طـغيان إِحمِرار السآعد

بارت 19

‎ طِـــغيان إحمـــرار ألســـآعد
الناس تركض عالرزق واني اركض عليك

~ شمس ~
مسحت عيونها وجاوبتني جواب صدمني ما توقعت السبب قوي هالدرجة
العنود _ عشتار نقذتني من الاعتداء عشتار بفضلها من بعد فضل الله امي عايشه وهواي اشياء سوتها عشتار لذلك لو انطيها عيوني ما اوفيها
مسحت على وجهي مصدومة من كلامها يا اعتداء هذا عشتار مجايبتلنه طاري هذا الموضوع باوعتلها وحجيت بهدوء
شمس _ عشتار مجايبه طاري هذا الموضوع ولا ندري عنه شعجب عشتار ما تضم علينه شي ؟
ابتسمت بقهر خدودها راح تنفجر كد ما عاصره على نفسها علمود ماتنزل دموعها
العنود _ يا روحي حفظت السر حتى عنكم
شمس _ يا سر ؟
العنود _ اني حلفتها ماتكول الاحد بس كتلها عادي تكول الكم حبيبتي حتى الكم ماحجت
شمس _ اعتذر اني بس شنو سالفة الاعتداء ؟
تنهدت عيونها متغرغرة بالدموع باوعتلي وكالت
العنود _ جنت كاعدة احجي ويا عشتار واجاني اتصال ثاني استأذنت منها وقفلت الخط جاوبت على الرقم اجاني صوت رجال عرفته من صوته ابن عمتي الغثيث اللي أكرهه كره العمى اموت منه حجيت بنتر
العنود _ خير غسان مشغولة اني بيك شي ؟
غسان _ العنود اخخخ افتحي الباب
انصدمت شبي هيج يصيح بوجع سديت الخط ونزلت ركض صح أكرهه بس ماكدرت اكول لا فتحت الباب كبل طب دفعني وسد الباب يباوعلي بنظرات مقرفه اجه يمشي بطيء يحجي بصوت مقرف
غسان _ اه اليوم انا وياج وحدنه اهلج ويا اهلي لا تخافين راح نتونس هواااايي
عشتار جانت دائماً تنصحني اركز على نقاط ضعفه حتى لو العب عليه بعدين اكبسه عضيت شفتي بقهر وغصبت روحي ابتسم كمت ورحت بأتجاه امشي وكفت بوجه احجي بهدوء مبتسمة
العنود _ اممم تمام اكعد اطلب عشه جوعانة بين ما اجي اروح احظر نفسي الك
وغمزتله تمنيت اضرب نفسي بالقندرة بس لازم علمود ما يهجم وهو جنه ثور بكدي عشرين مرة ابتسم يعض بشفته رفع ايده يريد يلمس ايدي دفعتها بخفه احجي بتلاعب اغمز
العنود _ لا لا مو هسه خلي احظر نفسي هسه كلا لللمس
عفته ورحت امشي بهدوء وثقة وهو كعد عالقنفة مبتسم فتحت باب الغرفة وتقصدت اغني علمود ما يشك قفلتها وركضت للتليفون دزيت رسالة العشتار والاخوية كاتبه
He..L//pA _
شافتها عشتار بنفس اللحظة وكتبت
عشتار _Ok
رجعت دزت رسالة ثانية
عشتار _ أني أصلا جايه حسيت اكو شي راح أوصل لهي شويه بين ما اجي اربي ابن البومة
طلعت من المحادثة من سمعت صوته يصيح
غسان _ يلا تعاي اوووف اليوم الليلة صباحي
العنود _ ههههههااااييي ايي انتظر عينيييي
ضربت على وجهي بكل قوتي من القرف هذا كله لعبان نفس راسلت اخوية وكتبت
_ He..L//pM
شاف الرسالة بعد دقيقة وكتب
مصطفى ( اخو العنود ) _ تمام جاي
ابتسمت وكعدت رجل على رجل انتظر وهو كل ساع صايح بأسمي واني ساكته انتفضت من سمعت الباب يدك بقوة يصيح
غسان _ اطلعيييي شكاااعد تسوين اطلعيييي اليوووم خشمممج اكسررره بنتتت الكو..
ما انكر الخوف اللي بداخلي بس بقيت ثابته وعطت بعصبية
العنود _ تاج راسك ابوية وقندرة جوه رجله ما اخليه يا حيوان يا ميع يا عو تفو على شواربك المعفنه المكملة يا خايس
صار السب بفلس ويضرب بالباب بكل قوته حسيت كلبي وكف واني اشوف الباب انكسر ودخل يلهث باوعلي بعصبية الارض سد الباب واجه عليه يركض مثل الثور الهايج
ركضت صعدت عالسرير وكمزت اريد اطلع بس لحكني كتفني من وره وحط خشمه بضهري فرفحت روحي صرت اتحرك واضرب بيده وانزل نفسي بالكاع اريده يعوفني واصرخ بكل قوتي متخبله دارني عليه يريد يحضني رفعت رجلي ضربته على بطنه دنك لازم بطنه بوجع يصيح دفرته براسه وكع نزلت اركض وهو يكح ويركض بس متوجع لحكني للصالة جرني من شعري وذبني بالكاع كعد فوكي يريد يسوي الحرام فرفحت روحي بجيت بكل قوتي اصرخ ادعي واتحسب وهو ولا يمه نزع قميصه وهستوه يريد يدنك عليه
اندفر لو والله اتكسر الباب انهجم هجم دخلت كالعادة بهيئتها المظلمة وسلاح بيدها متلثمة حاطه ايدها بجيوبها بس عيونها وحواجبها مبينات
كام هو عالسريع وكعد يهدد ويصيح
غسان _ منو انتِ ؟
ضحكت بصوت مرعب وتقربت تباوعله بحدة واشمئزاز حجت بهدوء
عشتار _ اني تاج راسك يا عديم الشرف
رفع ايده يريد يضربها لزمت ايده وبأيدها الثانية ضربته راشدي الصوت صدى بالبيت كله وكع بالكاع وهي تقربت تكعد كباله طلعت سجينة من بوتها وحطتها بوجهه تأشر تحجي بفحيح
عشتار _ وجهك يلعب النفس شرأيك أخليك تسويله تجميل غصبا على راسك ورأس الخلفوك هممم ؟
ابتسمت بين دموعي واني اشوف ملامح الخوف بوجهه من السجين ومن صوتها اللي مبين تسويها وبدون ما يرلفها جفن حجه برجفة
غسان _ انتِ مخبلة مو صاحيه
ضحكت بكل قوتها خلته يفز مخروع سكتت فجأة تباوعله بدون رد مر صمت تام لمدة دقيقتين رفعت سجينتها تأشر على صدره وبطنه
عشتار _ لا لا موعيب مطلع جسمك مو حرام تريد تغوينه بشعر صدرك الخايس وكرشك يا معفن مو عيب ؟
سكت مجاوبها يباوعلها بحذر خايف عاطت بي بصوت خلسني من يمي
عشتار _ عيييييب لوووو لاااا ؟؟
هز راسه بمعنى اي عالسريع شويه ويبجي ضربته على كتفه وكالت بتحذير
عشتار _ اقسم بالله وداعت عذاب سنيني إذا شفتك بعد بس لو لمحة شايف هاي السجينة أحطها بعينك مفهوم
هز راسه بمعنى اي وكال بصعوبة
غسان _ مف مفهوم
كامت وكفت بهدوء ورزانة منزلة راسها تباوعله وهو صار بي شجاعة مادري منين وكام وكف وعاط
غسان _ انتِ منو وتكوليلي ما اشوفك ميت عليج انا بنت ال...
قبل ما يكمل ضربته راشدي خلته يفرفح لزمته من شعره نزلته صار أقصر منها باوعتله بنظرتها المعتادة وكالت بتهديد وهي تضربه بالحايط دافعته
عشتار _ اني مو مثل البنات اللي عرفتهم يا حيوان اني عشتار بنت عبدالله واكون حفيدة محمد من عائلة سلمان عبد الرحمن
صاحت بصوت حاد 
عشتار _ اقسم بالله إذا ما طلعت من العراق باجر الصبح ابو ابوك أشعله افتهمت لو لا
صافن عليها ما مصدك اللي يسمعه راد يحجي وصاحت بنفس النبرة
عشتار _ ما اسمع صوت باجر إذا ما تطلع بكرامتك اطلعك من العراق سحل وداعت عافيتي افضحك فضيحة أخليك تلبس نقاب وتكعد يم امك تسوي سحورة وياها خطية لا تتعب وهسه اطلع اطلع
اخذ قميصه وطلع من البيت يركض اجتي عليه حضنتها بكل قوتي ابجي واشهك مجلبه بملابسها وهي تمسح على شعري تهديني بعدتني عن حضنها لازمة وجهي بأيديها تحجي بهدوء تحاول تهديني
عشتار _ خلص خلص راح لا تخافين عنوده
حضنتها اشم بيها مفرفحة وهي كعدت بالكاع ضامتني الصدرها تمسح على شعري حطت ايدها على خدودي تمسح دموعي بستها بخدها احجي
العنود _ يا روحي انتِ عشتار لو ما اجيتي جان دمرني هالحيوان
عشتار _ لا تحجين هيج ادري بيج سباعية ما يكدر يسويلج شي والله بس قفلتي الخط حسيت اكو شي واجيتج قبل ما تكتبين الرسالة اني بالطريق
بهالاثناء سمعنه صوت ركض دخل مصطفى يركض وجهه ما يتفسر باوعلنه بخوف واجه عليه يركض حضني بكل قوته يبوس براسي ويتأسف
مصطفى _ اسف اسف اتاخرت عليج بيج شي صار شي شكو شصار احجي ولج
حجيتله كل شي صار وخر مني اعصاب صاير راد يكوم وجريته حاضنته احجي
العنود _ بداعت امي لا تروح ما يحتاج والله لا تكبر راسه عشتار كفت وفت
ضحكت وهو ابتسم بس بعده مقهور وكل شويه يبوسني ويتأسف تحت أنظار عشتار مبتسمة روحي فرفحت عليها شلون تباوع علينه وتبتسم كالت بضحك
عشتار _ اللهم صل على محمد وآل محمد يمه عين الحاسود بيها عود يمامي توتوتوتوف
ضحكنه بس اني ومصطفى نعرف انقهرت بس ما تحجي كال مصطفى يحاول يلطف الجو
مصطفى _ هاي عود دتفلين علينه يمه شايفه تفلة هاي العرمة تشبه تفلة جدي هاكبرها الله وكيلج
انعكش وجها بقرف تضحك وخرت اللثام ونزل شعرها اللي يجنن لونه حلو كلش ماشاء الله حجه مصطفى مايعرف يسكت
مصطفى _ اللهم صل على محمد وآل محمد عين الحاسود بيها دود توففف تووووف تووووف تووووف
ضحكت بكل قوته وهي صافنة عليه عاكشه وجها حجت بأندهاش
عشتار _ توف توف هاي طلقات
ضحك وهي ابتسمت ودارت وجها ما تباوع النه وهو حضني بكل قوته همست بأذنه
العنود _ شبيك وخر
وخر وضربني على ايدي خفيف وكال
مصطفى _ وسم مو صوجج صوجي انا
باوعت على عشتار جانت صافنة عيونها بعيدة عنه ولا يمنه ضربتها على كتفه وكلت
العنود _ عشتاااار
عشتار _ نعم
ردت بكل برود تباوعلي 
العنود _ وين صفنتي
عشتار _ راح اخابر السايق يجيبلكم شخص يسوي الباب وشخص ينظف البيت
العنود _ ماله داعي انا انظف ومصطفى يسوي الباب
عشتار _ لا اني الكسرتها يعني اني اصلحها
مصطفى _ خايبه شنو السالفة قابل انتِ غريبة
عشتار _ حتى لو ما راح ارتاح مخسرانين شي على فكرة
طلعت تليفونها تريد تخابر صحت بيها
العنود _ عشتار تقبلين احسسج انتِ غريبة ؟
باوعتلي بأستغراب واشرت بمعنى شبيج
العنود _ جاوبيني
عشتار _ لا ما اقبل واني ما محسستج انتِ غريبة بس علمود محد يتعب واني هسه ارجع للبيت ما اكدر اساعدكم وبصراحة أصلا ماعرف
ابتسمت وكعدت يمها احضنها
العنود _ يشهد ربي عليه انتِ بمقام اختي واكثر يمكن حتى اختي ما تسوي اللي انتِ سويتي وياي فضلج ما أنساه ابد
ابتسمت وباست راسي وكالت بصوتها الناعم اللي بي أنوثة وحنان وهدوء وطمأنينة وامان احسد خواتها على هيج اخت
عشتار _ لا تكولين هيج انتِ اختي الرابعة واللي اسوي ويا خواتي اسوي وياج وبعدين اني ماعندي فضل عليج ابد الفضل لله مو الي
حجه مصطفى وهو حاط ايده على خده مذوب عيونه
مصطفى _ اوووف أوف منظر يبجي الحصوة
ضحكنه وهو ضحك وكعد عدل باوعلها وحجه بجدية وابتسامة
مصطفى _ وداعت امي الماعندي اعز منها انتِ مثل اختي وأنا اخوج وشنو تحتاجين كوليلي الله شاهد انتِ مثل اختي واعز منها ماعرف شلون اشكرج لو ما انتِ جان اختي ادمرت
تنهدت بأبتسامة حجت بهدوء بس بأبتسامتها اكو خيبة وقهر اعرفها صديقتي وصارلي سنوات وياها واحس بيها
عشتار _ انتَ مثل اخوية وماكو داعي تشكرني لأني ما سويت شي العنود اختي واني أصلا صارلي هواي ما متعاركة وايدي تحكني اريد اضرب احد بس اليوم ارتاحيت
ضحكنه وهي ضحكت وكامت تكتفت
عشتار _ هسه شنو ما راح تخلوني اجيبلكم عامل
هزينه راسنه بـ لا تأفأت وكالت وهي تأشر على الكاع والباب
عشتار _ اووف لعد هاي النفايات منو ينظفهم وهذا الباب منو يصلحه
باوعت على مصطفى ساكته وهو باوعلي ثواني وطكينه من الضحك وكعت بالكاع اضرب برجلي ومصطفى تمدد عالقنفة ميت من الضحك يدمع باوعتلنه مصدومة واشرت على راسها بمعنى مخابيل حجت بعصبية
عشتار _ شنو اللي يضحك كافي بلا مسخرة وسفاهة
راحت روحي اني ومصطفى من الضحك صرت اشيل روحي واركعها بالكاع اختنكت عاط مصطفى وهو يحجي مختنك
مصطفى _ اخخخ يمه نفااااااياات مسخرررة سفاااهة اخخخ
نضحك وما نلحك وهي تكتفت تباوعلنه بصمت عيونها حادة تخوف بعد وقت سكتنه نباوع عليها وهي تباوع علينه حجت بنفاذ صبر
عشتار _ خلصتوا لو بعد ؟
هزينه ايدينه بمعنى خلصنه حجت هي
عشتار _ تردون عامل لو لا لان اريد ارجع للبيت البنات عفتهم وحدهم
العنود _ لا حبيبي ما نريد عامل بس ليش ابقي شويه البنات ما طايرات
عشتار _ اسم الله لا تحجين هيج اسم الله اعوذ بالله
العنود _ اسم الله يمعودة شبيج نيتج شاطحة
ابتسمت خفيف واخذت تليفونها ولفت لثامها وطلعت قبل ما تطلع عاطت
عشتار _ اعتذر بس ما اكدر أساعدكم خلوا الكاع تلمع لمع
مصطفى _ تدللييييين هسه امعطهاااا معططط همممم
ضحكنه وهي ضحكت وصاحت
عشتار _ عوووع شلون ألفاظ سوقيه
مصطفى _ سوقيه لو عراقيه
عشتار _ ما تضحك ابد تره
مصطفى _ اوووووكيييييهههه دااااادوووهههه
ضحكنه ورحت ودعتها وفعلا ثاني يوم غسان الخايس سافر وبعد خلقته مشفتها