طـغيان إِحمِرار السآعد

بارت 31

      طِـــغيان إِحمـــرار ألســـآعد
                    يكول امشـي بطريق الشـوك والدنيـا ضلمة
                                 طلعولي خمس جـلاب
                                       لحكيني يمه..

~ عشتار ~
الشيخ _ بنتي عشتار عبدالله محمد هل تقبلين الزواج من مشعل عبد العزيز .... على المهر المتفق عليه الحاضر 500 مليون والغايب مليار قولي نعم وانتَ وكيلي
الصدمة محتلة وجهي حتى نسيت شنو يريد الشيخ نسيت كلشي بس كلام الشيخ يرن بأذني الحاضر والغااايييب الغايب صدمني آخر شي توقعته يكون المهر هلكد زين شلون ؟ شلووون ؟ عززه راسي ياربي راسي صدع مشعل مستحيل عنده هيج مبلغ زين مين جابه وليش هالكد ياربي راسي
لزمت راسي مو مستوعبة فززني كلام الشيخ وهو يكول
الشيخ _ ابنتي عشتار هل تقبلين الزواج من مشعل عبد العزيز على سنة الله ورسوله الكريم على المهر المتفق عليه ومن دون اي اجبار على ذلك فقولي نعم وانتَ وكيلي
عشتار _ نعم وانتَ وكيلي
حجيتها وحسيت بسكين تدخل صدري شي وجعني بشكل مو طبيعي لدرجة شهكت حاطة ايدي على كلبي اريد اخذ نفس بس ماكدرت مباشرة قريت آية الكرسي وضليت أعيد وأزيد بيها لحد ما خنكتي راحت طلعت رجلي من الماء وصعدت فوك والبنات وراي دخلت للغرفة باوعت على العنود وحجيت بخنكة
عشتار _ شلون ؟
تنهدت واجتي حضنتني بوستني وكالت
العنود _ والله أنا هم مادري وانصدمت حالي حالج
اجوي البنات وحضنوني بقوة حضنتهم اشم بيهم وهم يحجون
رميم _ الله شاهد فرحتلج من كل كلبي يا روحي انتِ يالغالية يا اعظم ام وأجمل اخت واقوى سند يالوكفاتج ما تنسي الله يسعدج ويهنيج ويعوضج عن عذابج والله يجازيج على حمايتج النه وحنيتج اللي غركتنه وكلبج الطيب اللي ما كدر يعوفنه مثلهم
شمس _ الله يسعدج ويوفقج دنيا وآخره ويفتحلج أبواب الرزق الحلال يا عشتانتنه ما قصرتي والله كفيتي ووفيتي وتحملتي الفوك طاقتج ومشاعرج تخليتي عن كل شي تحبي علمودنه روحي هي أمانة وانتِ اعز من الأمانة
آسيا _ امي واختي وصديقتي وسندي الحمتني هالسنوات كلها وفرتلي كل شي احتاجه واريده وحرمت نفسها من كل شي تريده الله يسعدج ويوفقج ويا الانسان اللي يحبج من صدك اروح فدوة الروحج والطولج من عمري على عمرج ما اتمنى شي اكثر من انو انتِ تكونين سعيدة ومرتاحة بحياتج عمري ما راح انسى من تطلعين بعز الحر تشتريلنه لو من تقريني وتفهميني عمري ما انسى حمايتج الي وتضحيتج يا اعز من عمري
العنود _ صديقتي ورفيقة دربي ام الوكفات عمري ما انسى مواقفج وياي ومساعدتج الي كل أسراري عندج واثقة مليار بالمية مستحيل تطلع الله يسعدج ويعوضج عن كل اللي راح واتاكدي انتِ اقوى إنسانة وأجمل إنسانة خُلق واخلاق وتواضع كل عمري وانتِ قدوتي اعرفج شكد صبرتي وتعبتي وان شاء الله اشوفج اسعد إنسانة
عشتار _ ماعرف شنو اكول بس اقسم برب العرش دعواتكم كافية وأقسم بالله ما أشوف نفسي متفضلة عليكم انتوا خواتي وبناتي وانتِ اختي وصديقتي والله لو بيدي ما أتزوج بهالعمر بس ثقوا انو عشتار مستحيل تعوفكم اني راح أبقى وياكم لحد ما نصيبي من الدنيا ينتهي اما أبقى عايشة هنا وياكم او ناخذ بيت اني وياكم ونعيش بي تأكدوا مستحيل اتركم او أتخلى عنكم او حتى عن اخواني اني صح أبين للكل اخواني طلعوا من حياتي وكرهتهم بس لا ماكو ام تكره اولادها وماكو اخت تحب اخوانها بكدي هذوله قطعة من روحي وانتوا روحي كلها والعنود اقسم بالله انتِ رابع خواتي واخوج رابع اخواني لا تعتقدين عشتار سوتلج فضل واحد ابد والله
بعدت عن خواتي وباوعت بعيونهم وحجيت بابتسامة
عشتار _ ثقوا بيه مستحيل أعوفكم والله صدكوني
البنات _ واثقين
ابتسمت أبوسهم واشم بيهم بحسرة كامت رميم وكالت بدلع
رميم _ اويي كومن يلا الخطوبة هسه والحلقاتتت وردح وهلا هلا هلا هلا
هزت جتفها تضحك ضحكت وكمت طلعت الفستان من الكيس اباوعله شوي مخصر وفخم يجنن رحت دخلت للحمام لبسته وطلعت البنات يعدلون بيه والعنود دردم تقلد على اساس تحسدني
العنود _ اي هببب ماعندها كرش بطنها مسطحة اي هبببب
عشتار بضحك _ يمه كوي وي وي وي تيزاب يمه كوي وي وي وي تيزاب
ضحكنه ورميم دكت على ميكب ارتست ربع ساعة واجتي اول ما دخلت باوعتلي وابتسمت تكول
_ اللهم صل على محمد وال محمد والله ما تحتاجين مكياج
عشتار بابتسامة _ حبيبتي نوره اشكرج
نوره _ تدللين آنسة
بدأت تحطلي مكياج خفيف بعد نص ساعة باوعت بالمراية وانبهرت بالمكياج شكد ما هو بسيط شكد ما حلو ومتناسق خاصة عيوني مطلعتها حادة اكثر يجنن ابتسمت العنود وكالت
العنود _ اللهم صل على محمد وال محمد تخبل صاحبتي
عشتار _ ليش كاعد تحسسيني انتِ صاحبي ؟
ضحكنه ونوره شغلها يجنن وأيدها خفيفه بشكل ما طولت حطيت عطر مختلف ولبست كعب اسود عالي لامع بعقدة مزدوجة من الكرستال باوعت على نفسي برضى مبتسمة بوست البنات والعنود ونزلنه النسوان وأكفات اول ما شافتني ام مشعل شكت أذني بهلهولة لزمتني تبوس بيها فرحانة ما مصدكة ابتسمت على لهفتها بستها من راسها وكامت امي اباوعلها تجنن كلش حلوة طالعة اجتي يمي وكالت بهدوء
جوان _ مبروك تتهنين
عشتار _ شكرا ماما
حضنتني بس احس حضنتها مجاملة حضنها بارد مابي دفو ولا أمان ولا شي حضنتها طبطبت على ضهري ولزمتني من ايدي هي وام مشعل دخلوني عالصالة باوعت مزينة بأحلى التزينات شي مريح للعين كلش مشعل كاعد على تخم واكو مثل الكوشة كعدوني بصفه شوي بعيد عنه وحجت امه
ام داوود _ يلا يمه هاي خطيبتك يمك مو صرعتني عليها يلا ارتاح اخذتها
ابتسم بخجل منزل راسه
جوان _ الف مبروك ابني
مشعل _ الله يبارك بيج عمه
ابتسمت امي بوستني هي وام مشعل وطلعوا فهموني انو الشوفة نص ساعة استغربت بس سكتت مرت دقيقتين بصمت بعدها قرب ايده يم ايدي بس ما لزمها تشجعت ورفعت عيني باوعتله بنفس اللحظة لزم ايدي وغمض عينه بدون ادراك باوعت على ايده اللازمة ايدي وإصبعه يمسح عليها ايده دافييية كلش حرارتها غلفت كلبي فتح عيونه وباوعلي عيونه ذبلانة كلش حجيت بهمس
عشتار _ مشعل
مشعل _ لا رد
عشتار _ مشعل !
مشعل _ لا رد
بس صافن عليه سكتت اباوعله واباوع على ايده اللي لازمة ايدي باوعتله عيونه تحولت بلحظة وحدة وصارت حمرة دم ورجعت نظراته الغريبة من يباوعلي حسيت كلبي انقبض من نظراته اللي كلها هوس وتملك حسيت بنظراته اكو تملك فضيع
عشتار بهمس _ الأشعل عيونك لا تباوعلي هيج
جاوبني وهو بالكوة يحجي تنفسه عالي كلش
مشعل _ أعميها إذا مالت عنج
عشتار بارتباك _ ءءء اني ءء راح اروح
كمت بسرعة ومشيت هستوني دا اوصل للباب وحسيت بإيده على حلكي وايده الثانية أتلفت على بطني وسحبني عليه بقوة صار ضهري على بطنه وراسي على صدره مشه بيه الناحية الباب وقفل الباب مرتين وصوت طكات القفل ترن بأذني حسيت نفسي كاعدة بفلم رعب ما اكدر احجي لان ساد حلكي بإيده ولا اكدر اتحرك لان ايده ملتفه على بطني مانعتني من الحركة حسيته نزل راسه بطئ وحط خشمه على حنكي قريب من أذني سحب نفس طويييل بهدوء
ماكدرت اتحمل وضربته بقوة على ايده اريد افك نفسي منه بس ما اكدر مشه بيه للتخم وفكني درت نفسي بعصبية عليه هستوني اريد احجي واشرلي بإيده بمعنى اششش حجيت بهمس واني رافعه اصبعي بوجهه بتحذير
عشتار _ مشعل آخر مرة أسمحلك تلمسني وبعدين الاشش هاي مو يمي افتهم اني مو لعبة بإيدك
ابتسم وباس اصبعي لزمني من ايدي بهدوء وكعدني كل شي ما يحجي يباوعلي بنظرات وحش مو نظرات مشعل البريء مو نظرات ابن جيراني اللي عشقني لا جانت نظراته نظرات هوس تملك احس بيها خبث واجرام عيونه تكوم تطلع نار بدون سبب
عشتار بهمس _ مشعل
مشعل _ لا رد
عشتار _ مشعل عيونك
مشعل وهو بالكوة يحجي _ شمالها ؟
عشتار _ ليش هيج تباوعلي ؟
مشعل بنفس النبرة _ مهووس بروحج يا وطن روحي
ارتبكت كلش ماعرف شنو ارد او شنو أتصرف لان موضوع المهر بعده براسي مستحيل يطلع ولو ثانية كمت بهدوء اباوعله اخاف يسوي شي بلحظة درت وجهي دا اركض ولزمني من ايدي وجرني وكعت بحضنه صار وجهي بوجهه بلحظة كل شرار عيونه راح وذبلت حجه بهمس وصعوبة وهو يكول
مشعل _ عليج ابو فاضل خليني بس هالمرة
عشتار بربكة _ شنو بس هالمرة ؟
باوعلي بنظرات مو مفهومة وعيونه نزلت على ركبتي يباوعلها بهيام وتعطش يبلع بريكه وتفاحة ادم تصعد وتنزل بوضوح عينه متمركزة بركبتي صدره يصعد وينزل بلحظة ما احس غير حضني بكل قوته حسيت عظامي طكن ايد على أكتافي من وره وايد على خصري يعصر بخصري يحاول ما يوجعني حسيت عيوني قفلت من قرب خشمه عند ركبتي صرت ما احس بأعضائي ولا بأعصابي بس شعور غريب دفن راسه بركبتي بقوة يشم بيه حرك خشمه على طول ركبتي يبوسها بحنان عاصرني بحضنه حجيت بصعوبة
عشتار _ مشعل وخر
مشعل _ لا رد
لزمني فكي رافع راسي وحط خشمه على ركبتي من كدام يبوسها حسيت كلبي راح يطلع من صدري صح هو هسه زوجي لان عقدنه وعادي هيج يصير بس احس لا ما اكدر ماعرف شنو اوصف وخر عن ركبتي ورجع راسي فتحت عيني اباوعله وهو عيونه ذبلانة يباوعلي بهيام وحب كمت من حضنه وكعدت بمكاني وهو مستمر يباوعلي حجيت بصوت ناصي واني اباوعله
عشتار _ ما يصير هيج تسوي
مشعل بذوبان _ ليش ؟
عشتار _ ما اعرف بس ما يصير ما اكدر
مشعل _ ما تحبيني ؟
عشتار _ مو هيج بس ما اكدر
مشعل _ مو بيدي
عشتار باستغراب _ شلون مو بيدك ؟
مشعل _ ما احس بنفسي والحسن
سكتت اباوعله وهو يتنهد بحسرة كعد على ركبة رجله وحط راسه على رجلي حاضنها حطيت ايدي على ضهره امسح عليه وهو يسولف بصوت حزين
مشعل _ حبيتج ، عشكتج ، هويتي ، انهوست بيج وبشوفتج ، ادمنت على صوتج وعليج ، متت بيج وعليج ، اخخخ يا بويه شسويتي بحالي أنا هسه بدونج ما أسوه فلس يا بعدي ما اكدر أميل عنج ولا اكدر اعوفج شني الحل ؟ شني اسوي حتى تحبيني ؟ صح خوفتج ممكن خفتي من نظراتي بس وداعت عيون امي مستحيل أنا اذيج لا تفكرين مشعل بيوم ياذي روحه لان روحه أمانة وانتِ أمانتي يا وطن روحي يا عشتار شحبج وشعشكتج وشنهوست بيج يا حيل حيلي ما حبيت شكلج اللي هو احلى وجه شفته بحياتي حبيت روحج واخلاقج وحنانج وقوتج وكل شي بيج حبيني أنا استاهل تحبيني
عشتار بتنهيدة _ احبك والله
رفع راسه وباوعلي والفرحة مسايعته كعد بصفي لزم وجهي وكال بفرحة لا توصف
مشعل _ صدك ؟ صدك والله تحبيني ؟
عشتار بخجل _ اي احبك
سحبني الصدره حاضني بقه دقايق على هالوضع خلص عشتار موضوع المهر آخر شي اعرفه هسه لازم نعيش اللحظة
بتردد رفعت ايدي وحضنته ضحك ما مصدك وشد على حضني بقوة وحط راسه بركبتي يشمني ويبوسني
مشعل وهو يبوسها _ افييييييييييييشششش
ابتسمت ورفعت راسي حطيته بركبته ارتاحت اعضائي واعصابي ونفسيتي كد ما العطر طيب وهادي عطر يجنن ما اكدر أوصفه خليت خشمي دافنته بركبته اكثر استنشق عطره حرفياً أطيب عطر شميته بحياتي من بعد ريحة خواتي اكيد بسته بركبته بدون شعور وهو احس لو عنده جناحات جان طار
باسني بكتفي وبالترقوة ورجع مخلي خشمه بركبتي باسني بقوة ابتعدت منه وحجيت بخجل
عشتار _ كافي يلا
مشعل _ خدج
عشتار بخوف وهي تلمس خدها _ شبي عززه ؟
مشعل _ ترافته مثل الاطفال
باوعتله وضحكت ابتسم هو وتقرب باس عيوني ابتعد حاط خشمه على خدي ويحجي بهمس
مشعل _ اوووف شكثر اهواج ريحتج بس شميتها فقدت صوابي
عشتار _ هاي شنوو صرت تعرف تتغزل
ضحك وابتعد
مشعل _ بصراحة أنا كل شي ما افهم بالغزل ايمن امس دربني
عشتار بضوجة _ يعني كل هذا من ايمن
مشعل _ لا مو كله بس اغلبه
عشتار بضحك _ زين ليش من ايمن ؟
مشعل _ أنا ما داخل علاقة قبل ولا عندي اصدقاء عدهم علاقات حتى تكون عندي خبرة بس ايمن عنده اصدقاء
عشتار _ ابد ولا علاقة داخل ؟
مشعل _ ابد
عشتار _ احلف
مشعل _ وأبو راس الحار ماعندي علاقات سابقة
عشتار _ تمام كافي عيب من الناس مخليهم بره
هز راسه وكام فتح الباب وكعدنه على الكوشة دز رسالة بالتليفون دقايق وانفتح الباب وانرش الجكليت وانطلقت الهلاهل دخلوا النسوان من ضمنهم خواتي وخوات مشعل كمت بفرحة ولهفة تحت أنظار مشعل وحضنت خواتي والعنود حضنت خوات مشعل وأخته مريم كلش لطيفة سلمت عليهم بوستهم ورجعوني عالكوشة اخواني ما موجودين حسيت بداخلي فراغ وقهر وما بينت بس مشعل انتبه عليه ولزم ايدي باسها بالختلة وكال بهمس
مشعل _ أنا ابوج وزوجج وحبيبج وصديقج واخوج وسندج وأشعلج لا تهتمين
ابتسمت وهزيت راسي دخل ابوية وامي وأبو مشعل بس شفته ابتسمت وكمت اجه يمي مبتسم برزانة باسني براسي وأنطاني صندوق خشب وكال
ابو داوود _ الف مبروك بويه ان شاء الله الذرية الصالحة والله يوفقكم ويسعدكم وهذا بنيتي حكج لانج تحملتي وليدي
ضحكت وبست راسه وحجيت بامتنان
عشتار _ شكرا عمو ما قصرت والله وجودك كافي عندي ودعواتك اجمل من الف هدية عندي
ابو داوود _ حبيبتي بويه تتهنين بابني ولا ترجعي ابد اخذي حلالج
ضحكت اني ومشعل وهو سلم على مشعل وعجبني أسلوبه شكد حلو وبار باهله وأمه وأبو اجتي امي سلمت عليه وباركتلي وكعدت وابوية اجه باوعلي بنظرة وكال
عبدالله _ مبروك عليك مشعل مبروك عليج بابا
عشتار _ الله يبارك بيك بابا
هز راسه وراح كعد يم امي بارزين نفسهم بدلاتهم الماركة وساعاتهم من يردون يشغلون الدي جي طلعوا امي وابوية وام مشعل وأبو شغلوا البنات الدي جي وكمت اني ومشعل اللي وجهه راح يطك من الخجل واني مو اقل منه بس كسروها خواته وخواتي والعنود من اجوي يركصونه مشعل كام بس يصفك واني اندمجت كلش حتى نسيت الهدوء وكل شي وكمت اهز جتف ويا خواتي باوعت على مشعل يباوعلي ويضحك ضحكت ولزمته من ايدي اركص وياه وهو يستحي يركص بس يصفك ثواني ودخلوا الشباب وياهم اخوان مشعل الكبار وزوجات اخوانه ابتسمت ومشعل راح سلم عليهم واني ابتسمت وسلمت على اخوانه بس من بعيد لبعيد اجني زوجات اخوانه سلمن عليه برود واني قابلتهم بقالب جليدي كعدوا يباوعون على البيت ويتبسبسن بقوا شويه اخوانه يسولفون ويانه نص ساعة ساعة واخذوا زوجاتهم وطلعوا بقوا بس الشباب راحت رميم طلعت اغنية جيناك بهاية ومشعل راح ويا الشباب وكام يركص ويهز جتف بس برزانة والبنات يضحكون ويصورون ضحكت
ورحت يم البنات امشي واهز جتف وأغني
عشتار _ بس اشر بيك وشوف نجيب الغثك مجتوف احنه من نصاحب منعوف احنه المابينه مخربط بينه اليندك يتورط نيشن صح وما نغلط اما نغلط
وكفت بنصهم اركص بس بهدوء ثواني وطلعت رميم دبكة انصدموا الشباب يباوعون علينه لزمت العودة وكمت افر بيها باحترافية لزمت فستاني اني والبنات وكمنه ندبك الشباب صفنوا علينه متعجبين خصوصاً مشعل عيونه متمركزة بيه ما مصدك ضحكت وكملت والأغنية على وشك الانتهاء راحت رميم تهز ركبة وطفتها كعدت على الكوشة اضحك شغلوا اغنية يا أميرتي يا جميلتي وكام مشعل مد ايده الي لزمتها وكمت قرّبني عليه كلش لدرجة شويه وينطخ خشمي بخشمه رفع ايده وكام يمشي مثل الأتراك واني كمت احرك ايدي بنعومة وكف بالنص واني افتر داير مدايره اركص وأغني
عشتار _ على قلبي قد بات مغرمون يا أميرتي يا جميلتي يا سيدة كل النساء لا تتركيني في وحدتي فالابتعاد عنك ابتلاء
وهو متكتف مبتسم يباوعلي بهيام والبنات يصورونه ويضحكون من خلصت اني وياه تقرب وباسني براسي دخلوا ابوية وامي وأبو وأمه اجتي امه جايبه وياها تخم الماس كلش راقي وكالت
ام داوود _ مو حقج بنيتي واعذرينه على التقصير
عشتار بابتسامة _ لا والله خاله ما قصرتي لا انتِ ولا عمو وجودكم كافي
اخذ مشعل الكلادة انداريت وخرت شعري وهو لبسني والشباب صافنين علينه ويقلدونه بينهم حسيت جسمي كزبر من ايده طخت ركبتي لبسنياها واخذ الأساور لزم ايدي ولبسنايهم اخذ التراجي لبسها الي مع انو مرتبك وايده ترجف بس لبسها الي جابت مريم الحلقات والصدمة من جانت اكو اربع حلقات وحلقة وحدة رجالية ابتسمت اباوعله وهو مبتسم يباوعلي عيونه تلمع بحب اخذهم كلهم ولبسني اول واحد باس ايدي وكال
مشعل _ انتِ الاولى
لبسني ثاني حلقة وباس ايدي وكال
مشعل _ والثانية
لبسني الثالة باس ايدي وكال
مشعل _ والثالثة
لبسني الحلقة الرابعة باس ايدي وباس راسي وكال بهمس
مشعل _ والرابعة والأخيرة يا وطن روحه المشعل
ابتسمت واحس اكو شعور بداخلي شعور حب كبيييير الهالانسان بس سالفة المهر وحتى الحلقات والألماس والهدايات مكاعد تطلع من راسي واتمنى ما يكون اللي بالي صح خلي اسكت ما اريد اعكر هالليلة
اخذت الحلقة لبستها اله لمست ايده دافية وحنينة احس ايده ايد أب يحب بنته ويشتغل ويتعب علمودها
حضني بقوة كبالهم حاط راسه على كتفي بادلته بقوة وحب من صدك اتاكدت من مشاعري حطيت ايدي على راسه وحجيت بهمس
عشتار _ احبك اشعلي
حضني بقوة دلالة على فرحته مسحت ام مشعل على ضهري وضهر مشعل وكالت بابتسامة
ام داوود _ الله يسعدكم ويهنيكم ويبعد عنكم أولاد الحرام بجاه محمد وآل محمد
ابتسمت وابتعدت عنه كعدنه على الكوشة ودخلت المصورة الكل طلع ما عدا البنات بقوا كعدتني عالكوشة مقابيل مشعل اباوعله وهو يباوعلي اخذت صورة طلعتيالي بالكاميرا كلش حلوة أخذت صورة ثانية ضهري بضهر مشعل نباوع عالكاميرا وهواي صور بدلنه ملابسنه ولبست لثامي اللي هو شماغ احمر وهو لثامه الأسود رافعه راسي اباوعله وبس عيوني طالعة وصورة وهو يبوس ايدي وهواي لحد ما تعبت وخواتي بس يصورن ويضحكون أنطه فلوس للمصورة وراحت والكل طلع يردوني ابقه وياه وحدنه على اساس نسولف
حسيت الفرصة اجتني من رب العالمين انو احجي لان هذا الموضوع اكل راسي باوعتله وابتسمت سائلة
عشتار _ شكد تحبني ؟
باوعلي وضل صافن بوجهي ما يعرف شنو يجاوب والحيرة بملامحه واضحة ضحكت بهدوء وحجيت
عشتار _ تحبني هواي ؟
مشعل _ ما ينوصف وحك علي
عشتار _ زين شنو تسوي إذا عفتك ؟
انعفس وجهه بلحظة يباوعلي بشك ابتسمت واني احجي
عشتار _ بس سؤال صدكني
مشعل _ ما احب اجاوب
عشتار _ الخاطر عشتار
مشعل بتنهيدة _ ماعرف ارضي من سماي وهو مجرد سؤال عاد لو حقيقة شني تتوقعين ؟
عشتار _ زين تسوي شي يضوجني بيوم ؟
مشعل _ ابد انتِ تضوجيني أنا ما اضوجج
ضحكت بقوة وهو ابتسم على ضحكتي حجيت واني اباوع على الياخة اعدلها
عشتار _ زين انتَ تعرف اني اضوج إذا احد يستغفلني او يضم عني شي صحيح ؟
مشعل باستغراب _ اي
باوعتله وعيوني تحولت للحدة وهو عيونه الاستغراب واضح بيها من سؤالي ونظراتي سكتت اباوعله بحدة وهو نطق مستغرب
مشعل _ شمالج عشتاري ؟
عشتار _ مشعل !
مشعل _ مشعل ؟ المهم عيونه
عشتار _ انتَ ...... !!؟؟

                                         يَتبـَــع
                             طَهـِر لِسـَـانك بِذِكـرِ اللـه
                                    سُبحَــان اللـه
                                      الحَمـدُللـه
                                 لَا إِلـٰــه إِلا اللـه
                                   اللــه أَكبَــــر
                    اللـهُــمَ صَلِ عَلى مُحَمَــد وَآلِ مُحَمَــد

ابو الكهرباء والنت حرام انطيهم ربع والله بس مضطرين 😒

سيموراماتي ادري التنزيل صاير شله وعبر مو مضبوط بس والله الكهرباء زفت مو بيدي الموضوع عذروني داده 😓
البارت الجاي طويل من 6000 كلمة وفوك تدللنننن 🤎