طـغيان إِحمِرار السآعد

بارت 25

‎ طِـــغيان إحمـــرار ألســـآعد
ان الانسـان لا يرث الكرامـة ولا المهانـة بـل
يصنعهــا بنفسـه

~ عشتار ~
وصلت للشركة نزلت من السيارة وسديت الباب اباوع على الشركة بأبتسامة شر ناويتلهم على نية تحركهم وتحرك شوارب الخلفهم واجاني صوت فارس احد الحماية يكولي
فارس _ آنسة عشتار نعتذر لكن لازم نرافقج وين ما تروحين هالايام
رديت بدون ما التفت عليه
عشتار _ السبب ؟
فارس _ أوامر حضرة الأستاذ عبدالله
سكتت بدون ما ارد ومشيت وهم يمشون وراي امشي باوعوا عليه بودي كارد الكاعدين عند الباب وكفوا وفتحوا الباب اول ما دخلت صار صمت عجيب بالشركة بحيث بس صوت رنة كعبي موجودة بالمكان والكل أنظاره توجهت نحوي وكفوا السكرتاريين وتقدموا بأتجاهي يسلمون عليه رديت عليهم بمجاملة وابتسامة واستأذنت منهم ومشيت رفعت راسي اتنهد شكد اكره هاي العادات اني انسان طبيعي حالي حالكم ليش توكفون لابن نائب ابن وزير ابن شركة ابن المدير ابن المعاون ليش توكفون الشخص بس لان هو ابن شخص عنده سلطة ونفوذ والفقير محد يلتفت اله
زفرت بضيق وصعدت مشيت متوجهه ناحية الغرفة وكفت مقابيل وجان اكو على اليسار مكتب السكرتيرة كامت وباوعتلي متفاجئه من وجودي كالت بهدوء
السكرتيرة _ السلام عليكم آنسة عشتار
عشتار _ وعليكم السلام
السكرتيرة _ العفو بس شعجب انتِ جايه هنا ؟
عشتار _ وين أستاذ عبدالله ؟
السكرتيرة _ والد حضرتج ؟
عشتار _ نعم
السكرتيرة _ موجود بالغرفة بس يستريح لان قبل شويه جان عنده ضيوف
عشتار _ Ok
اجه فارس ودك الباب شويه وسمعت صوته يكول
عبدالله _ تفضل
كامت هي بوجهه علامة تعجب مستغربة فتحت الباب ودخلت رافعة راسي مبتسمة برود باوعت على ابوية وكلت بأبتسامة
عشتار _ مرحبا
باوعلي ورفع حاجبه ذب الاوراق من ايده ورجع ضهره على الكرسي بهدوء وجاوبني برود مثل عادته
عبدالله _ اهلا بابا
ابتسمت وكعدت على الكرسي اباوعله رجع اخذ الاوراق يباوع عليهم وكال
عبدالله _ شعجب جايه هنا ؟
عشتار _ عندي موضوع معك
رفع راسه باوعلي بأستغراب رجع الاوراق على الطاولة ورخه ضهره على الكرسي يعدل بشواربه شويه وكال
عبدالله _ شنو الموضوع ؟
عشتار _ مجموعة مواضيع راح اجمعها الك بموضوع واحد
اشرلي بمعنى احجي ابتسمت ورخيت ضهري على الكرسي حاطه رجل على رجل اهز برجلي وصوت الخلخال يرن بالمكان حجيت بهدوء
عشتار _ اتوقع تعرف اني جنت بالمستشفى صح ؟
هز راسه بمعنى اي تنهدت وكملت كلامي
عشتار _ تعرف ليش ومنو السبب وشنو راح اسوي بالفاعل ؟
عبدالله _ بابا اخوانج كبار ويردون مصلحتج
عشتار بضحك _ مصلحتي ؟ يا مصلحة بيهم ؟ الضرب ؟ التهديد ؟ التعنيف ؟ الاتهامات ؟ الشتم والسب ؟ الظلم ؟ الكفران ؟ وبعد لو احجي منا السنة ما اخلص يا مصلحة هاي ؟
سكت يباوعلي حط ايده على المكتب وشبك ايديناته ثنينهم وكال برود
عبدالله _ بابا اني مو فارغ لسوالفكم عندي مليون شغلة فوك راسي
عشتار _ ومن ضمن شغلاتك ومصالحك الشخصية تزوجني امجد ؟
عبدالله _ هذا الشي مو انتِ تقرري
عشتار _ لا غلطان اني أقرره وبدون موافقتي هالمصلحة ما تتحرك شبر واحد
عبدالله _ عشتار بابا عوفي هالسوالف للرجال ولا تدخلين لان مو بصالحج
عشتار _ اني بنت بألف مرأة ومليون رجال محد يكدر يفرض رأيه عليه ويا بابا مو بس اني رافضه هالزواج اكو شخص رافض هالزواج رفض قاطع ومستحيل يخليكم تتحركون بهالزواج وراح يشعلكم شعل
رفع ايده يعدل بشواربه ويباوعلي بشك باوعت بعيونه عيونه حادة بشكل مو طبيعي من يباوع على الشخص الشخص يحس كاعد يقراه وهذا الإحساس هسه كاعد احسه احسه بنظراته يقراني ويعرف اني شنو اقصد طلع سيجارة من هاي لونها بُني وتكون ثخينه وكبيرة شويه ورثها ونفخ الدخان باوعلي وكال برود
عبدالله _ ومنو هذا الشخص ؟
عشتار بأبتسامة _ بعدين تعرفه
عبدالله _ إذا هيج اسمعي بابا انتِ مالج غير ابن عمج امجد وهو يحبج والجميع يعلم ان انتِ اله وهاي عادات من قديم الزمان موجودة ماكو زواج بره عائلة سلمان عبد الرحمن
تحولت ملامحي للبرود نزلت رجلي بهدوء اني وكاعدة قدمت نفسي للمكتب وضربت المكتب بيدي بقوة اباوعله برود حجيت بهدوء وحدة عيني بعينه
عشتار _ بابا اولاً حبه ما يهمني وهو واللي لابسته برجلي اما العادات انتَ اكثر واحد تعرف اني ما تحكمني عادات ولا تقاليد ولا اكبر واحد يكدر يحكمني اني عشتار انتَ وعمامي تعرفوني زين اني غصباً على اللي يرضى واللي ما يرضى طلعت من قوقعتكم واني عمري خمس سنوات ماكو بشر كدر يتحكم بيه او يمنعني اما الزواج فهو شي يخصني واني اللي اختار الشخص مو انتَ لان اني مو ثوله ولا اني غبيه ولا نايمة ورجلي بالشمس ماعرف الدنيا طشت لو رشت مثل زوجتك اني غير
طول ما اني احجي هو عيونه باردة لكن بنفس الوكت نظراته لو جانت رصاص كان اني الله يرحمني ضربت المكتب بخفه وكمت من الكرسي نزلت درجتين امشي بطيء واحجي بحدة مكملة كلامي
عشتار _ اني وياك نعرف هالزواج بي مصلحة الك والأبو امجد لا تنسى اني عشتار محد يضحك عليه او يحاول يخليني اداة طمعه وجشعه حتى ينال مصالح هو مو بحاجة الها واذا كان ماسك عليك شي هذا بحثٌ آخر
وكفت مقابيل الشباك اباوع وهو كام من مكانه واحسه يقرب يمي وكف بصفي ومخلي ايديه وره ضهره حجه بهمس وبرود تام
عبدالله _ كل اللي كلتي مو مهم بس يا عشتار اقسم بالله إذا هالزواج ما تم بسببج راح تشوفين شي ما شفتي بحياتج
عشتار بأبتسامة _ بابا لا تهدد لان هالشي راح ينكلب ضدك
لزمني من ايدي ودارني عليه ضغط على ايدي بقوة لدرجة حسيتها راح تنكسر بيده اني مضروبة وايدي بيها جروح ولزمني راحت روحي وسكتت ما أنطيت ردة فعل باوعلي وكال
عبدالله _ عشتار الاشعل تردينه صحيح ؟
انصدمت شلون يعرفه بقيت ساكته اباوعله ضغط على ايدي اكثر حسيت ايدي بقت ثواني وتنخلع لزمت ايده بقوة ابعدها وحجيت بهدوء
عشتار _ هد ايدي بابا ايدي مجرحة
هدها بعنف ومسح وجهه بنفاذ صبر حط ايديه بجيب بنطرونه وكال بحدة
عبدالله _ بابا عشتار إذا عبالج أني طرطور او مغفل انتِ غلطانة بس خلي اختصرلج الموضوع انتِ الأمجد وبس الاشعل من اليوم تنسي يطلع منا
ضرب بأصبعة على راسي بخفه وخر ايده يباوعلي برود كأنه متأكد ضحكت بحقارة مديت نفسي وهمست بأذنه
عشتار _ واذا كتلك ما راح أنساه وراح أزوجه وغصباً على اكبر راس واللي بي خير خلي يوكف بوجهي اممممم اخاف نسيت فضايح اخوانك تريد أسويها عام واخليكم تكعدون على الحديدة ما اعتقد بابا
وخرت منه مبتسمة وكفت مقابيله متكتفه وابتسامتي كلها شر وانتقام حجيت بثقة رافعة راسي
عشتار _ راح اسوي اللي اريده ومحد يدخل ولا يعترض بابا زواج من امجد ماكو اخواني انتَ وعمامي راح تعوفوهم ينالون جزائهم وتره اني بنتك وللأسف اطباعك معشعشه بداخلي وبين عروقي اخواني راح يدفعون الثمن غالي واذا وكفت بوجهي او حاولت تنقذهم تره ما راح تكدر كل المصايب اللي سوها اخوانك اطلعها واطمهم طم وأطم تاريخهم واحد واحد عوف اخواني كافي اللي سويتوا بيهم كافي من توكف أمام رب العباد ويسألك ليش هيج سويت بأولادك شنو تجاوبه ؟ علمود شركتي ؟ علمود شغلي ورصيفي وتجارتي وفلوسي لو شنو تجاوبه اتقي الله باجر وراك حساب وقبر وليلة موحشة ما يوكفلك أحد إذا اخوك يعبد عدو رب العالمين وملحد تتوقعه بيوم الحساب راح ينقذك او يخلصك وهو ماعنده احد يخلصه او ينقذه ؟
يباوعلي ساكت ماعنده جواب ولا ردة فعل متأكدة باللحظة اللي اني احجي بيها وروحي تفرفح هو يفكر شلون يتخلص من تمردي او ممكن يفكر شلون يتخلص من مشعل بس المتأكدة منه يفكر باللي عندي وشلون جبتهم وشنو عندي واي فضايح ابوية وأعرفه حافظتهم حفظ واحد واحد تنهدت وكلت
عشتار _ دانش تفكيرك زين وفكر زين بالاخير اني ما جايه اخذ رأيك جايه أبلغك انك راح تعوف اخواني وراح تصرف النظر عن فكرة زواجي من امجد واكو أشياء ثانية راح اكولك عليها بس مو هسه من تردلي خبر
عبدالله برود _ بابا عشتار لا تنسين اني ابوج
دار ضهره الي وراح يمشي بطيء مشيته بيها هيبة وملامحه قوية وحادة ما انكر ابوية وعمامي واخواني وأبناء عمامي وسامة فول لان اجدادي جانوا وسيمين سبحان الله انطاهم الوسامة والفلوس والجاه والنفوذ والسلطة وأخذ منهم راحة البال والطمأنينة والأمان والصبر والإيمان والعدل واهم شي اخذ منهم العائلة والمحبة والود والسلام والتفاهم والتسامح وكل هذا هم بأمكانهم يرجعوا بيدهم لكن هم يحبون دورهم هذا
صحيت من تفكيري على صوته وهو كاعد مرخي جسمه على الكرسي يشرب سيجارته كال بثكل وهيبة
عبدالله _ واهم شيء ما اسمحلج تنسين اني عبدالله محمد سلمان عبد الرحمن مو اني اللي تهدديني وتوكفين بوجهي وهيلة على شخص بهالكون يمس شعره وحدة من شاربي
ابتسمت ورفعت ايدي وصفكت بصوت مو عالي وحجيت
عشتار _ برافو برافو برافو اسمعني بابا
مشيت بهدوء اطك بكعبي وهو يباوعلي بحدة مرتخي على الكرسي ويعدل بشواربه بالإيد الماسك بيها السيجارة وكفت مقابيل المكتب اخذت جنطتي برود نزلت جسمي عليه وحجيت واني اضرب اصبعي على المكتب
عشتار _ بابا إذا انتَ عبدالله اني عشتار صدك محد يكدر يوكف بوجهي إذا ما سويت اللي كتلك عليه وموضوع الزواج ينتهي تماماً والله وبالله وتالله اسوي بيكم العجايب اسوي اللي محد يسوي بكائن الك يومين تفكر ومن تقرر بلغني بقرارك حتى أتصرف ومهما كان قرارك هواي شغلات راح اكولها بس مو هسه بالوقت المناسب وهسه Goodbye dad
مشيت ودكيت الباب انفتح طلعت امشي بهدوء تطك بالكعب والناس اللي كاعدة كلهم عيونهم توجهت نحوي يباوعون عليه مشيت ونزلت والحماية وراي عبالك بنت مافيا شكد اكره احد يلحكني وين ما اروح بس مشعل لا حالة خاصة
ضحكت على تفكيري شبيه اني مجنونة استغفر الله
طلعت من الشركة بعد ما ودعوني السكرتاريين رديت عليهم بمجاملة وطلعت امشي جان هواء طيب يطير شعري راحت عيوني على سيارة واكفه ودرت عيوني رجعت باوعت شفت مشعل يباوع بأتجاهي درت عيوني مستغربة شبي وشنو ديسوي هنا ؟ وشلون عرف اني هنا ؟ تجاهلت اسئلتي والتفتت على الحماية باوعت الفارس وكلت
عشتار _ انتوا روحوا انتهت مهمتكم
فارس _ بس آنسة هاي اوا...
عشتار بحدة _ كول للأستاذ عبدالله الآنسة عشتار كالت روحوا
هز راسه وراحوا رحت امشي بهدوء وشعري يطير شكد احب هذا الشعور حسيت اكو ألم بداخلي ماعرف شنو اجاني فجأة مثل التأنيب ماعرف ليش بس كرهت روحي فتحت السيارة وحطيت ايدي على صدري ضيقة بكلبي مو طبيعية راح يوكف كلبي من الخنكة فتحت الجامة ولأول مرة افتحها ما انتبه الاي شي بس اريد اطلع من هالمكان خنكتي ما تنوصف شغلت السيارة واشوف مشعل جانت سيارته مقابيل سيارتي يباوعلي باوعتله ودرت نظري قبل لا احرك الكير دست بانزين ماعرف ليش حركت الكير والسيارة كمزت مشت بكل سرعتها بسرعة حركت السترين ولفتها إلا شويه وأدعم سيارته مشيت بسرعة مو طبيعية السيارة شويه وتطير فاتحة الجامة والهوا يكفخ بخدي صار تليفوني يدك بشكل مو طبيعي اجتي سيارة يمي دك هورن ما اهتميت ولا باوعت منو بس دست بانزين اكثر والسيارة شويه وتنكلب بيه واني ما مهتمه
دك التليفون رفعت الخط بدون ما اجاوب وسمعت صوته مفرفح يعيط بخوف
مشعل _ عشتار اوكفي السيارة راح تنكلب بيج خففي السرعة عشتار وطن روحه المشعل عذبتي روحي عذبتيني اوكفي فدوة اروحلج إذا صار بيج شي فكري بخواتج واخوانج بدونج يضيعون وانا بدونج اموت لج عشتاااار السيارة راااااااح تنكلللللببببب
سديت الخط وشمرت التليفون وراي وزدت بالسرعة الشارع جان فارغ السيارة صارت طيارة من سرعتها خففت شويه ولفت الستيرن ما اشوف إلا سيارة طلعت من جوه الجسر تمشي بسرعة لكن مو مثلي ردت ادخل بيها بس هي بعدت واني لفت الستيرن بكل قوتي والسيارة صارت تشحط مثل التفحيط وصارت تلوف وتلوف بيه لزمت الستيرن ورجعته وكفت بنص الشارع من الصدمة حطيت ايدي على كلبي وغمضت عيوني حسيت كلبي طلع من صدري
ما اكدر افتح عيوني لكن اسمع صرت اسمع صوت ناس وسيارات فتحت عيوني وبقيت صافنة للأمام حسيت كلبي مات صرت أشوف الناس اربعة اربعة رجع عندي النظر الطبيعي ثواني بس وكفت سيارة بنص الشارع نزل مشعل يركض فتح باب السيارة ولأول مرة يلزمني شالني من ايدي الحضنه كعد ركباته يم باب السيارة واني بحضنه ايدي واكعة بالكاع وعيوني صافنة بالسماء بس أشوفه وأسمعه بس ما اكدر احجي نزع جاكيته وغطاني بي حته ما يبين شي صارت الناس تلتم علينه يصيحون البنية راح تموت البنية ماتت واكو مرة كبيرة بالعمر كالت بقهر وهي تلطم على صدرها
المره _ يمه صخام البنية ماتت راحت روحها ولكم يبوووو 
هي حجت هيج لو مشعل راد يموت دفع راسي بصدره وقابض على شعري بقهر  يعيط
مشعل _ لاااااا يمهههه راحتتتت روحيييي ياربي دخيلكك لاااا ولجج يمهههه ولك بوييييه شوووف حالييي ماتتت روحي ماتتت لا تروحيييين منو يبقههه ويايييي روحيييي راحت يا الله دخيل اسمك لااا ياربي دخيل اسمك بجاه محمدددد يا اللهييييي لااااا كوميييي لا تروحييييين
اسمع رجال يكوله
_ ولك بويه لا تسوي بنفسك هيج كوم كوم شد حيلك خالي كوم
سمعت صوت سيارة شرطة وصوت سيارة ثانية نزلت ثواني وصرت احس اكو احد كعد يمي اجه صوت مره كبيرة تبجي وتكول بقهر
_ ولك يمههه شبيهااا احجييي خايب اسكت لا تصرخ شبيها ولج يمه صخام الصخمني البنية راح تموت
مشعل _ لا تكولييييين هيج يمهههه ما اعيش ما اعيش امووت وعسانييي بالموت الله يأخذ روحيي ولا ياخذها مني ولج يمهههه خليهااا تكوووم ما اكدر بدونهااا
صرت اسمع أصوات الشرطة والناس اجه صوت يصيح على مشعل
ايمن _ ولج خووويييه بيه ولا بيج ولك مشعل كوووم تنتظرها تنجلط كوووم شد حيلك خويه فدوة اغديلك اختي راح تروح
ام داوود _ ولك يمهه كووم لا تأخذها للمستشفى مابيها شي من الخرعة هاي كوم شد حيلك
كام واني بحضنه شالني ايد جوه راسي وأيد جوه رجلي ايدي صاح على ايمن يأخذ سيارتي حطني بسيارته وأمه حطت راسي على رجلها تمسح على راسي بأيدها الحنونة وتقره قرآن على راسي وهو اسمع شهكاته يهمس بقهر
مشعل _ راحت روحي راحت روحي
غمضت عيوني غصباً عني وصرت ما احس بشي
احس بثكل على ايدي راسي ثكيل فتحت عيوني ورجعت غمضتها واحس بأيد حنونة تمسح على وجهي وخدودي فتحت عيوني شويه استوعب اباوع هذا مو سقف بيتنه ولا سقف مستشفى رفعت ايدي اباوع عليها بيها كانونة او لا بس ايدي مابيها شي حطيت ايدي على راسي اشوف اكو شاش لو لا ماكو شاش سمعت صوت مره تكول بفرحة
مره _ الحمدلله كعدت كعدت الف الحمدلله
حسيت الثكل اللي على ايدي راح فجأة واجه وجه مشعل بوجهي عطت بفزع مصدومة
عشتار _ الله اكبر
مشعل _ بيج شي يوجعج شي ؟ احجيلييي مو شليتي عقلي شل
اسمع صوت ضحكات رجال وصوت ضحكة بنات وكل شي ما افتهمت باوعت على بطني شفت متغطيه بطانية وخرتها وكعدت عدلت شعري اباوع على الأشخاص شفت مره ورجال وايمن وهند ورهف كاعدين باوعت على مشعل ما مفتهمه كمت وكفت بس ممتوازنه لزمت الحايط اباوع عليهم وحجيت بتعب
عشتار _ السلام عليكم
ضحكوا كلهم وردوا عليه
الكل _ وعليكم السلام
كام مشعل طلع بسرعة كامت المره كعدتني وحجت
ام داوود _ كعدي يمه ارتاحي طلعتي من حلك الموت وتسلمين
عشتار _ عفواً خاله ما فهمت
ايمن بضحك _ ولج يمه هذولي طكطكطوكين هاي اللي كدامج مثغفه متشوفين ابنج متكولب عليها مثل السمجه المزوهرة
عشتار _ ?What are you talking about ( ماذا تتحدث عنه ؟ )
ايمن _ شني كاعد تسبيني خويه ؟
ضحك الرجال الكبير وكال
ابو داوود _ كافي الاغم عوفها للبت
كام من مكانه وتقدم يمي كعد مقابيلي وكال بأبتسامة
ابو داوود _ شلونج بويه هسه ؟
عشتار _ تمام عمو لكن انتوا منو ؟
ابو داوود _ أنا ابو داوود ابو مشعل عرفتيني
تذكرت الرجال اللي سلمت عليه من عزموني هو نفسه بس هسه كبران بالسن اكثر لكن بعده على نفس الرزانة ابتسمت بهدوء حجيت بصوت ناصي مابيه حيل احجي حتى
عشتار _ اتذكرتك عمو انتَ شلونك
ابو داوود _ الحمدلله أنا على الله بس بنتي أنا عتبان عليج
عشتار _ ليش عمو ؟
ابو داوود _ جا بويه تكطيعنه فرد كطعه ما تكولين اروح أزورهم أشوفهم
عشتار بأبتسامة _ حقك عليه عمو لكن عندي ضروف
ابو داوود _ معذورة بويه انتِ هسه شلونج تردين ترحين للمستشفى نتطمن عليج
عشتار _ لا عمو شكرا راح اروح
ام داوود _ لا يمه هاي ما مرجيه منج والله ازعل منج إذا رحتي
عشتار _ خاله خواتي بالبيت وينتظروني حتى اتعشى وياهم
ام داوود _ ولج يمه انتِ تعبانه هسه شلون ترحين
عشتار _ بالسيارة خاله
مشعل بهدوء _ بعد ماكو سيارة ولا تسوقين
التفتت عليه شايل صينية بيها كباب وكُبيبات ( كبة ) ولفة برجر وعصير برتقال وفواكه وسبانخ فتحت عيوني مصدومة من حطه بصفي وكال بهدوء
مشعل _ اكلي روحج رايحة
عشتار _ لا شكرا ما اريد شي اريد ماء فقط
ايمن _ ولج خويه لا تحجين هيج احس نفسي جريذي كبالج
ضحكت بهدوء وكلت بأبتسامة
عشتار _ حشاك ما يصير تحجي هيج
كام حط ايده على راسه وكال بقهر يعض إصبعه ويفر بنفسه
ايمن _ بس انتِ تحترميني وأبو فاضل بس انتِ
ابو داوود _ من اللطلطة مالتك محد يحترمك اكو بشر يحجي هيج ويا مرت اخو
كحيت مصدومة شنو مرت اخو ياربي ليش هالاحراج اجه مشعل مدلي الماء ايده ترجف دا اخذه وبالغلط اظفر اصبعي الصغير طخ باصبعه وكع الماء من ايده بأرتباك نزل نفسه واخذت مرتبك فتحه الي وكال
مشعل _ اسف وكع بالغلط
عشتار _ لا عادي مش مشكلة
اخذته وشربت منه شويه وكمت باوعلي بخزر وكال
مشعل _ وين اكلي الاكل بالاول
باوعلي ابو واشر بمعنى اكعدي كعدت واحس نفسي محرجه بينهم ما اعرف شلون اكل كبالهم حاط بس ملعقة حجيت بخجل وجهي احمر شويه وينفجر
عشتار _ أحمم مشعل هاي بس ملعقه احممم يعني بلا زحمة ممكن شوكة وسكين
حسيته خجل بس ما اتردد كام طلع شويه ودخل بيده شوكة وسكين حطهم بالصينية وشالها وكال
مشعل _ تعالي وياي
ابو داوود _ هوب هوب هوب وين ماخذ البت
مشعل _ بويه تتعشى
اشرلي امشي باوعت على رجلي وشهكت
عشتار _ يااا وين كعبي
باوعتله بزعل وهو باوعلي بنظرات حنينة هز راسه وحط الصينية على كرسي وطلع من الغرفة وخواته يضحكون كالت رهف بضحك
رهف _ لج انتِ مسودنة اخوية تسودن
عشتار بصدمة _ اني ليش اسم الله ؟
ضحكوا كلهم اجتي امه تضحك لزمتني من وجهي وبوستني بخدودي وكالت وهي تعصر خدودي
ام داوود _ يمه شحلاتج اكول وليدي ليش متسودن بيج روحج حلوة وجهج حلو شيريد من الله بعد
دخل وهو وجهه احمر مبين سمع الحديث باوعت بيده الكعب مالي انحرجت من نظرات اهله ومن الفشلة مديت ايدي اريد اخذ الكعب منه ما قبل وكال بخجل
مشعل _ لا انتِ تعبانه
انحرجت كلش وهو نزل لبسني الكعب الاول والثاني كام من مكانه حجيت بهمس بس هو يسمعه الخجل بوجهي واضح كلش
عشتار _ شكراً الاشعل
مشعل _ العفو عشتاره
اخذ الصينية واشرلي امشي مشيت وهو طلع عدهم حديقة بس مو كلش كبيرة كعد هو بالكاع واني صفنت عليه ما متعودة باوعلي وكال
مشعل _ اكعدي عشتاري
عشتار بحرج _ احممم ما متعودة
هز راسه وكام يريد يروح يحط الصينية عالسيارة صحت
عشتار _ لا جيبيها يمي
هز راسه وجابها الي شلتها وانصدمت من ثكلها وشلون هو يشيلها عبالك ريشه قاومت شويه وهو راح جاب كرسي الي وجاب كرسي اله عطت بي بوجع ايدي خدرت
عشتار _ مشعل ايدي
اجاني ركض وأخذ الصينية مني فتحت ايدي صارت بقعة حمرة بيها وأصابعي حمرة كشر وجهه بوجع حط الصينية واجه لزم ايدي بين ايده يفركها يحجي
مشعل _ سودة عليه جان كلتيلي
عشتار _ ماردت اطلع بدون قوة
مشعل بابتسامة _ بعدج طفلة
دنكت راسي بخجل وهو يمسح على ايدي وينفخ عليها شويه وراح الحمار كعدني على الكرسي وهو كعد كلش مقابيلي حاط الصينية بحضنه ورجله مسافة قلم وطخ برجلي انطاني عصير وكال
مشعل _ اشربي عشتاره
اخذته وشربت شويه صفنت على بيتهم شكد بسيط لكن ما شاء الله سُعداء كال بضحك
مشعل _ انصدمتي من بيتنه حقج متعودة على القصور عشتاري
رديت بدون ما اباوعله بتنهيدة
عشتار _ هالقصور اللي تكول متعودة عليها جنت احسها بس مجرد سقف عايشين جوا بس اجيت انتَ وغيرتني خليتني افهم انو البيت مو مجرد سقف نعيش جوا مو بس فلوس واحد بس يصرفها مايدري مين جايه وين راح تروح لا البيت مثل الخليه مثل المنظومة لازم الواحد يتعايش ويتناسق وياها وإلا يطلع يطلع للمجهول انتَ خليتني احس نفسي انسان مو بس آلة يستخدموها المصالحهم اني ما تهمني الفلوس ولا القصور ولا الشركات ولا اي شي هالقصور اللي تكول متعودة عليها هي سبب عذابي طول هالسنوات
باوعتله هو صافن عليه عيونه تلمع بدموعها ضحكت بوجع وكلت بضحك عيوني غركت بدموعها مثله
عشتار _ تدري ولا يوم عشت مرتاحة بهالقصور اللي تحجي عنها ولا يوم نمت واني مطمأنة ولا يوم ما فكرت بخواتي واخواني ولا يوم عشت بهالقصور وعقلي ما تعب من التفكير ولا يوم حسيت نفسي اني جزء من البيت او اكو شخص بالبيت يحبني غير خواتي ونينا العاملة اخواني ما يدرون شنو يسون مايعرفون هم يحبوني او لا هالقصور اللي تحجي عليها اني روحي طلعت بيها شفت أنواع واشكال العذاب بيها تعذيب نفسي وجسدي ومع هذا جنت اكعد وابتسم واضحك علمود خواتي ما يشوفون أختهم بيها شي
الوسواس القهري اللي احاربه علمود اكل من مطعم كدام خواتي ما اريد احسسهم أختهم عندها شي هاي القصور اللي تحجي عليها سوت بيه العجايب
نزلت دموعه مبتسم واني دموعي نزلت بس ابتسامتي راحت مسحت دموعي وشربت العصير شويه واكلت شويه من اللفة وكلت
عشتار _ شكراً شبعت
مشعل _ كاعد تكذبين
عشتار _ شمدريك
مشعل _ تكدرين تكولين الأب يعرف بنته وحافظها
عشتار بضحك _ بنتك واني مادري ؟
مشعل _ اي كملي يلا
عشتار _ لا والله ماريد لازم ارجع الخواتي
مشعل _ بعد وكت
عشتار _ شنو بعد وكت
مشعل _ الساعة ثمانية إلا ربع
عشتار _ بس هم كافي اريد ارجع
مشعل _ بس ترجعين تاكلين
عشتار _ اكيد
مشعل _ تمام صبري ثواني
كام راح دخل للبيت طلعت امه وخواته وأبو وايمن سلموا عليه رادوني ابقه لكن اعتذرت ما اكدر ودعوني ودعتهم رحت اريد اصعد بالسيارة اجه بسرعة مشعل وسد الباب وكال
مشعل _ ماكو سيارة ولا انتِ تسوقين
عشتار _ لا بالله شنو ما أسوق لعد شلون ارجع مشعل عليك الله وخر عندي شغل هواي
مشعل برفعة حاجب _ اي وشني هالشغل اللي تردي ؟
عشتار _ اريد اروح اخذ كم شغلة من السوبر ماركت واريد اخذ عشاء وهواي أشياء الخواتي
مشعل _ أنا اوديج اصعدي
عشتار _ مشعل لا اني احب أسوق
مشعل _ اي علمود تسوقين السرعة مليار وتروح روحي صح ؟
ابو داوود _ ولك بويه شمالك انتَ مسودن لا تصرخ عالبت
مشعل _ كلت ما تسوق
عشتار _ لا أسوق
مشعل _ ما تسوقين
عشتار _ أسوق
مشعل _ ما تسوقين
عشتار _ أشو إلا أسوق
مشعل _ سيارة ماكو
عشتار _ اكو واسوق
مشعل _ كلت لا
عشتار _ واني كلت اي
ام داوود _ خايبين كافيييي شني انتوا جهال خو ما جهال ولج يمه خلي هو يسوق
عشتار _ خاله اني احب أسوق
برطمت بزعل صدك اني احب أسوق وأحب السياقه والسيارة شبي يريد يحرمني من هسه اهوو باوعلي وارتبك عرفت نقطة ضعفك عصرت عيوني وطلعت دموع التماسيح غرغرتها بعيوني اشو هذا باوعلي لو تخبل من الارتباك مايدري شيسوي وحضني بكل قوته يحجي بتوتر
مشعل _ عشتاري والله خايف عليج أنا وحك سبع الكنطرة
فتحت عيوني على وسعها وهو بعده ما واعي دفعته بكل قوتي ما يندفع حجيت بهمس
عشتار _ وخر وخر شكاعد تسوي كمت تتمادى مششششعل
اخيرا حس على نفسه وابتعد مرتبك موت وكام يعرك باوعت الكل صافن علينه وكاتم الضحكة من الفشلة ركضت صعدت بالصدر وهو صعد بمكان السايق كبل حرك السيارة ومشينه مسحت على وجهي ياربي والله مو اني هو والله هو حضني اني ما الي ذنب ياربي هو ساكت واني ساكته كال بهدوء
مشعل _ وين تردين تروحين
عشتار _ سوبر ماركت
هز راسه وسكت طلعت تليفوني من الجنطة راسلت شمس على رسائل الرصيد والتليفون يطلع صوت الكتابة مال الكيبورد كام يتحسر وحسيته مثل اللي ضاج سديت الصوت وكملت كتابه
عشتار _ شميسه شنو كاعد تسون ؟
شافته بنفس اللحظة وجاوبتني برسالة
شمس _ اني ورميم كاعدين نقره وآسيا كاعد تباوع بالآيباد والله لا يشوفج نظراتها احسها تكولي شوفي كاعد اباوع وانتِ كاعد تقرين كالكلبه
ماكدرت اخفي ضحكتي وضحكت بصوت ناصي وكتبت الها
عشتار _ راح اجي وادرس وياكم ( اراجعلكم ) ونصير كلنه كلاب مو وحدج وحتى هاي آسيا اني صح زعلانة منها بس راح اخليها تدرس من باجر للمواد الجديدة
شافت الرسالة وجاوبتني
شمس _ لا حشاج وحشاي وحشى رميم بس آسيا هي كلبة عو هو عو هو عو هو
من شفت الرسالة ضحكت بكل قوتي بحيث من الضحك صوتي راح لزمت بطني وحجيت بهمس اضحك
عشتار _ اخخخ بطني يمامي يمه بطني ماتت
رسلت رسالة صوتية وحجيت بضحك
_ هسه اصفي على شي لو هو لو عو بطني ماتت خرب يومك شاروخان
احجي بشقه ما منتبه على وجه مشعل واخيراً تذكرت هو كاعد شبيه اني هسه شيكول عليه والله عيب باوعتله وانصدمت من شفت وجهه احمر وشاد ايده على الستيرن حجيت بهدوء عبالي بي شي
عشتار _ مشعل شبيك ؟
مشعل _ مابيه شي
يحجي واحسه كاز على اسنانه أعصابه تلفانه استغربت وضعه وسكتت اجتني رسالة من شمس فتحتها ولكيتها كاتبة
شمس _ هي مرة تصير مسعورة مرة تصير مجلوبة حسب مزاجها بس هي تعجبها كل الأدوار ما شاء الله اما عن لقبي المترف شاروخان ببسي خان احسن
ضحكت بهدوء وكتمت ضحكتي لان مشعل صدك شويه وينفجر بيه حطيت ايدي على حلكي بقوة فجأة داس بريك بكل قوته عطت من الصدمة وكلت
عشتار _ شاروخااااانننن
انصدمت من اللي كلته ولزمتني الضحكة بس الموقف ما يسمح ابد باوعت على مشعل اللي يباوع للأمام بحدة ساكت يعدل بشواربه ولحيته جنه ابوية
عشتار _ شبيييك شبيك تخبلت كلبي راد يوكف ياربي
سندت ايدي على رجلي وحطيت راسي بين ايديه مصدومة شلون هيج سوه ياربي يعني خرعتين بيوم واحد هواي على بنية مثلي والله هواي حسيت نفسي اختنكت واجتني مثل الحسرة على نفسي بيا ذنب اعيش هذا كله شنو الذنب اللي سويته حتى اتحمل كل هذا الشي ولازم اسكت وما انهار ياربي القوة تعبتني والضعف يتعبني ما اكدر تعبت من الكتم ياربي راعيت خواتي واخواني راعيتهم افضل من الأمهات وبالآخير هاي جزاتي ياربي يعني اني ذنبي انو اني بنت عبدالله ومن عائلة سلمان عبد الرحمن ياربي انتَ خليتني بنته مو اني اللي اختاريته احس خنكة بصدري مو طبيعية ليش اخترع مرتين المرة الأولى ردت اموت لو ما فضل رب العالمين بس ياريتني ميته والله ياريتني ميته على الاقل ارتاح من هالعيشه والدنيا الظالمة
سمعت صوته يكول بهدوء وحدة
مشعل _ منو هذا اللي كاعد تحجين وياه ؟
رفعت راسي بصدمة باوعتله وكلت
عشتار _ شنو منو ؟ شنو ؟ شكاعد تحجي ما فهمت
مشعل _ منو شاروخان اللي صارلج ساعتيين تحجين وياه وهسه صرختي باسمه منو ؟
فتحت عيوني بصدمة اباوعله ما مصدكة حسيت إذا ابقه لحظة بهالسيارة راح اموت او اسوي بنفسي شي حجيت بخيبه
عشتار _ انتَ واهلي واخواني والدنيا على عشتار اقسم بالله عشتار بشر مثلكم
فتحت الباب بسرعة ونزلت اركض بالكعب جان واكف يم رصيف وبصفه اكو حديقة اركض بكل قوتي بين الأشجار واحسه يركض وراي ويصيح بأسمي اركض بقوة وكعت واحس رجلي انغرز بيها شي فرفح روحي سمعته يصيح روحه مفرفحة
مشعل _ عشتاااار بووويه اوكفي بداعت خواتج
ما وكفت وكمت مع انو احس رجلي كل ما اركض توجعني اكثر حسيت احد يلزمني من ايدي وشدني عرفته هو وكفت مبعدة وجهي عني دموعي تنزل وخرت ايده وبجيت بصوت مهدود حيلي كعدت على المسطبه وحطيت ايدي على وجهي ابجي بكل قوتي وشهكاتي تكطع كلبي رفعت وجهي للسماء دموعي تنزل ابجي حسيته هو هم بجه كعد بصفي يبجي بحركة واكثر مني لزم ايدي باوعتله وهو يباوعلي دموعه تنزل كال بحزن
مشعل _ ولج عشتاري هديتي حيلي يا بعد روحي اللي بعدج تروح عشتاري اروح فدوة الوجهج أنا آسف أنا اسف والله اسف
بجيت اكثر ما احس غير سحبني الصدره يمسح بخدودي ويحجي
مشعل _ شهكتج شعلت كلبي يا كل كلبي ولج بويه والله ما اشك بيج أنا مستحيل اشك بيج الله ياخذني اذا اشك بيج انا اعرفج اكثر من نفسج انا اعرفج انتِ اشرف من الشرف لا تشبهيني بيهم انا ما أذيج ابد أنا اعشكج أنا عابر مرحلة الحب والعشك والهيام والهووس وياج انا مستعد اضحي بسنيني علمود شعره وحدة من شعرج وداعتج عندي ومعزتج عندي انا ادري بيج تراسلين لو خواتج لو صديقتج ردتج تطلعين اللي بكلبج بس طريقتي غبيه ياروحي انتِ عشتاري والله انتِ اعز من كل شي بهالكون لا تبجين بسببي
شهكت مجلبه بملابسه وحجيت بتعب
عشتار _ الأشعل تعبوني تعبوني اخواني ابوية عمامي امجد اشهم اووف يا تعب كلبي الماكل كلبي
مشعل _ وعيونج حكج اخذه من عيونهم وداعتج اسوي بيهم مجزره بس باوعيلي
رفعت راسي وباوعتله مسح دموعي وكال
مشعل _ هاي العيون عزيزة على كلبي دموعها جمرات بكلبي لا تبجين انتِ أقوى بنية شافتها عيني اروح فدوة لعيونج والنبرة صوتج اللي من اسمعها كلبي يرفرف والرموشج انا اغديلج فدوة مشعل يغدي فدوة الوطن روحه عشتارته الغالية عيونج الصفرة ما يلوكلها الحزن يا بعد نظر العيون
وخرت من صدره بخجل عطره تغلغل بأعماق كلبي ردت اكوم ورجلي ماكدرت باوع على رجلي وضرب رجله بقهر كعدني ونزل حجيت بهدوء
عشتار _ لا مشعل كوم اني اطلعها
مشعل _ سودة عليه بيه ولا بيج بويه
طلعها وحسيت طلع روحي من جسمي باوعلي وحطها بركبته بكل قوتي فتحت عيوني بصدمة وحجيت
عشتار _ مشعل لااا لااا توووجععع
مشعل _ اششش انا بدونج اموت
طلعها من ركبته ورجع خلاها فرفحت روحي وهو كاعد يم رجلي على ركباته لزم ايدي وكال بنبرة غريبة اول مرة اسمعها
مشعل _ لا تحجين ويا غيري ، لا تحبين غيري ، لا تباوعين الغيري ، لا تضحكين الغيري ، لا تبتسمين الغيري ، لا تروحين الغيري ، لا تفكرين بغيري ، لا تعوفيني ، لا تزعلين مني انا اهواج ، لا تفكرين تعوفيني لان مستحيل هالشي روحي بيج عشتارة الاشعل
طلعها من ركبته مرة ثانية قبل لا يحطها وبحركة سريعة وغير مدركة حطيت ايدي على ركبته من جهة اليمين لان هو يحطها من جهة اليمين باوعلي مصدوم كبل حسيت على نفسي وبعدت ايدي عنه ونزلت راسي كلت بأسف
عشتار _ اعتذر اسفه ماقصدت
كام ورفع راسي كال بحنان
مشعل _ لا تعتذرين وطن روحه المشعل انتِ ما تعتذرين انا الاعتذرلج يا روحه المشعل
ابتسمت وكمت حجيت بهدوء وخجل
عشتار _ يلا خلي نروح
ابتسم وكف بصفي مشينه ونسولف عن ذكريات الطفولة شفت السوبر ماركت مقابيل الحديقة ضحكت ومشيت وياه اجه سؤال بالي وسألته بدون تخطيط
عشتار _ مشعل ليش محتفظ بكل شي يتعلق بيه ؟
تندمت لان سالته هو ضحك وجاوبني بتنهيدة
مشعل _ من جنه صغار احتفظت بكل شي يخصج بعذر هاي آمانة بس أنا أعرف نفسي كذاب انا احتفظت بكل شي الج بدون تخطيط جان شي لا إرادي ومن تفرقنه
ذب حسرة وكمل كلامه
مشعل _ حسيت فقدت نفسي فقدت شغفي فقدت حياتي وحبي وضحكتي وسعادتي وبنتي وسندي وصديقتي وحب حياتي وأول حب بحياتي فقدت احلى شعور احلى احساس ماكدرت انساج وعذابي جان انو اشوفج وادري هذا خيال بس عاجبني ماكو يوم مر إذا ما شفتهم ماكو يوم يمر إذا ما اتذكرتج ماكو يوم نسيتج ببساطة كل شي يخصج محتفظ بي لانه يخصج الج وانتِ مو شخص هين انتِ وطن روحي ودوه جروحي حبيت حنيتج عليه لان حتى من افترقنا جنتي تجيني بالحلم وبالواقع وبكل مكان اشوفج بس
طول ما هو يحجي اني كلبي يرعد اول مرة انصاب بهيج شعور شعور حلو من تحس نفسك مهم عند احد او احد يحبك ابتسمت بخجل وحجيت
عشتار _ انتَ إنسان كلش كلش nice وحباب وكيوت
ضحك خجلان وجهه انكلب احمر ضحكت على خجله ومشينه وصلنه للسوبر ماركت اخذت نساتل وحلويات وجبوسه واندومي وببسي وكيك اخذت بيض وهو ضحك وكال
مشعل _ ها ام البيض راح تخلصي باجر لو اليوم ؟
ضحكت وكتله
عشتار _ اوووف شنو هالسمعة لا أطمن راح اعوفه يومين بس
ضحكنه ومشينه رحت اخذت فواكه عيوني تلمع بحب وهو يضحك عليه اخذت برتقال اهم شي رحنه نحاسب
مشعل _ شكد خويه ؟
المحاسب _ 30 الف
هزيت راسي وطلعت فلوس دا ادفع باوعلي بخزره وكال بهمس وهم يفتح محفظته وينطي الفلوس
مشعل _ هاي عاشر مرة تعيديها
استغرب ما فاهمة اخذ الأكياس وخلاهم بالسيارة كعد وساق السيارة باوعتله وحجيت بهدوء
عشتار _ الأشعل شبيك زعلان
مشعل _ مو زعلان
عشتار _ لا زعلان كولي السبب
مشعل _ مو زعلان عشتار بس تعبان
عشتار _ عشتار ؟
مشعل _ جا شني غير اسمج عشتار
عشتار _ اها تمام مشششعل
حجيت آخر كلمة بوضوح ودرت وجهي بزعل تنهد وكال
مشعل _ عشتار شبيج ؟
عشتار _ لا رد
مشعل _ عشتار كاعد احجي وياج
عشتار _ لا رد
مشعل _ عشتاري شبيج بويه هسه انا زعلان انتِ ليش زعلتي
عشتار بحركة _ لان تكولي عشتار شنو عشتار ها ؟ وبعدين كتلك اني ما احب زوجي المستقبلي يضم عليه شي واني من اسألك شبيك زعلان كله ماكو شي وماكو شي خلص هاهيه اروح ازوج امجد الخايس وانتَ تزوج هناء الخايسه
خزرني وكال بتحذير وحدة
مشعل _ عشتاري دير بالج تكولين امجد او اي احد لان انا مو مكرن حتى تكولين اروح ازوج الحيوان انتِ الي وانا الج نقطة راس سطر لا تعيدين هاي الكلمة تمام
عشتار _ لعد ما تقبل تكولي شبيك زعلان
مشعل _ حاظر اكولج بس مو هسه من ترجعين وترتاحين إذا صار عندج مجال وجنتي مرتاحة دكي عليه واذا ما مرتاحة هم دكي عليه
ضحكت وهو ضحك وسكتنه وصلني للبيت دخل السيارة وهو نزل من السيارة شافوا الحرس واستغربوا يخافون يسألون باوعلي وكال بحدة وهمس
مشعل _ راح اكسر أسنانهم وشلع عينهم شلع هال... استغفر الله روحي عشتار روحي
عشتار بعصبية _ تمام مشعل تمام
مشعل بأبتسامة _ تعرفين شلون تعذبين الواحد عشتاري
عشتار بغرور _ طبعاً
مشعل _ روحي بويه ارتاحي وأكلي زين مع السلامة
عشتار _ مع السلامة
ردت امشي بس درت ضهري وباوعتله بأبتسامة حجيت بهدوء
عشتار _ الأشعل دير بالك على نفسك
مشعل _ حاظر انتِ هم ديري بالج على نفسج وباجر اكو مفاجأة راح تعجبج كلش
عشتار _ شنو
مشعل _ باجر تعرفين يلا بويه روحي
عشتار _ تمام يلا مع السلامة
مشعل _ مع السلامة وطن الروح
مشيت بأبتسامة بس وصلت يم الباب راحت
تنهدت ودخلت اول ما دخلت لزمني جواد من ايدي وكال بعياط صادمني ..؟؟!

                                         يَتبـَــع
                             طَهـِر لِسـَـانك بِذِكـرِ اللـه
                                    سُبحَــان اللـه
                                      الحَمـدُللـه
                                 لَا إِلـٰــه إِلا اللـه
                                   اللــه أَكبَــــر
                    اللـهُــمَ صَلِ عَلى مُحَمَــد وَآلِ مُحَمَــد

بارت طويل 5100 كلمة لعيونكم🤎🪐
صح تأخرت بس سلكولي والله طن ضروف ان شاء الله احاول التزم 🪐🤎
مشاهـدة مُمتعــة سيمورامــاتـي 🤎🪐