طـغيان إِحمِرار السآعد

بارت 36

                               طِـــغيان إِحمـــرار ألســـآعد
                            اثـاري تخون بيه بحجـة زعلان !

~ عشتار ~
وكفت مقابيل الباب وحسيت النفس ضاق بصدري بسبب اللي سمعته
مشعل بضيق _ مادري شلون أصارحها بهالموضوع
سيف _ شلون اختفوا ؟ وهم توهم طلعوا من العمليات ما فكرت ؟
مشعل بتوتر _ عقلي انشل وما لكيت جواب مقنع بس هسه كل اللي شاغل بالي عشتار شلون افهمها الموضوع
ايمن _ لا تجذب عليها
مشعل _ انجب تريد اكلها والله اهلج مختفين ؟
دكيت الباب وحجيت بصوت راجف
عشتار _ الأشعل تعال شويه
بنفس الثانية انفتح الباب باوعتله احاول أتمالك اعصابي سد الباب وراه يباوعلي بقلق ابتسم بتوتر واردف
مشعل _ وطن روحي عشتار وطن روحي
عشتار _ تعال وياي
بدون شعور لزمته من ايده وصعدت بالدرج وهو مصدوم من حركتي يعرف ومتأكد اني سمعت كل شي صعدنه دخلت للغرفة وهو وياي كعدت على التخم اباوعله وهو يباوعلي منتظرني احجي
عشتار _ لا تضم عليه
مشعل بتنهيدة _ اللي تريدينه يجرالج كليلي شتردين تعرفين ؟
عشتار _ اهلي شبيهم ؟ وينهم ؟ بس هذا اللي اريد اعرفه صعب ؟
هز راسه بـ اي ساكت يتحسر تنهدت كلبي يموتني احس بي شوك كل ما اتنفس يموتني كعد بصفي يتنهد ويتحسر
عشتار بهدوء _ مشعل اهلي وين ؟ امي ؟ ابوية ؟ اخواني ؟ محمد ؟ جواد ؟ الأكبر ؟ روحي وين ؟ عقلي وين ؟ كولي خليني اعرف ارضي من سماي

مشعل _ عشتارتي وطن روحي انتِ قوية صح ؟
صفنت بوجهه ما اعرف شنو اجاوب اجه بالي العذاب اللي عشته وكل شي مريت بي إلى ان وصلت الهاي اللحظة ضحكت بقوة اباوعله صرت اضحك بهستيريه وماعرف ليش بس احس من الالم والعذاب بردت روحي
اضحك بقوة واضرب على كلبي وبطني ودموعي تنزل من الضحك وهو صافن عليه ماتت روحي من الضحك كعدت بالارض اضرب بيها واباوعله وارجع اضحك بنفس القوة
كعد يمي يباوعلي بخوف لزمني من وجهي واني اضحك باس راسي بكل قوته يحجي برجفة
مشعل _ بنيتي عشتوره
حضني بقوة على صدره وكعد بصفي ماد رجليه حضنته اضحك وابجي بنفس الوكت ما اكدر استوعب الفكرة فجأةً وقفت ضحك رفعت راسي اباوعله كعدت على ركباتي صافنة عليه ودموعي تنزل بصدمة واحجي مثل الطفلة
عشتار _ يعني خلص ؟ بعد ما اشوف لا امي ولا ابوية ؟ يعني بعد ما اكول ماما وبابا ؟ ما أشوفهم ؟ ما اسمع صوتهم ؟ يعني بعد ما اشوف ابوية ؟
حضني بقوة واني دموعي تنزل بلا صوت دفن راسه بشعري يشمني باس شعري وصار يمسح على شعري وضهري ويحجي
مشعل _ أنا أبوج أنا امج أنا أخوج أنا سندج أنا حبيبج أنا زوجج عاينيلي شو
رفع راسي واني اباوعله بصدمة ودموع مسح دموعي وباس عيوني

مشعل _ وداعتج اكلب الدنيا وأرجعهم الج لو اعرف اشك الكاع وأطلعهم بس لا تنزل دموعج عويناتج غالية عليه هي ودموعها كلش غالية
عشتار _ الأشعل اهلي ؟ اهلي هذوله اهلي اهلي ؟ وين تلكاهم
مشعل _ الكاهم وداعتج ما تثقين بيه ؟
عشتار _ اكثر من نفسي
مشعل _ ثقي الكاهم وأرجعهم الج
عشتار _ وعد
مشعل _ وعد
سكتت وصفنت بالفراغ ماعرف شنو اسوي شنو راح يفيد ؟ البجي ؟ الدك ؟ اللطم ؟ لو ابجي دم ما راح يفيد
وصلت مرحلة برود داخلي غير طبيعي احس شمعتي انطفت من بعد اهلي صرت احس انطفى اجمل شي بداخلي احس نفسي اتبلدت شعورياً
مشعل _ عشتاري بوياي فضفضي احجي اللي بداخلج
عشتار _ بداخلي فراغ ماكو شي احجي
مشعل _ احجي بويه حاولي
صفنت بوجهه ابتسمت ودرت وجهي اباوع على الباب تنهدت وحجيت برجفة وابتسامة
عشتار _ شنو اسوي ؟ شنو اللي بيدي وما سويته علمود الناس الاحبهم ؟ اخواني سويت العجايب والمعجزات علمودهم تخليت عن كل شي علمودهم تخليت عن فرحتي وسعادتي وحياتي وصحتي وعافيتي تخليت حتى عن ضميريّ بهذاك الوكت شنو اللي بيدي اسوي وما سويته علمودهم ؟ خواتي ؟ سويت اللي اعظم الأمهات والخوات والأباء ما كدروا يسووا عشت عذاب من عمري ثلاث سنوات إلى الآن بكل كفخة من الدنيا تموت روحي وارجع أكوم وحدي بدون سند بدون حماية بدون مساعدة بدون شي اني وحدي جنت احارب علمودهم وهم ما حاربوا غيري