تَباريح العشق

Part 30

دِنيا وماكوَ بَيها أنتِ
بَيها أگضي العُمر صَعبة
أنا بدوَنچ بَلا روح غَريب
وعَايش بغربَة .

صوت الصرخات يعتلي بالمكان ، الحياطين تسمع وتغلس لأنهم جماد بس اني هم جماد ؟

صوت صريخها يدوي بالمكان تصرخ مفرفحة من الوجع وأحسها تلوذ بروحها منا ومنا بس ماكو نتيجة ماكو خلاص ..

نزلت اتمشى على أطراف اصابعي وكاتمة النفس ، وصلت للطابق الأرضي وگفت گدام الغرفة والصوت يزرف أذني تصرخ موجوعة وصوته المقزز يعتلي صوتها بالفشار والكفران والغلط

منو راح يخلصها من أيده ؟ هم راح تموت مثل لقبلها ؟ هم راح أتفرج وأسكت !

نص ساعة ضبط من التعذيب النفسي والجسدي وأختفى صوت البنية أم عيون الخضر

ركضت بكل سرعتي أختل جوة الدرج وكممت حلگي وگطعتتت النفس گطعته وأضمضم بروحي بالحايط وگلبي ظل يرررگع يرررگع من الخوف دخيلك ربي لا تخلي يشوفني أنتهي أنتهي

طلعت تك عين اباوع بيها وأشوف القذر المجرم يلبس بحزامه چان يضربها بي الملطوم الظالم المقزز ، عدل هندامه والقاط الخايس مثل وجهه وراح يتمشى وأستقبله الخايس الثاني بسيطة اني اعلمك أصبرلي

كامل: قطرة مَي ما تنطيها تخليها مثل الچلب

- خاف تموت

كامل: موتتهم

- زوجها بده يحس بغيابها وصار أكثر من مرة يتردد للصالون ويگلوله عدها دورة بغير محافظة مثل ما گلت بس اليوم متعارك ويه أم الصالون ويگللها تچذبين عليه وبدت تخاف منه

كامل: وصللها كلامي بس تفك حلگها بحچاية تقره الفاتحة على جهالها اذا ما خبلته و لوعته ما اطلع كامل هههههههه يگلك خسر الشغل الجديد وهاي البداية بس

- عنده غير مشكلة شاغلة باله وسافر لتركيا ومن رجع صار يدور عليها

كامل: شغلتيش

- نسيبهم دك الناقصة بأخته ورجعها عليهم بليلة عرسها

كامل: منو نسيبهم

- ليث ابو المعارض قبل اشتغلنا وياه يهرب ل*** وشغله من جوة لجوة

كامل: تذكرته تذكرته ، شجابه عليهم لو صاحبنا هم من جوة لجوة

- لا ما عنده هيج بس يمكن سالفة ثار قديم وسجنوا ليث هوَ وعمه جابوا من تركيا

كامل: هذا عمه مو هَين عنده منصب بالدولة بس ما جاي أحصله شگد دورت وراه ماكو ولا عثرة توصلني اله

- خاف أستخبارات

كامل: لا شغله مو مال أستخبارات

- تأكدت منه ؟