طـغيان إِحمِرار السآعد

بارت 3

‎                        طِـــغيان إحمـــرار ألســـآعد

روحٍ غامِضة وَ وعودٌ كاذِبة
تتخلى الروحِ وتتَبَدل بالارواحِ
كلا كلا للانكِسارِ

~ شمس ~

باوعت من الشباك ماكو سيارتها بس اريد اتأكد رحت الغرفتها دكيت الباب ماكو صوت والباب مقفول عرفتها طلعت رحت اركض على آسيا دكيت الباب سمعتها تكول
آسيا _ ادخل
فتحت الباب شفتها لازمة الايباد وتكتب بالدفتر حجيت
شمس _ ها شكاعد تسوين
باوعتلي وضحكت ودارت الايباد عليه وهي تكول بحماس
آسيا _ ههههه دا اكتب اخيرا راح اخلص بقه بس ثلاث تمرينات
ابتسمت وحجيت بحنان
شمس _ تمام حبيبتي يلا امشي اخذي جنطتج خلي نروح نكعد يم رميم
باوعتلي وهزت راسها بأبتسامة لطيفة وهي تكول
آسيا _ راح نطلع اليوم تدرين
ضحكت على حماسها
شمس _ اي ادري يلا تعاي
شالت جنطتها والايباد والتليفون واجتي تركض لزمتها ومشيت سديت الباب ورحت الغرفتي اخذت جنطتي والايباد والموبايل
دنمشي غرفة رميم بعيدة والممر كبير وطويل شوكت نوصل باوعت على صوت فتحت الباب ولكيت اخويه الصغير طلع
الأكبر _ ها وين رايحات
باوعتله برود وحجيت بأستفزاز
شمس _ شعليك
باوعلي وعض شفته بقهر
الأكبر _ شايفه إذا اشغل ايدي عليكم اخليكم تتمنون الموت وما تشوفونه لزمي حدودج وياي شمسسسس

باوعتله بقهر وحقد حتى اخواني كرهونه بسبب امي وأبويه وعمامي
شمس _ شنو جان راح ينقصكم لو وكفتوا مرة وحدة ويا خواتكم وحميتونه متكولون خطيه اختي عليها حمل جبال فوك ضهرها ثلاث بنات بركبتها ربنا يحاسبكم على كل وجع حسينه بي على كل لحظة عشتار جانت تكافح وتجاهد حتى تحمينه وتخلينه نعيش حالنه حال البنات وانتوا وين حايرين بالنسوان والشرب والمعاصي والله وثق راح تتحاسبون واني اكولها بوجهك وما خايفه من اكبر واحد حسبي الله ونعم الوكيل بيكم ان شاء الله لا صحة ولا راحة تعيشون ضعف اللي عشناه واللي عاشته اختي حسبي الله بيكم

اباوع عيونه صارت حمرة يسمع بصمت طلع اخويه الكبير وباوعلي بصمت ماعدهم اي عذر باوعت على آسيا وكلت
شمس _ روحي يم رميم هسه اجي واخذي أغراضي وياج
أخذتهم وهي تباوع الاخواني بحدة وكره عظيم باوعتلهم ورجعت حجيت
شمس _ والله ما تتوفقون وانتوا شايفين اختكم تعبانه من المسؤوليه ومن الحماية بس متشكي وتره اني مو غبيه ولا مجويه على راسي ادري شنو غايتكم تردون تخوفون اختي علينه تردون تسلبون راحتها وعافيتها بس هيهات والله بعيده عليكم

اباوعلهم يباوعولي بصمت باوعتلهم وضحكت
شمس _ ماعندكم شي تحجون بي حقكم اللي مثلكم ما يحجي او ماعنده شي يحجي بي
ضربت على صدري من جهة كلبي وحجيت بحقد ولوم
شمس _ اكره كلبي اللي يحبكم بعد كل شي صار بينه بسببكم اكره كلبي اكررررها اريد اطلعه ادوس عليه واذبه بالزبالة لان بعده يخاف عليكم اريد اطم روحي طم طم لان بعدني احس اتجاهكم شعور الاخوه متستاهلون والله متستاهلون
باوعت اخويه الصغير يباوعلي بصدمة وأخوية الكبير بعد كلامي دخل الغرفته وقفلها عليه شفت اخويه الصغير راح يكعد على الدرج وصافن طلع من جيبه باكيت جكاير اخذ جكارة ورثها صافن باوعتله كام واجه بأتجاهي باوعلي وحجه بصوت يرجف من كلامي
الاكبر _ هذا علمود تبطلين تحبينه
مفهمت ما احس غير وجهي يطلع نار نار من الراشدي اللي اجاني باوعتله بأستحقار وابتسامة وحجيت برود
شمس _ وداعت خواتي كرهتكم
وانطيته راشدي بكل قوتي شكو حقد موجود بداخلي طلعته بهالراشدي بحيث ايدي انصلخت وكلت بقوة
شمس _ وهذا إثبات على كرهي الكم
باوعلي بصدمة وكال
الاكبر _ انتِ الحشره اضربيني إذا ما اخليج عميه ما أتسمى الاكبر
رفع ايده يريد يضربني لزمتها ونبتت اظافري بيها وحجيت بهمس
شمس _ اني شمس أعميك وما أنعمي والله والله لو تدري بيك ضربتني إلا تزلزل الكاع بيك وحق سبع الكنطره لا تندك بأختي
باوعلي بأستهزاء وسحب ايده مني بقوه باوعتله من فوك ليجوه وعفته ومشيت الغرفة رميم فتحت الباب ودخلت شفتها كاعدة على السرير صافنه على الباب من دخلت باوعتلي وحجت
رميم _ تأخرتي
باوعتلها وسكتت ماعندي شي احجي
رميم _ جنتي تحجين وياهم
رديت برود مابيه حيل احجي بعد
شمس _ اي
باوعتلي بأستهزاء وردت برود
رميم _ ماكو فائدة بيهم لا تعبين نفسج
باوعتلها بصمت رجعت ضحكت وكالت
رميم _ صارلنه شهرين مشايفين ظل امي شفتي شلون حياتنه الناس تحسدنه عليها
ردت آسيا عليها وكالت
آسيا _ ليش هذيج ام لو تنحسب على الأمهات الف مرة صار اجتماع بالمدرسة ولا مرة اجتي كله عشتار جانت تجي وياي وتسأل عليه من كلب عبالك هي امي مو اللي حايره بالماركات والفلوس ومراكز التجميل والجيم لا فد يوم درستنه ولا سمعتلنه ولا علمتنه الصح من الغلط كل هذا عشتار سوته وهي اختنه بس والأم صارلها شهرين مسافره
باوعنالها بصدمة من كلامها اللي كله صحيح حجت رميم برود
رميم _ العالم تشوفنه ملكات عايشين بقصور وعز ميدرون الفلوس اخذت من عدنه طفولتنه وراحتنه ميدرون كل ضربه ننضربها روحنه تفرفح السابع سماء وحتى لو اشتكينه عليهم عدهم عادي يدفعون ملايين ومليارات ويطلعون مثل الشعرة من العجين المليار عدهم حاله حال الألف ميقدرون الفلوس ولا يشكرون ربهم
ولو اللي يشتغل بهيج شغل خايس يعرف الله حتى يشكره