الليل شبعني سفر واني بمكاني.
أجساد تعبانة ، وجوه ذبلانة ، عيون حزينة ماليها الدموع ، عقول شاردة ، أفكار مسمومة ، خوف يحبس الأنفاس ، أنتظار قاتل ..
هذا حالي وحال الكل وأحنا منتظرين شخص عزيز على گلوبنا يحارب الموت ويعيش ، وأحنا منتظرين معجزة إلاهية تنقذنا وتنقذ الراقد على فراش الموت ! ..
أسبوعين بـ أيامها ولياليها وساعاتها ودقايقها أخذت من حيلنا حيل ومو راضية تخلص والحال يميل لليأس يميل للخطر يميل للفاجعة ويه كل خروج للدكتور من غرفته وملامح الخيبة تنقري بوجهه وماكو كلمة ينطقها تبرد الگلب ، أصنّفها وبشدة بـ
أسوء أيام حياتنا ..
رفعت عيوني لـ أكثر بشر منهّار وفقد السيطرة على نفسه وقوته وعقله رفعت عيوني لـ خالتي حبيبتي واگفة مكسورة وظهرها منحني ودموعها مغرگة وجها وهيَ تباوع لأبنها الچبير وأول فرحتها وعزيزها يصارع النفس بين هاي الأجهزة المشؤومة وأصواتها الكئيبة المزعجة لتعصر الروح وتقشعر البدن ..
من الجهة الثانية واگف عمو راسم على بعد أمتار مكتف أيده لصدره وساند ظهره على الحايط عيونه تايهه وباله شارد والحزن مخيم على وجهه وكلما تضيق بي يتنهد بحسرة ويهمس " لاحول ولا قوة الا بالله العلي العظيم " ..
مُناف گاعد بالگاع ولام رجله لصدره يضرب راسه بالحايط بحركة لا أرادية وعيونه منفخة حمر والدموع ما توگف ولا يمسحهن وكلما يفقد الأمل يبچي بصوت عالي وكل شهگة منه تشك الصدر وتطلع من قوتها وهضمتها ..
محمد يمكن الله رزقه بالهدوء والصبر ويمكن إيمان نابع من القلب تجاه عظمة رب العالمين وقدرته على التغيير من حال الى حال برمشة عين " يقول لها كُن فيكون " كتاب القرآن الصغير بأيده ميفارقه وطول گعدته هنا ما يترك القرآن والدعاء كلما أفقد الأمل اباوع لوجهه آخذ القوة من إيمانه وثقته بالله ..
احتاجيت ألزم أيده الخوف دمرني ، رحت اوگف بصفه مغمض عيونه وشفايفه تتحرك بهمس لزمت أيده فز يفتح عيونه باوعلي وعصر أيدي بين أيده ورجع يغمض عيونه ويردد بصوت خافت خاشع ..
محمد: يا أبا عبد الله لقد عظمت الرزيةُ وجلت ، وعظمت المصيبة بكَ علينا وعلى جميع أهل الأسلام وجلت وعظمت مصيبتك في السماوات على جميع أهل السماوات
كمل وهوَ يردد زيارة عاشوراء على گلبه وختمها بـ
محمد: اللهم صلِ على محمد وآل محمد أنتَ الشافي والمعافي يا الله
مسح على وجهه وذب نفس بحسرة والتفت براسه يباوعلي
محمد: يله ارجعج للبيت وراج دوام
إيلاف: محمد ما أريد أداوم والله نفسيتي تعبانة ومالي خلك للدوام
محمد: لا تعبيني إيلاف صارلج يومين ممداومة والأمتحانات تفوتچ
أنت تقرأ
تَباريح العشق
Romanceغانيَة مِن نَسلِ الأفلاكِ تَقلَّبت بوَسط الدُناة قارَعت مُدلهمات الحَياة لتُنقذ زهرَة الهُندباء جاءها المُنقِذ مِن بُحور الأنوَار فتوَلدت سَنار الحَياة لتَنطفئ بمرورِ السِنين وتَحيا مِن شُعاع الفَتان يَدور مَضمون الروايَة عَن فَتاة تُحارب الصِعاب لت...
