طـغيان إِحمِرار السآعد

بارت 15

                               طِـــغيان إحمـــرار ألســـآعد
النفس ضايك والروح تعبانة الله يشهد عليه
روحي ذبلانة

~ آسيا ~
كاعدة بالصالة صافنة افكر باللي جاي يصير كلبي يوجعني على اختي اللي هي بمثابة امي واعز ناسي مرات اصفن ما استوعب شلون تتحمل كل هذا شلون ساكته شلون صابره شلون هي هيج بس ما الكه جواب برغم اخواني شكد أذوها بس هي اكبر سند الهم بدونها يضيعون فوك ضياعهم استغرب حبها العجيب الهم استغرب نظراتهم الها تحمل هواي شغلات استغرب ماتقبل وحدة من عدنه نحجي عليهم استغرب شلون تريدنه نحبهم مثلها واكثر استغرب من هواي شغلات تحملتها عشتار
فزيت على صوت باوعت شفت محمد ينزل بطيء درت وجهي عنه مالي خلك أشوفهم كعد كبالي وسألني
محمد _ وين اختج
باوعتله واشرت عالباب بمعنى طلعت سكت يباوعلي واني اتذكر وعدي العشتار مستحيل اخاف مستحيل الخوف ما اله نصيب بحياتي ابتسمت برود اباوعله لأول مرة بادرت وسألته
آسيا _ شعجب لافي بالبيت
رجعت نظرته نظرة القساوة والحقد اللي تشع من عيونه وحجه بحدة
محمد _ لا تدخلين احسن لج وعدلي اسلوبج
آسيا _ كون تسمعك هيج تحجي وياي إلا تشوي على أذنك بصل
باوعلي فاتح عينه على وسعها كام يريد يضربني عطت بصوت فززه
آسيا _ والله اخليها اطمك طم ورب البيت مد ايدك وشوف إذا ماتطلعك جلاليق
باوعلي بغضب ورفع إصبعه بوجهي يهددني الخايس
محمد _ والله العظيم هاي المرة راح أعديها بمزاجي مرة ثانية اكص لسانج كلبه
آسيا _ ماكو كلب غيرك وطول ما انتَ ترفع صوتك اني ارفعه واعيط واهلهل هم عندك مانع ؟؟
سكت يباوعلي بغضب شرايين ركبته طالعة وأيده دماراتها راح تنفجر كد ما ضاغط عليها عيوني متعلكه بإيده إذا يضربني أودع كد ما ايده ثكيلة
كعدت اباوعله وجهه معفوس تعبان حسيت شي بداخلي مقهور على وجعه طردت هالافكار من راسي اذكر نفسي هذا الانسان شنو سوه بأعز إنسانة على كلبي راح كعد مقابيلي ساكت استغربت معقولة يخافون من عشتار ليش ما ضربني معقولة يخاف منها قطع حبل افكاري صوته يحجي برود
محمد _ اختج ضعيفه
آسيا _ منو اختي ؟
محمد _ عشتار
هزيت راسي بأستنكار ما مصدكة اضحك
آسيا _ عشتار ؟ عشتار ضعيفه ؟
هز رأسه بمعنى اي يباوعلي برود
آسيا _ غلطان عشتار مو ضعيفه عشتار تحبكم وكلبها كلب أُم لان هي اللي ربتنه من أنتوا مأذيها ومن يميل بيكم الزمن هي تعدله الكم هي سند الكم وانتوا اذية الها إذا تعتقد اللي تسوي عشتار وياكم هذا ضعف انتَ غلطان هذا حب هذا حنان ام هذا خوف عليكم هاي مسؤولية تكدر تكولي وين جانت أمكم وين أبوكم اللي بعتوا عشتار علموده وهي مستعدة تشتريكم بنظر عينها وين ابوك من توكع بشدة انسجنت وابوك ماكو وأمك ماكو عمامك ماكو
طول ما اني كاعد احجي هو ملامحه جامده حسيت احجي ويا كل شي بهالدنيا إلا الانسان حسيت نفسي احجي ويا حيوان ويا حايط ويا جليد بس مو إنسان ابتسم بأستهزاء وكال بهدووووء
محمد _ هي تحبج هواي لدرجة جانت ما تنام تسهر على ملامحج جنتي تبجين هواي ما تسكتين إلا وياها غبية هي غبييية اول وتالي راح تغدروها
ابتسمت بأستهزاء وحجيت بنفس نبرته
آسيا _ مثل ما إنتوا غدرتوها مثلا ؟
باوعلي ساكت مايعرف شنو يحجي لأول مرة أشوفه هيج هادي اول مرة ما يتهجم اول مرة يستمع الاحد استغليت الفرصة وسألته
آسيا _ تحبوها ؟
محمد _ ما امتلك مشاعر الأي شخص
آسيا _ لعد ليش من تتمرض تجي عليها ؟
سكت صافن بوجهي كام من مكانه كعد بصفي يباوعلي بأبتسامة غريبة حسيت شي بكلبي يوجعني معقول خايفه ؟ بس ما احس بشعور خوف اباوعله مثل الواحد الماواعي على روحه
محمد _ تدرين اني كذاب ؟
ساكته اباوعله مادري شنو اجاوبه هزيت راسي بمعنى ليش
محمد _ عشتار معزتها بروحي اضحك على نفسي إذا أكول ما احبها هاي امي وأختي وبنتي اني ما خلفت بوعدي الها عمري ما كرهتها معزتها بروحي كل يوم تكبر
سكت شويه مختنك كمل كلامه بقهر
محمد _ ما اريد احبكم ماريد احب اي شخص يحاربوني بي خلوني آلة بيدهم تمنيت اكرهكم مثل ما اكرهم بس ما اكدررر ما اكدررر ماكدرتتت اكرها ماكدرت اكرها
اباوعله مصدومة صدك يحجي لو تأثير الشرب لو شنو راح كعد بزاوية لام نفسه حط راسه على رجله يحجي يرجف
محمد _ شلون اكرها هاي بنتي واختي وامي انسى اسمي وما انسى شنو سوت علمودنه شلون هي تنسى الصار بيها بسببي وشلون جازيتها شلون راح تنسى واني شلون أنسى بأي طريقة انسيها وانسي روحي
الصدمة محتلتني اول مرة محمد هيج يحجي اخواني مثل ابوية وعمامي كل همهم الشركات والنسوان والفلوس والتجارة وهاي السوالف لدرجة كلنه جنه مقتنعين هم ماعندهم مشاعر بس عشتار جانت تكول غلطانات ما تعرفوهم بكدي جنت ما اصدك بس هسه صدكت بنفس الوكت هو مو واعي يمكن يهلوس
تنهدت وحجيت بهدوء
آسيا _ انتَ ما تحبها كاعد تهلوس ماتحب احد لأنك تشبهم
رفع راسه يباوعلي وكام من مكانه يريد يصعد فجأة غمض عيونه ووكع بالكاع فتحت عيوني على وسعها مادري شسوي