج
ضحكت وراحت صعدت الغرفتها باوعت على البنات وحجيت بهمس
عشتار _ راح اكل برتقالة برة لهوها بين ما اكل تمام ؟
هزوا راسهم يضحكون ركضت للمطبخ اخذت برتقالة وسجينة رحت ركضت طلعت برة بالحوش قطعت البرتقالة وصرت آكلها متلذذة ما احس غير صوت ورايه يحجي بضحك
ايمن _ يواشج عمي منو راكض وراج
التفتت مصطفى ايمن سيف بس مشعل ماكو ضحك سيف وكال
سيف _ لا تدورين ماهو ديغسل
عشتار _ نعم ؟
تحمحم وسكت باوعلي ايمن وكال
ايمن _ خايبه والعباس ابو فاضل احس نفسي حشرة يمج
عشتار _ يا ما يصير هيج تحجي على نفسك
ايمن _ خايبه انتِ الاكل مالج مثقف مشيتج مثل هذني اللي يطلعن بالتلفزون يمشن هيج
راح يمشي ويهز بكتفه يصعده وينزله ضحكت بقوة لازمة بطني مصدومة ضحك وباوعلي وكال
ايمن _ ها بشرفج مو احسن منهن ؟
مصطفى _ اللي تكول انا احسن منهم باليوم يأخذون مليار
ايمن _ والرقاصة شكد تاخذ ؟
مصطفى _ ملايين باليوم بس شني الفائدة وشرفها ضايع
ايمن _ خاب انجب ملايين عادي البس بوشيه واروح اركص
سيف _ خايب من امداك وامداني
ايمن _ مليون مرة
عشتار بضحك _ كافي داده
مصطفى _ من تكولين داده احس نفسي الرجل الأخضر ماعرف ليش يطري على بالي من تكولين هاي الكلمة اللعينة
مشعل برود _ انجب خويه
التفتوا كلهم على مصدر الصوت اجه يمشي برزانة وثكل وكف يمنه يباوعلي وينزل عينه مستحي من الولد باوعت على مصطفى ردت احجي ومشعل طير عيونه بيه باوعتله بمعنى شبيك وهو ساكت خازرني خزرته بحدة وحجيت موجهة الكلام المصطفى
عشتار _ العنود راح تجي يمي تبات شكم يوم
مصطفى _ ليش
مشعل _ راح اليوم نخطب
مصطفى _ نعممم ؟
سيف _ يوم الالي من اللي بالي مبروك خويه
ايمن _ مبروك خيتي وانتَ سليمة طمك اخذت الطكطوكية وعفتلي الحية الصفرة
ضحكت فزيت على عيطة مصطفى
مصطفى _ هيييي اوكف ليش أنا مادري
مشعل _ جا توني شحجيت ؟
مصطفى _ من تقرر تكولي
مشعل _ خايب البارحة كتلك ذاكرة ضفدع عندك ؟
ضحكت وايمن عاط
ايمن _ لا مو ذاكرة ضفدع ذاكرة زرافة
عشتار بضحك _ عوفوا الحيوانات رجاءاً وهسه تقبل ؟
مصطفى _ لا ما اقبل
ضربه مشعل على ضهره بقوة خازره عاط بي بعصبية
مشعل _ لا تقبلللل وغصباً عليييك خيتي العنوود راح ترووح وياهااا فهمتتت ؟
مصطفى _ خلاااااص اشششش
عشتار بصوت ناعم _ كافي الأشعل
باوعلي وذبلت عيونه غمضها واستغفر رجع فتحها يباوعلي هايم بتفاصيلي وكال وهو يهز راسه
مشعل _ حاظر
ايمن وهو يضربه على كصته _ جيرة بفركك كون ولك انتَ شخصيتك بس علينه خايب ارفضلها طلب سليمة تصكك صك
عشتار _ لا تضربه ايمن
باوعلي وكال وهو يضرب تحية مبتسم
ايمن _ حااااظر سيدي
ضحكنه وكال سيف بغرور
سيف _ انا مو مثلكم الحمدلله
طلعت شمس واجتي تمشي بهدوء تباوع على سيف بحدة وكفت وتكتفت حجت بحدة وهدوء
شمس _ سيف روح اخذ الأكياس
سيف _ وانا شعلي ؟
شمس _ شنو ؟
سيف وهو يتنهد _ وينهن ؟
شمس _ يم الباب دخلهن بالسيارة لطفاً
سيف _ حاظر امرنا لله
ضرب كصته ايمن وكال وهو يضرب على كصته
ايمن _ امداني اخواني صاروا طليان البنات عبدالله
طلعت رميم وراحت تمشي تطك بالكعب متكتفه تمشي بهدوء وتحجي
رميم _ وشبيهم بنات عبدالله استاذ ايمن ؟
ايمن وهو يحط ايده على راسه _ على راسيييي بنات عبدالله وعبدالله على راسييي
وكفت بصفي وكالت بابتسامة
رميم _ روح اكعد بالسيارة الجو حار اليوم
ايمن _ اي والحسن راح انصهر
راح يمشي وطلع من البيت
مصطفى _ الف الحمدلله
العنود _ مصطفى روح جيب جنطتي وعلاكة الملابس بسرعة
راح يمشي واني اضحك بقوة عليهم وهي تضحك ومشعل صافن عليه مبتسم حجيت اباوعله
عشتار _ يلا باي
مشعل _ الله وياج بويه اليوم احنه يمكم لا تنسين
ابتسمت وطلعت من البيت وراي البنات كعدت بمكان السايق والعنود اجتي فتحت الصندوق المصطفى حط الغراض باوعلي وسوه بإيده بمعنى باي
ابتسمت وسويتله باي مشيت بالسيارة مطلعة اغنية ونغني
_ نحن لا نهزم ومنا عطاء الدم سقا نخلة الصبر رغم ريح الهم شراع الآباء يمم إلى ضفة النصر ناصرون شهداء سجناء غرباء واللهي لانهزم
العنود تضحك علينه تهز بيدها عاطت تضحك
العنود _ مو بنات عصابة والحمزة ابو حزامين
عشتار _ شعبالج داده
وصلنه للبيت اخيرا فتح الحارس البوابة دخلت السيارة طبكتها ونزلت باوعت على الحارس وحجيت
عشتار _ طلع الغراض وحطها بالباب لطفاً
راح يطلع الغراض واني مشيت بغرور رافعة راسي دخلت للبيت اباوع شفت محمد وجواد كاعدين بس دخلت كام جواد شاف العنود وتخربطت أحواله والعنود تباوعلهم بنظرات قرف واشمئزاز وغرور باوعتلهم بهدوء درت نظري على نينا اللي اجتي بناحيتي مبتسمة حضنتها بابتسامة وهي بادلتني باوعتلها وحجيت
عشتار _ صعدي الغراض فوك خلي ميرنا تساعدج
هزت راسها مبتسمة رجعت اردفت بهدوء
عشتار _ سوي الغداء وصعدي بغرفتي حبي
نينا _ حاظر ماما
مشيت مبتسمة والعنود عيونها على جواد تباوعله بحقد صعدت وهي وياي تحجي ودردم بصوت
العنود _ اييييع عيني تلوثت بس شفته
عشتار بضحك _ داده كافي
جواد _ خليها تريد افرك حلكها عبالها ناسي اللي سوته
التفتت عليه وهي التفتت تباوعله حجت بعياط وهي تنزل الدرج
العنود _ ولك خاف عبالك انا هينة تطلع غلطان تحترمني غصباً عليك وعالخلفوك افتهمت لو لا
راحت تريد تضربه لزم ايدها نزلت وعطت
عشتار _ اييييدك عن صديقتي جوووواد
نزل ايده يتنفس بعصبية عاطت وهي تضربه بكف ايدها على صدره وتباوع عليه
العنود _ شوفي مثل الثور اقل حركة يتعب ويكعد ينهك
صارت تقلده بالتنفس وهو صافن عليها ضحكت بكل قوتي لزمتها من ايدها وهمست بأذن جواد بحدة
عشتار _ إذا انمدت ايدك القذرة على خواتي او صديقتي اكسرها حط هالمعلومة بعقلك الفارغ
اخذتها بدون ما أشوف ردة فعلها صعدت والبنات يضحكون بس آسيا بقت جوه صعدنه دخلت للغرفة وهي كعدت بنص السرير متربعة طلعت الغراض من جنطتي ورجعتها المكانها نزعت الأساور والقلادة والساعة احجي
عشتار _ داده عوفي مو على كل شي واعصابج فارت مثل الثور الهايج تذكريني بمحمد والله
العنود _ يستفزززنييي يستفزني شايف حالو
عشتار _ هسه منو تتموع اني لو انتِ ؟
العنود _ انتِ طبعاً
ضحكت وهي ضحكت اخذت ملابسي دخلت الحمام سويت الروتين المعتاد اباوع على ايدي واتنهد كالعادة طاغي عليها الاحمرار سبحت سويت مقشرات حطيت المراهم نشفت نفسي لبست ملابسي وطلعت
امشط شعري واسولف ويا العنود ...