طـغيان إِحمِرار السآعد

بارت 27

                             طِـــغيان إِحمـــرار ألســـآعد
                                  الما يتعدل ... يتبدل
~ عشتار ~
عشتار _ " اهلا بأستاذ هِشـام "
استاذ هشام _ "هلا ومرحبا يابه شعجب شعَتب "
عشتار _ " اهلا بيك استاذ الله يسلمك "
احجي بهدوء صافنة على الشوارع والحدايق والبيوت والليل والنجوم جاوبني بصوت خشن ثكيل
هشام _ " شخبارج آنسة اشو ما تسألين "
عشتار بتلاعب _ " الدنيا تلاهي استاذ انتَ شخبارك شلون مكتبك "
ضحك ضحكة متلاعبة تشبه ضحكة ابوية وعمامي مال ناس تمطر وترعد وتبرق فلوس
هشام _ " هاهاهاهاها مكتبي عال العال واني عال العال انتِ شلونج ؟ "
عشتار _ " اني تمام بس استاذ اني أريدك تنفذ شغلة ممكن من خلالها تفيدك وتفيدني "
هشام _ " طيب ، بس شنو هاي الشغلة ؟ وشلون تفيدج وتفيدني ؟ "
عشتار _ " باجر انتَ موجود بالمكتب ؟ "
هشام _ " اي نعم "
عشتار _ " ممتاز باجر اجي وافهمك الموضوع "
هشام _ " تمام آنسة عشتار تنورين "
عشتار _ " Thanks استاذ هشام "
سديت الخط وشمرت التليفون كدامي عالميز وكمت وكفت سانده ايدي على البلكونة اباوع بعشوائية واحس الشرار والحقد ينكط من عيني ابتسمت بخبث إذا ما اخليكم عبرة للأجيال اني مو عشتار هشام صديق بابا ودائماً يوكفله بأي شي شغله غامض محد ما يعرفه بس بابا محد يعرف هل هو سياسي ؟ او هو ضابط استخبارات ؟ او هو نائب شغله مو مفهوم بس الاعرفه ومتأكدة منه انو هو واصل وكلش هم مخلص البابا كلش لان حسب كلامه بابا هو اللي وصله للي هو بي قبل التقيت بي وجان رجل عمره بالثلاثين شكله خبيث وهو بي هيبة والقاط والرباط والمحابس والساعة والمكتب ذكي ذكاء ما يخطر على بال بشر شكد حاولوا يوكعوا وما كدروا بالاخير هو وكعهم مخلص الي والبابا لان اني اكثر شخص ساعده من بعد ابوية
صفنت اباوع على النجوم تنهدت بضيق انتوا اللي جبرتوني اسوي اللي راح اسوي والله الا اطمكم طم واحرك تاريخكم وخلي اشوف شخص يوكف بوجهي فزيت على ايد تضرب كتفي بخفه التفتت وشفتها آسيا تنهدت ساكته وهي تباوعلي بحزن ما تحملت أشوف نظراتها رجعت نظري اباوع بعشوائية واحس نفسي بأي لحظة أضعف واضمها بحضني وكفت بصفي وحطت ايدها فوك ايدي باوعت على ايدها اللي تمسح على ايدي بنعومة سكتت ما أنطيت ردة فعل وهي تنهدت وكالت بهدوء
آسيا _ زعلانة ؟
عشتار _ no
آسيا _ لعد شبيج ؟
عشتار _ مابيه شي
آسيا _ عشتانه
باوعتلها وابتسمت بهدوء ما احس غير قربت مني وحضنتني بهدوء تمسح على ضهري حاطة راسها على كتفي تنهدت ما اكدر أقاومها اكثر حضنتها امسح على شعرها بداخلي قهر بس أتجاهله وكعت دموع على كتفي غمضت عيوني مقهورة خليتها تطلع اللي بداخلها صارت تبجي بس بدون صوت قوة حضنتها عليه حطت ايدها على راسي تمسح على شعري تبجي ابتسمت عشتار هذا آخر يوم وكعت دموعي بدون صوت وشعور شهكت وشهكتها شكت كلبي حضنتها بكل قوتي اريد ادخلها بين ضلوعي يا ناس هاي بنيتي ربيتهم بتعب عمري فنيت عمري وطفولتي ومراهقتي علمودهم مو بس بناتي هذني روحي شلون اشوف دموعهم واسكت شلون
احس بس الدموع تنزل على كتفي وركبتي بس صوتها ماكو وخرتها من حضني وهي منزلة راسها ما تريدني اشوف دموعها رفعت راسها دموعي توكع بدون صوت مني بدون ردة فعل بدون شعور بدون ادراك بس دموع تنزل باوعتلي وجها احمر دموعها تنزل رفعت ايدي ومسحت دموعها بخفه وكلت
عشتار _ دموعج غالية يا بعد عيون اختج يا حيلي وتعب عمري يا بنيتي يا عوض سنيني دموعج غالية عليه يا بعد البدونج ينعمن تتوقعين ازعل منج بيوم ؟ انتِ روحي اني عشت علمودكم وحاربت علمودكم ومستعدة افني عمر عمري علمودكم تتوقعين تعبت منكم ؟ شلون اتعب من بنيات كلبي ؟ ربيتكم من واني طفلة ومن كبرت تتوقعيني اتعب ؟ تتوقعين احب احد اكثر منكم ؟ شلون احب احد اكثر منكم أصلا شي مو معقول بالنسبة الي انتوا الأعز من روحي مستحيل احد ينافسكم بكلبي مستحيل اطمني
ابتسمت بس ابتسامتها بيها خيبة احس شي بداخلها مكسور حضنتها الصدري وحجيت بقهر
عشتار _ لا تسوين بيه هيج يا روح اختج ما يهون عليه عيونج الحلوة تبجي بسببي
حطت ايدها على شفايفي وبعدت عني كالت وهي تهز براسها نافية
آسيا بهمس _ لا لا مو بسببج ابد ابد لا تفكرين بيوم انتِ قصرتي لا تفكرين انتِ سببتي النه اذية لا والله والله يشهد انتِ ماكو منج اثنين منو يسوي اللي انتِ سويتي ؟
مبتسمة بكلامها واحس نفسي مسوية شي كبير بحياتي التفتت على صوت شمس تكول وهي تمشي بأتجاهنا بهدوء
شمس _ منو يربي اخوانه وهو طفل ؟ منو يتحمل الضرب والتعنيف علمود اخوانه ؟ منو يصبر على الاذية والضرب والظلم والاتهامات والشتم والطغيان والنفاق والكذب والغش والكفران والماسونية والشرك والسحر والمسؤولية والعذاب النفسي والضغط والإجهاد والقهر والأمراض وأنانية الأهل وظلم الاخوان والاعتداء والجبروت والخيانة وغيرها وغيرها هواي من الأمور منو يتحمل ويصبر على كل هذا ؟ انتِ سويتي اللي محد يسوي الانسان انتِ حاربتي عشيرة بيها شياطين وماسونية وكفر انتِ جنتي وما زلتي تحاربين شياطين بشرية وحقيقية
رميم وهي تمشي _ انتِ اللي تعبتي وصبرتي انتِ القوية اختنا انتِ اللي صرتي الام والأب والأخت والأخ والصديقة والسند والعشيرة والعمة والخالة مارستي كل الأدوار بدون ما تشتكين او تتذمرين او تعايرينه انتِ صرتي ام وانتِ تربيتي بدون ام انتِ اللي حنيتج غركتنه وانتِ مشايفه حنان امج انتِ صرتي أب سندنه وانتِ ما جان عندج سند انتِ الأم اللي تربي وتحمي وتوكل وتتحمل المسؤولية انتِ الأب اللي يسند ويحمي وضهر قوي الأولاده اللي يوديهم للمدارس ويجيبهم من المدارس اللي يطلعهم ويونسهم ويسفرهم ويركض بيهم للأطباء انتِ الإخت اللي تلعب وتونس اللي تضحك الزعلان وتواسي الضايج انتِ الأخ السند الضهر العزوة انتِ كل هذوله وهم عايشين انتِ اللي توكعين وتكومين بنفسج انتِ اللي افتخر بيها انتِ اللي امشي وياها رافعة راسي بمواقفها اني مو اكلج هالحجي مجاملة انتِ تعرفيني ما اعرف أجامل احد بس ردت افهمج انو احنه بعدنه نتذكر عشتار الطفلة اللي ربتنه واختارت اسم أختنا الصغيرة بعدنه نذكر عشتار اللي جانت تتحمل الحر بالشموس علمودنه وتتحمل البرد علمود تدفينه ردت اذكرج انو ولا وحدة نست فضلج
هم يحجون واني مصدومة من كلامهم حسيت نفسي صدك سويت شي بحياتي حسيت اني كل شي سويته يستاهلونه واكثر ابتسمت وفتحت ايدي ركضوا عليه حضنوني بقوتهم حضنتهم بقوة مغمضة عيوني كلبي يرفرف بكلامهم بوستهم ما اريد ابتعد عنهم ابد حجيت بهدوء
عشتار _ عمري كله ما فكرت سويتلكم شي يسوه بمعزتكم بكلبي اني اسفه بنيات كلبي اسفه رميمه شمستي آسياوتي بس والله ما كان بيد...
قاطعوني كلهم وهم يحضنوني اقوى يسكتوني شويه وكلت بضحك
عشتار _ يلا ابتعدوا انمردت مرد
ضحكن وخروا كعدت على الكرسي وهم اجوي وكعدوا على الكراسي باوعتلي آسيا وكالت
آسيا _ عشتار ضوجه والله
البنات _ اي والله
عشتار _ ادك على العنود ومصطفى ونطلع ؟
آسيا _ وهند ورهف خليهم يجون
عشتار _ اخوانهم ما يقبلون
آسيا _ كولي المشعل حبابه
عشتار _ يا قابل يعوفون خواتهم وحدهن ؟ ما يقبلون
شمس _ هم يجون ويا خواتهم
صفنت أباوعلهم احس شعور غريب بداخلي هزيت راسي وطلعت بره الغرفة دكيت على العنود واني انزل الدرج انفتح الخط واجاني صوت مصطفى يحجي بصوت خشن
مصطفى _ اهلا، اهلا وسهلا بعشتار صديقة اختي ام البيض
ضحكت بقوة وحجيت انزل الدرج بهدوء
عشتار _ مصطفى انطيني العنود
ما احس غير صوت طبه وراي باوعت على المطبخ شفت ضهر عريض ركض وره الباب سديت الخط منها كبل ورحت امشي واغني
عشتار _ يا شهاب يا كذاب تستاهل اكل الذئاب يا شهاب يا كذاب تستاهل اكل الذئاب
مشيت وصلت للمطبخ وسويت نفسي ما ادري بيهم دكيت على العنود مرة ثانية ودخلت للمطبخ ومحمد وجواد وره الباب فتحت الضوء انفتح الخط وجاوبتني العنود
العنود _ ولج ها شبيج سديتي
عشتار _ اووي هو انسد وحدة وين مصطفى ؟
ابتسمت ورحت سويت نفسي ادور بالثلاجة أنطته التليفون وجاوبني
مصطفى _ ها محد يكدر يعيش بدون مصطفى محد يتنفس بدون مصطفى
عشتار _ استقر مراد علمدار
مصطفى _ يروحلي فدوة هذا الارعن
عشتار _ دسمعععع
مصطفى _ خايبه متحجين طرشتي أذني
عشتار _ جيب العنود وتعالوا نطلع ومشعععللل واخوانه راح يجون
مصطفى _ مشعل ؟ واخوانه ؟ وراح يجون ؟ ولج أنا اخوج مو اخوانههه
عشتار _ اكيد انتَ اعز من اخواني حتى بس شويه ضايجين
مصطفى _ خلاص يابه نص ساعة ويمج احنه
عشتار _ تمام يلا كود باي
مصطفى والعنود بصياح _ ثقااااااافة تااااايييم
ضحكت وسديت الخط سويت نفسي ادور واني اسمع صوت انفاس مثل المحرك درت وجهي على الجهه الثانية وكلت
عشتار _ اسم الله الرحمن
باوعت شويه بداخلي ميته ضحك اخذت عصير ودرت وجهي باوعت عالباب وسويت روحي استغربت اباوعلهم جواد لازك بالحايط وجهه احمر من العصبية ومحمد واكف كدامه باوعتلهم بأستغراب وهم طلعوا باوعلي محمد وكال كاتم عصبيته
محمد _ ماكو طلعة
عشتار _ نعم ؟
محمد _ ماكو طلعة شنو ما سمعتي ؟
عشتار _ ما اسمع عندك سماعة ؟
عفتهم وطلعت امشي ثواني وانجريت من ايدي باوعتله وحجيت بحدة
عشتار _ محممممد وخر ايدك عني احسلك
محمد _ عشتااااار تره اني مو مكررررن
عشتار باستهزاء وضحك _ صدُك ؟ مو مكرن ؟ لعد من جنت تخلي امجد يدخل عليه بالغرفة شنو جنت ؟ شيخ ؟ رجل دين ؟ مؤذن ؟ من جبت بنات ملاهي للبيت وجنت تشوفه يحاول يعتدي عليه وانتَ تباوع وتغلس ؟ لو من تشوفهم يضربون بيه سواء جنت طفلة او مراهقة ليش تباوعلي وتسكت ؟ من جان امجد يحاول يبيع غراميات براسي وانتَ تدري ليش ما وكفته إذا انت َ مو مكرن ؟ وليش من اجه شخص يحبني ومستحيل يأذيني رفضته ؟ تدري ليش انتَ سويت كل هذا ؟ لانك مكرن بس مو اني السبب السبب بيك لان اني عمري كله ما قصرت مع اي واحد بهالبيت السبب بيك انتَ مو بيه على العموم الله على الدنيا كبير وصدكني ما يهمني بعد اي شي
وخرت ايده ومشيت طلعت للحديقة زفرت نفس وكعدت على الكرسي طلعت رقمه وكلبي يدك بقوة احس عطره بعده بأنفي اتصلت عليه اول ما رن جاوبني كأنه منتظرني وجانت اول كلمة
مشعل _ " عشتاري "
عشتار _ " الاشعل "
مشعل _ " عشتاري وطن روحه المشعل "
عشتار _ " الأشعل شاعل روحي "
مشعل _ " عيون الأشعل "
عشتار _ " شلونك ؟ "
مشعل _ " سمعت صوتج شني تتوقعين ؟ "
عشتار _ " اممم شمدريني انتَ كولي ؟ "
مشعل _ " احساس ماله وصف او مثيل أجمل احساس حسيته بعد احساسي بحبج "
ارتبكت ماعرف شنو احجي ابتسمت وحجيت بهدوء
عشتار _ " احممم الاشعل ؟ "
مشعل _ " يثالث عيونه "
ضحكت بهدوء واحس فرحة بداخلي واني احجي وياه خجلانة على فرحانة على حب على اشتياق على ارتباك مادري شنو مشاعري
عشتار _ " ءءء اريد اطلب طلب ممكن ؟ "
مشعل بتنهيدة _ " لا تكولين ممكن انتِ تأمرين اي شي تردي بطن عيوني بس اعوفج لا ومليون لا "
عشتار بخجل _ " يعني اطلب ؟ "
مشعل بصوت ناصي _ " لا انتِ ما تطلبين انتِ تأمرين امر "
عشتار _ " امممم اني راح اطلع اني وخواتي والعنود ومصطف... "
مشعل بحدة _ " لا تنطقين اسمه "
عشتار باستغراب _ " وات ؟ "
سكت ما رد عليه اسمه يتنهد ويستغفر واني مستغربة ما فاهمة صدك جاوبني بصوت متعوب
مشعل _ " لا تنطقين اسم غيري عشتارة روحي يا عوض اللهي "
عشتار _ " ليش الاشعل ؟ "
مشعل بتنهيدة _ " تعصرين كلبي ، تبهذلين حالي وأحوالي ، تشعلين روحي لا تأذيني عشتارتي أنا تعبان لا تزيديها علي "
عشتار _ " تمام بعد ما اكول مصطفى "
استغفر وسمعت ضربة قوية شويه اختفى الصوت بقيت ساكته مستغربة وأسمعه يتنهد يقهر شويه واستوعبت شنو كلت صحت
عشتار _ " ياااا الأشعل ؟ "
مشعل _ " ها عشتار "
جاوبني وصوته مخنوووك ضجت من نفسي كلش حجيت بهمس
عشتار _ " مشعل مادري "
مشعل _ " مو مشكلة "
عشتار _ " اي كتلك راح نطلع جيب هند ورهف حباب "
مشعل _ " ما يقبلن "
صاحن هند ورهف بصوت واحد
_ " لا نقبللللللللل "
ضحكت وهو ساكت مبين ضايج اجتني خطة ابتسمت بشر وكلت
عشتار _ " مشعل جيبهم وانتَ تعال وخلي ايمن يجي حباب ضايجه "
مشعل برود _ " الوقت متأخر عشتار "
ضجت كلش من بروده حجيت بهدوء
عشتار _ " يعني ما تكدر تجي ؟ "
مشعل _ " لا خليها غير مرة بالنهار وانتِ هم شعندج طالعة هيج وكت "
عشتار _ " تمام مشعل "
مشعل _ " يعني ما راح تطلعين وياهم ؟ "
عشتار _ " لا راح اطلع خواتي ضايجات شويه يلا Good night باي "
مشعل _ " عشتار اوكفي "
عشتار _ " نعم ؟ "
مشعل _ " زعلتي ؟ "
عشتار برود _ " لا "
اجه وكت تنفيذ الخطة بعدت التليفون شويه وشهكت شهكة كذبية رجعت التليفون وسمعت صوته يحجي بصوت مرتفع
مشعل _ " عشتاره شبيج عشتاريييي بويه شبيج ؟ "
عشتار بصوت ناصي _ " مابيه شي مشعل يلا من ارجع اخابرك "
مشعل _ " صدكتي ارفضلج طلب ؟ "
عشتار _ " شنو ؟ "
مشعل _ " حاظر ربع ساعة ويمكم أنا "
ابتسمت بأنتصار ورخيت ضهري على الكرسي حجيت بهدوء
عشتار _ " أحمم مشعل اخواني اخاف يصي... "
مشعل _ " ماكو خوف وانا وياج "
عشتار _ " تمام مشعل "
مشعل بضوجة _ " الاشعل ! "
عشتار بضحك _ " صح صح "
مشعل _ " يلا عشتاري دير بالج على نفسج ابوية "
عشتار بخجل _ " انتَ هم الاشعلي "
تنهد تنهيدة طووييييلة وجاوبني
مشعل _ " حاظر يا عمره الأشعلج"
ابتسمت وسديت الخط كمت اركض صعدت فوك شفت البنات مبدلات حجيت واني متكتفه
عشتار _ شنو هاي عيني متأكدات يعني ؟
شمس بثقة _ طبعاً نعرفج ما ترديلنه طلب
ابتسمت ورحت الغرفة الملابس طلعت فستان رمادي وكعب اسود والكعب مالته بي علامة فلوس لبست ساعة واسوار سويت شعري ويڤي صبغت اظافري ابيض وحطيت شويه تنت غامق على شفايفي رشيت عطر واخذت جنطة وطلعت باوعوا عليه البنات بأعجاب ابتسمت واخذت تليفوني اللي دك فتحت المكالمة واجاني صوت مشعل يكول
مشعل _ " احممممم عشتار أنا جوه بيتكم "
عشتار بغيض _ " تمام مشعععل "
سديت الخط اخذت السويج وطلعت من الغرفة دا اقفلها والبنات نزلوا طلع جواد من غرفته باوعلي وتقرب يمي باوعلي بحدة دنك وهمس بأذني
جواد _ تعتقدين اني راح اسكت على هذا مشعل ههههه تكونين غلطاااانة وكلش هم سمعيني يا اختي الحلوة اني هسه راح اعوفج تعيشين هاي الايام ودعي خطيه ممكن بأي لحظة بعد ما تشوفي زواج ما راح تزوجين طول ما اني عايش مشعل ما راح تكونين اله
ابتسمت بغرور ضهري مستقيم باوعتله بحدة مبتسمة حجيت بنفس نبرته
عشتار _ وما اعتقد تتوقع اني أسمحلك تأذي الانسان اللي احبه اسمعني هذا مشعل عزيز روحي اللي يمسه بماي امسه بنار وتره لا تستعجل العب هسه يلا بدأ
جواد بتلاعب _ تندمين حبي
عشتار _ امووووت عالندم اني
قفلت الغرفة اباوعله مبتسمة بأستفزاز عفته ومشيت بثقة صوت الكعب يرن بالمكان رن لمحت محمد واكف وساند ايده على الباب يباوع بغموض احجي بثقة بس اعرفهم مستحيل يسكتون اخواني لا يستهان بيهم خاصة إذا ساندوهم عمامي اوووف بالأكبر يا روح اختك صارلي شهر مشايفتك والله كلبي فرفح على شوفتك مش مشكلة تهون طلعت بره وتليفوني دك فتحت الخط واجاني صوتها ساطرني
العنود _ " ولج يلاااا بسرررعة هذا راح يموتني ابو ش.خه ولا يستقر صارله ساعة يمدح بكشخته عبالك روميو "
مصطفى _ " على اساس انتِ شلونج صارلج نص ساعة تمدحين بروحج عبالك اليسا وانتِ بعدج الألف مصايره "
قفلت الخط يبوو عركاتهم ولا تخلص شفت البنات وأكفات يم السيارة فتحتها وكعدنه بنفس اللحظة دك تليفوني جاوبت واجاني صوت مشعل يهمس بصوت ناصي كلش بالكوة اسمع
مشعل _ " لا تسوقين "
عشتار _ " شنو ما اسمع "
مشعل _ " لا تسوقين لا تسوقين "
عشتار _ " لا خلي اسوق على كيف "
مشعل _ " عشتاري بويه لا تعذبيني كتلج لا تسوقين بطلي عناد "
عشتار _ " ما اسمع والله بس شوف اني راح امشي انتَ امشي ورايه تمام ؟ "
صرت اسمع أصوات كل شي ما فهمت سديت الخط والحارس فتح الباب شغلت السيارة ورجعتها طلعنه عالشارع شفت سيارة مشعل وسيارة مصطفى طلع ايمن من الجامة مطلع نص جسمه يعيط
ايمن _ ولجججج خووويه عفيه عليييج صاكرته صكر عمي لو هيج النسوان لو بلاهاااا والزهرة خليتي يطلعنا غصبااااا على راسه
فز لازم ضهره وصاح بوجع
ايمن _ اخخخخخخ يا بوييه عادي خويه مشاكل اخَويه بيناتنه على راسييييي
مصطفى _ ولكككك النسووووان صكااااارااات اطلعع
ضحكت بكل قوتي عليهم والبنات وياي صارت سيارة مشعل تتحرك وهي واكفه مثل اللي ديتعاركون مشيت بالسيارة وصرت بصفهم باوعت لكيت مشعل ذاب روحه على ايمن يضربه دكيت هورن سيارة بس شافني وخر عنه ودار وجهه متفشل وخواته فاطسات ضحك ضحكت وطلعت اغنية نحن لا نهزم شخطت السيارة امشي والبنات يضحكون ونغني
_ نحن لا نهزم ومنا عطاء الدم سقا نخلة الصبر رغم ريح الهم شراع الآباء يمم إلى ضفة النصر
نغني وكل ما يحاولون يسبقونه اسبقهم وتليفوني كل شويه يدك من مشعل اجاوبه يكولي لا تسرعين اكوله اوكي واسرع وصلنه للحدايق وكفت السيارة وهم وكفوا نزلوا كلهم إلا أني جنت اخذ شغلاتي واخذت علكة اكلتها شويه وفتحت الباب ونزلت بغرور باوعلي مشعل وصفن سديت السيارة ومشيت بطيء وكفت مقابيلهم وحجيت بهدوء اباوع على المكان
عشتار _ ها حلو المكان ؟
هند _ كلش حلو والله اول مرة اجي هنا
رهف _ مادري بالحياة اكو هيج حدايق لو تشوفين الحدايق اللي يمنه عبارة عن ماي وطين
ضحكت بهدوء ومشينه اني بوسط البنات والشباب ورانه كعدت على المسطبة اني وخواتي بس العنود وهند ورهف والشباب بس مشعل واكف مرتخي على شجره يباوع عليه كعدوا بالارض باوعت العنود على شمس ورميم وكالت
العنود _ تعالوا اكعدوا هنا شعليكم باختكم
رميم _ اريد اجرب بس ممتعودة
ايمن _ خايبه كعدي ممتعودة عود ها كعدي
ضحكت رميم وراحت كعدت يمهم هي وشمس باوعلي ايمن وكال
ايمن _ ولج خويه انتِ مصنوعة من شني ؟
عشتار _ من تُراب
مصطفى _ توراب ؟
ايمن _ توراب ؟
عشتار بضحكة _ اي اعزائي
ايمن _ خايبه شو بلا احجي مثل المثغفين
عشتار _ مثغفين شنو ؟
رهف _ مثقفين يالاثول
عشتار _ احجي مثل المثقفين ؟ ها قصدك انكلش ؟
باوعلي وكع بالكاع نايم بالكاع بس رجله متربعة ضحكت بقوة على منظره كال وهو يتنهد
ايمن _ ايييي ايييي الناس اخذت المثقفات والدكتورات والممرضات والانكلشات اوووف وما بقه على حالي بس ام السموووممم اوووف يا يابه
ضحكت وكمت الحدايق جان مقابيلها المطعم المفضل الي واصلا جبتهم علمود المطعم جوعانة اكثر مطعم نظيف وأكدر اكل منه بدون حروب داخلية
عشتار _ راح اروح اطلب اكل تردون شي ؟
شمس _ اريد فوتشيني بالدجاج
رميم _ واني اريد سوشي
آسيا _ واني اريد هوت دوغ
ايمن _ عجيب حتى اكل مال ناس طكطكطوكين خايبه أنا اريد ثريد
عشتار باستغراب _ شنو ثريد
هو ومصطفى بنفس الوكت ضربوا كصتهم حجيت بتذمر
عشتار _ أووه اني راح اجيبلك بيتزا والعنود همبرغر لحم بالـ cheese وم...
ما كملت كلامي وباوعت على مشعل اللي يباوعلي بضوجة بلعت ريكي والتفتت على مصطفى وكلت
عشتار _ وانتَ راح اجيبلك كنتاكي تمام
كلهم هزوا راسهم موافقين بس ايمن يدردم ويضحك ويا مصطفى التفتت على مشعل اللي كال بهدوء
مشعل _ ما تروحين وحدج
عشتار _ لعد ؟
مشعل _ امشي يلا
مشيت وياه ساكتين المطعم شويه بعيد دقايق وكال وهو مبعد نظره عني
مشعل _ يعني عاندتي وسقتي السيارة
عشتار _ لعد شلون اجي مشي ؟
مشعل _ أنا اخذج كوليلي شوكت ما تردين وين ما تردين أنا اوديج
عشتار _ ما اقبل عليك انتَ مو سايق انتَ مشعل
مشعل _ أنا قابل على نفسي انتِ مو اي احد انتِ عشتار
ضحكت وكلت
عشتار _ كولي شنو اللي مزعلك مو وعدتني تكولي كل شي ؟
مشعل _ لا تصيحين الأي رجال بأسمه ، لا تسوقين ، لا تطلعين فلوسج تدفعين وانا موجود ، لا تصيحيلي مشعل ، لا تكولين ممكن واطلب وحباب ومدري شني انتَ تأمرين وانا اللي عليه انفذ ، سولفي وياي كليلي شيصير بيومج وين تروحين وشتسوين شاركيني ليش تحسسيني أنا غريب ؟
عشتار _ انتَ مو غريب
مشعل _ ادري أنا رجلج
عشتار _ نعم يا خويه ؟
حجيتها بلهجة مصرية بشقة دار وجهه حتى ما أشوف ابتسامته ضحكت وحجيت بهدوء
عشتار _ تدلل عيني بس اني هم عندي شروط
مشعل _ كولي عيني
صفنت شنو الشروط ما يباوع على بنات حتى اكوله ما تباوع كل شي ماعنده ضحكت وحجيت
عشتار _ اوووف كل شي ماعندك حتى احجي
ضحك خجلان ومنصي وجهه باوعلي وكال بجدية
مشعل _ عشتاري باجر راح اجي أنا واهلي على حسب الأصول راح اجي هالمرة بأحترام وافق ابوج خيراً على خير ما وافق أشعلهم شعل واشويهم شوي
هزيت راسي مرتبكة حجه بخوف
مشعل _ خو ما انتِ مموافقة
باوعتله وهزيت براسي بمعنى موافقة ابتسم يباوعلي بتمعن يجبرني اخجل نزلت عيوني بالكاع امشي ما احس غير انجريت وانضربت بي وكفت اباوع بصدمة باوعت وراي شفت عامود هالثخنه بس انضرب بي اموت باوعتله من الفشلة حطيت وجهي بين ايديه فشلانة وهو كاتم ضحكته بالعافية وخرت ايدي ومشيت ما اباوعله ياربي شهالاحراج ومن التوتر صرت ما اعرف امشي وهو يمشي كدامي ضربت وجهي على كيف واني وحاطه ايدي على وجهي عثرت ردت اوكع لزمته من قميصه من وره وجريته التفت بسرعة لزمني قبل لا اوكع ثواني وسمعنه صوت القميص انشك رفعت راسي اباوعله بصدمة وهو متفشل اكثر مني صافن مايدري شيسوي من الصدمة صرت اضحك ضحك هستيري وهو صفن عليه عباله تخبلت واني من اضحك من كلب ضحكتي رنانة فتح عيونه مصدوم بردة فعل منه حط ايده على حلكي علمود ما يطلع صوت ضحكتي واني اضحك بكل قوتي ميته من الضحك والدموع تنزل على ايدي بقيت لحد ما بطني نملت سكتت اضحك بس بهدوء وخرت ايده اباوعله وجهي احمررر دم من الضحك طلعت كلنيكس من الجنطة مسحت عيوني اضحك واباوعله يباوعلي مبتسم حجيت واني اشر بيدي بمعنى اوكي
عشتار بضحك _ لا بأس ما صار شي اوكي اوكي
مشعل _ امشي بويه فضحتينه كبال الوادم
رجع همس بصوت ناصي كلش عباله ما اسمعه
مشعل _ ولو انتِ احلى فضيحة
تحمحم ومشه واني وياه امشي وراه وهو كدامي باوعت على قميصه مشكوك شويه باوعلي وكال
مشعل _ اروح اشتري قميص عيب
هزيت راسي متفشلة وهو ضحك وكال
مشعل _ عادي ما صار شي هالقميص ذكرة حلوة
ابتسمت ساكته رحنه محل ملابس رجالية وهو باوعلي وكال بضيق
مشعل _ وين اضمج من عيونهم
عشتار بضحك _ مو هالدرجة الأشعل
زفر بضيق ولزمني من ايدي حيل عبالك راح اطّير انصدمت من حركته بس سكتت كوة عليه دخل للمحل لازمني مرجعني وره ضهره اخذ اي تيشيرت كدامه ما طولنه دقيقة اخذه وطلعنه ضايج وخرت ايدي منه بهدوء وحجيت بأبتسامة
عشتار _ شبيك عيني ؟
ابتسم غصباً عليه وكال خجلان
مشعل _ أنا عينج ؟ هنيالي
ابتسمت بخجل ورديت عليه
عشتار _ لا صدك شبيك ليش زعلان مصار شي يعني واذا دخلت وياك
مشعل بحدة _ عشتار ما أريد اي بشر يشوفج افهمييي
سكتت ودرت نظري عنه اول مرة يحاجيني بهالطريقة طريقة تملك حسيته يريد يتملكني بس هو ابد ما علق على لبسي ولا حرمني من اي شي ليش هيج يسوي مادري ساكته امشي وهو انتبه على زعلي حاول يحجي وياي بس ارد بكلمتين او اهز براسي وصلنه للمطعم دخلنه واول ما دخلنه الكل انظاره توجهت عليه اني عادي متعودة على هذا الوضع بس مشعل مبين ماعجبه الوضع لزمني من ايدي يمشي واني وراه وكفت مقابيل البنية وحجيت بهدوء
عشتار _ هاي
البنت _ هاي اهلا وسهلا اهلاً آنسة عشتار شلونج
عشتار _ اني fine اريد اطلب بعض الوجبات من فضلج
البنت _ نعم انسة تفضلي
كتلها الطلباتي باوعتلي وكالت
البنت _ اي انسة تفضلي ساعة ويجهز طلبج
هزيت راسي ومشينه اني ومشعل كعدنه على الطاولة كعدت مبعدة نظري عنه وهو يتحسر كال بهدوء
مشعل _ عشتاري أنا آسف
باوعتله وما رديت تنهد ومسح وجهه نزل ايده وكمل كلامه يباوعلي بتمعن عيونه تلمع بحب
مشعل _ عشتاره افهمي انو انتِ احلى شي بالدنيا بالنسبة الي انا مستحيل اشك بيج او مثل ما تفكرين انتِ بس انا احبج كل اللي اكدر اكوله أنا احبج ومستحيل اتخيلج ويا شخص ثاني بس الفكرة تموتني تشلني شل وعلي الكرار انتِ بالنسبة الي اعز من الهوا اعز من إعزازي حبي الج ما اكدر أوصفه الج ولا اعرف لأنه ما ينوصف والله اغار عليج ما اشك بيج ما احب اي احد يشوفج لان انا رجال واعرف تفكيرهم انا اسف ممكن نبرة صوتي علت بوجهج او حديت بالكلام شوية اسف لا تزعلين مني بويه
ابتسمت وهزيت راسي وهو كل شوي يعتذر مني بقينه نسولف منتظرين الطلب يجهز .....

~ العنود ~
كاعدين نسولف اني والبنات ونضحك على سوالف ايمن ومصطفى اللي فعلا يشبهون بعض بشكل مو طبيعي نفس السوالف والتحشيشات حجيت بضحك
العنود _ والله ناقصنه عشتار تحلي الكعدة احس الكعدة فاهية
ايمن _ رجاءاً مرت اخوية ما تصير ملح لو على كل ركبتي مرت اخوية شكر وتبقى شكر
ضحكنه كلنه وايمن منسجم ويا رميم هم نفس الشخصيات دك تليفوني باوعت شفت رقمه الحيوان اتوترت كلش بس حاولت ما ابين باوعلي مصطفى وكال
مصطفى _ ها منو ؟
العنود _ عشتار هسه من رخصتكم شويه
كمت ورحت امشي بعيد عنهم جاوبته وحجيت بعصبية
العنود _ تره لحيت وكلش هم اني مو كتلك لا تدك على هالرقم مرة ثانية
جواد برود _ واني ما امشي بمزاج احد
العنود _ وعساك لا مشيت لا تدك عليه يا حيوان كاعد تحرجني شنو انتَ ما تفهم
جواد بحدة _ العنووود احترمي نفسج وهذبي كلماتج لا استخدم غير أسلوب
العنود _ يمه يمه يمه خوفتني اسمع لك تره اني ما اخاف من اكبر واحد واذا تعرف اختك راح تعرفني نسخة منها وداعت ابوية إسبيك سبايه لا صايره ولا دايره تهديد لا تهدد لا والقرآن وحروفه ابليك بلوة
جواد _ اوووف جنج اختي عموماً بلا هاللغوة اني ما داك على سواد عيونج اني داك اريد اعرف اختي وين وصدك هالكلب وياها
العنود _ احترم نفسك يا خايس مشعل هذا تاج راسك وراس اخوك الجلب الكبير على الاقل يحب اختك يمكن اكثر من امه وأبو هي تأذي وهو ما يأذيها مو مثلك انتَ اذيتها عندك لعبة
جواد _ اكلي تبن بعد كلبي وكولي اختي وين فوراً
العنود _ التبن خليته الك تاكله هواي من اهلك ومن اختك يا حيوان
جواد _ شنو رأيج اجي هسه
العنود _ انجب رجاءاً ولي من يمي
جواد _ العنود تكولين اختي وين لا أتصرف غير تصرف واعرف بنفسي وثقي إذا عرفته بنفسي ما يصير طيب
العنود _ دولي يابه ولي كبور لفتك
سديت الخط بوجهه والغريب بعد ما اتصل بس معقولة يسويها اعرفه هذا خبل بس لا مستحيل يعرف اووو هسه اني شكو دا افكر طبه مرض
رجعت يمهم وسويت الوضع طبيعي من سألوني كتلهم
العنود _ عشتار تكول الطلب بعده مجاهز
بقينه نضحك ونسولف
مرت ربع ساعة وسمعنه أصوات سيارات شخطت يمنه التفتت وشفت بالتمام 7 سيارات جيب سودة عالية وكفت ونزلوا من السيارات أشخاص لابسين اسود فتحوا باب ثاني سيارة والصدمة اللي نزل من السيارة .... ؟؟!

                                         يَتبـَــع
                             طَهـِر لِسـَـانك بِذِكـرِ اللـه
                                    سُبحَــان اللـه
                                      الحَمـدُللـه
                                 لَا إِلـٰــه إِلا اللـه
                                   اللــه أَكبَــــر
                    اللـهُــمَ صَلِ عَلى مُحَمَــد وَآلِ مُحَمَــد

على الموعد 12:16
توقعاتكم ؟؟ 🔥
يوم السبت بارت طويل يعبر الـ 6000 كلمة مليان احداث وتفاصيل
لعيونكم 🤎