لا تواسينِي بكلام أحضني حيل ..
سَــنار
باوعت داير ما دوري وحدي گاعدة ألقي نظرات على الأستقبال وأصبعي بحلگي اطكطك أظفري بسني وأفكر بحياتي الجديدة شلون راح اتأقلم هنا شلون راح أصير منهم وبيهم ويتقبلوني وخصوصاً أم مُـنقـذ ما طايقتني وحاسة بنفورها مني وعدم تقبلها بس باقية مثل بلاعة الموس لا تگدر تطردني من حياتهم لأن صرت أم أحفادها وما تريد تفرط بيهم وتريدهم يتربون بيناتهم ولا تگدر تتقبلني ..
ما أنكر وگفتها وياي ومساعدتها الي ولأطفالي معتنية بيهم وبدونها ما چنت راح أعرف أتصرف لأن وحدي وجديدة على الأمومة بس كل هذا تسوي من باب واجبها تجاه أحفادها مو حباً بيه ..
اما مُـنقـذ باقي بيناتنا من جهة أمه لهسه زعلانة منه وما تحاچي ولا تباوعله ومن جهة اني صح ما أشكيله ولا ألوم عليه ولا أشاركه بعدم راحتي هنا ببيتهم بس ما حاجة احچي يعرفني وكاشفني من وجهي وتصرفاتي وهدوئي الزايد وياه من أضوج من شي وما أسولفله بي أصير هادئة وقليلة الكلام وياه وهوَ رأساً توصله الأشارة ..
صح مستقرة هسه بالأستقبال بس مُـنقـذ أخذ غرفة أخوه الصغير مُناف وطرده من غرفته لأن چبيرة ونحتاجها ومُناف أخذ غرفة مُـنقـذ القديمة وأحسن خطوة سواها لأن مستحيل اگعد بغرفة زوجته القديمة عوزها والله
وأشترى غرفة وأثاث جديد ونقلنا أغراضنا وأستقرينا رسمياً وأحلى شي أثنينا ما مرحب بينا بس جهالنا شافعيلنا هههههه المضحك المبكي حرفياً
صعدت للغرفة غيرت ملابس أميرتي حبيبة أمها والي راح تعوضني عن فقدان أمي سبحان من زرع حبها بگلبي أحسها صارت ويه روحي وأريدها تكبر بسرعة حتى أشاركها كلشي وتصير صديقتي وتحن عليه من گلبها مو مصلحة لا لا هاي بنتي من دمي اريد واحد من دمي يحن عليه من بعد أمي والله عوضني بأثنين مو واحد الحمدلله والشكر ربي
نزلت بعد ما غيرت ملابسها ورتبت نفسي ولگيت وجه جديد بالأستقبال بس!
لا مو وجه جديد هاي البنية شايفتها كذا مرة بالصالون وهم چانت موجودة بالصالون بيوم عرس إيلاف
وطلعت نفسها هاي البنية هيَ لولي خطيبة راسم الي چان عندي فضول أشوفها وأشوف أختيار راسم من بعد العزوبية الطويلة وما غلط بالأختيار صراحة أهني على أختياره كلش تخبل وروحها حلوة
بس كلما اشوف وحدة بيهن وأكون شايفتها سابقاً شگد أخجل وأستحي وبودي ألزم مًـنقـذ اگطعه تگطع لأن بسببه كلشي بسببه دا أعيش أحراجات مو طبيعية والله ..
الهدوء ما يدوم .. إيلاف وين ؟
محد يعرف صارت الساعة بـ ١٢ بليل ومحد منهم رجع للبيت وتايهين بالشوارع والمستشفيات والمراكز يدوروها بس گلبي لعب وشميت ريحة كامل الخايسة بالسالفة
أنت تقرأ
تَباريح العشق
Romanceغانيَة مِن نَسلِ الأفلاكِ تَقلَّبت بوَسط الدُناة قارَعت مُدلهمات الحَياة لتُنقذ زهرَة الهُندباء جاءها المُنقِذ مِن بُحور الأنوَار فتوَلدت سَنار الحَياة لتَنطفئ بمرورِ السِنين وتَحيا مِن شُعاع الفَتان يَدور مَضمون الروايَة عَن فَتاة تُحارب الصِعاب لت...
