طـغيان إِحمِرار السآعد

بارت 22

              ‎ طِـــغيان إحمـــرار ألســـآعد
انتَ جذبة شجابك بنص الصدك ...؟

~ عشتار ~
طلع مشعل وكال ربع ساعة ويجي وكعدوا البنات يقنعون بيه ويحلفون هم موافقين وماعندهم مشكلة سكتت شويه وحجيت بهدوء مرتبكة
عشتار _ ارجع للبيت وأفكر
شمس _ عشتاري كافي انتِ تضحين اسمحيلنه هالمرة احنه اللي نضحي
بلعت ريكي وحجيت بغصة مقهورة
عشتار _ ما اكدر اعوفكم ماريدكم تضحون اريدكم تكبرون مرتاحين ما اكدر
شمس _ عشتار احجي الصدك بداعتنه انتِ تحبين مشعل ؟
هزيت راسي بقهر شهكت أتنفس بصعوبة سكتت هي تباوعلي عيونها تلمع حجيت بهدوء
عشتار _ تردوني ازوج ؟
شمس _ بس انتِ ما مزوجه انتِ راح تبقين ويانه بس على الاقل إذا حاولوا يأذوج مشعل موجود وياج
عشتار _ الله كريم ارجع للبيت وأفكر
هزوا راسهم وسكتوا حسيت بخنكة تمشي بصدري خنكة مو طبيعية ماعرف شنو اريد وشنو ما اريد بس اللي اعرفه ومتأكدة منه ما اريد ابعد عن خواتي شبر مو بيدي الموضوع وبنفس الوكت مشعل مادري شنو مشاعري تجاهه احبه ؟ لو معجبه بشهامته ؟ اني ادري كلش زين ردة فعل ابوية واخواني شنو غير امجد وردة فعله وعمامي وأهل مشعل اخاف يأذوهم عقلي راح ينشل من التفكير والخنكة تزيد وراسي ديموتني باوعت على ايدي وتنهدت مبتسمة كدمات على خراميش على جروح ابتسمت على أثر بوسة بخدي باوعتلها لزمت ايدي باستها وكالت
آسيا _ اروح فدوة الأيدج والوجهج امي انتِ
ضحكت ولزمت وجها ابوسها بخدودها حضنتني بفرحة تبوس بركبتي انفتح الباب ودخل مشعل وراه رهف وهند واخوه الأصغر منه باوعت عليهن وضحكت وهم ضحكوا واجوي يمي يبوسوني ويسلمون عليه
رهف _ ولج شلونج مشتاقتلج والعباس من كالي مشعل انتِ بالمستشفى سويت فلم هندي على امي علمود تقنع مشعل يجيبني الج
مستغربة شلون تحجي وياي كأنها صديقتي المقربة ابتسمت بهدوء وحجيت
عشتار _ هلا وغلا عُمري نورتي
هند _ هلا بيج كبد صارلنه هواي ما ملتقين هههههه
عشتار _ حبيبي تنوريني بأي وقت
عرفت البنات عليهم سلموا عليهن وبسرعة انسجموا وياهم باوعت رهف على آسيا وكالت
رهف _ انتِ آسيا صح ؟
آسيا _ نعم
رهف _ فدوة بعدج تخبلين
ابتسمت وآسيا ابتسمت وردت عليها
آسيا _ ثانكس
ضحكوا كلهم واني عيني ماتدري وين تباوع مرتبكة من نظرات مشعل اللي أكلتني اكل باوعتله ورفعت حاجبي بغرور ابتسم مرتبك ونزل راسه حجه ايمن اخوه بتلاعب يهز حواجبه
ايمن _ اييييي يا يمه الله يرحم ايام زمان تذكر مشعل من جنت مكابل باب بيتنه وكاعد تنتظر عزيزك يطلع من بيته
فتحت عيوني واختنكت كحيت مرتبكة ومشعل عض شفته يباوع الاخو بخزره منحرج ضحكوا خواته يباوعون عليه وعلى مشعل وخواتي مبتسمات يباوعولي ابتسمت اباوعلهم وهزيت راسي بمعنى شكو هزن راسهن بمعنى ماكو شي يضحكون كام ايمن من مكانه رفع ايده يباوعلي يحجي
ايمن _ خايبه وعلي أخوية إذا تزوجتي الله وكيلج محمد كفيلج بعد ما نشوفه بالبيت يرجع لهذاك الزمن الله يرحمه
ضحكت منحرجة وجاوبته بأبتسامة
عشتار _ يا زمن عزيزي ؟
صفن يباوعلي ومشعل ضرب كصته بيأس وخواته ميتات ضحك حجه هو يضحك ما مصدك
ايمن _ خويه انتِ حقيقية لو شني السالفة ؟
هزيت راسي ما فأهمه رجع المكانه باوع المشعل وكال
ايمن _ خايب حظك يكسر الصخر هاي وين لكيتها شوفها عزيزي وعوومري وحبوبيبي وانا ما شايف بس وصال نهار ليل تحجي مثل الزلم الحوك
ضحكنه كلنه ومشعل يباوعله مصدوم وكل شويه يتحمحم منحرج من خواته ثواني ودخل مصطفى باوع على مشعل وأيمن سلم عليهم وعرفهم بنفسه وهم عرفوا بنفسهم كعد يمهم يسولف منسجمين شوي وباوعلي مصطفى وعاط
مصطفى _ صدك راح تزوجين ؟
غصيت بالعصير اكح يعني هسه شنو هالاحراج ياربي طفر مشعل انطاني مي يباوعلي بخوف اخذت المي من عنده شربت شويه ورجعته اهمس
عشتار _ شكراً
مشعل _ العفو
صاح مصطفى معصب
مصطفى _ ها مشعل شني الوجبه ؟
مشعل _ شنو ؟
مصطفى _ ليش تنطيها مي ترى اني موجود ؟
مشعل _ انجب بويه شني انتَ موجود ؟
مصطفى _ شوف خويه انا هسه موجود وعشتار مثل اختي من تزوجون عود انطيها مي
ضحكت ومشعل التفت عليه عاقد حاجبه ماعجبه الوضع حجت العنود بضحك
العنود _ على كيفك خويه مصطفى يعتبر عشتار مثل اخته لذلك يغار عليها شويه وعشتار هم تعتبره مثل اخوها
ابتسم مشعل بتفهم وهز راسه راح كعد بمكانه ضرب مصطفى على كتفه وكال بضحك
مصطفى _ لا تضوج يشهد الله عشتار مثل اختي ولأن اختي انا ما موافق عليك
فتح عيونه مشعل يباوعله وكال وهو يضربه على صدره بقوة
مشعل _ ليش يا خايس
مصطفى _ الله اكبر شني هالسمعة ترى سابح وجاي حتى اباطي خليتله عطر
ضحكوا كلهم واني ضحكت عاكشه وجهي بقرف كام ايمن باوعلي وضرب رجله يحجي بقهر يميل بروحه ورأسه
ايمن _ لج خويه سودة عليه وراج مشوار خيسه طويييل
ضحكت عاكشه وجهي حجيت بقرف
عشتار _ شنو ليش ؟
عدل نفسه فجأة وحجه بصوت طبيعي
ايمن _ خايبه انتِ من الكلام وانقرفتي شلون لعد بالحقيقة إذا تزوجتي مشعل يبووو تهجين بليلة ظلمة من ريحة العفونية والخيسة
فتحت عيوني بصدمة وصدك لعبت نفسي كام مشعل ضربه على ركبته من وره يباوعله بخزره لزم ركبته وباوع المشعل وحجه بتذمر
ايمن _ لك الله لا ينطيك سويتلي طبعة
مصطفى _ طبعة بعلباته علمود ياهو اللي يشوفه يكول ضاربي بالنعال
ايمن _ حسبي الله على كل ظالم
جره مشعل من قميصه وطلعه بره باوعت على هند ورهف وحجيت
عشتار _ ليش هيج يعنفه ؟
ضحكت رهف وجاوبتني
رهف _ يمعودة ايمن اللي يعيل بي شوفي كل شويه مسوي مصيبة وياه بس والله أصلا مشعل ما يضرب ابد هذا الضرب هيج شقه بيناتهم
هزيت راسي مستغربة ابتسمت بداخلي طبعاً استغرب اول مرة اشوف هيج شي بين اخوان شباب يمكن لان متعودة على اخواني واحد ما يدري عن الثاني التفتت على هند اللي كالت تغمزلي
هند _ لا تخافين مشعل ما يضرب حبيب كلبه
ابتسمت ساكته والبنات ضحكن شويه ودخل مشعل وأيمن باوعلي وحجه
أيمن _ والعباس ابو فاضل وحق هو علي اشاقه مشعل ماكو انظف منه وداعت حصان الحمزة مشعل جلده يتبدل كل ما يدخل للحمام
عشتار _ I know  انتَ تشاقه
صفن يباوعلي هز راسه بيأس يباوع المشعل بقهر عض شفته وكال مفرفح
ايمن _ انتِ ماكو منج بعد وحدة الي خو ما بس هذا يأخذ وحدة ترطن انكليزي
ضحكت والبنات ضحكوا كام مشعل وحجه برود
مشعل _ شنو كلت شتريد ؟
ضحك ايمن ورفع ايده يحجي
ايمن _ كلت يارب ما اريد وحدة فايخه اريد وحدة زلمة حوك
عشتار _ يعني اني فايخه ؟
مشعل _ يعني هي فايخه ؟
مصطفى _ يعني صديقة اختي فايخه ؟
آسيا _ يعني اختي فايخه ؟
رميم _ يعني اختي فايخه ؟
شمس _ يعني اختي فايخه ؟
العنود _ يعني صديقتي فايخه ؟
هند _ يعني جنتنه فايخه ؟
رهف _ يعني جنتنه فايخه ؟
صاح بصوت باكي يقلد يحجي بخوف منظره مضحك
ايمن _ لا والعباس انا الفايخه وسبع الكنطرة انا الفايخه بس عيونكم سدوها
ضحكت واني أشوف مصطفى ومشعل لزموا طلعوا بره ضحكن البنات بكل قوتهم دخل مصطفى يضحك باوع الاخته وكال
مصطفى _ راح نروح نجيبلكم اكل ونجي
هزت راسها وهو طلع مر الوقت بين السوالف والضحك وسألت آسيا
آسيا _ شلون تعرفون عشتار ؟
هند _ جنه جيران ورهف جانت اربعة وعشرين ساعة يمكم علمودج
آسيا _ علمودي ؟
رهف _ اي علمودج جنت اجي البيتكم انتِ جنتي طفلة كلش احبج لان دبدوبة وهيج مثل اللعابة بس جان اخوج يضوجني
آسيا _ زين وعشتار شلون جان شكلها من جانت صغيرة
هند _ هههه حبيبتي جانت تخبل شعرها طويل ولونه مثل هسه وعيونها تخبل بس احجي سر رهف جانت تخاف من عيونها لان حادة شويه
ضحكت والبنات ضحكن حجت رميم وهي تحضني
رميم _ اوي داده وين اكو مثل عيون عشتارتي
باستني بعيوني تضحك ابتسمت وبستها بخدها حجت هند تباوعلي
هند _ عشتار وداعت امي انتِ بمعزة خواتي رهف ومريم اريد اكلج شي
عشتار _ تفضلي حبيبي
هند _ الله يشهد على كل حرف احجي صدك وما مكذبه والله مو لان اخوية امدح بي كدامج بس صدك اخوية يحبج كلش هواي انا اخوية وأعرفه مايرفع عيونه على بنية من عرفته يحب اقسم بالله ما صدكت ومن شفته شلون نايم وحاضن صورتج يلا صدكت ومن شفته هسه شلون يباوعلج صدكت ومن شفت دموع اخوية اللي عمري كلها ما شفتها تنزل على اي شي تنزل علمودج صدكت ومن شفته شلون يسولف بيج بحضن امي صدكت ومن سمعت صوته يصيحلي بأسمج صدكت والله اخوية ما يلعب عليج ولا نيته هيج وانا من حبه الج وسوالفه عنج حبيتج وامي من حبه الج حبتج والله من عرف وصال مخابرتج هجم البيت هجم اخوية يستاهل تنطي فرصة اله والنفسج ادري ما تكدرين تعوفين خواتج وادري ماكو احد ينافسهن بالمحبة عندج بس انتِ ما راح تعوفين خواتج راح تبقين وياهن الحد ما انتِ ترضين تعيشين ويا اخوية بس حاولي تنطين فرصة لان يا عشتار اخوية مستحيل يعوفج وانا خايفه يسوي شي يهدم شبابه بيده فكري بالموضوع
طول ما هي تحجي اني مركزة بكل شي تحجي وخنكة بصدري مو طبيعية واحس اكو هوا يلفح اذني باوعتلها مادري شنو احجي باوعت على خواتي يباوعون عليه مبتسمات بس عليمن يمثلون اعرفهم كلش زين ادري بيهم ما يردوني ابعد عنهم ولا يردون يبعدون عني من جانوا صغار ما يحبون احد يحجي وياي او يسولف وياي يغارون لان دائماً هم الهم الأولوية بحياة عشتار
تنهدت ودرت نظري على هند تباوعلي مبتسمة ابتسمت وحجيت 
عشتار _ اني مو رافضه اخوج اني خايفه عليه وعليكم انتوا اهله واني اهلي مو هينين لا تتوقعون الموضوع واكف على موافقتي حتى لو اني وافقت اهلي مستحيل يوافقون ابوية وعمامي واخواني كلهم رافضين أتزوج احد غير ابن عمي تتوقعين ليش اني هنا ؟ لان رفضت اتزوجه اني هنا
تنهدت وكملت كلامي
عشتار _ اخوج غالي عليه ولأن غالي ما اريده يتأذه حتى لو اني وافقت شلون اهلي يوافقون اهلي مستحيل يوافقون أتزوج غير ابن عمي إلا إذا هالزواج بي مصلحة قوية الهم
التفتت على صوته داخل شايل اكياس حطهم وكال
مشعل _ هالموضوع عليه وهالمصلحة راح تخليهم يوافقون غصباً عنهم
عشتار _ مو بهالسهولة لا تستهين بيهم ترى اذكياء ويحسبون حساب الكل شي وبكل خطوة يخطوها يعرفون شنو بعدها ومخططين الها
ايمن _ خويه نامي وراسج بارد احنه نتصرف وياهم وبالاخير راح يوافقون وهم الممنونين
تنهدت بتعب شلون افهمهم تقدمت يمي شمس انطتني مي شربت منه وباوعت بعيونها ابتسمت وحجيت بهمس
عشتار _ شكرا يا نور دنيتها العشتار
ضحكت بصوت ناصي وتقربت باستني براسي ردت عليه بنفس نبرتي
شمس _ الف عافية عشتانة روحي
سكتت اباوع الخواتي وهم يباوعون عليه بأبتسامة كامت آسيا كعدت بصفي سويتلها مكان اكثر كعدت سانده ضهرها عليه ورأسها على صدري حاضنتني مبتسمة حضنتها امسح على كتفها وضهرها ابوسها بشعرها وهي تبوس بيدي ضربت هند رهف وحجت تأشر علينه
هند _ تعلمي شوفيها شلون حاضنه اختها وتبوس بأيدها
رهف _ خايبه هذني مثقفات فايخات يتريكن نوتيلا
ضحكنه كلنه ومشعل عينه عليه ومن اباوعله يديرها حجه ايمن ما مصدك
ايمن _ ها صدك تتريكن نوتيلا مادري شني
باوعت على العنود وشمس ورميم وطكينه ضحك طلعت ضحكتي الرنانة وخرت آسيا من عندي تضحك بكل قوتها تبجي داخت من الضحك واني اضحك بكل قوتي رفعت راسي حاطه ايدي على بطني احجي بضحك بدون وعي
عشتار _ اووف يمه بطني اخخخ بطني راح اجيب ههههههه
ضحكوا كلهم على جفصتي ورميم وشمس ضحكتهم فضيحة وكعت رميم على شمس تضحك بكل قوتها بعد وقت مو قصير حجت شمس بالكوة تمسح عيونها من الدموع وترجع تضحك
شمس _ يا نوتيلا شايف عشتار شنو تتريك طك سبع بيضات تاكلها كلها الله وكيلك البيض ما نلحككك عليييههه هههههههه
ضحكت بكل قوتي وهم ما فاهمين بعدهم حجت العنود بضحك
العنود _ حتى نصيحلها ام البيض
ضحكوا كلهم يباوعون عليه غطيت وجهي اضحك بطني كامت توجعني بعد شويه سكتنه حجت رميم وجها احمر دم
رميم _ تكول نوتيلا ها ؟ شايف عشتار طك ست سبع بيضات من جانت صغيرة الحد الآن حتى لقبناها ام البيض باليوم يمكن عشر بيضات تاكل الله وكيلكم طبقة بيض كاملة تاكلها بأسبوع البيض ما نلحك عليه لا هو ولا البرتقال باليوم اربع برتقالات تاكل العاملة تحط بالثلاجة خمس كيلوات كيلوين العشتار وثلاثة للبيت
سندت ايدي على المخدة وغطيت وجهي بيدي اضحك وخرت ايدي وحجيت بضحك وجهي يطلع نار كد ما ضحكت
عشتار _ كافي فضحتوني
ضحكوا كلهم ومشعل يباوعلي مبتسم حجه ايمن وهو يحط ايده على شفايفه
ايمن _ ثبتولي ان بعض الظن اثم وانتِ خويه ليش ما تبقين الخواتج بيض وبرتقال
عشتار بضحكة _ لا والله اسويلهم وياي بس من اكل ادخل غيبوبة أصحى منها الكه روحي ماكلة البيض كله وهن صافنات عليه
مصطفى _ شلون تاكلين اربع برتقالات انا وحدة واحس بطني تشنج
العنود _ يوووه يمعود مرة رحت البيتهم شفتها حاطة البرتقال كدامها ومأكله ثنين وكاعد تاكل بالثالثة باوعت على البنات ههههه جان شمس تكولي ما بقت لا بيض ولا برتقال كله أكلته ام البيض
ضحكنه كلنه باوعت على البنات وحجيت بضحك
عشتار _ لج شميسه منو جانت ما تخلي على حالي افوكادو وانتِ رميمه ليش العنب جان يختفي ما الحك حتى أشوفه وآسيا عدها علاقة حب ويا الخيار مو بس اني
رهف _ لكم عيني شلون تاكلون فواكه وخضروات أنا كل خمس سنوات يلا أحطها بحلكي
رميم _ عشتار ما وكفت على البيض والبرتقال لا الليمون ما نلحك عليه ولا الجزر وكل أنواع الفواكه تاكلهن
هند _ هو صح انا ما اكل فواكه ولا بيض بس كل الأشياء اللي تأكليهن مفيدات
العنود _ اي ما تشوفيها بيضة
ابتسمت كام مصطفى استأذن يطلع باوع للعنود وكال
مصطفى _ العنود يلا امشي نروح للبيت
العنود _ يا بيت ؟
مصطفى _ بيت الوزير يا بيت يعني بيتنه غير
العنود _ لا طبعاً ما اروح وعشتار اعوفها ؟
عشتار _ حبيبتي روحي خواتي موجودات
العنود _ عشتار اسكتي بلا زحمة
مصطفى _ لعد شلون وين تنامين ؟
العنود _ ادبر نفسي انتَ روح
مصطفى _ وأعوفج ؟
العنود _ هيج ما تكدر تعيش بدوني
مصطفى _ اي بصراحة يلا كومي
العنود _ لاععع
مصطفى _ لعد شلون انا نعسان وين انام بحمامات المستشفى
عشتار _ اي عادي روح نام بيها وخلي صديقتي يمي
مصطفى _ انام بالحمامات الخايسه
العنود _ عادي حبيبي الحمامات خايسه وانتَ خايس
ضحكنه كلنه وهو سوه الها حركة بسيطة حجه مشعل
مشعل _ انا راح انام بالسيارة تعال وياي
ايمن _ قصده تعال ويانه وياااانه
مشعل _ ايمن انت ارجع للبيت
ايمن _ شايفني حرررمة حرمة انا حرمة أعوفك ؟
حجيت بهدوء نعسانة موت والنعس واضح بملامحي
عشتار _ مشعل خلي ايمن يبقه وياك او كلكم ترحون شعندكم باقين أصلا اني باجر راح ارجع للبيت
هز رأسه معصب وأيمن ابتسم وكال
ايمن _ فديتج جنتنه العزيزة المثقفة الفايخه على راسيييي صديقتي العزيزة اختي الغالية
ابتسمتله وكلت
عشتار _ Thank  you dear friend
ايمن _ العفو بعد كلبي العفو
العنود _ ها صرت تعرف انكليزي
ايمن _ لا وعلي بس ثانكيو اعرفها من الابتدائي
ضربه مشعل على ضهره وخزره بعصبية باوعلي وهز راسه بنفاذ صبر حجه بحدة 
مشعل _ هاك روح ودي خواتي للبيت وارجعععع
ضحكت على نبرته شلون شدد على كلمة ارجع وأيمن ضحك ويغمزله كام وهو يكول الخواته يهز ايده
ايمن _ كومن عيني كومن زلم آخر زمن يمشون بكلامكم
ضحكن البنات يباوعولي حجت رهف بحماس
رهف _ دباع الفخر الزلم تمشي بكلامنه عشتار ابوس راسج
ابتسمتلها ومشعل متكتف يباوع علينه معاجبه الوضع حجه ايمن يهز بيده لزم جنطة هند وحطها جوه ايده وكال
ايمن _ هو الرجال صار جوه اباطكم يمشي جنه جنطتكم
ضحكت على شكل وشكل مشعل شلون مصدوم يباوعله ويباوع عالجنطة ما مصدك ضرب كتفه مصطفى وكال بأسف كاتم ضحكته
مصطفى _ للأسف خويه انتَ صرت جنطة
التفت عليه وخزره ضحك مصطفى وطلع بعد ما حط بيد اخته فلوس وايمن شال جنط خواته يباوع على مشعل يهز بيده وطلع
ضحكت اباوع على البنات وراحت عيوني على مشعل اللي عينه اكلتني باوعتله ودرت نظري سمعت صوته يكول بهدوء
مشعل _ عشتار
كل الأنظار توجهت علينه حجيت بهدوء بدون ما اباوعله
عشتار _ نعم
كامت العنود اخذت البنات وطلعت بدون ما تحجي بس عافت الباب شويه مفتوح  تقدم يمي خطوتين يتنهد بتعب رفعت راسي باوعت بعيونه وحجيت بهمس
عشتار _ إذا تعبان روح ارتاح ما اله داعي تبقى
مشعل _ اششش اله داعي كل شي يخصج اله داعي عندي
سكتت ودرت نظري منه كعد عالكرسي وطلع كيس مبين مال اكل مد ايده الي بمعنى اخذي هزيت راسي بـ لا وكلت
عشتار _ ما اريد شبعانة
مشعل _ ما أكلتي شي اخذي
نبرته بيها هدوء وطمأنينة ما كدرت ارفض اخذتها من عنده وحجيت
عشتار _ شكرا مشعل
مشعل _ وطن روحه المشعل لا تشكريني على شي
هزيت راسي ودرت عيوني عليه اباوعله حسيت كلبي يدك دكات غريبة اول مرة احس بهيج شعور ابتسمت بوجهه مثل الخبله مادري ليش انتبهت على نفسي وبنفس اللحظة وخرت الابتسامة ماكدر يخفي ضحكته وضحك اني هم ضحكت على نفسي شبيه خبله والله عيب باوعتله وابتسمت هو سكت مبتسم يباوعلي بتأمل حجيت بهدوء
عشتار _ اني اسفه
عكد حاجبه ما فاهم تنهدت على نفس ابتسامتي وكلت
عشتار _ اسفه لان عيطت عليك وغلطت
هز راسه بـ لا وكال بهدوء وهو يفتح العصير
مشعل _ شوكت صرختي وغلطتي ؟
عشتار _ على سالفة نهاد الخايسة وخطوبتك شنو نسيت ؟
مشعل _ ما اتذكر هاي شوكت ؟
باوعتله وفهمت السالفة ضحكت بفهاوة صافنة بوجهه رفع راسه باوعلي ماكدر يخفي ابتسامته مدلي العصير ساكت أخذته منه مبتسمة نفس أسلوبه من جان صغير من جنت اغلط وياه واجي اعتذر هيج يسوي لزمت الكيس طلعت اللفة اكلت منها وابتسمت مصدومة رجعت اكلت نفس الطعم لحد هسه اذكره طعم مميز صفنت اباوع على اللفة وراحت ذكرياتي بعيد كلش