طـغيان إِحمِرار السآعد

بارت 4

طِـــغيان إحمـــرار ألســـآعد

حَـبيت عـيونَك والحَجـي اللـي بيهـن
مع الأسـف والـله ما اكـدر اشتريـهن

~ عشتار ~
باوعتله بتركيز ملامحة مو غريبة فتحت عيني واني أتذكر ؟؟؟
معقوله هو لا مستحيل باوعتله وحجيت بكذب اريد أضيع الموضوع
عشتار _ لا ما عرفتك ولا اريد اعرفك وتره راح اعبر موضوع نضراتك وصلافتك بمزاجي ما اريد ألمحك تباوعلي بعد افتهمت لو لا
باوعلي وضحك وهو يكول
الشخص _ بعدج نفس اللسان ماتغيرتي
باوعتله كلبي راح يطلع اريد بس اروح مكاعد ينطيني مجال
عشتار _ شنو داده أعرفك تعرفني من باقي اهلي واني مادري رجاءاً عيب هاي التصرفات استحي شويه انتَ وحواجبك جنها مكناسه
باوعلي وكال
الشخص _ ادري بيج تكذبين وعرفتيني بس اعرفج بنفسي اني مشعل
باوعلته وحجيت بتغابي
عشتار _ يا مشعل ما اعرف احد اسمه مشعل
ضحك وكال وهو يمد بالكلمة بأستفزاز
مشعل _ كذااااابة
باوعتله بعصبية وحجيت
عشتار _ احترم نفسك لا والله اضحك العالم عليك شهالميانة الخايسه ما أعرفك كلت ولا اريد أعرفك يلا تبخر من كدامي
باوعلي بحدة وكال
مشعل _ تدرين لو احد حجه وياي بهالاسلوب غيرج اشوي شوي
باوعتله نفس كلماته من جان صغير نفس الحواجب والعيون والملامح نفس كل شي
عشتار _ راح ألطمك بوكسي اعمي عينك عَمي
عفته ومشيت واني افكر ياربي شلون يعني مو معقول صدفة ابد مو معقوله يعني هيج من العدم اجه بوجهي هسه اني عقلي بشنو يفكر بعمامي لو بخواتي لو بشنو تنهدت واني استرجع أيامي وذكرياتي ويا هذا الانسان
مشعل حب طفولتي جنت دائما من اطلع أشوفه يباوعلي او يلحكني او من اروح للحديقة القريبه يجي يكعد بعيد يراقبني شلون العب خواتي واضحك
جنت ادري يراقبني بس اكذب روحي واكول لا توهسين يمكن هو هيج صدفة من اطلع هو يطلع ولاني متعودة على النظرات من العالم لان بنت عائلة معروفين جنت ما اهتم لحد ما يوم طفح صبري وياه ورحت يمه بعصبية
اباوعله من شافني ارتبك كأن عرف اني ليش جايه
عشتار _ من جان عمري 6 سنوات انتَ تراقبني يعني صار ثلاث سنوات شتريد مني ليش تراقبني ها احد دازك عليه شترييييد ليش تباوعلي من اطلع ليش تباوعلي من العب خواتي ليش مراقبني وين ما اروح أشوفك بوجهي ليييش

باوعلي برود وكال بهدوء استفزني
مشعل _ ما مراقبج
باوعتله باستهزاء وحجيت
عشتار _ وهيج من قدرة قادر وين ما اروح أشوفك بوجهي
باوعلي وسكت استفزنييي راح اموته
عشتار _ متحجي شبيك نخلست
مشعل _ كتلج ما مراقبج ولا اعرفج
عشتار _ إذا ما مراقبني ليش من اروح للحديقة تجي وراي وليش من العب ويا خواتي تباوعلي وليش من اروح للمدرسة تلحكني تره خنكتني
باوعلي وحجه
مشعل _ لا لا عشتاري ميصير تحجين وياي هيج ميصير باباتي
باوعتله بصدمة فاتحة عيوني على وسعها من كلامه
عشتار _ اسمي عشتار مو عشتاري وبعدين باباتي بعينك وهو غير بعدك زعطوط
باوعلي وضحك وكال
مشعل _ اكبر منج باباتي ميصير يلا روحي لعبي
اتنرفزت الدرجة رفعت ايدي اريد انطي راشدي ونزلتها بعصبية وحجيت
عشتار _ وحق القرآن وحروفه إذا شفتك بعد لاحكني او مباوعلي أنطيك راشدي افرك فر اطمك طم طم طم افتهمت ما اريد ألمحك ابد ابد هيج يعني وجهك ما اريد أشوفه بأي مكان لان وربي وربي بأي مكان بأي شارع بأي وضع بس أشوفك كدامي انطيك راشدي او دفرة او جلاق على حسب حالتي النفسية لحد ميصير عمري 11 ماريد أشوفك افتهمت ماماتي يلا Goodbye
عفته هو وصدمته بكلامي ورحت على خواتي شلت آسيا لان جان عمرها 5 سنوات وشمس ورميم جان عمرهن 7 لزمت رميم وخليت شمس تلزم ملابسي ورحنه نمشي من بعدها مشفته بس مرات المحه من يروح المدرسته لان بيته قريب ومرات اشوفه من الشباك من يطلع اخته الصغيره وانقهر
لان اخواني مو بحنيته ولا مثله وجنت دائما اسأل نفسي ليش جان يلحكني ليش يراقبني وما الكه جواب استمرت معاناتي بين خواتي وحمايتي الهم والضرب اللي جنت اتعرضله من اخواني وامي ابوية عمره مضربني
مو لان يحبني ويخاف عليه لا لان ميهتم بيه ولا يهمه امري مايضيع وقت بضربي ويتأخر على شغلة وتجارته وفلوسه
دخلت 11 سنة ونسيت مشعل وسالفته بهذاك اليوم باوعتلي آسيا بضوجه وزعل ومدت بوزها كزكزت عليها رحت ابوسها بأيدها وجهه ركبتها اشمها ريحتها تجنن مال اطفال حجت بملل
آسيا _ عشتار ضوجه والله تعبت دراسة وكتابة دراسة وكتابة خلي نطلع حبابه
التفت على رميم اللي كالت
رميم _ اي والله ضجت كلش كلش مكاعد أطيق البيت خلي نروح للحديقة اللي جنه نروحلها من احنه صغار حبااابه
باوعتلهم وانقهرت روحي نمردت عليهن حجيت
عشتار _ يلا كومن نبدل
بدلت لبست فستان لون وردي فاتح كلش وحذاء ابيض وسويت شعري ذيل حصان لزمت آسيا ولبستها مثلي باوعتلها تخبل جنها لعابة وهي جانت شويه مربربه مو هواي بس تخبل خدود ينكرطن صليت على محمد وبستها بركبتها واني اكول
عشتار _ شنو هالجمال اروح فدوة لبنيتي الحلوة يمه صدقة المحمد يلا البس خواتج واجي اسويلج شعراتج تمام حبيبتي
ضحكت وكالت بنعومة اطفال
آسيا _ هههههه اي اوكي عشتاري
ابتسمت وراحت ابتسامتي من تذكرت مشعل من كالي عشتاري رجعت ابتسمت وبستها بخدها ولزمت رميم وشمس يردون بجامة وتيشيرت علمود يلعبن براحتهم لبستهم اللي يردونه طبعا ذواقات كلش
اخذتهم ورحت نمشي مو هواي يعني عشر دقايق او ربع ساعة قريبه باوعتلي آسيا وكالت
آسيا _ حبابه عشتار اريد جبس ونستله
باوعتلها وحجيت
عشتار _ لا ميصير حبيبتي سنونج تتسوس احنه مو اتفقنه كل جمعة ناكل جبس ونستله
باوعتلي بزعل وكالت
آسيا _ كلش مشتهيه اكل جبس ونستله حبابه بس اليوم
ما كدرت ارفض واني أشوف الزعل بعيونها
عشتار _ تمام بس اليوم بس وين هسه مين اجيبلج
باوعتلي وضحكت وهي تكول
آسيا _ اكو أسواق قريبه على الحديقة نروحلها
باوعتله وهزيت راسي اباوع البنات هم يريدن قبلت ماعندي حل غيره مشينه وصلنه للحديقة باوعت الآسيا وحجيت
عشتار _ ها وين ابو الأسواق
آسيا _ هذاك شوفي
باوعت وانصدمت باللي واكف يباوعلي بأبتسامة مشعل هذا اي والله مشعل صارلي هواي مشايفته باوعتله وخزرته عفته وباوعت على البنات وحجيت
عشتار _ اجيبلكم عصير داليا مو احسن من الببسي
باوعولي بزعل حجيت واني اخلي ايد على عيني
عشتار _ خلص خلص لا تزعلون من عيوني
اخذتهم وطبيت للمحل اشتروا جبوسه ونساتل وببسي حجم عائلي سألت ابو المحل اللي يباوعلي بدهشة
عشتار _ شكد الحساب
باوعلي وكال
ابو المحل _ ستالاف بنتي
انصدمت من سألني
ابو المحل _ بنتي انتِ مو من عائلة محمد سلمان عبد الرحمن
باوعتله وحجيت برود
عشتار _ اي
ابو المحل _ بس بنيتي انتِ مبين بعدج صغيرة وخواتج صغار شلون طالعين وحدكم وشلون استاذ عبدالله يقبل
باوعتله بصدمة وحجيت
عشتار _ شمعرفك باسم ابوية
باوعلي وكال
ابو المحل _ نفس الملامح
عشتار _ عادي عمو اهلي أقنعهم اني وهاي الستالاف يلا مع السلامة
ابو المحل _ الله وياج بنيتي
اجاني شعور مو طبيعي شعور وحدة واستثناء حسيت روحي بكل شي مختلفه عن العالم بس لان اهلي أثرياء لازم ما اطلع
محد يعرف بس ارجع للبيت شيصير بيه من ضرب وشتم بس أتحمل علمود خواتي
فزيت على صوت شخص هو يكول
مشعل _ عشتار عشتار شبيج
باوعتله برود
عشتار _ رجعت تلحكني
باوعلي وابتسم
مشعل _ ما اراقبج اني كل يوم اجي هنا
سكتت مابيه حيل احجي فتحت عيني واني اسمعه يكول
مشعل _ سمعت كلامج كلتيلي ما اريد أشوفك لحد ميصير عمري 11 اني
الما اسمع كلام شيوخ سمعت كلامج
صفنت اريد اروح يم خواتي جانوا يصيحوني
سمعته يكول
مشعل _ كل عام وانتِ بخير عشتاري
انداريت وحجيت
عشتار _ ثاني مرة اكولك اسمي عشتار مو عشتاري ثاني شي شمدريك صار عمري 11 وشمدريك اليوم عيد ميلادي
ضحك ضحكة طويله
مشعل _ اعرف كل شي عليج
اتنرفزت ما احب احد يدخل بيه او بخصوصياتي غير خواتي
عشتار _ على اي اساس انتَ منو ابويه لا اخويه لا خالي لا عمي لا جدي لا ابن عمي لا ابن خالي لا مالك اي علاقه بيه اطلع من حياتيي
عفته ومشيت مو بيدي والله ما كاعد استحمل اي شخص غير خواتي
رحت العب وياهم ونسيت كل شي وكل همي راح من أشوف ضحكتهم وفرحتهم لعبت وياهم هواي اركض وراهن والزمهن افرهن وكل هذا جان يراقبني مشعل بس سكتت علمود خواتي باوعتلهم بعد وقت طويل وحجيت
عشتار _ ها متعبتن
آسيا _ لا ما تعبت بعد فريني حبابه
شمس _ خلي نبقه شويه بعد فد نص ساعة ونروح
رميم _ اي والله خلي اطلع طاقتي السلبية احسن ما اطلعها يمكم مو ؟
ضحكت رغم تعبت كلش حيلي نهد بس ما حبيت اكسر فرحتهم شلت آسيا وفريتها وهي تضحك بعلو صوتها واني اضحك على ضحكتها نزلتها وكعدت على المسطبه اباوعلهم يلعبون مبتسمه راحت ابتسامتي واني اشوفه يباوعلي ويضحك حجيت بداخلي
عشتار _ عرفت شنو دواك انتَ دواك يمي اصبرلي
باوعتله برود ممهتمه ودرت عيني على خواتي واضحك لمحته مستغرب من ردة فعلي الباردة اصبرلي إذا ماربيتلك عله
صارت الساعة بالعشره بالليل باوعت على البنات وحجيت
عشتار _ يلا بنياتي نروح الوقت اتأخر
باوعولي وهزوا راسهم بـ اي كل هذا الوقت هو مكابلني وكاعد اريد اعرف ماعنده اهل يسألون عليه ماعنده واجبات مدرسة سكتت وشلت آسيا رغم جانت ثكيله شويه وخليت البنات يلزموني ومشينه نمشي وهذا ورانه منطيته اي اهتمام خليته يتخبل وكعت علاكة الاكل  دنكت دا اشيلها اجه هو وشالها يريد يلفت انتباهي
يريد يخليني اعيط واحجي يعني يكولي شوفيني اني دا اراقبج بس والله مايصير اللي تريده ما باوعت بوجهه حتى اخذت العلاكة بكل برود ومشيت خليته يفور
باوعت آسيا نايمه وحاطه وجهه على جتفي وصلنه فتح الباب الحارس والبنات نعسانين اول مرة هيج نطول تنهدت واني اعرف شنو راح يصير إذا اكو احد موجود دخلت للبيت ماكو احد همزين لان صدك مابيه حيل
دخلت الغرفتي حطيت آسيا على السرير وغطيتها زين بستها بركبتها واشم بيها اخاف عليها من نسمة الهوا نيمت البنات وبستهم غطيتهم ونمت بالنص