طـغيان إِحمِرار السآعد

بارت 16

  طِـــغيان إحمـــرار ألســـآعد
  شخسر بعد حتى نفسي ضيعتها وياك
مادوم بعشرتك جنك حرام ...

~ عشتار ~
باوعلي بنظرة باردة وكال كلام مو كلام صواعق تصعق بروحي
عبدالله _ بابا عشتار بعد الامتحانات راح تم خطوبتج من ابن عمج امجد
فتحت عيني على وسعها مصدومة باوعت بعيونه وكأن عيونه تنطق حسيتها تكولي مو وهم اللي سمعتي حقيقة وغصباً عليج تتقبليها مشيت بهدوء كعدت عالتخم مقابيله اباوعله حجيت بهدوء
عشتار _ منو كلك اني موافقة ؟
باوعلي برود ورد عليه خلاني أشيل روحي واركعها
عبدالله _ اني ما اخذ رأيج اني ابلغج فقط
عشتار _ واني مو لعبة بيدك انتَ وأخوانك زواج ماكو بابا
دخلوا محمد وجواد سلموا على ابوية وهو قابلهم برود كالعادة كعدوا وسال جواد
جواد _ شنو الموضوع ؟
عبدالله _ بابا ابن عمكم امجد خطب اختك واني وافقت
باوعت على اخواني ماعدهم ردة فعل عادي عدهم درت نظري الأبوية وحجيت بصوت مرتفع
عشتار _ بابا اني مو لعبببببة
عبدالله _ عشتااار صوتجج هذا الحل الوحيد حتى عمامج يرضون عنج
عشتار _ عساهم لا رضوا شعليه اني بابا زواج ماكو أنسى السالفة
ويا كلامي دخلوا عمامي وولد عمامي كلهم لابسين رسمي العطور توصل لغير محافظة أحذيتهم تلمع وساعاتهم كعدوا كلهم يباوعون عليه حجه عمي الكبير بحدة يهدد
جاسر _ سمعي هاي الطريقة الوحيدة كدامج حتى نعفي عليج انتِ لعنة على عائلة سلمان عبد الرحمن وكاعد تتحدين أبناء محمد سلمان سويتي مصايب حركتي الشركات والقصور وخفيتي الأكبر ووكفتي بوجهي خرب ... إذا ما طميت عارج
غمضت عيوني من كفر فتحتها وحجيت بنفاذ صبر
عشتار _ والله ثم والله مستعدة اسوي الأفضع والاسوء انتَ كلتها اني لعنة واللعنة ماتروح من صاحبها اله من يموت واني وياكم والزمن طويل هالعائلة المعفنه عائلة الشياطين راح تنمحي على شنو تحاسبني لان حميت اخوية من ظلمكم وطغيانكم ربيتهم بتعب عمري ربيتهم ضهري كسرته علمودهم بالاخير تضيعونهم مني علمود مصالحكم الخايسه وياريت على شي بي خير ضاعوا على شي وسخ ومصالح حرام وشرب ونسوان وملاهي والله حاسبتلكم كل شي سويتوا بيه راح أدفعكم ثمنه اخليكم تتمنون الموت وما تلكوا مثل ما حركتوا كلبي على اخواني اله اطلع برواحكم
طول ما كاعد احجي هم يترقبون شكاعد احجي كمت من مكاني ودفرت الطاولة وكعت وتكسر كل شي بيها ضربت ايدي باب الصالة بكل قوتي لدرجة الباب انفطر ودخل خشب بيدي بس ما اهتميت كملت كلامي بحقد
عشتار _ موتوني بدال المرة الف مرة اعترف طلعتوا روحي على اخواني واني أشوف ضياعهم بسببكم خليتوا مسؤولية على ضهري إذا صار شي الاخواني تحطونه براسي وتكولون بسببج انتِ مهملة وانتوا اصلا مو مهتمين بيهم بس علمود تحركون كلبي وتخلوني ألوم بروحي والله كل عمايلكم منسوخة نسخ براسي واللي خلق هالكون إلا اسوي المحد مسوي إلا اخلي كاع العاصمة تشهد على بهذلتكم يا قليلين الأصل
ما احس غير كاموا عمامي كلهم عليه يضربون بيه صرت ماعرف الضربات منين تجي وين تروح ماكدر حتى ارفع ايدي بقيت اباوع على اخواني وابوية اللي بس يشاهدون يا يمه شكد كلبي تعب حمدت ربي البنات نايمات جان هسه اخترعن ما احس غير احد يجرني حطني وره ضهره يعيط عرفته من صوته بكثر ما أكرهه واكره صوته اكدر اعرفه
امجد _ لا بابا لا عوفها اني أقنعها لا تسويها
باوعله عمي اجه باتجاهي دفعه ولزمني يجرني بكل قوته يضربني على راسي اعثر واوكع يشدني من شعري يكومني وأمجد يركض يلزم ايدي وولد عمي يجتفوا يبعدوا عني جرني وكعت حيلي راح ركض امجد عليه بكل قوته لزم ايدي وعمي يجرني وهو يجرني وولد عمي يجرون بيده يردونه يهدني ضربه ضربه عمي على ايده لحد ما فلت ايدي جرني يمشي سريع فتح غرفة ابوية وامي دفعني وكعني بالكاع سد الباب وقفله باوعلي واجه يركض عليه حيله حيل شاب يضرب بيه بكل قوته واني فقدت أعصابي صرت اضرب بي وادفر برجلي كورت ايدي وضربته بنص وجهه عيونه نطت من العصبية لزم راسي ركعه بالأدراج وكعت مزهرية بصفي بس ما تكسرت لزمتها دايخه من الضربه وضربتها براسه والكزاز وكع عليه حطيت راسي بالكاع الدوخة لازمتني فتحت عيوني اباوع على عمي طلع سلاحه وسحب أقسام ابتسمت اباوعله وحجيت بهمس صوتي يرجف من الضرب
عشتار _ إذا رجال سويها
بثواني الباب انكسر ودخل امجد يباوع بصدمة على ابو اجه عليه يركض كعد كبالي يباوع الأبو بنظرات توسل واني جنت كاعدة ساندة جسمي على ايدي حسيت ايدي ترجف بس قاومت بكل قوتي حجه امجد بتوسل
امجد _ اسوي اللي تريده بس عوفها بهالدنيا وياي
باوعله ابو بأستهزاء  وفر المسدس رجعه بالسترة رفع اصبعه بوجهه وهو هز راسه طلع عمي وهو التفت يباوعلي بخوف اني حسيت مقاومتي راحت وكعت على جهتي اليمنى راسي على ايدي وايدي الثانية حاطتها بالكاع تعبانه تعب بس الله يعرف بي ماهمني الضرب ولا همني موضوع الخطبة ولا همني امجد ولا يهمني امتحاناتي اللي بقالها يومين بس بالي اخواني شلون باعوني للمرة الألف
باوعلي امجد بخوف دموعه تنزل كعد كبالي مد رجل والرجل الثانية خلاها جوه الرجل المادها ملامحه مخيم عليها الخوف والحزن دموعه مغركة وجهه نزل نفسه حط ايده على ضهري ولفها على خصري  وأيده الثانية رفع بيها ايدي النايمه عليها رفعني عن الارض شويه وهد ايدي ولف ايده على اكتافي رفعني لحضنه يبجي مهضوم واني ايدي ما اكدر ارفعها وادفعه رفعني اكثر انشمرت ايدي على كتفه راسي صار على كتفه يضغط عليه بكل قوته يبجي مفرفح واني مثل المغيبه ما اكدر احرك اصبع مثل المشلولة فرفحت روحي اريد ادفعه ما اكدر حجيت اهمس بالكوة عليه صوتي يرجف
عشتار _ امجد
شهك بكل روحه حط راسه بركبتي يشمني بشوغة روحه مفرفحة يشم بيه بكل قوته فرفحت روحي حجيت بحدة اهمس بوجع بلعومي يحركني
عشتار _ امجددد
امجد _ ياريت محد غيرج ينطقه
عشتار _ عوفني لا تلوثني
عافني سندت روحي على ايدي احاول استرجع قواي اجه الصوت اللي فقدته السنوات صوت اللي بداخلي حجه وبنبرته أمان
_ الصبر مفتاح الفرج
سكنت روحي وحسيت ربع حيلي رجعلي رجعت ضهري على الكنتور باوعت على امجد اللي يباوعلي ودموعه تنهمر حجيت بصعوبة
عشتار _ عوفني
شهك بكل حيله يبجي
امجد _ ما اكدر عشتار ما اكدر
عشتار _ ما احبك أكرهك اكثر بشر اذاني انتَ
امجد _ احبج ما اكدر اعيش بدونج افهمي
عشتار _ واني كلبي مو الك ولا الي كلبي يهوى غيرك افتهم
باوعلي بصدمة عيونه دم حط راسه بين رجليه يبجي ويحجي
امجد _ كوليلي شنو اللي شفتي بي مو موجود بيه ليش ذليتيني وحبيتي لييييش اني شسويتلج
ضحكت بوجع وحجيت بحقد
عشتار _ شفته انسان حقيقي يخاف ربه يحبني من صدك ما يرفع عينه على بنية وحفظ ملامح محبوبة كلبه اللي هي اني حفظ ملا محي وصفاتي واطباعي وكلامي محتفظ بكل شي يخصني حنيته غركتني يشبهني بكل شي حنيته على أحبابه وقوته على اعدائه والله ما باوعلي نظرة مو مريحة ما يرفع عينه على بنية غيري مأذاني بحرف عكسك بكل شي
سكتت موجوعه كملت كلامي
عشتار _ انتَ ما خفت ربك بيه ولا بنفسك انتَ ما تحبني انتَ تحب جسمي تحب شكلي تحب مظهري عكسه هو حب روحي حتى عيوبي يعشقهن انتَ مو بس تباوع انتَ زنيت يعني انتَ زاني ويا بنات زانيات شوف الفرق انتَ مسوي اكثر الأشياء اللي اكره واكره كلمن يسويها وسويتها كدامي واني طفلة شفت بنية كاعدة بحضنك بوضع ما يناسب لا الدين ولا يناسبني حاولت تعتدي عليه واني طفلة ما راعيت عمري عكسه اللي يراعي كلامه خاف يجرحني بحرف انتَ اذيتني اذية ما تنوصف عبالك اني غبيه بسببك اخواني ضاعوا انتَ جريت محمد والاكبر وجواد اخذتهم لطريق الشرب والمخدرات وياريتك مأخذ روحي ولا شوفتني اخواني اللي ربيتهم بتعب عمر وعذاب سنين يضيعون كبال عيوني وماكدرت أمنعك حرمتني من اخواني خليتني أشوف اخواني بأسوء الحالات محمد خليتني أشوفه بين النسوان سكران وجواد خليتني اشوفه شلون يعامل بنات الملاهي ويشرب الحرام والاكبر فرفحتني عليه وكل هذا شوفتني شلون طفت ضحكة اخواني البريئة شوفتني شلون اخواني باعوني شوفتني شكد تعبت بحياتي علمودهم كتلي بطريقة غير مباشرة اللي ضيعتي عمرج علمودهم ما يستاهلون خليتني اشوف اخواني اللي مستعدة اتبرعلهم بعمري يشربون الحرام حتى ينسون عذابهم خليتني أشوفهم شلون يعاملون بنات الملاهي احسن مني خليتني سنين واني عايشه بقلق ماعرف شلون أحافظ على خواتي  ههههههه تدري البارحة فرطت بكلبي علمودهم بعت كلبي علمودهم بس يلا الف الحمدلله

اني احجي وهو روحه تفرفح يشهك بكل روحه خلصت كلامي واني اضحك على جروحي وعلى نفسي وعلى حياتي وحالتي وهو اجه يمي لزم ايدي دموعه تنزل يحجي عالسريع يميل راسه مثل المجانين
امجد _ اسف والله اني اني احبج ماسويتلج شي اني بس احبج نزوج ونروح نعوفهم والله حتى ما اشتغل وياهم وكل شي سويته بعد ما أعيده ابد والله بس لا تعوفيني وانسي هذا انسي حبيني الي تردين اعوف البنات اعوفهم اعوف الشرب اعوفه اعوف المخدرات اعوفها اعوف اهلي اعوفهم بس لا تتركيني الله يخليج
فلتت ايدي منه وكفت وحجيت بهدوء
عشتار _ ارفع راسك
رفع راسه عيونه حمره دممم وارمه من البجي ضحكت وحجيت
عشتار _ عبالك استغربت غلطان لقد ورثتوا هذه القذارة والنجاسة من فرعون
ضحكت بكل قوتي ورجعت حجيت بحقد واني اشر على كلبي
عشتار _ الأشياء المكتومة بداخلي أصبحت أترجمها على هيئة دروس تبدأ بالصفع وتنتهي بالدعس
عفته بصدمته وطلعت من الغرفة رافعة راسي دخلت للصالة ماكو احد هزيت ايدي بيأس وصعدت اركض دخلت للحمام مال غرفة آسيا سبحت الوقت مادري شكد لعبانه نفسي فركت كتفي بكل قوتي احس نفسي نجسه لأنه لمسني طلعت مشطت شلون ما كان وجبت كتبي قريت مكاعد اكدر اركز بشي رحت الغرفتي اباوع للبنات كاعد يقرن وكل وحدة كاعدة بمكان معين علمود يقرون براحتهم رفعوا راسهم يباوعون عليه كامت شمس قلقانه اجتي يمي حضنتني بكل قوتها تشم بيه وتحجي
شمس _ عشتار يمه شصاير بيج احسج مو على بعضج شنو صاير
ابتسمت احاول اضيع الموضوع حضنتها ابوسها بعيونها وخدودها احجي
عشتار _ اروح فدوة للحنينة ماماتي اروح فدوة لكل كلمة تكوليها مابيه شي اني بس مشتاقتلكم وضايجه لان مكاعد اركز بالدراسة
باوعتلي آسيا بأستغراب وسألت
آسيا _ يا دراسة ؟
عشتار _ الامتحانات مالتي مال اخير السنة بعد يومين
آسيا _ يا امتحانات شبيج عشتار مريضة الله يخليج لا تخوفيني
باوعتلها ما فأهمه حجت كلام صدمني صدمة مو طبيعية وخلاني اكمز
آسيا _ احنه اعفاء عام شنو نسيتي
باوعتلها وصفنت اتذكر اني درجاتي كاملة وهي هم كاملة يعني احنه ما نمتحن ضحكت بكل قوتي على نفسي من التعب والمصايب نسيت اضحك بكل قوتي وكعت بالكاع من الضحك والبنات يضحكن على ضحكتي واني اباوع ما مصدكة كامت اسيا طبت على صفحة المدرسة شفتهم ناشرين الأعفاء واني وياها موجود اسمنه لان مو وزاري بس رميم وشمس يمتحنون لان وزاري كمت احضنهم بكل قوتي اضحك احجي واني غاصة من الضحك
عشتار _ من المصايب مكاعد افهم شديصير بحياتي نسيت وصارلي ايام اقره واني ما امتحن ههههه زين انتِ شكاعد تقرين
طلعت الكتاب جان كتاب مال متنبي واني عبالي عربي ضحكت اكثر بالاخير كعدت ويا رميم وشمس درستهم كلش زين واجاني اتصال رديت
عشتار _ " منو "
الشخص _ " سلام عليكم "
جان صوت بنية خشن بي بحة قوية استغربت كلش ورديت
عشتار _ " عليكم السلام منو ؟ "
ردت عليه وصدمتني صدمة عمري من عرفتني بنفسها ...؟؟

                                      يتبع
                             طهر لسانك بذكر الله
                                   سبحان الله
                                    الحمدلله
                                لا إله إلا الله
                                  الله اكبر