طـغيان إِحمِرار السآعد

بارت 10

طِـــغيان إحمـــرار ألســـآعد
فاليرحـل مـن يشـاء فقـد رحـل مـن اوعدنـي
بالبقــــــاء
~ عشتار ~
انفتح الباب وانفتحت عيني وياه من الصدمة واني اشوف اخوية محمد وجهه مليان دم ركبته مجروحة خدوده وارمة عيونه حمررر اباوعله ممصدكة لازم خاصرته بوجع وكع الكلاص من ايدي باوعلي عيونه ذبلانة بالكوة يشوف رحتله اركض للحظة حسيت راح افقد اخوية حضنته بكل قوتي بس علمود اسنده حضني بقلة قوة ما يكدر يسند روحه حط راسه على كتفي يحجي بصوت متقطع يهمس
محمد _ اخخخخ س.. ساا.. سااعدينييي
عشتار _ امشي وياي
سندته ضهري نكسر ثكيل وذاب كل ثكله عليه حجيت بداخلي
_ ياربي ارحم كلبي وحالتي وحيرتي ارحم كلبي المتعوب تعب بس جلالتك تعرفه يااااارب أنطيني الصبر والقوة ارحم عبدتك المتعوبة وساعدني يا صاحب العرش العظيم يا خالق النفوس
مشيت واحس كتفي راح ينخلع سكتت عن ألمي سكتت عن ضهري اللي أحسه راح ينكسر نصفين صعدته فوك بعد معاناة احجي وياه احاول اخلي يصحصح
عشتار _ محمد لا تنام لا تغمض ابقه وياي دخيلك ساعدني قاوم شويه فدوة اروحلك
ما اسمع منه بس يون ما يكدر يحجي بعد طلاع الروح وديته الغرفته نيمته على السرير وخليت جوه رجله مخدة جبت كلينكس مسحت وجهه من الدم راسه ينزف جبت شاش لفيت راسه بيها همزين مو كلش مجروح ماكو نزيف بس وجهه مشخط خشمه ينزف رفعت راسه وحطيت كلينكسه على خشمه دقايق وخرتها ونزلت راسه ما نزل دم مسحت ايده اللي مشخوطة من الطول للطول كل هذا هو يون من خاصرته يون وخرت ايده رفعت التيشيرت اشوف اثر ايد صاير على شكل دائرة حمرة جبت ماي بارد حطيت بي ثلج ماعرف شسوي اريده يسكت من كاعد يون يوجع كلبي باوعت جبت وصله بللتها بالمي البارد وحطيت بيها ثلج لفيتها صارت مثل الدائرة حطيتها على الاثر اللي كان يشبه الكدمة عيوني كامت تحركني بـ لحظة صار كل هذا
روحي فرفحت على اخوي اللي كام يون اباوعله عركان تنهدت بتعب وبقيت عشرين دقيقة يمكن حاطه الوصلة وهو سكت وخرتها ورحت كعدت يم راسه وحجيت احس الألم بيه
عشتار _ ها شلون صرت
هز راسه بمعنى احسن
عشتار _ خف الألم ؟
محمد _ اي شويه
سكتت امسح على راسه وامسح وجهه من العرك احبكم أنتوا مو بس اخواني ولدي جنت صغيرة جانوا زينين وياي ويحبوني بس ماعندهم مسؤولية معتمدين عليه بكل شي بس محمد جان يحاول يساعدني بس عمامي جانوا يوكفون بوجهه  باوعت بوجهه احجي بداخلي
اخخخ منك يا كلبي صح ما اسكتلكم وأضربكم بس أتندم وروحي تفرفح على كل ضربة اضربها بودي اكسر ايدي اخاف وجعتكم مو بس اخواني ولدي اكبر مني بالعمر بس أحسكم جزء من روحي بكل مرة أضربكم بيها بودي اروح احضنكم بيها واتأسف اخاف وجعتكم بكل مرة اكول كلمة بودي اكص الساني اخاف يجرح مشاعركم امي أنتوا
تنهدت بتعب وهو باوعلي وكال
محمد _ ليش مهتمه
سكتت مجاوبته ماعندي رد شنو اكول احبكم أحسكم روحي إذا تتأذون روحي تتأذه ما كدرت ارد
محمد _ جاوبيني
عشتار _ لأنك اخوية
سكت يباوع الأيدي اللي تمسح على ايده وجر ايده ودار وجهه عني سكتت مقهورة كال برود
محمد _ ممضطرة تسوين كل هذا
سكتت رجع كمل كلامة وهو يباوع على السكف
محمد _ ابد ممضطرة مو لان اخوج تجبرين نفسج واني مشوفج الويل
ابتسمت بحسرة اتذكرت كل شي وذكرته وياي
عشتار _ خلوك تكرهني وانتَ اكثر واحد تعرف اني ضحيتلك بكل شي صحتي وعافيتي وجهي جسمي تحملت الضرب اللي ميتحمله بني ادم بس في سبيل متتأذه فضلتك على امي وأبوية جنت أشوفك اب وأخ وصديق حتى من بديت تضربني ما جنت فأهمه هههههههه جنت بريئة
ضحكت بكل قوتي بس ضحكة مليانه قهر وهو يباوعلي بصمت
عشتار _ ههههه اخخخ يمه حتى برائتي ضحيتلك بيها ما بقيت النفسي اي شي جنت أحاسب روحي جنت اكول اكيد مني السبب اني يمكن ضوجته بحجايه وضربني او يمكن نرفزته بتصرف وضربني مع انو اعرف كلش زين السبب شنو بس اغلس ما اريد اتفشل كدام نفسي اخوية اللي ضحيتله بعمري بسبب مشروب محرم وحبوب وبودرة تنحط على الايد اللي ياما وياما لزمتها وبستها ياما وياما ضمدت جروحها ياما وياما حميتها يعني بودرة تنحط على الايد تشمشم بيها وتجي تضربني لان انتَ شاربها بقناعتك برضاتك
شهكت روحي مفرفحه من هالذكريات الوسخة
عشتار _ ما كفاك كل هذا ما كفاك الضرب والتعنيف خليت بيه مرض نفسي مستحيل يروح او يتلاشى خليتني بحسرة اكل المطعم صرت اكل كدام خواتي حتى بس ما احسسهم أختهم بيها شي اكل كدامهن واضحك واني من الداخل راح اموت راح اتخبل كاعد أصارع بداخلي صارت تلعب نفسي من كل الأكل إذا ما أشوف بنفسي ما اكدر أكله وكاعد اكل غصبا عني بس علمود خواتي
حطيت ايدي اللي ترجف على راسي وهو ساكت يباوعلي مصدوم متعجب
عشتار _ ههههههه هينه هي تتوقع هينه عليه من ابقه بالحمام اسبح ساعتين وهذا خطر ممكن يصير بجلدي أمراض من المي والغسولات هينه عليه من أشوف البنات شلون يأكلون من المطاعم ومن الأسواق براحتهم بدون صراع داخلي لو هينه عليه من اكل شي اني لعبانه نفسي منه والف وسواس براسي ويموتني هذا الإحساس واسكت واسكت واسكت
ضحكت ورجعت كملت
عشتار _ تعرف من كد ما حالتي تأزمت صرت أكطع بيدي إذا أوسوس من نظافة شغلة أو إذا جنت طالعة اكعد احك بيدي لحد ما تصير كتلة من الاحمرار
باوعلي بصدمة وكال
محمد _ ليش
ضحكت أهز براسي
عشتار _ حتى يروح اللي هنا
ضربت على راسي بكل قوتي ورجعت حجيت
عشتار _ اكوم متخبلة اريد اسبح اريد اوخر الوسخ بس يكون مكان مو مناسب او اكون طالعة لا إرادي حتى يروح هذا الإحساس او بالأحرى عقلي يكون مغيب مقتنع احك ايدي بهالطريقة العنيفه حتى أوخر الوسخ عن ايدي أصحى على نفسي ايدي متكطعة ليش ها يا اخوية الكبير ليش
كعد ورجع ضهره على تاج الجرباية حط ايده على عيونه يفركهن بعنف وخرهن وباوعلي ابتسمت وحجيت بوجع
عشتار _ من جنت تضربني وتشوفني صغيرة كلبك ما يوجعك
هز راسه وهو صافن على الحايط
محمد _ جنت شارب مو واعي أصحى من غيبوبتي اشوفج مدمايه بسببي جنت انقهر بس المخدرات مأثره على عقلي وضميري وعلى كل شي اني ما اكرهج ولا احبج
هزيت راسي بهدوء وحجيت كلمات بارده بس كلبي موجر نار
عشتار _ منو سوه بيك هيج
محمد _ ماعرف
عشتار _ ما شفت شكله
محمد _ جان مو واضح بس عريض جسمه معضل
عشتار _ مكال شي
محمد _ قبل ما يروح همس بأذني *اني الأشعل اللي راح يشعلكم شعل * ضربني بخاصرتي بوكسي وراح ركب السيارة ومشه
عشتار _ تمام انتَ هسه نام
باوعلي برود ونام بصمت تام رحت امشي اريد اطلع اريد ابجي اريد اعيط اريد انهار سمعته صاحلي
محمد _ ابقي
انداريت مصدومة
عشتار _ ليش
محمد _ مادري بس ابقي
هزيت راسي ورحت كعدت على التخم مقابيل السرير اباوعله هز راسه بـ لا
محمد _ تعاي شبيج
تنهدت ورحت يمه كعدت على حافة السرير لزم ايدي ونام عدل رأسه على المخده خله ايدي على راسه
محمد _ من انام روحي
سكتت امسح على راسه داخلي فراغ وألم وجع روحي قوي متناقضين بكل شي مرة يشوفوني ام ومرة يشوفوني عدو هدموا اخواني وهدموني شكد ما احاول أبين ما اهتم او ما اظهرلهم مشاعري ما أكدر إذا أشوفهم متوجعين أنسى كل شي سووا بيه واروح اركضلهم باوعت الوجهه ورجعت ذكرياتي لهذاك اليوم اللي اقل ما يقال عنه يوم بشع