طـغيان إِحمِرار السآعد

بارت 34

   طِـــغيان إِحمـــرار ألســـآعد
معلـم على الصدعـات كلبـي

~ شمس ~
كاعدات بالغرفة وكل وحدة حسرة باقية بكلبها العنود وجها احمر وأصابعها طابعات على خدودها بس ساكته تدعي القوة اني ورميم ساكتات دمعة ما تنزل آسيا صافنة ما تحجي شي ولا تاكل
كمت ودخلت الغرفتي ما اريد أضعف كبالهم طلعت قميصها حطيته على وجهي اشم بي بشوغة اتمنى اعرف اخبارها شبيها ؟ شصار بيها ؟ والله كلبي ملجوم عليها محد يحس بالآخرين إلا هي تحس بينه اتذكر سوالفها ولعبها ويانه واتحسر اجتي بالي هذيج الليلة الساعة 11:33 اللي كل شي ما ناسيه منها ولا حتى الوقت نسيته

عشتار _ ها شموستي ما تنامين اليوم ؟
شمس _ والله اريد انام بس ماكو ما تجي النومة
عشتار _ ليش حبيبتي ؟
دمعت عيوني برطمت ودفنت راسي بصدرها خايفة مجلبة بملابسها حجيت بخوف
شمس _ اني خايفة عشتاره
عشتار _ لا تخافين امي انتِ اني وياج
شمس بهمس _ هو بس انتِ وياي
عشتار _ لا يروحي اني وخواتج واخوانج كلنه وياج لا تخافين واني موجودة تمام امي
شمس _ اني خايفة تعوفيني
عشتار _ اني اعوفج ؟ أمداني إذا اعوفج
مسحت على شعري باستني براسي وكالت وهي تحضني بحنان
عشتار _ عمري ما راح اعوفج لا انتِ ولا رميم وآسيا انتوا بنيات كلبي تتوقعين اكو احد يعوف هيج مؤنسات حلوات ؟
هزيت راسي لا بطفولة وكلت
شمس _ يعني ما راح تعوفيني ؟
عشتار _ ابد
شمس _ وعد 
مديت اصبعي الصغير وهي ابتسمت بلطافة وانطتني إصبعها الصغير وكالت بحنان
عشتار _ وعد مستحيل أعوفكم
شمس بدموع _ اخاف
عشتار بهدوء وابتسامة _ تخافين اموت ؟
هزيت راسي ودموعي توكع فكرة مرعبة تجي بالي ابتسمت هي وكالت
عشتار _ منعسانة انتِ ؟
هزيت راسي بـ لا هزت راسها وشالتني بهدوء تخاف رميم وآسيا يكعدون وكفتني ولبستني قمصلة لان الجو شتوي بارد لبستني كلاو اباوعلها مستغربة فتحت الدرج وطلعت دفتر مبين عليه قديم ومترب اخذت مخدتي وبطانية صغيرة
ابمت ولزمتني من ايدي دخلنه البلكونة كفختني نسمة هواء باردة كعدت هي بالارض مادة رجلينها مبتسمة حطت على رجلها المخدة باوعتلي وفتحت ايدها

رحت يمها بهدوء كعدت بحضنها اباوعلها وجهي قريب من وجها حضنتها بوست خدودها الترفات خليت راسي بركبتها اشم بيها احس بأمان فضيع حسيت بابتسامتها تتوسع باستني بركبتي وبخدي نومتني على المخدة غطتني واني جلبت بأيدها ابتسمت تباوعلي وكالت
عشتار _ نور حياتي تخافين اموت ؟
هزيت راسي وبست ايدها اخذت ايدي بوستها ورجعتها كالت بتنهيدة
عشتار _ شموسة اسمعيني وافهمي تمام حبيبتي
هزيت راسي وهي كملت كلامها واحس بابتسامتها خيبة
عشتار _ رب السموات والأرض هو اللي يحدد عمر الانسان شوكت يولد وشوكت يموت مكتوب على الجبين بس محد يشوفه  الله العالم بكل شيء تشوفين الناس إذا ما يعرفون بشي معين يكولون الله اعلم لان هو يعلم كل شي بهالدنيا واكيد هو يعرف اني شوكت اموت محد يموت قبل اليوم المحدد اله تمام بنيتي