طـغيان إِحمِرار السآعد

بارت 37

                             طِـــغيان إِحمـــرار ألســـآعد
                          الوجع بالروح ملامحنا شعليها ...؟

~ رميم ~
بعدت شمس عنها لزمتها من أكتافها وكلبتها والصدمة من شفنه
المخدة مليانة دم شهكن البنات فاتحين عيونهم بصدمة واني مو مستوعبة شهكت كلبي مفرفح من اللي أشوفه رفعت وجهه اباوع دم نازل من انفها على خدودها وشفايفها وركبتها دم غزير لونه غامق شويه كلبي يفرفح روحي تحترك اباوعلها حبيبتي مغمضة عيونها وجها ذبلان وعركانه
فزينه كلنه على عيطة آسيا
آسيا _ لااااااااااا
صارت تضرب على وجهها وبكل ضربة تصيح
آسيا _ انجلطتتتتت انجلطت انجلطت اختيييي الله ياخذني وياخذ عمري وياخذ جااااسر ومُلهم ومحممممد وجوووواد الله يااااخذهمممم
عفتهم وطلعت اركض وصلت كبال غرفة الاكبر وكعت بالارض راسي انطخ بالحايط عطت بصوت ناصي ما اريد اخوفه كمت بصعوبة واني ادك الباب بقوة انفتح الباب وطلع بوجهه خوف حجيت بانهيار
رميم _ الأكبر عشت عشتاااار عشتااار انجلطت راح تروح اميييي
ولاول مرة انهار بهالطريقة كعدت بالارض ابجي واضرب على وجهي بكل قوتي املخ بشعري وبوجهي كطعت شعري ابجي بكل قوتي صعدن العاملات يباوعون عليه بصدمة
نزل عليه الاكبر لزمني من ايدي يريد يوكفني حاير شنو يسوي ويخليني اوكف ضربت على صدري بكل قوتي واحجي بدموع وعياط
رميم _ عووووفنيييي عوفنييي لا تلزمني روح اخذهاااا للمستشفى روووح عوفنييي عسااااني بالموت عسااااني بالمووووووت تفهم شنو عسانييي بالموووت اموووت وارتاح اموووت وما أشوف عمامي مستقووووين على اختي وخبلووووها اموووت وما أشوف ضعفييي وعجزييي اموووت وما اشوفهمممم ساحريهاااا واحننننه السبببببببببببب رووووح

عياطي زلزل البيت وهو يباوعلي مصدوم من كلامي الكل متعود عليه باردة وما اهتم بس هذا الشي ويا عشتار مستحيل يصير هاي اختي يا ناس هاي امي اللي ربتني ابجي بكل قواي وما الحك ماتت روحي من الحسرة
اجتي شمس تركض والأكبر عافني وراح يركض حتى بدون تيشيرت اجتي شمس يمي كعدت لزمتني تريد توكفني وما تكدر
ملخت شعري اكطعه بكل قوتي كومتني حضنتني بكل قوتها تحجي بأذني
شمس _ رميممم رميييم اسمعيني كافي لا تسوين هيج مابيها شي بس ضغطها ارتفع كافي حبيبتي كافي اشششش لا تشوفين الاحد ضعفج لا تخليهم يشمتون بينه كافي يا روحي عود اني اكول عليج قوية وباردة وما تهتمين هيج تسوين
رميم بهمس _ لان تعبت وتمرضت نفسيتي وطلعت روحي واني قوية وثابتة تعبت والله
شمس _ اني وياج وعشتار وياج وآسيا والعنود والاكبر كلنه وياج وبضهرج ما تعبين واني وياج يا توأمي امشي وياي امشي
لزمتني ساندتني طلع الاكبر من غرفتها عيونه حمرة دخل غرفته واني دخلت للغرفة كعدت يمها حضنتها بكل قوتي حاطة راسي على صدرها وابجي كلبي راح يوكف سحبتني شمس اجه الأكبر لابس هسه ما مدكم القميص شالها وطلع هو والعنود يركضون باوعت على البنات مسحت دموعي بعنف وحجيت
رميم _ يلا يبنات عبدالله كومن انهضن على حيلكم والبسوا افخم لبس وأفخم ساعة حتى عائلة قندرة ما يتشمتون بيكم يلا صبرن وصيروا قويات يلا يلا كومن
كمت طلعت من الغرفة دخلت غرفتي دخلت سبحت راسي يموتني من الطخة لبست البرنص وطلعت نشفت شعري شلون مجان بس اريد اخلص طلعت فستان بُني لبسته ولبست كعب اخذت جنطة حطيت بيها فلوسي ومستمسكات وموبايلي وكفت أمام المراية وابتسمت عيوني تجدح بقوة رحت للقرآن بسته حطيت ايدي عليه وحجيت بثبات واني واثقة من نفسي ومن اللي احجي
رميم _ اقسم بالله العلي العظيم وحق القرآن وحروفه ماكو ضعف من بعد اليوم مستحيل أضعف وسببي اني مؤمنة بالله سبحانه ومتأكدة يعوضني اني وخواتي خير إذ لم يكن في الدنيا سيكون في الآخره ويارب بحق هذا كتابك الكريم تعطيني القدرة والصبر والثبات منك اللهي وتنتقم من كل اذى اختي قريب ام بعيد انك على كل شيء قدير
وخرت ايدي وبست القران رجعته مكانه وطلعت لكيت البنات مبدلات حجيت بهدوء
رميم _ بنات عبدالله وخوات عشتار الضعف مو من خصالنا
ابتسمن واني ابتسمت ومشينه حسيت عندي قوة أواجه اكبر واحد وفعلا اليوم راح اسوي اللي كل هاي السنوات جنت منتظرته
وكفت شمس كبال السايق وحجت بجدية
شمس _ وصلنه المستشفى الـ....
السايق _ حاظر انسة تفضلي
فتحلنه باب السيارة صعدنه وهو صعد بلش يسوق لبست سماعتي وطلعت الاغنية المفضلة
_ نحن لا نهزم ومنا عطاء الدم سقا نخلة الصبر رغم ريح الهم شراع الآباء يمم إلى ضفة النصر نحن لا نهزم ومنا عطاء الدم سقا نخلة الصبر رغم ريح الهم شراع الآباء يمم إلى ضفة النصر ناصرون شهداء سجناء غرباء والله لانهزم
صرت اسمعها لحد ما وصلت الأكثر مقطع احبه
_ مر عام ام مضى الف ام جهلت ولم تدري آن ان تعلم وان كنت لا ترحم فحكم القضاء يجري
صافنة على الطريق لحد ما وصلنه نزعت السماعة وخليتها بالجنطة نزل السايق فتح الباب نزلت اني والبنات نمشي بثبات وعيون الناس تباوعلنه تنهدت اريد بيوم احس نفسي طبيعية وما اريد احد يباوعلي منهم اللي يباوع بإعجاب واللي يباوع باستغراب واللي يباوع بحسد ما يدري لو يعيشون عيشتنه يتمنون يعيشون بالشوارع ولا هاي العيشة الحمدلله على كل حال
وصلنه يم السكرتيرة
رميم _ سلام عليكم
السكرتيرة _ وعليكم السلام والرحمة تفضلي
رميم _ قبل تقريباً ساعة ونص اجتي مريضة اسمها عشتار عبدالله
السكرتيرة _ لحظة اشوفلج
كامت تكتب باوعتلي بصدمة وكالت
السكرتيرة _ عشتار عبدالله محمد ؟
رميم _ نعم
السكرتيرة _ ممكن سؤال
رميم بنفاذ صبر _ تفضلي
السكرتيرة _ عشتار اختكم
آسيا _ اي نعم اكو أشكال ؟ وبعدين ليش هالاسئلة
السكرتيرة _ بس اريد انتوا من آل سلمان عبد الرحمن
رميم بحدة ورسمية _ عشتار عبدالله بأي غرفة
باوعتلي منحرجة وانطتني رقم الغرفة رحنه نمشي ساكتات وصلنه يم الغرفة دخلت عشتار نايمة وحاطيلها اوكسجين وكانونة والعنود حاطة راسها بين أيديها تبجي بصمت والاكبر كاعد يم راس عشتار نايم ورأسه على راسها كعدت بعيد عنهم اباوع على عشتار
كعد الأكبر اجتي عينه عليه كام وكعد بصفي باوعتله وابتسمت بهدوء نزل راسه يتنهد وهمس
الأكبر _ ذبحتيني بكلامج
رميم _ ساعة انهيار كل شي الانسان يسوي
الأكبر _ هاي انتِ القوية لو غيرج ؟
رميم _ حالياً نفسي قبل ساعة جنت متبدلة
الأكبر _ إذا انتِ او اي وحدة منجن تروح أنا اموت وراها
رميم _ اسم الله عليك
حضني بقوة راسه على كتفي حضنته اشم بي بي ريحة عشتار نزلت دموعه على كتفي حجيت بهمس
رميم _ لا حبيبي خليك مثل ما اني اعرفك
الاكبر _ أنا ضعيف كبالجن حبيبات اخوجن
رميم _ الأكبر احبك
الأكبر _ يا عيون الأكبر أنا أموت عليجن
رميم _ انهدم بدونكم انتوا قوتي وسندي أنا ما اعرف الخوف لان عشتار وشمس وآسيا والعنود وانتَ وياي
الأكبر _ سامحيني يا روح اخوج سامحيني أنا ظلمتكم واكثر وحدة ظلمتها عشتارتنه ومادري إذا هي صدك مسامحتني او حتى ما تحسسني بالذنب
رميم _ عشتار ما تعرف تكذب جانت تألف علمودكم صدكني عشتار مسامحتك وتحبك يمكن اكثر من عدنه
الاكبر بابتسامة _ غلطانة عشتار ما تحب احد اكثر منكم
رميم _ شمدريك
الأكبر _ الكل يعرف وهذا الشي واضح
ابتسمت ابوسه واطبطب عليه ابتعد عني باوعلي من فوك ليجوه باوع على شمس وآسيا نظرته تحولت للحدة فجأة اشر الشمس وآسيا يجون اجوي وكفوا كدامهم باوعلنه وحجه بهمس كاز على اسنانه
الأكبر _ شنو هاللبس ؟
شمس _ لبسنه ؟
الأكبر _ لا لبس خالتي
شمس _ شبيك الأكبر
الأكبر _ شنو رأيجن اروح اجيب كرون ستيل وأشدهن ؟
آسيا _ حشاك اكبري
الأكبر _ هاللبس ممنوع بعد تلبسونه
رميم _ السبب
الأكبر _ واضح السبب رميم هاللبس بعد ما ينلبس
شمس بهدوء _ حبيبي الاكبر الانسان ما ينقاس بلبسه
الأكبر _ ادري شمس بس هذا اللبس ممنوع بعد
عافنه وطلع باوعت على البنات وضحكت
اجتي العنود يمنه وكالت
العنود _ شبي اخوجن
آسيا _ يغار
العنود _ عليمن
آسيا _ لان لابسين فساتين
العنود _ تره صدك فساتينجن فد مرة مبالغات تره مستشفى مو عرس
رميم برود _ اي شي شفته كدامي لبسته
فزينه كلنه على صوت انين التفتنا جانت كاعد تحرك راسها وأيدها على كلبها ركضنه عليها وهي رفعت ايدها وخرت كمامة الاوكسجين وحطت ايدها على راسها فتحت عينها بذبول باوعتلنه كلنه ساكته شويه حجت كلمات صدمتنه
عشتار _ م.. ما... ماما با... بابا
ركضت العنود صاحت الدكتور اجه فحصها وصار يسألها
الدكتور _ باباتي تشوفين زين
هزت راسها بـ اي
الدكتور _ تسمعين كلامي واضح لو مشوش
عشتار بصعوبة _ وا... واضح
الدكتور _ هذني شكد ؟
عشتار _ اربعة
الدكتور _ وهذني ؟
عشتار _ خمسة
ابتعد عنها ودخل الأكبر باوع على الدكتور بقلق قبل ما يحجي نطق الدكتور
الدكتور _ لا تقلق ابني بس انتَ اخوها ؟
الأكبر بخوف _ أي أنا اخوها
الدكتور _ ساعة وتعالي
الأكبر _ ليش دكتور
الدكتور _ بعدين تعرف ابني
عافنه وطلع آسيا كبل راحت يمها وحضنتها بقوة تبوس بوجها وركبتها وتحجي
آسيا _ خوفتيني عليج والله خوفتيني
عشتار بصوت ناصي _ سودة بوجهي بنيتي
آسيا _ اسم الله عليج اسم الله اني بدونج ما اعيش والله
عشتار _ اششش من عمري وسنيني على عمركم بنيات كلبي
راحت شمس حضنتها تبوس بخدودها تشمها بشوغة كعدت عشتار على حيلها حضنت شمس بقوة مغمضة عينها تمسح على ضهرها شمس تبوسها بخدها تشم بيها رافضة دموعها تنزل لزمت عشتار وجها بين أيديها مسحت عيونها تبتسم تهونها عليها حضنتها الصدرها تبوس بشعرها وتحجي
عشتار _ اششش حبيبتي شميسه باوعيلي
رفعت راسها تباوعلها وهي تبوسها بعيونها وتكول
عشتار _ لا تخافين اني مستحيل اعوفكم مستحيل بأرادتي اعوفكم
شمس _ ليش هيج صار بيج ليش
صفنت بوجها ماتعرف شنو ترد تنهدت وحضنتها تطبطب عليها ساكته رحت يمها وشمس ابتعدت وراحت غاصت بحضن الأكبر اللي صافن بعشتار دموعه بعينه كعدت على السرير اباوعلها
جمالها مو طبيعي جمال چذاب ساحر واثقة انو حتى لو تشوهت اسم الله تبقى اكثر امرأة شافتها عيني جميلة عيون كبيرة مسحوبة حادة ملونة ذبلت بسبب الزمن والضروف وجه ابيض كطن نوراني لحد الآن اتذكر جانت قبل ما تنام تقرأ سورة النور وتنام ورب العالمين نور وجها خشمها صغير شفايفها تجنن خدودها ممتلئة ركبتها ثلج أيديها ناعمة جسمها مثل الساعة الرملية
بس كل هالجمال ذبل بأسباب مجهولة وخفايا احنه منعرفها
تباوعلي بابتسامة وبعيونها قوة عجيبة وفخر ابتسمت رافعة راسي بيها امنيتي وين ما اروح اكول للناس هاي اختي اللي ربتني
تقربت يمها وحجيت بابتسامة وهدوء
رميم _ اشتاقيتلج يا روحي
عشتار _ اني اكثر يا عوض ربي
رميم _ جنت واثقة ما راح تعوفينه
عشتار _ واني واثقة حتى لو عفتكم راح تبقون قويات وثابتات
رميم بابتسامة _ لا لان احنه ما راح نكون موجودين بدون عشتانه
ابتسمت وحطت ايدها على خدي
عشتار _ ماكو احد يموت وره احد
رميم _ بس احنه غير احنه مو احد احنه رميم وشمس وآسيا والاكبر والعنود ومحمد وجواد والأشعل
عشتار وهي تتنهد _ محمد وجواد طلعوا من حياتي خلص
ابتسمت وتقربت حضنتها بقوة خليت راسي بركبتها اشمها ابتسمت وهمست يم أذنها
رميم _ تكدرين تخدعين الكل بذكائج بس احنه لا يا عشتار مثل ما انتِ حافظتنه احنه حافظيج
عشتار _ ما خايفه ولا مستحيه ما اكلج كرهتهم لا طبعا بس حبهم نزاح عن كلبي وماعندي اي شعور تجاهم
رميم _ احاول اصدك
ضحكت أبوس بيها لزمتها من وجها ابوس بخدودها بقوة واحجي واكزكز
رميم _ خدودج مال جعص وعض والله
عشتار بضحك _ شنو جلب ؟
ضحكت حاضنتها بقوة حاطه راسي على صدرها لزمت إيديها ابوس بيهن بوست خدودها وما اشبع منها
عشتار _ هاي صاير عندها فائض حنان
رميم _ اي والله صاير عندي جفاف عاطفي ومعنوي
عشتار _ بالأكبر ولا بيج
الأكبر بابتسامة _ لا لا رجاءاً أنا أصلا صحراء الأنبار ما احتاج
ضحكنه وهي رجعت ضهرها بألم بس تحاول تخفي شعورها راحت العنود يمها حضنتها تبوس بيها بقه الأكبر يحوس يريد يروح يمها بس يستحي كامت العنود باوعتلنه واشرت بمعنى امشن طلعنه كلنه وكفنه بالباب باوعت على العنود وسالتها باستغراب
رميم _ ليش ما كلتوا المشعل عشتار بالمستشفى
العنود _ خطية لا ما اريد اخوفه حتى المصطفى ما حجيت
باوعت على الساعة وابتسمت داخلياً اجه الوكت اخيراً باوعت على العنود وحجيت بهدوء
رميم _ بس الأفضل تكولون اله عموماً اني راح ارجع للبيت اجيب كتبي اريد اقره ما بقه شي للامتحانات
العنود _ وين رايحة على الاقل استأذني من اختج
رميم _ انتِ كوليلها عود مستعجلة راح ادك للسايق يجيني واذا الدكتور راح يطلعها اليوم وحدة تكولي علمود ما ارجع للمستشفى يلا باي
عفتهم ورحت بدون ما اسمع ردهن مشيت بالممر وصوت الكعب يرن بالمكان رن جان اكو مجموعة شباب ديحجون والصدمة من ضمنهم جان اخو مشعل اتوقع ايمن وعلى اثر صوت الكعب كلهم التفتوا بعدت عيوني عنهم