طـغيان إِحمِرار السآعد

1 بارت

‎             طِـــغيان إحمـــرار ألســـآعد 
هل يُعقل بأن تتبدلُ الاحزانِ بالافراحِ
هل نهايتهم الاستسلام ؟
ام العيشةُ بألانعام ؟
لنرى ما نهاية هؤلاء الفتيات ياترى نهايتهم الضعف والانكسار ام العزيمةِ وإلاصرار ؟!!

~ عشتار ~

قصر موحش ظلام دامس هياكل العظمة في نظر العُملاء قصر يتجرد من الرحمة والمحبة ولم ينبت فيه غير الكره والحقد لا يوجد فيه غير المال ولا رحمة ومحبة للبنون
تنهدت واني اشوف البيت فارغ من أصحابه كالعادة رحت اتوضى باوعت على الساعة كانت 4:45 تنهدت فرشت سجادتي وكمت اصلي خلصت وكعدت على السجادة رفعت راسي وايدي ادعي

عشتار _ يا ربي انتَ تكول اني أستجيب دعوة الداعي إذا دعاني اني كاعد ادعي ياررب اني ما مسامحتهم يارب السموات والأرض بجاه محمد وآل محمد شوفني بيهم يوم ياربي اني تأذيت شنو ذنبي شنو سويت ياربي ليش عايفهم بطغيانهم شوفني شوف شكاعد يصير بيه اني ما اريد شي بس شويه ارتاح
شهكت بدون دموع وكملت
_ هيجي بس اريد ارتاح ياربي ثلاث بنات
ضربت على ركبتي وكلت
_ بهالركبة ياربي اخذ حقي وحق خواتي انت السميع العليم يارب برد كلبي جروحي متتخيط والله متتخيط سبحانك ربي على كل شيء قدير وحسبي الله ونعم الوكيل

مسحت على وجهي جبت قرآني قريت منه شكم صفحة وسديته باوعت الساعة بالخمسة وربع تقريبا كمت اكعد البنات امشي واباوع قصر كلمن يدخله يتعجب من فخامته واناقته بس ميدرون دفعت ثمن هالفخامة سنين عمري ابتسمت
ورحت دكيت الباب ماكو رد دكيت مرة ثانية ودخلت احجي
_ رميم يلا امي كومي ساعة خمسة وربع يلا يلا وين الحماس
اباوعلها كامت وكفشتها كفشت اسد ضحكت وكتلها
_ يلا امي غسلي وبدلي على السريع ونزلي ناكل بين ما اكعد الباقيات
باوعتلي بنعاس وكالت
رميم _ اموت على ربج والحسين الشهيد بس اريد حليب مكثف وصمونتين
ضحكت وكتلها
_ تمام امي بس استعجلي ماكو وقت
عفتها وطلعت ورحت على الثانيه دكيت الباب ودخلت
_ شمس كومي كعدي يلا راح تصير بالخمسة ونص
اباوعلها كامت اجتي حضنتني وباست خدي وكالت
شمس _ كمت عمر عمري
ابتسمتلها وكلت
عشتار _ يلا بسرعة غسلي وبدلي وتعاي نتريك
باوعتلي برود وكالت
شمس _ إذا اكو احد جوه ما اريد ريوك
باوعتلها وتنهدت بتعب
عشتار _ تتوقعين اكو احد ؟
هزت راسها بـ لا كتلها واني انهي الحديث
عشتار _ يلا استعجلي امي
وطلعت ورحت على الثالثه دكيت الباب ودخلت اباوع بصدمة عيطت خليتها تفز
_ يعني لا تنامين مثل الناس ولا تكعدين مثل الناس شنو انتِ تردين تتحولين زومبي اكو واحد ينام بالمكلوب
اباوعلها باوعتلي وضحكت ضحكتها الرنانه
آسيا _ هيهيهيهيهي شسوي ما ارتاح اله هيج مدورين راحتي ها ها كولي هيج
ابتسمت وبستها احجي
عشتار _ ليش شعندي غيركم احمل اجيب يلا امي غسلي وبدلي على السريع
باستني حيل وراحت تركض للحمام ضحكت على نشاطها ورحت كلت للعاملة تسوي الريوك على السريع ورحت الغرفتي اباوع على ايدي تنهدت بتعب ورحت غسلت وجهي همزين سبحت بالليل ولو احس روحي وسخه بس ماكو وقت
لبست ملابس المدرسة ورشيت عطر كومة ابد ما احب اكون وسخه او اهمل روحي اباوع على أظافري طويله وحلوه ضحكت واني أتذكر هذاك اليوم اللي حسيت بي احساس الوحدة والاستثناء
المدرسة _ عشتار شنو هاي الأظافر رايحه حفله تره مدرسة هاي مو عرس ركزي وفتحي دماغج الأظافر تنكص وبعد ما تطول زين لو لا وهسه امشي وياي للمديرة
باوعتلها بحدة وكلت
عشتار _ رجاءاً ست ما اسمح الاي شخص يتأمر عليه ويحجي وياي بهالاسلوب وبعدين بنتج أظافرها اطول من اصبعي اشو عفتيها واجيتي عليه لو علينه شديد العقاب وعلى غيرنه غفور رحيم
اباوعلها فتحت عيونها بتعجب وكالت
المدرسة _ انتِ فلا تستحين ولا عندج تربية اهلج ما علموج احترام المدرس امشي كدامي للمديرة
مشيت واني افكر بكلامها واحجي بداخلي فعلا ماعندي تربية حالي حال اليتيم بس الفرق اني يرشون عليه فلوس حتى اسكت وما اطلب اهتمام منهم او نصيحة عزت عليه نفسي وربيت روحي وربيت خواتي عندي احترام وكل شي بس ما اسمح الكائن يتجاوز حدوده وياي لو منو يكون وخواتي ربيتهم  على هالقاعدة
قاطعتني المدرسة وهي تكول
المدرسة _ يلا استعجلي
زفرت بضيق الارض راح ينفذ صبري وياها ورب الكعبة راح ينفذ
وصلنه للمديرة وحجت المدرسة السالفة
باوعتلي المديرة وحجت
المديرة _ راح اسويلج استدعاء شنو اسمج الثلاثي
باوعتلها برود وضحكت واني اعرف شنو راح يصير من اكول اسمي
عشتار _ عشتار عبدالله ........
اباوعلها فتحت عيونها بصدمة وسرعان ما اخفت صدمتها وضحكت بوجهي
المديرة _ يعني انتِ من عائلة ........
باوعتلها برود وكلت
عشتار _ اي
ضحكت وكالت بخوف
المديرة _ ههههههه عشتار حبيبتي احنه أصلا مستحيل نسوي استدعاء بس نخوف الطالبات حتى ميعيدون الخطأ والمدرسة هم غلطانه مو بس انتِ
ابتسمت بخذلان واني أشوف معاملتهم المنافقه بسبب اهلي وعائلتي تمنيت روحي مثل البنات بس قدري دائما ضدي
باوعت على المديرة اللي اخذت المعلمة على صفحة تحجي وياها بهمس درت نظري للمعلمة وشفتها حطت ايدها على حلكها بصدمة وضربت خدها اجتي وكالت
المدرسة _ حبيبتي عشتار اني مو قصدي الإساءة صدكيني بس اني ضايجه شويه وطلعت حركتي بيج اعتذر ماماتي
باوعتلها وابتسمت بهدوء
عشتار _ حصل خير
درت نظري للمديرة وحجيت
عشتار _ ست من رخصتج  ارجع الصفي
المديرة _ اخذي راحتج حبيبتي
فزيت من صفنتي على احد يمسح على كتفي باوعت شفتها رميم باوعتلي وكالت
رميم _ امشي يلا خلي نتريك
رحت بصمت كعدت على الطاولة سميت بأسم الله وبديت اكل
خلصنه وطلعنه شفت السايق كاعد بصف النافورة يباوع بالتليفون صحت عليه
عشتار _ ها مناوي تحرك
السايق _ يلا نروح
صعدنه كلنه اباوع نظراته بس يباوع علينه باوعت بالمراية وكلت بحدة
عشتار _ راح ألطمك براشدي أخليك تشوف بالمكلوب
باوعلي بصمت ودار عيونه بعد مرفعها
اباوع على رميم وجها صار ماروني كتلها
عشتار _ شكو ؟
باوعتلي عيونها مدمعة من الضحك حجت بهمس
رميم _ الرجال راح يسويها على نفسه من الخوف
باوعتلها بحده وكلت
عشتار _ كافي سُكتي يلا لا اخلي ينزلج تروحين للمدرسة مشي
باوعتلي بخوف مصطنع وحطت ايدها على حلكها وسكتت باوعت الشمس ضربتها على ايدها تحجي
شمس _ هيج احسن لج
باوعتلها وكلت
عشتار _ انتِ هم سُكتي
باوعتلي بخذلان تضحك وسوت نفس رميم سدت حلكها بأيدها اباوع على آسيا لازمة الكرواسون وتاكل كتلها
عشتار _ كافي راح ينشك حلكج من الاكل
باوعتلي وكالت وهي تأكل
آسيا _ ميخالف اهم شي هذا
واشرت على بطنها هزيت ايدي وسكتت
وصلنه ونزلنه دخلنه للمدرسة وكل وحدة راحت الصفها كعدت منتظره الجرس يدك أخذتني افكاري لأخواتي شنو مصيرهم شلون أحافظ عليهم وشلون احميهم من هالشياطين تنهدت ياربي ارحم حالي وحيرتي
دك الجرس واجت المدرسة