طِــغيان إِحمـــرار ألســـآعد
خليتنـي بـلا خلك ما اتحمـل حجايـه..!
~ عشتار ~
عشتار _ انتَ يا مشعل حالتك المادية يا ترى تسمح تنطي المهر هذا ؟
حسيته أنصدم يمكن ما جان متوقع اسأله أو راح يكون هالموضوع براسي صفن بوجهي ما يعرف شنو يرد رفعت حاجبي بشك وحجيت
عشتار _ الأشعل انتَ ضام عليه شي ؟ كول هسه احسن من ما إني اكتشفه بنفسي وساعتها صدكني راح انسيك صوتي وشكلي راح أخليك تنسى عشتار
أباوعله تغيرت ملامحه مية وثمانين درجة من البرود للعصبية تنهد ورفع شعره يصبر بروحه ما ينفجر بيه رجع نظره عليه وكال
مشعل _ عشتار لا تهدديني بفكدج تره جلمتج تحرك كلبي وانتِ باردة
عشتار _ اللي يحاول يستغفلني تتوقع اسكتله ؟
مشعل بعصبية مكتومة _ عشتار لو مهما يكون حبج بكلبي لا تغلطين مو مشعل اللي يستغفل حرمة مو أنا
عشتار _ لعد شنو تفسيرك وحدة انخطبت واللي هي تعرفه عن خطيبها انو حالته المادية متوسطة فجأة ينطيها مهر مليار ونص تعرف شنو مليار ونص وهو حالته متوسطة ؟ شلون صارت ؟ مين اجتي الفلوس ؟ من الهواء ؟
سكت صافن عليه واني حسيته يريد يأكدلي شكوكي بس ما يعرف شلون ما يعرف شلون يصارحني تكتفت اباوعله منتظرته يحجي يبرر موقفه ليش يخليني أفكر بي هيج سند ايديه على رجله ومسح وجهه حجه بهدوء وهو مبعد نظره عني
مشعل _ حقج تسألين بس اكو أشياء أنا ما اكدر احجيها لا إلج ولا الغيرج افهميني ؟
عشتار _ ماكو شي اسمه ما اكدر طول عمري أعرفك أنتَ مشعل القوي الشجاع اللي ماكو شي يوكف بوجهك وهسه تكولي ما اكدر ؟
مشعل _ عشتار عوفي هذا الموضوع
حطيت عيني بعينه وتحولت نظراتي للبرود مو بكيفك راح اعرف الموضوع يعني راح اعرفه وإذا مو منك إني اعرف شلون افهم الموضوع والسر اللي انتَ ضامه يا مشعل اقسم بالله وداعت خواتي اعرفه اعرفه
عيوني تتنقل بين ملامحه برود اعرف نقطة ضعفك وهذا أسوء شي سويته ويا عشتار ابتسمت بهدوء وهزيت راسي وكمت من مكاني درت وجهي أريد اروح ولزمني من ايدي ساحبني عليه رفعت عيني اباوع على كل وجهه إلا عيونه نزلت راسي مبتسمة لزمني من حنكي ورفع راسي عيونه تتنقل بين بملامحي
مشعل _ عشتاري ليش ما تباعين بعيني ؟
رفعت عيني وباوعت بعيونه اللي هي أجمل شي بوجهه حافظت على هدوئي وابتسامتي وهو ابتسم يباوع لعيوني وعينه تنكط حب وخرت ابتسامتي بطئ اباوعله برود وهو من كان صغير يضوج إذا أتجاهله وخرت ايده عن ايدي بهدوء ودرت نفسي ومشيت الناحية الباب دا افتح المفتاح ما احس غير ايده أخذت المفتاح مني وشمره بقوة ماعرف وين طار بقيت ثابته بمكاني ما اباوعله
وكف مقابيلي ساكت بس أشوف ايده شلون قابض عليها بجنون رحت وكفت بالنص اباوع على الأرض والتخم أدور على المفتاح راح هو مد ايده وره الكوشة وطلع المفتاح باوعتله وحجيت برود
عشتار _ أريد اروح
مشعل _ ما ترحين
عشتار _ المفتاح
مديت إيدي بمعنى جيبه تقرب واني ايدي مفتوحة لزمها وباس باطن ايدي وسمعته يهمس بهيام
مشعل _ افيييييش يا ريحة هلي
سكتت اباوعله وهو رفع عينه باوعلي وتنهد رفع رأسه يستغفر هز راسه وكف كبالي ولف أيديه على أكتافي وكال
مشعل _ عشتارتي روح روحي وحيل حيلي يا بعد حيل أمي افهميني اغديلج فدوة أنا ما اكدر اكلج لان هذا شغل مو بس وحدي وياي هواي ناس ومتعاهدين السر ما يطلع لو بس أنا جان كتلج وأنا الممنون بس غير وأدم وياي
عشتار _ شغل سري يعني ؟
مشعل _ أي وغلاتج بروحي
عشتار بشك _ مشعل شغل سري يخليك تنطي مهر مليار ونص ؟
مشعل _ وداعت عافية أمي كلهن حلال ما تعرفيني انتِ ؟ مستحيل اشتغل شي حرام لو على كص ركبتي
عشتار _ مشعل سواء انتَ حجيت هالشغل أو لا أني راح اعرفه يعني راح اعرفه
مشعل بتنهيدة _ عشتاري لا تعاندين لان هالشغلة محد يعرفها غيري أنا وناس مستحيل يخطرون على با
عشتار _ مشعل حط هالجملة براسك زين واحفظها عشتار من تريد شي يصير حتى لو اهد جبال في سبيل أوصل للي أريده صدكني هالجبال راح تنهد وعلى ايدي
أخذت المفتاح منه تقربت متقصدة وحضنته برسمية كلش مثل ما احضن امي ابتعدت عنه بعد ثواني ملامحه ما تتفسر من الضيق حسيت كلبي انفطر عليه حطيت ايدي على خده وحجيت بابتسامة
عشتار _ لا تخاف عليه مثل ما أني ما اخاف عليك لان ادري بيك محد يكدر عليك اشعلي
ابتسم مال رأسه وباس ايدي رد عليه
مشعل _ عشتاري لا تعبين نفسج وعوفي هالموضوع واوعدج بس تخلص الشغلة اكلج كل شي بالتفصيل
عشتار _ no no no لا حبيبي هذا تحدي بالنسبة الي واني امووت على التحديات وهسه تعبت راح اروح مو كيفت انتَ
مشعل _ عشتاري ما اخليج
عشتار بابتسامة _ نشوف بيبي
مشعل _ شني بيبي ؟
عشتار _ أحمم ماكو شي
مشعل بضحك_ يلا أودعناكم
عشتار _ وين بعد وكت ؟
مشعل _ شوفي الساعة كبد
باوعت راح تصير بالثنتين بالليل حجيت بإحراج
عشتار _ أحمم أي باي
تقرب حضني بقوة راسي على صدره بادلته مستحيه وهو بس اسوي هيج يتخبل حضني أقوى يبوس بشعري ابتعدت بخجل وجهي راح يطك ضحك وباسني بخدي كرص انفي وكال
مشعل _ مع السلامة وطن روحي
عشتار _ الله وياك
ردت اوصله ما قبل علمود الحراس والفستان وماعرف شنو
شنو راح هو واني فتحت الباب وطلعت امشي صعدت فوك دخلت للغرفة البنات كاعدات عالسرير هن والعنود يردون يباوعون فلم عطت بيهم متخصرة
عشتار _ خير داده خير ؟ هم بغرفتي وبالـ TV مالتي وما تعزموني مو عيب ؟
العنود _ إذا حضرة جنابج ملتهيه ويا الحب وصارلكم ساعة امواح وأمواح عبالج ما ندري
عشتار _ انجبي أصلا تعاركنه وراح
العنود _ أكص ايدي إذا مو منج السبب
ضحكت ضحكتي الرنانه وجاوبتها واني اخذ المنشفة
عشتار _ أي مني السبب بس هو صالحني وراح
رميم _ عشتاره خلي الرجال يصمد وياج لا ينجلط أسم الله
ضحكت وحجيت
عشتار _ احاول احاول عموماً خلي اسبح واطلع لا تباوعون الفلم وخلي ميرنا أو نينا تسوي إندومي
العنود _ انجبي لجج موهبتي الاندومي أني اسوي وبايدي هااااييي
رفعت أيدها تشوفنياها ضحكت من كل كلبي على حركاتها والبنات يضحكون بقوة وحده نامت فوك الثانية وهي دردم معاجبها اخذت ملابس ودخلت للحمام فليت شعري ونزعت الفستان سبحت خوش سبحه قشرت جسمي بالمقشرات والأثار خافه وبعضها مختفيه مهرين طلعت المراهم وسويت ركبتي راسي الأثر مالته باقي قلييييل كلش نشفت نفسي
لبست ملابسي وطلعت شفت بس البنات حجيت واني أوخر المنشفة من شعري
عشتار _ لعد وين العنود ؟
آسيا _ راحت تسوي الاندومي
هزيت راسي اسولف إني وياهن وامشط شعري بعد نص ساعة والعنود مو موجودة ضفرت شعري وحطيت مرطب الأيدي والشفايفي حطيت مرطب الاقدامي ولفيتها بكيس لبست جواريب فوكاها باوعت على البنات وحجيت باستغراب
عشتار _ مو العنود طولت ؟
شمس _ أي وهي بعد ما دخلتي تسبحين بربع ساعة تقريباً راحت تسوي الاندومي
فتحت عيوني على وسعها مصدومة إني تأخرت هواي يعني كل هذا الوقت وهي مجايه هزيت راسي ما أريد اخوفهم باوعت تليفونها وأغراضها موجودة يعني مستحيل رجعت وحتى لو ترجع تجي تكولي أو تكول للبنات
طلعت من الغرفة وسديت الباب نزلت بطئ واسمع صوت شويه مرتفع من المطبخ نزلت باقصى سرعة فتحت المطبخ وانصدمت ....
أنت تقرأ
طـغيان إِحمِرار السآعد
מתח / מותחןاكشن ، غموض ، إثارة ، سحر تحكي روايتي عن أربعة بنات يقعون تحت عذاب الثراء المبهر وكان القدر ضدهم دائما ولكن كان رأيهنَ مخالف ومتمرد على قوانين الاضطهاد الاربعة واحدة تـُكمل الأخرى فكانت الاخت الأكبر منبع القوة والكبرياء والصبرِ على البلاء وكانت الا...
