طـغيان إِحمِرار السآعد

بارت 11

طِـــغيان إحمـــرار ألســـآعد
انا ابن المدينة وتيهت بيها
يل عندك جرح وتكلي مجروح
انه جروحي فاضت مادري وين اوديها

~ مشعل ~
طلعت شعرها يطيره الهوا تقربت اكثر أريدها تشوفني وانصدمت واني اشوف بيها اثر بأيدها تقربت اكثر اباوع فعلا اثر تقربت رحت عند الحارس اللي بالباب وهي وكفت تحجي ويا السايق رحت على السايق وسألته
مشعل _ سلام عليكم خويه
السايق _ وعليكم السلام تفضل
مشعل _ بس خويه منطقة الـ ...... منين اطلعلها
كعد يشرحلي وآني أهز براسي وهي ما باوعتلي ولا حتى بنظرة تباوع كدام نزلت راسي وباوعت على ايدها جان اثر احمر مثل الضربه باوعت على الحارس بعد ما كمل كلامة حجيت والكلمات ثكيله على لساني
مشعل _ تسلم خويه
عفته ورحت امشي تفكيري مشتت هواي اسئلة بداخلي ليش مهتم الها زين حجيت بداخلي واني بيه تأنيب ضمير
مشعل _ مايصير مشعل مايصير تباوعلها لا ترفع عينك لا تصفن بيها حرام كما تدين تدان انتَ تباوعلها وهي ماترفع عينها وين مشعل اللي مايرفع عينه على بنية استغفر الله شبيه انا
صفنت افكر شنو الأثر هذا ضربة لو واكعة لو شنو زين لنفترض ضربة منو يضربها حسيت راسي صدع استغفرت ربي وكملت طريقي بس صورة ايدها متطلع من راسي وصلت للمطعم لكيت ايمن وداوود وحسين وسيف
مشعل _ سلام عليكم
الكل _ عليكم السلام
رحت كعدت على الكرسي حطيت راسي بين ايدي مهموم اجه كعد بصفي ايمن حط ايده على كتفي
ايمن _ شبيك خويه
مشعل _ مابيه شي
ايمن _ علينه الأشعل علينه
ابتسمت ساكت طبطب على كتفي وهمس بصوت ناصي
ايمن _ هل يا ترى هذه الحالة بسبب بنت الجيران
سويت روحي ما مفتهم
مشعل _ يا بنية يا جيران شبيك ماكو شي بس تعبان من الشغل
ايمن _ يعني اسمحلي حاولت والله صدكني حاولت اصدكك بس ماكدرت
مشعل _ طبك حريشي لا تصدك
عفته وكمت رحت يم الولد اسوي بالطلبات بس ساكت بالي مشغول حسيت بضربة على ضهري التفتت مصدوم داوود يباوعلي بعصبية
داوود _ ابن الحلال صارلي ساعة احجي وانتَ سرحان
مشعل _ تعبان من الشغل مو اكثر سويت الطلبات خلي سيف يوديهن راح ارجع للبيت
عفته ورحت بدون ما اسمع شي ركض ايمن وراي يصيح
ايمن _ هوب هوب خايب انتظر
مارديت عليه مالي خلك ولا بيه حيل احاول اقنع نفسي تعبان بسبب الشغل بس اعرف بنفسي عليمن ضايج وصلت للبيت وايمن ينك فوك راسي شبيك وشبيك دخلت سلمت ورحت الغرفتي اريد انام غطيت نفسي وسمعت الباب ينفتح دخل ايمن وعاط بيه
ايمن _ كوم كوم تعال وياي
مشعل _ اريد انام يا بشر تعبان
ايمن _ ماكو تعاااال
جرني من ايدي ونزلنه كعدنه بالصالة باوع الامي وكال
ايمن _ يمه ليش ما تعزمين المنطقة
ام داوود _ ليش يمه شعدنه
ايمن _ ليش لازم اكو عزيمة
ام داوود _ جا من يسألوني شنو المناسبة اكول لازم اكو عزيمة ؟
ايمن _ لا بس مشتاقين للشباب ونريد ناكل بصراحة وكوليلهم ماكو مناسبة شني يمه كلبج من صخر متشتاقين لحبايبنه
ام داوود _ اوكف يمه انتظر اكلتني خلص راح اعزم
ايمن _ منو تعزمين
ام داوود _ خايب غير الجوارين واللي نعرفهم
ايمن _ بس يمه لا تعزمين بيت ابو محمد
ابو داوود _ انجب لك فلا تستحي شني نعزم المنطقة كلها وما نعزمهم شيكولون علينه الناس الاغم معليج بي اعزميهم
ام داوود _ ام محمد مستحيل تجي وأبو محمد كذلك اعزم منو
هند _ اعزمي بناته
رهف _ اي يمه عليج الله
ام داوود _ خير ان شاء الله كومي جيبي تليفون ابوج
رهف _ ليش
ام داوود _ يعزمهم غير
رهف _ راح تعزمين بنات ابو محمد
ام داوود _ اي جا شلون
وصال ( زوجة داوود ) _ والله بنات ابو محمد ولا ارتاحلهن خصوصاً هاي الكبيرة فد متكبرة وشايفة نفسها شوفة بس لان ابوها عنده فلوس
مشعل _ ليش انتِ حاجيه وياها ؟
وصال _ ها
مشعل _ حاجيه وياها ؟
وصال _ لا بس شايفتها
رهف _ لعد شكو كاعد تحجين عليها وانتِ بس شايفتها
وصال _ النسوان هيج يحجن
رهف _ ولا مرة حجن عليها او على خواتها لا تكذبين
ابو داوود _ كافي سدوا الموضوع وصال بويه عيب تحجين على بنية متعرفيها حتى لو سامعة عنها كلمة مو طيبة المفروض ما تقبلين
وصال _ اعتذر عمو بس صدك هي لو تشوفها متلومني شلون رافعة راسها وهي بطول اصبعي وتلبس كعب من تكبر شتسوي
هي تحجي واني احس شياطين الارض كاعد تحجي اجاني احساس ما اريد احد يحجي عليها ما اقبل حجيت بعصبية
مشعل _ خويه عيب هيج تحجين كدامنه يعني تقبلين احد يحجي عليج هيج كدام عائلته وهو بس شايفج احترمي ابوية الكاعد على الاقل
داوود _ امشي اصعدي كدامي
وصال _ هاي شبيكم كل هذا علمود حجيت على وحدة أنتوا لا تعرفوها ولا شايفيها
هند _ حبيبتي وصال عشتار نعرفها وشايفيها ولو كانت علاقتنه سطحية بس عيب هيج تحجين وحتى لو جنتي تكرهيها المفروض تح.....
قاطعتها رهف وكملت
رهف _ المفروض تستحين من حموينج وزوجج وعمج وعمتج كاعدة بنصهم تحجين على البنية
وصال _ على كيفج عيني هسه شني حجينه يا كلمة ردي مكانج
داوود _ وصااااال امشييي للغرفة امشييي
ابو داوود _ داوود احترم مرتك كدامنه
داوود _ اعتذر بويه بس طلعت عن طوري امشي صعدي
اخذها وصعد باوعت على ايمن اللي صفن
حسين _ وجع شبيك صفنت صفنة ابو صابر
ايمن _ شكد شايف ناس حقودة مثل هاي الحشريه ما شايف ولا راح اشوف
ام داوود _ لك يمه عيب هاي مرت اخوك
ردت رهف وهي تصب الجاي
رهف _ لا يمه صح كلامه وشلون تكذب عينك عينك هي مو حجت وياها بالعزيمة
ام داوود _ يمكن بعدها ضايجه من الموقف
ايمن _ يا موقف احجووولي
ام داوود _ يبووو منك ومن فضولك
رهف _ اني احجيلك .. كاعدين بالعزيمة ودخلت عشتار هي وخواتها سلمن علينه وكعدن مقابيلنه وامها جانت تسولف ويا النسوان عشتار جانت تضحك ويا خواتها جانت وصال تباوعلها من فوك ليجوه وعشتار ردتلها النظرات تباوعلها من فوك ليجوه مبتسمه بأستهزاء حجت وصال تحاول تستفزها
وصال _ بناتج لو خواتج
ردت عشتار وهي نفس ابتسامتها ونظراتها
عشتار _ شنو هالسؤال السخيف
نطت عيون وصال من جوابها عبالها عشتار لان صغيرة راح تسكتلها بالكوة كتمت ضحكتي عيوني كامت تدمع اريد اضحك وهند حاطة ايدها على حلكها وجها احمر وصال سكتت ماحجت بعدها
حسين _ يابويههه شلون رد بالكصة كاعد أتخيل رد البنية تفلة وضربت جبهة وصال زرفتها
ضحكنه كلنه ورهف نامت بالكاع تتمرغل وامي تضحك ابوية يهز ايده يسوي روحه ميضحك
ايمن _ اخخخ بطني يا يمه راح اولد من جيرة بكصتك على هالتعبير
هند _ والله لعبت نفسي تعبيرك عميق بويه وجهك راح ينفجر اضحك لا تخليها بنفسك
انفجر أبويه يضحك راح الغرفته يضحك وامي لحكته واني طلعت بالحديقة كعدت عالحشيش مبتسم افكر بيها طلعت صورها اباوعلهن كعد بصفي احد عرفته ايمن ذبيت التليفون واني اتنهد حجه ايمن بكل جدية الدرجة انصدمت منه
ايمن _ احجيلي خويه لا تضم عليه شي اني ايمن مو تكول الابويه ايمن بير اسراري ذب سرك عندي لا تخاف ما راح يطلع والله سويت كل هاي التمثيلية علمودك
تنهدت وحجيتله من شفت ايدها باوعلي بحيرة وكال
ايمن _ زين احنه بصفتنه منو حتى ندخل بيها هذا الشي واكف بعيوني وعيونك
مشعل _ ما يهمني احنه منو وهي منو اريد اعرف شنو قصتها
ايمن _ ليش ؟ ولا تكلي فضول لان انت من الأساس مو فضولي
مشعل _ مادري ليش وهذا الشي محيرني اكثر اريد اتقرب منها وماريد اريد اعرف قصتها وما اريد بس الشي الواثق منه ما اريد يتأذه طرف إصبعها
ايمن _ عندي خطة بس راح تكلفك
مشعل _ فلوس ؟
ايمن _ نوعاً ما هيج شي
مشعل _ كول
بدأ يشرح واني مركز على كل حرف يحجي خلص حجي وتمدد عالحشيش وهو يكول
ايمن _ يا يمه يبس ريكي
مشعل _ وشوكت نكدر نسويها
ايمن _ باجر
ابتسمت بس بداخلي شي ما اكدر افهمه
ايمن _ تحبها
مشعل _ لا
ايمن _ تحبها
مشعل _ مادري
ايمن _ تحبها
مشعل _ مااادري بس ما اعتقد
ايمن _ هو شني المادري
مشعل _ ماعرف كتلك يعني مادري
ايمن _ اسألك وجاوبني
هزيت راسي
ايمن _ شنو عجبك بيها هي بالذات واكو هواي بنات سواء بالعائلة او بره العائلة ليش هي
ابتسمت وحجيت بدون وعي
مشعل _ لان هي مميزة عن كل البنات
ايمن _ شلون يعني شنو بيها مميز
مشعل _ قوية برغم من صغر سنها شايله مسؤولية خواتها عجبتني قوتها حنيتها على خواتها اهتمامها بيهم اسلوبها اخلاقها كل شي بيها مختلف وجديد ماشفته بأحد
ايمن _ شنو تحس من تشوفها
مشعل _ فرح على توتر على ندم على لوم مشاعر مختلفة بس كلها تروح من اشوف عيونها اشوف روحي بيها
ايمن _ حبيت شكلها ؟
مشعل _ لا حبيت روحها حبيت غموضها حبيت جرأتها حبيت مسؤوليتها حبيت شجاعتها حبيت لعبها حبيت ثكلها واخلاقها
تنهد وهو يكول
ايمن _ طلعت واكع وفاطس هم
مشعل _ اني ما احبها بعدها صغيرة مو مال حب
ايمن _ الحب مايعرف عمر صح اني ماعندي تجربة بس مقتنع
مشعل _ ماعرف بس نادم
ايمن _ ليش
مشعل _ باوعتلها ودخلت بيها بس مو بيدي من شفت ايدها حسيت بلعومي يحركني
ايمن _ منو يضربها يعني
مشعل _ مو سمعتهم يكولون ابوها ما فارغ وامها تسافر واخوانها نحرفوا عن الطريق يعني منو
ايمن _ معقولة هم ضربوها
حجيت بحقد
مشعل _ حتى أشعلهم شعل اهد عليهم الدنيا هد
ايمن _ دخيلك يابو الحسنين شني هاي كل هذا علمود ست الحسن ام السحورة
مشعل _ لا لو اي بنية بنفس موقفها اسوي اللي اسوي مو ديوث اني
ايمن _ حشاك يمعود هدي شبيك
كمت من الحشيش واني اكول
مشعل _ يا علي انتَ الولي
طفر من مكانه وعاط
ايمن _ يابو الحسنينننننن
راح يركض داخل البيت يهوس بكل صوته نزلوا اخواني وخواتي طلعوا ابوية وامي من غرفتهم يباوعون عليه مصدومين وهو يهوس بكل حيله يصيح
ايمن _ علي علي علي مولااااااي علي علي علي مولااااااي علي علي علي مولاااااي علي علي علي مولاااااي مولاي مولاي مولاي مولاي
دخل حسين وسيف وياه يهوسون
حسين _ الفرار الفرار جاء حيدر للقتال الامان الامان من غضب ذو الفقار دخل الميدان علي ملك راكب الخيل هو يعادل الكتاب صاحب الهيبة والوقار وضع قدمه على الارض فصار غبار اسد شجاع وحده يعادل جيش صاحب المنبر يا علي
راح ايمن اخذ التليفون وطلع قصيدته اللي مستحيل يستغني عنها
ايمن _ علي حكه بالحرب يتباهى رايه بجفوف الحسن خلاها صولة الشبلين حسن ويا حسين كنطرة عباس من يدناها علي فجأة بالحرب عاف القتال شاهد العباس بس بيا خيال يا عليي
سيف _ علي فجأة بالحرب عاف القتال شاهد العباس بس بيا خيال ذكره بصفين وبدر وحنين ذكره بصولاته من خاباها علي حكه بالحرب يتباهى راية بجفوف الحسن خلاها صولة الشبلين حسن ويا حسين كنطرة عباس من يدناها
راكان _ لا رماح ولا سهام ولا سيوف الحسن لو صال يفنيها الصفوف
حسين _ لا رماح ولا سهام ولا سيوف الحسن لو صال يفنيها الصفوف الأسد لو صال بسيفه هد جبال بصولته العدوان يتحداها علي حكه بالحرب يتباها راية بجفوف الحسن خلاها صولة الشبلين حسن ويا حسين كنطرة عباس من يدناها
راكان _ صال شبل حسين وتحدى الكفر وكف وكفت حيدرة بصولة بدر جدل الفرسان يكلب الميدان والكفر مثل الغنم سواها علي حكه بالحرب يتباهى راية بجفوف الحسن خلاها صولة الشبلين حسن ويا حسين كنطرة عباس من يدناها
ايمن _ علي وشطوله وكف بالنهروان غضب صبه على الكفر وبلا هوان سوحت الدموم يا بطل ليفوك ثارت العدوان في منواها

خلصت القصيدة وهو سد التليفون باوعلهم وكال
ايمن _ ها حبايب
ابو داوود _ انت خبل والله محنون مو بعقلك من امداك
ايمن _ ليش هيج بويه هذا علي ابو الحسنين
ابو داوود _ عليه السلام بس انتَ مخبل مو بعقلك الله أنطاك الخفه وأخذ منك العقل وسبحان الله انتَ وهذولي كلش متوالمين لان ماكو عقل
يأشر على سيف وحسين وعليه وعلى رهف باوعتله رهف وكالت
رهف _ شعليه اني يا بويه
ام داوود _ يمه منج انتِ شعليج ها مثله ماكو عقل ولا فهم امداكم مخلفه صخول اني ومادري
راحت تركض على ايمن باسته بخده وراحت تركض للدرج وتصيح
رهف _ انا الذي سمتني امي حيدرة ضرغام اجام وليث القسورة كليث غابات كريه المنظره على الاعادي مثل ريح صرصره اكيلكم بالسيف كيل السندرة اضرب بالسيف رقاب الكفرة
ام داوود _ رايده من علي يهديكم
راحت الغرفتها وأبويه راح وراها والكل رجع رحت الغرفتي وأيمن راح الغرفته تمددت اباوع عالسكف احاول أتجاهل احساسي ما كدرت فتحت التليفون ورحت على صورها اباوعلها اتمعن بداخلي ألوم بروحي بس مو بيدي بقيت للفجر كاعد كمت اصلي توضيت وصليت خلصت وبقيت كاعد هالسجادة رفعت راسي وحجيت بدون ما أفكر بشنو راح احجي اريد أفضفض اريد ابرر
_ اللهم انتَ تعرف نيتي خير انتَ تعرف ما في الصدور وانتَ تعرف اني هذا الشي مو بيدي انتَ تعرف حاولت امنع نفسي منها بس ماكدرت يارب إذا جنت خير الها قرّبني واذا شر ابعدني واذا جانت خير الي قربها واذا جانت شر سوي بيها خير وقربها يارب العالمين
لميت سجادتي واستوعبت شنو حجيت استغفر الله ضحكت على تفكيري ورحت اسبح بدلت ونزلت تريكت وطلعنه اني وأيمن للشغل طلبونه نصبغ بيت خلصنه شغل ورجعنه للبيت صعدت الغرفتي سبحت ورحت على غرفة ايمن دخلت وباوعتله وكلت
مشعل _ ها شني
ايمن _ اصبر رحمة الابوك
مشعل _ صارلك دهر اصبر واصبر صار الليل
اشرلي بمعنى بعد بقيت كاعد بغرفته لوقت طويل صار الفجر شويه دك تليفونه باوع الاسم وطفر
ايمن _ امشي يلا
لبس شماغه رحت لبست شماغي وطلعنه باوعت البيتهم باوعت طلعت وماخذة سلة الزبالة وياها رحنه وراها وراسلت حسين وسيف
باوعت عالشارع وابتسمت بأنتصار طبكت السيارة كدامها وووووو...!؟؟

                                          يتبع
                               طهر لسانك بذكر الله
                                     سبحان الله
                                      الحمدلله 
                                    لا إله إلا الله
                                      الله اكبر

حبايب باجر ينزل الاشباه ويمكن هذا البارت والبارت الجاي عن مشعل بس احداااااااث طن اطنان من الاحداث بالبارت الجاي بس اريد تفاعلكم وتعليقاتكم الحلوة تخليني استمر وانشر بارتات اقوى + ضيفوني على الإنستقرام ارد على الكل واكتبولي رأيكم بالقصة لان رأيكم يهمنيييييي روح روحي

وصدك شنو توقعاتكم منو هاي ؟ وشنو راح يصير ؟؟؟