طـغيان إِحمِرار السآعد

بارت 35

                                طِـــغيان إِحمـــرار ألســـآعد
                                 انا نغشيت بيك عيونك كبار
                             طلعت عيوبك اكبر بس ما شفتهم

~ شمس ~
سديت الخط وانطيته حظر وطلعت من الحمام وانصدمت واني اشوفها واكفة مقابيل الحمام فاتحة عينها بصدمة ما مصدكة
بلعت ريكي بصعوبة مادري شنو احجي شلون ابرر ؟ شنو اكول ؟ بلحظة اجاني تأنيب ضمير طغى على روحي واني اشوف عيونها تلمع بدموعها تباوعلي بخيبة نظرتها شكت كلبي تمنيت روحي ميته ولا شايفة نظراتها
راحت تمشي بهدوء كعدت بالارض ضمت رجلها الصدرها تباوعلي بخيبة حجت كلمة وحدة بهدوء مو طبيعي
عشتار _ ليش ؟
شمس _ وحق ألقرآن وداعتج عندي ماكو شي هو لازك بيه اسألي رميم هو دائماً يخابرني واني ارزله واكوله بعد لا تخابرني ما يفيد حتى حظرته الف مرة ويجيني من ارقام ثانية وداعتج ما خنت الثقة
نزلت دموعها بغزارة تباوعلي وما تحجي لأول مرة اكون عاجزة حسيت نفسي مو كفو اروح اكعد يمها وأواسيها ساكته اباوعلها ودموعي تنزل عليها دموعها تنزل مال انسان شايل هموم سنوات دموعها عشرة عشرة ما تحملت وركضت كعدت مقابيلها لزمت وجها بين ايدي وحجيت
شمس _ لا تبجين اني ما استاهل ما استاهل صدكيني اضربيني اضربيني قابلة بس لا تبجين بسببي الله يخليج
عشتار بهمس ودموع _ اكسرها قبل لا تنمد عليج امي انتِ
بجيت اكثر ما اتحمل حنيتها علينه فضيعة ماتت روحي عليها سحبتني الصدرها دموعي ودموعها ينزلون احس بايدها تمسح على شعري وضهري بحنان نمت على رجلها دموعي تنزل بدون صوت اجاني ملمس ايدها الناعم تمسح دموعي بحنان
عشتار _ لا امي لا لا تبجين ما عاش اللي ينزل دموعج واني عايشة باوعيلي شموس
باوعتلها وكمت حضنتها بقوة راسي على كتفها وهي كملت كلامها وهي تمسح على ضهري
عشتار _ ننسى هالموضوع وبعد ما يتكرر ابد واني أتصرف وياه تمام حبيبتي
شمس _ آسفة ضميت عليج
عشتار _ لا تتأسفين اخذيها عبرة ما تضمين عليه شي بعد اني اختج يا روحي وحيلي اسمعيني هالشي غلط واني هم غلطت مو بس انتِ بهالفترة حبيبتي اهم شي دراستج ومستقبلج لا تفكرين بهالاشياء كل شيء اله specific time
( وقت محدد )
شمس _ والله اني ما احبه اموت من شوفته ومن طاريه بس هو لزك والله العظيم احظره من رقم يجيني من عشرة بزعني من حياتي وغلطي ضميت عليك آسفة والله مو قصدي اخونج او اخون ثقتج
عشتار وهي تمسح على شعرها _ مو مشكلة بعد صارت بس اني اللي أريده منج انو يكون تفكيرج بدراستج هالفترة وهسه إذا دك عليج أنطيني التليفون بين ما اجيبلج تليفون جديد تمام يا روحي ؟
هزيت راسي بـ اي ورجعت حضنتها بكل قوتي مبتسمة واحجي بفرحة
شمس _ انتِ احلى واوسم وأجمل واحن واقوى بنية بالعالم
حسيت بيها تبتسم باستني براسي ساكته
شمس _ احبج
عشتار _ روحي فداج امي انتِ
كامت هي وكومتني مسحت عيوني باست راسي وكالت
عشتار _ روحي غسلي هالوجه الحلو وامشي
هزيت راسي وكمت غسلت وجهي ورجعتلها لزمتني من ايدي وأيدها دافية وناعمة كلش نزلتني بالصالة واني سألتها
شمس _ شنو حجيتي ويا الاكبر
عشتار _ بعدني محاجيه وياه من يخلص الفلم اكابله واكعد
ضحكنه ورحنه كعدنه بالصالة اجوي البنات
آسيا بضوجة _ عشتار
عشتار _ ها امي
آسيا _ اليوم ما سلمت عدل كله شمس بالأحضان
عشتار بضحك _ تعالي تروحلج فدوة عشتار وعشيرتها خايس خايس
ضحكنه بقوة وآسيا كامت باوعتلي برفعة حاجب بمعنى كومي هزيت أكتافي وكلت
شمس _ ما
آسيا _ راح اعيط
كمت بسرعة لان اعرف بس تعيط تفطر الأذن صح صوتها ناعم بس يبووو من تعصب اقره على أذني السلام راحت كعدت بصفها حاضنتها بقوة تبوس بوجها وركبتها وعشتار تضحك مكيفة عليها
لو شكد ما نوصف حب آسيا العشتار ما نوفي تحبها اكثر من كل شي حرفيا حبها ما ينوصف رميم حبها سكوتي مو دائماً تعبر بس آسيا عكسنا راحت العنود بوست عشتار وكعدت يمها تسولف ثواني ودخل حبيبي الأكبر ابتسمت عشتار بس شافته ابتسامة واسعة وهو مبتسم خجلان كعد بعيد عنه كامت العنود ورميم وآسيا واني رحت وياهم دخلنه للمطبخ نسولف ونسوي اندومي ...